އަރުޝީއަށް ގިސްލާފައި ރޮއެގަނެވުނެވެ. ވޭނުން ފުރިގެންވާ އަޑަކުން މަންމާއޭ ގޮވާލުމާއި އެކުގައެވެ. އޭނާގެ މަންމައަށް އެތައް ޝަކުވާތަކެއް ހުށައަޅަމުންނެވެ. ”މަންމާ، ކީއްވެތަ އަހަރެން ކައިރީގަ މިހުރިހާ ވާހަކަތަކެއް ކުރިން ނުބުނީ؟ އަދިވެސް އަހަރެން މަންމަކައިރިން އޮޅުންފިލުވަން ބޭނުން އެތައް ވާހަކަތަކެއް އެބަހުއްޓޭ. އަޅެ މަންމަ އަހަރެންނާއި ބައްދަލުނުވެ ދިޔައީ ކީއްވެތަ؟ އަހަރެން މަންމަޔާ ވާހަކަދައްކަން ބޭނުން. މަންމަގެ އުނގުގަ ބޯއަޅާލައިގެން އޮވެ ރޯލަން ބޭނުން. މަންމަ ހާދަ ކެތްތެރިއޭ. އަހަރެންނަށްވެސް ތިފަދަ ކެތްތެރިކަމެއް ދެއްވާތޯ  އަބަދުވެސް ދުޢާ ކުރާނަން. ތީ އަހަރެންގެ އުފަން މަންމައަކަށް ނުވި ކަމުގެ ހިތާމަ މުޅި އުމުރަށްވެސް އަހަރެންގެ ހިތުގަ އޮންނާނެ. މާޒީވެ ގޮސްފައިވާ ވަޤުތަކީ އަނބުރާ އަންނާނެ އެއްޗެއް ނޫންކަންވެސް އަހަރެން ޤަބޫލުކުރަން. އެޙަޤީޤަތާއެކު އަހަރެން މުޅި އުމުރު ހޭދަކުރަން މިހުރީ ތައްޔާރަށް. އެކަމަކު އަހަރެންގެ އުފަން މަންމަ އަހަރެންގެ ކުރިމަތީގައި ހުރިއިރުވެސް އަހަރެންނަށް އޭނަ މަންމަގެ ގޮތުގައި ބަލައެއް ނުގަނެވުނު. ކޮންމެފަދަ ސަބަބަކާހުރެ އޭނަ އަހަރެން ދޫކޮށްލި ކަމުގަވިޔަސް އެއީ އަހަރެންގެ އުފަން މަންމަ ނޫން ކަމަކަށް ނުވާނެ. އެކަން އަހަރެންވެސް ޤަބޫލުކުރަން. މަންމާ، އަހަރެން މިހުރީ ވަރަށް އެކަނިވެރިވެފަ. އަހަރެންނަށް ރަނގަޅު މަގެއް ދައްކައިދޭނެ މީހަކުވެސް އަހަރެންގެ ކައިރިޔަކު ނެތް. މައެއްގެ އަޅާލުމާ އޯގާތެރިކަމަށްވެސް އަހަރެން މިހުރީ އިންތިހާއަށް ބޭނުންވެފަ. އެކަމަކުވެސް އަހަރެންގެ އުފަން މަންމައަށް މަންމާއޭ ކިޔާފަ ގޮވާލަން ޖެހިލުން މިވަނީ ކީއްވެގެން ކަމެއް ނޭންގެ. ތި މަންމަގެ ވާހަކަތަކުން ބައެއްފަހަރަށް އެއީ ވަރަށް ރަނގަޅު މީހެއްކަމަށް ޤަބޫލުކުރަން އަހަރެންގެ ހިތް ބުނަމުން ގެންދޭ. އެކަމަކު އަނެއްބައި ފަހަރަށް އެއީ ހިތްގަދަ އަދި ހިލަ ހިތެއްގެ ވެރިއެކޭ ބުނަން އުޅޭހެންވެސް ހީވާކަހަލަ. މަންމާ، އަހަރެން މިހުރީ ހަދާނެގޮތް ހުސްވެފަ.“ އަރުޝީ ޝަކުވާ ކުރަމުން އެގެންދަނީ އަރުޝީގެ އަމިއްލަ ނަފުސާއިކަމެއް ނުވަތަ ނަފިސާއާއި ކަމެއް ޚުދު އަރުޝީއަކަށްވެސް ނޭންގުނެވެ. އޭނާއަށް ބާރަށް ރޮއެގަނެވުނެވެ. ލޮލުން ފައިބަމުން ދިޔަ ކަރުނަތަކުން އަރުޝީގެ މޭމަތި ވަނީ ތެމި ފޯވެފައެވެ. އެންމެފަހުން ރޮމުން ރޮމުން ގޮސް ވަރުބަލިވެގެން އަރުޝީއަށް ލޯމެރުނީއެވެ.

”އަރުޝީ، އާދޭ. މަންމަ ކައިރިއަށް އާދޭ. އަރުޝީގެ މަންމަ އެބަހުރިން. މި މަންމަ އަރުޝީ އެކަނިވިޔަކަ ނުދޭނަން. އަރުޝީއަށްޓަކާ މި މަންމަ ކޮންމެފަދަ ކަމެއްވެސް ކޮށްފާނަން. މަންމަ ބޭނުންވަނީ އަރުޝީ ކައިރީގަ ހުންނަން. އެހެންމީހެއްގެ އެއްވެސް ނުފޫޒެއްނެތި. ތީ ހަމައެކަނި މި މަންމަގެ ދަރިއެއް. އެހެން މީހަކަށް މަންމަގެ ތި ދރިފުޅަކަށް ބާރެއް ނުފޯރުވޭނެ. ބާރު ފޯރުވިޔަކަ ނުވެސްދޭނަން. އަރުޝީ، އާދޭ. މި މަންމަ ކައިރިއަށް އާދޭ.“ އަރުޝީއަށް ފުންމައިގެން ތެދުވެވުނެވެ. މުޅި މީހާ އޮތީ ދާހިއްލާ ފޯވެފައެވެ. ދެލޯ ބޮޑުވެފައިވާ ޙާލު ހައިރާންކަމާއިއެކު މުޅި ކޮޓަރިތެރެއަށް ވަށައިގެން ބަލައިލެވުނެވެ. ކޮޓަރި ތެރޭގައި ހުރި ހުރިހާ ބޮކިތަކެއްވެސް ހުރީ ދިއްލާފައެވެ. ވީއިރު އަރުޝީގެ ވަށައިގެން ވެރިވީ ކޮން އަނދިރިކަމެއް ބާއެވެ. އެއީ ކޮންތަނެއް ބާއެވެ. އަދި އޭނާއަށް އެގޮވީ ކާކުބާއެވެ. ހަމަގައިމުވެސް އެއީ ނަފީސާއެއް ނޫނެވެ. އެހެނީ އެމީހެއްގެ ވާހަކަ ދެއްކުމުގެ ވައްޓަފާޅިއާއި ބަހުރުވަ ހުރީ ނަފީސާއާއި އެއްގޮތަކަށް ނޫނެވެ. އެ އަޑު އެންމެ ވައްތަރީ ސަމްސުއްނިސާގެ އަޑާއެވެ. އަރުޝީ، އޭނާގެ ކޮޓަރިތެރެއަށް ވަށައިގެން ބަލައިލިއެވެ. ސަމްސުއްނިސާ ކޮޓަރިތެރޭގައި ހުރިތޯ ޔަޤީން ކޮށްލުމުގެ ގޮތުންނެވެ. ހަމަ އެވަޤުތު އޭނާގެ ނިތްކުރިމައްޗަށް ޖަމާވެފައިވާ އޮށްދާތައް، އަމިއްލަ އަތުން ފޮހެލިއެވެ. އަދި މޫނުމަތީގައި ބާރަށް އަތްކާއްތާލުމަށް ފަހު އަނެއްކާވެސް ކޮޓަރިތެރެއަށް ބަލައިލިއެވެ. ހަމަ ޔަޤީނުންވެސް އެތާކު ސަމްސުއްނިސާއެއް ނެތެވެ. ގުން ކިޔާފައި ހިންދިރުވާލުމާއިއެކު، ފުން ނޭވާއެއް ލިއެވެ. އަދި އެނދުކައިރީގައި ބަހައްޓާފައިހުރި ކުޑަމޭޒުމަތީގައި ހުރި ފެންފުޅި އަތަށް ނެގިއެވެ.  އޭރުވެސް އަރުޝީ ގެންދިޔައީ ކޮޓަރިތެރެއަށް ވަށައިގެން ބަލަމުންނެވެ. ދެލޯ ވަނީ ކާއްޓެއްހެން ބޮޑުވެފައެވެ. ހިތުގައި ވަނީ ބުނެދޭން ނޭންގޭފަދަ ބިރުވެރިކަމެއް އުފެދިފައެވެ. ފެންފުޅީގެ މަތިނަގާ، އެއިން ފެންކޯވަރެއް ބޯލިއެވެ. ”އަހަރެން ހިތަށް މިވެރިވަނީ ކޮންކަހަލަ ބިރުވެރިކަމެއްބާ؟ އެއީ ކޮންމެހެން އަހަރެން ބިރުގަންނަށް ޖެހޭވަރުގެ މީހެއްވެސް ނޫނެއްނު. އެކަމަކުވެސް އަހަރެން ހާދަ ބިރެއް އެބަ ގަނެޔޭ.“ އަރުޝީ އަނެއްކާވެސް އޭނާގެ އަމިއްލަ ނަފްސާއި ވާހަކަ ދައްކަން ފެށިއެވެ. އަދި ފުންނޭވާއެއް ލުމާއިއެކު މަޑުމަޑުން ދެލޯ މަރާލިއެވެ. ”އަރުޝީ، ހަމަޖެހޭ. އެއީ އެވަރު ކަމެއްނޫން. އޭނަ އަރުޝީއަކަށް އެއްވެސް ގެއްލުމެއް ނުދޭނެ. އޭނަ އެއްވެސް މީހަކަށް ގެއްލުމެއ ނުދޭނެ. އެއީ އެހާ ގޯސްމީހެއް ނޫން.“ ދެއަތް ދެފަރާތަށް ތިރިކޮށްލުމާއިއެކު، ހަމަ ޖެހުމަށް ބުނަމުން، އަރުޝީ އޭނާގެ އަމިއްލަ ނަފްސަށް ހިތްވަރުދެމުން ގެންދިޔައެވެ. އަދި މޭމަތީގައި މަޑުމަޑުން އަތްއަޅާލިއެވެ.

އަނެއްކާވެސް އޭނާގެ މަންމަގެ ޑައިރީ ނަގާ ހުޅުވާލިއެވެ. އަރުޝީ އެންމެފަހުން ކިޔަމުން ގެންދިޔައީ، އެޑައިރީގެ އެންމެ ފަހު ޞަފްޙާ ކަމުގައި ވީނަމަވެސް އިތުރު ވާހަކައެއް އޭނާގެ މަންމަ ބުނަން ބޭނުންވެފައި އޮވެދާނެ ކަމުގެ ޔަޤީންކަން ހިތުގައި އޮތަތީވެސް މެއެވެ. ކަންވީވެސް އެހެންނެވެ. އާނއެކެވެ. ޑައިރީގެ އެންމެ ފަހު ޞަފްޙާގައި އިތުރު އެއްޗެއް އޮތްހެން ހީވިއެވެ. އަރުޝީ އަވަސްވެގަތީ، އޭގެ އެންމެ ފަހު ޞަފްހާ ހުޅުވާލުމަށެވެ. އެތަނުން އަރުޝީއަށް އަނެއްކާވެސް ފެނުނީ، ފަތްޖަހާލާފައި އޮތް ގަނޑެކެވެ. ޑައިރީ އެްފަރާތުގައި ބާއްވާލުމާއިއެކު، އެ ގަނޑު ނަގާ ނިޔުޅާލިއެވެ. އެއީވެސް ސިޓީއެކެވެ.

”މަންމަގެ ދެލޯފަދަ ލޯބިވާ ދަރިފުޅާއެވެ.

އަދިވެސް އެއްފަހަރު ތަކުރާރުކޮށް މަންމަ މިއެދެނީ، މި މަންމައަށް މަޢާފުކޮށްދިނުމަށެވެ. ދަރިފުޅަށް ކޮންމެހެން އެނގެންޖެހޭ މަޢުލޫމާތުތަކެއް މިއޮއްހުރިހާ ދުވަހު ސިއްރުކޮށްގެން ހުރުން އެއީވެސް މަންމަ ކޮށްފައިވާ ކުށެއްކަން މަންމަ ޤަބޫލުކުރަމެވެ. ވީއިރު މަންމަ ދަރިފުޅުގެ ކިބައިން މަޢާފަށް އެދެންޖެހޭ އެތައް ކަމެއް އެބައޮތެވެ. ދަރިފުޅުގެ ޢުމުރުގެ މިހާ ހިސާބަށް އައި އިރުވެސް ދަރިފުޅުގެ އުފަން މަންމަގެ މަޢުލޫމާތު ނުދީ އޮތުމެވެ. ދަރިފުޅުގެ ބައްޕަގެ ޙަޤީޤަތް ފޮރުވާފައި ބޭއްވުމެވެ. މަންމައަށް ބައްޕަގެ ފަރާތުން ލިބެމުންދިޔަ އަނިޔާތަކުގެ ޙަޤީޤަތް ވަންހަނާ ކުރުމެވެ. ބައްޕަ ދަރިފުޅުދެކެ އިންތިހާއަށް ލޯބިވިއިރުވެސް އެކަން ދަރިފުޅުގެ ކުރިމަތީގައި ހާމަނުކުރި ސަބަބެވެ. މިހެންގޮސް އެތައް ކަމެކެވެ. އެހުރިހާ ކަމަކަށްޓަކާ، ދަރިފުޅުގެ މި މަންމައަށް މަޢާފުކޮށްދޭށެވެ.

ދަރިފުޅާއެވެ. ތިޔައީ މި މަންމަގެ ޙަޔާތުގެ އެންމެ ކުލަރީތި ޞަފްޙާއެވެ. މަންމަގެ ދަތި އުނދަގޫ ޙަޔާތަށް އައި ދިރުމެވެ. މަންމަ އެކަމަށްޓަކާ ސަމްސުއްނިސާއަށް އަބަދުވެސް ޝުކުރުވެރިވާނަމަވެ. ދަރިފުޅު ދޫކޮށްލާފައި އޭނާދިޔަ ޙަޤީޤީ ސަބަބު އެނގޭނީ ހަމަ އޭނާއަށެވެ. އެހެނަސް އަރުޝީގެ ޙަޔާތަށް އެކަމުން އުނިކަމެއް ނުލިބި ވޭތޯ އަރުޝީގެ މި މަންމަ މަސައްކަތް ކުރީމެވެ. އަދި މަންމަގެ މަސައްކަތުގެ ނަތީޖާ ފޮނިކަމަށްވެސް މަންމައަށް ޤަބޫލުކުރެވެއެވެ. އެހެނަސް އެކަން އެގޮތަށް ބަލައިގަތުން އޮތީ އަރުޝީގެ އަތްމަތީގައެވެ. އުންމީދުކުރަނީ މަންމަ ދަރިފުޅަށް ދިން ތަރުބިއްޔަތަކީ، ދަރިފުޅަށް އެއިން ދުނިޔެއާއި އާޚިރަތުގެ މަންފާއެއް ކުރާނެ ތަރުބިއްޔަތެއް ކަމަށް ދަރިފުޅު ޤަބޫލުކުރާނެ ކަމަށެވެ. ސަމްސުއްނިސާގެ ނުނިޔަތް ޢަމަލުން ނިކުތް ހިތި ނަތީޖާއަށް ޢަމަލީ ސިފައެއް ގެނައުމުގައި މަންމަގެ ޙިއްޞާއަކީ ކުޑައެއްޗެއް ނޫންކަންވެސް މަންމަ ޤަބޫލުކުރަމެވެ. އަދި އެއީ މަންމައަށް ކުރެވުނު ފާފައެއްކަންވެސް މަންމަ ޤަބޫލުކުރަމެވެ. އެކަމަށްޓަކާ މަންމަ ވާނީ އެތައްފަހަރަކު ﷲ ގެ ހަޟުރަތުން ތަޢުބާވުމަށް އެދި ދެއަތް އުފުލާފައެވެ. މަންމަގެ ފާފަ ފުއްސަވާ ދެއްވާތޯ ދަރިފުޅުވެސް ދުޢާ ކޮށްދިނުމަކީ، ދަރިފުޅުގެ ފަރާތުން މި މަންމަ އެދޭ އެންމެ ފަހު އެދުމެވެ.

ދަރިފުޅާއެވެ. ސަމްސުއްނިސާއަކީ ދަރިފުޅުގެ އުފަން މަންމައެވެ. މަންމަ ކުރިންވެސް ބުނިފަދައިން އޭނާ ކުރިކަމެއްގެ ޙަޤީޤީ މަޤްޞަދު އެނގޭނީ ހަމަ އޭނާއަށެވެ. އެހެންނަމަވެސް ދަރިފުޅުގެ ހިތުގައި އޭނާއަށްޓަކާ ނަފުރަތު ނުބޭއްވުން އެއީ މި މަންމަގެ އިލްތިމާސެކެވެ. އަދި އޭނާ ދަރިފުޅުގެ މަންމަގެ ގޮތުގައި ބަލައިގަންނާނެ ކަމަށްވެސް މަންމަ އުންމީދުކުރަމެވެ. ދަރިފުޅުގެ ޙަޔާތުގެ ކޮންމެ ކަމެއްގައި، ކޮންމެ އެއްޗެއްގައި އޭނާގެ ފުރިހަމަ ޙައްޤު އޮންނާނެކަން ޤަބޫލުކުރަން ވާނެއެވެ. އަދި އެ ހައްޤު އޭނާއަށް ދޭންވެސް ވާނެއެވެ. މަންމަ މިދުނިޔެ ދޫކުރުމަށްފަހު މަންމަގެ ހުރިހާ އެއްޗެއް ޤާނޫނީ ގޮތުން ދަރިފުޅަށް މިލްކުވާނެގޮތަށް މަންމަ ވާނީ ހަދާފައެވެ. އިންޝާﷲ ދަރިފުޅަކަށް އެއްވެސް ކަމަކަށް ދައްޗެއް ނުވާނެއެވެ. މަންމަގެ އެންމެބޮޑު ހިތާމައަކީ، ދަރިފުޅު ލޮލަށް ނުފެނި މި މަންމައަށް ދުނިޔެއަށް އަލްވަދާޢު ކިޔަންޖެހިދާނެތީއެވެ. މިހާރުވެސް މި އިންނަނީ އެތެރެހަށީގައި އެތައް ވޭންތަކެއް އަޅައަޅައެވެ. އެހެނަސް މަންމަގެ ވޭނުގެ ތަކުލީފު އެހެން މީހަކަށް ނުޖައްސާ މިދުނިޔެއިން ވަކިވެގެން ދިޔުން އެއީ މަންމަ އެދޭގޮތެވެ.

ލޯބިވާ އަރުޝީއެވެ. ޙަޔާތުގެ ދަތުރަކީ، އޭގައި އެތައް މޫސުމަކާއި ކުރިމަތިލާން ޖެހޭނެ ދަތުރެކެވެ. އުންމީދު ކެނޑިގެންދާނެ އެތައް ދަނޑިވަޅެއް އަންނާނެއެވެ. ވަރުބަލި ވެއްޖެކަމުގެ އިހުސާސް ކުރެވޭނެ އެތައް މަރުހަލާއަކާއި ކުރިމަތިލާން ޖެހޭނެއެވެ. ޙަޔާތުގެ ނައު ދެންމެދެންމެ އަޑިޔަށް ދަނީއޭ ހިތަށް އަރާނެ އެތައް ވަޤުތެއް އަންނާނެއެވެ. އެހެންނަމަވެސް އެއިން ކޮންމެ ފަހަރަކީ، ދަރިފުޅަށް ދިރިއުޅުމުގެ އެތައް ފިލާވަޅުތަކެއް ލިބިގެންދާނެ ފަހަރެކެވެ. އަދި އެއިން ދިރިއުޅުމަށް މަންފާކުރާނެ އެތައް ތަޖުރިބާތަކެއް ލިބިދޭނެއެވެ. އުންމީދު ކަނޑާނުލާ ކުރިޔަށް ދިޔުން އޮންނާނީ ދަރިފުޅުގެ އަތްމަތީގައެވެ. އެއިން ކޮންމެ ފަހަރަކުވެސް ﷲގެ ހަޟްރަތުން ވާގިއަށް އެދޭށެވެ. އަދި ދަރިފުޅުގެ ޙަޔާތުގެ ދަތުރުގައި އެކުގައި ދަތުރުކުރުމަށް އިތުބާރު ކުރެވޭނެ ބައިވެރިޔަކު އިޚްތިޔާރު ކުރާށެވެ. އެއީ ކޮންމެހެން އަތްމަތި ތަނަވަސް މުދާވެރިޔަކަށް ވާކަށް ލީޒިމެއް ނޫނެވެ. ޢިލްމާއި ޙިލްމު ހުރުމުން ފުދޭނެއެވެ. ޙަސަބާއި ނަސަބަށްވުރެ ބޮޑަށް، ސީރަތާއި އީމާންތެރިކަމަށް އިސްކަން ދޭށެވެ.

ދަރިފުޅާއެވެ. މަންމަ ނެތް ދުނިޔެއެއްގައި، ދަރިފުޅުގެ ހަޤީޤީ ބެލެހެއްޓުންތެރިޔަކީ ޚުދު ދަރިފުޅެވެ. ﷲ ފިޔަވާ ބަރޯސާވާނެ އިތުރު އެއްވެސް ފަރާތެއް  ނޯންނާނެކަން އަބަދުވެސް ޤަބޫލުކުރަން ވާނެއެވެ.  މައިމިހާއަކީ ޒިންމާއެއް ކަމުގައި، ޙަޔާތުގެ ބައިވެރިޔަކީ ތިމާގެ އެހީތެރިއެއް ކަމުގައި ދެކޭށެވެ. ދަރިފުޅުގެ މި މަންމަ އެދެނީ ތިޔަ ދިރުފުޅަށް ދެދުނިޔޭގެ ބާއްޖަވެރިކަމާއި ލާބަ ލިބުމަށެވެ. މަންމަގެ އެންމެ ފަހުގެ އިލްތިމާސެއްގެ ގޮތުގައި އަދިވެސް މިއެދެނީ ދަރިފުޅު މަންމައަށް މަޢާފުކުރުމަށެވެ. އަބަދުވެސް މަންމަގެ އަރުޝީދެކެ ލޯބިވާ މަންމަ.. ނަފީސާ.

ސިޓީ ކިޔާ ނިމުނުއިރު އަރުޝީގެ ދެލޯ ވަނީ ރަތްވެފައެވެ. އެހެންނަމަވެސް ހިތްވަރު ކޮށްލާފައި ދެލޯ ރަނގަޅަށް ފޮހެލިއެވެ. އަދި ފުންނޭވާއެއް ލުމާއިއެކު، ހިތުގެ ޢަޒުމު ވަރުގަދަ ކޮށްލިއެވެ. އަހަރެން ދެން ނުރޯނަމޭ ބުނާ ކަހަލައެވެ. ދެން ކުރިއަށް ދާނީ އޭނާގެ މަންމަގެ ނަޞޭހަތާއި އެއްގޮތަށް ކަމަށް ބުނާކަހަލައެވެ. އެހެނީ އަރުޝީ ކިތަންމެ ބޭނުންވިޔަސް، އޭނާގެ ދިރިއުޅުމުގެ ޙަޤީޤަތަށް ބަދަލު ނާންނާނެކަން އޭނާ ޤަބޫލުކުރެއެވެ. އޭނާގެ މަންމަ، ނަފީސާ ދެން އަނބުރާ ނާންނާކަން އެއީ އިލާހީ ޤާނޫނޫކަންވެސް އަރުޝީއަށް އެނގެއެވެ. އެހެންކަމަށް ވީއިރު ދެން އޮތީ އެ ޙަޤީޤަތާއި ކުރިމަތިލުންކަންވެސް އޭނާއަށް އެނގެއެވެ. އެކަމަށް ތައްޔާރުވުމަށް ހިތްވަރެއް ބޭނުންވާނެކަންވެސް އަރުޝީ ޤަބޫލުކުރެއެވެ. އެހިނދު އަރުޝީގެ ޚިޔާލަށް އައީ ހަމަ އެންމެ ނަމެކެވެ. ސާމިރެވެ. ހަމައެވަޤުތުމެ، އެނދުމަތީގައި އޮތް މޯބައިލްފޯނު ނަގާ، ސާމިރުއަށް ގުޅާލިއެވެ. ސާމިރު ފޯނަށް ޖަވާބު ނުދިނުމުން އަރުޝީއަށް ލިބުނީ ހައިރާން ކަމެކެވެ. އެއީ މީގެކުރިން ވީކަމަކަށް ނުވާތީއެވެ. ހަމަހޭވެރިކަން ވެގެން އަރުޝީ، އޭނާގެ ކޮޓަރީގައި ބަހައްޓާފައިހުރި ގަޑިއަށް ބަލައިލިއެވެ. މެންދަމުން އަލިވެ ދޭއް ޖަހަނީއެވެ. ސާމިރު އޭނާގެ ފޯނަށް ޖަވާބު ނުދިން ސަބަބާއިމެދު އަރުޝީ ވިސްނާލިއެވެ.  އެހެންކަމުން ކޮންމެވެސް ވަރަކަށް ހަމަޖެހިލާފައި އަނެއްދުވަހު ގުޅަން ނިންމައިގެން އޮށޯވެލިއެވެ. އަދި ނިތްކުރި މަތީގައި ބޯއަޅާލައިގެން އޮއްވާ، އަރުޝީއަށް ނިދުނީއެވެ.

އަރުޝީއަށް ސިއްސައިގެން ހޭލެވުނީ، ފޯނުގެ ރަނގަބީލުގެ އަޑަށެވެ. ރަނގަޅަށް ދެލޯ ހުޅުވާލާފައި ގަޑިއަށް ބަލައިލިއެވެ. ފަތިހު ފަހެއް ޖަހަނީއެވެ. އެއަށްފަހު އަރުޝީ ދެން ބަލައިލީ މެދުކެނޑުމެއްނެތި އޭނާއަށް ގޮވަމުން ދިޔަ ފޯނަށެވެ. އަރުޝީ ފޯނު ނަގާ އެއަށް ޖަވާބު ދިނެވެ. އަނެއްކޮޅުން އިޖާބަދިނީ ސާމިރުއެވެ. ސާމިރުގެ އަޑުގައި ހުރީ ކަންބޮޑުވުމާއި ހާސްކަން އެކުލެވިފައެވެ. ވާނީވެސް އެހެންތާއެވެ. އަރުޝީ އޭނާއަށް ގުޅީ އެހާ ދަންގަޑިއެއްގައި ވިއްޔާއެވެ. ”އަރުޝީ ކިހިނެއްވީ އެހާ ދަންވަރު ގުޅާފައޮތީ؟“ އަރުޝީ ކައިރިއަށް ކޮންމެވެސް ވަރަކަށް ހިނިއަންނަގޮތް ވިއެވެ. އެހެންނަމަވެސް އެއީ އޭނާއަށް ކުރެވުނު ކޮސް ކަންތަކުގެ ސަބަބުން އަމިއްލަ ނަފުސަށް ހީލި ހީލުމެކެވެ. ”ވަރަށް ބޮޑަށް މަޢާފްކުރޭ އިނގޭ. އަސްލު އޭރު ގަޑި ބަލާނުލާ ގުޅާލެވުނީ. އެވަޤުތު ބައްދަލުކޮށްލަން ބޭނުންވެފަ ހުރީމަ. ވަރަށް މުހިންމު ވާހަކައެއް ދައްކަން ބޭނުންވެގެން. އެކަމަކު ފޯނު ނުނެގީމަ ގަޑިއަށް ރަނގަޅަށް ބަލައިލީ. އަހަރެންގެ ކޯލު ފެނުނީ ކަންބޮޑުވާނެޔޭ ހިތަށްވެސް އެރި. ވަރަށް ބޮޑަށް ސޮރީ އިނގޭ.“ އަރުޝީ ގުޅަން ބޭނުންވި ސަބަބު ބުނެދިނުމުން ސާމިރު ކޮންމެވެސް ވަރަކަށް ހަމަޖެހިލިއެވެ. ”ގަޑިން ވީއިރުވެސް ބަލާނުލާ އަހަރެންނަށް ގުޅަން ޖެހުނީ އަނެއްކާ ކިހިނެއްވީ؟“ ”އަހަރެން ވަރަށްބޮޑު ކަމަކާ ގޮތެއް ނިންމަން ބޭނުންވެގެން ސާމިރުގެ ހިޔާލަކަށް ބޭނުންވީ. އަދި މިގެއަށް ގެނެސް އެއްޗެއް ދައްކާލަންވެސް ބޭނުންވެފަ ހުރީމަ އަންނާށޭ ބުނަން ވެގެން.“ އަރުޝީ އޭނާ ސާމިރުއަށް ގުޅި ސަބަބު ވަރަށް ރަނގަޅަށް ކިޔއިދިނެވެ. ”އެންމެރަނގަޅު. އަހަރެން ފަތިސް ނަމާދުކޮށްލައިގެން ތިގެއަށް ދާނަން.“ އެގޮތަށް އެއްބަސްވުމާއިއެކު، އަރުޝީވެސް ދިޔައީ ނަމާދުކުރާށެވެ.

ހެނދުނު ހައެއް ޖެހިއިރު، ސާމިރު ހުރީ އަރުޝީގެ ގޭގައެވެ. ސާމިރު ގޭތެރެއަށް ވަތްއިރު ސަމްސުއްނިސާ ހުރީ ގޭތެރެ ކުނިކަހާށެވެ. ސާމިރު ފެނުމާއިއެކު ސަމްސުއްނިސާއަށް ލިބުނީ ހައިރާން ކަމެކެވެ. ”ސާމިރު ހާދަ ހެނދުނަކާ ކީއްކުރަނީ؟ އަނެއްކަ އަރުޝީއަށް ކަމެއްވީތަ؟ ދައްތަ ކައިރީގަ ނުވެސް ބުނޭ.“ ސަމްސުއްނިސާ ވާހަކަ ދެއްކިގޮތުން އޭނާ ކަންބޮޑުވެފައި ހުރި މިންވަރު ސާމިރުއަށް އަންދާޒާ ކޮށްލެވުނެވެ. ސަމްސުއްނިސާ ހަމަޖެހުމަށް ސާމިރުގެ ޢިޝާރާތުން އަންގާލިއެވެ. ހަމައެވަޤުތުމެ، އޭނާގެ ސުވާލުތަކަސް ސާމިރު ޖަވާބުވެސް ދިނެވެ. ”އަރުޝީއަކަށް އެއްވެސް ކަމެއްނުވޭ. އަހަރެން މިއައީ އަރުޝީ ބުނެގެން އޭނަގެ ކޮންމެވެސް ކަމެއްގަ އެހީތެރިވެދޭން. ދައްތަ ހާސްނުވޭ.“ ”އެހެންތަ؟ ދައްތަގެ އެހީތެރިކަން ބޭނުންވަންޏާވެސް އަންގާލައްޗޭ. މިތާ އެބައުޅެން އިނގޭ.“ ކޮންމެވެސް ވަރަކަށް ހަމަޖެހުމުގެ ނޭވާއެއްލަމުން ސަމްސުއްނިސާ ބުނެލިއެވެ. އާނއެކޭ ބުނުމުގެ ގޮތުން ބޯޖަހާލުމާއިއެކު، ސާމިރު ދިޔައީ އަރުޝީގެ ކޮޓަރިއާއި ދިމާއަށެވެ. ޓަކި ޖަހާލުމާއިއެކު، އަރުޝީގެ ކޮޓަރީގެ ދޮރުހުޅުވި މަންޒަރު ބަލަން ސަމްސުއްނިސާ ދުރުގައި ހުއްޓެވެ. ހަމަ އެވަޤުތުމެ ސަމްސުއްނިސާ ކައިރިއަށް ޖެހިލާފައި އެއްވެސް ކަމަކު  ބޭނުންވާނަމަ އޭނާގެ ކައިރީގައި ބުނެލުމަށް އަރުޝީގެ ކިބައިން އެދުނެވެ. އަރުޝީވެސް އާނއެކޭ ބުނުމުގެ ގޮތުން ބޯޖަހާލިއެވެ. އެހެނަސް މިފަހަރު އަރުޝީގެ ތުންފަތް މައްޗަށް ވަނީ ހިނިތުންވުމެއް ވެރިވެފައެވެ. އެ ހިނިތުންވުމުގައި ވަނީ، އޯގާތެރިކަމެވެ. އެމަންޒަރު ސަމްސުއްނިސާއަށް ފެނުމުން، އޭނާގެ ހިތް އުފަލުން ފޮޅިގެން ދިޔަކަހަލައެވެ. ކޮފީ ތައްޓެއް ހަދައިގެން އެބަ ގެންނަންކަމަށް ބުނަމުން ދުވެފައި ކަހަލަ ގޮތަކަށް ދިޔައީ ބަދިގެއާއި ދިމާއަށެވެ. ހަމައެހާމެ އަވަހަށް ކޮފީ ތައްޔާރުކޮށްގެން އަރުޝީގެ ކޮޓަރި ކައިރިއަށް އައިސް ޓަކި ޖަހާލިއެވެ. ހުއްދަ ލިބުމާއިއެކު، ކޮފީތަށި ހިފައިގެން ސަމަސުއްނިސާ ކޮޓަރިއަށް ވަނެވެ.

އަރުޝީ އިނީ އެނދުމަތީގައި އިށީންދެލައިގެންނެވެ. ސާމިރު އިށީންދެގެން އިނީ ތަންކޮޅެއް ދުރުގައި ބަހައްޓާފައިހުރި ގޮނޑިއެއްގައެވެ. އިތުރު އެއްޗަކަށް ބޭނުންވާނަމަ ބުނެލުމަށް ބުނެ، ކޮޓަރިން ނިކުމެގެން ސަމްސުއްނިސާ ދިޔައީއެވެ. އެހެންނަމަވެސް ސަމްސުއްނިސާގެ ކިބައިން ތަފާތުކަމެއް ފެންނަން ހުރިކަމަށް ސާމިރުއަށް ފާހަގަކުރެވުނެވެ. އެހެނީ ސަމްސުއްނިސާއަކީ މިހާރު ސާމިރުއަކަށްވެސް އައު މީހެއް ނޫނެވެ. ސަމްސުއްނިސާއަށް ކަމެއް ފޮރުވަން އުޅޭކަމުގެ ބިރު އޭނާގެ މުނުމަތިން ފެންނަން ހުރިކަހަލައެވެ. ނިކުމެގެން ދިޔަވަޤުތު ކޮންމެވެސް ވަރަކަށް ކޮޓަރި ހޯދާބަލަން އުޅޭކަހަލަ ގޮތަކަށް ސަމްސުއްނިސާގެ ޢަމަލުތައް ހުރިހެން ސާމިރުއަށް ހީވިއެވެ. ”ދައްތަ މިއަދު ހާދަ ފާޑަކަށް ކޮޓަރިތެރެ ބަލަމުންނޭ އެދިޔައީ. ހީވަނީ ކޮންމެސް އެއްޗެއް ހޯދަން އުޅޭހެން.“ ޝައްކުގެ ނަޒަރަކުން ދޮރާއިދިމާއަށް ބަލަހައްޓައިގެން އިނދެ، ސާމިރު ބުނެލިއެވެ. ”އާން، އަހަރެންނަށްވެސް ތިކަހަލަ އެއްޗެއް ހީވި.“ ސާމިރުގެ ބަހަށް އަރުޝީވެސް އެއްބަސް ވެލިއެވެ. ”އާން ދެން ބުނެބަލަ، ކޮންކަހަލަ ކަމެއް ދިމާވެގެންތަ އެހާ ދަންވަރު ގަޑީގަ ގުޅަން ޖެހުނީ؟“ ސަމާސާ ގޮތަކަށް ސާމިރު އަހާލިއެވެ. ”ސާބަސް ސާމިރު، މިހާރު ބުނެފީމެއްނޫންތަ އެއީ ގަޑި އޮޅިގެންނޭ.“ ހީނލާފައި އަރުޝީވެސް ޖަވާބުދިނެވެ. ”މަންމަގެ ޑައިރީއެއްގެ ވާހަކަ ސާމިރުއަށް ކިޔައިދިނީމެއްނު. އަދި އޭގަ މަންމަ ލިޔެފަ ހުރި ވާހަކަތައްވެސް ސާމިރުއާ ހިއްސާ ކުރީމެއްނު ދޯ.“ އަރުޝީގެ ވާހަކައަށް އެއްބަސް ވެލުމުގެ ގޮތުން ސާމިރު ބޯޖަހާލިއެވެ. އަރުޝީގެ ވާހަކައަށް އިތުރު ހުރަހެއް އަޅަން ބޭނުންނުވާ ކަހަލަ ގޮތަކަށެވެ. ”އަހަރެން މިހާރު އެޑައިރީ އެއްކޮން ކިޔާ ނިންމާލައިފިން. ޑައިރީ ކިޔާ ނިންމާލިއިރު އަހަރެންނަށް އޭގެތެރެއިން އިތުރު ސިޓީއެއްވެސް ފެނުނު. މިއަދު ސާމިރު މިގެނައީ އެސިޓީ ސާމިރުއަށްވެސް ދައްކާފަ އަހަރެންނަށް ގޮތެއް ނިންމުމަށް ސާމިރުގެ ޚިޔާލަކަށް އެދެން ބޭނުންވާތީ. ސާމިރު މިކަމުގަ އަހަރެންނަށް އެހީވާނަން ދޯ؟“ ވަރަށް އުންމީދާއިއެކު އަރުޝީ، ސާމިރުއާއި ސުވާލު ކޮށްލިއެވެ. އަދި ޑައިރީ ނަގާ ސާމިރުގެ އަތަށް ދިއްކޮށްލިއެވެ. ”ތިޔަށް ޖަވާބެއް ދޭން އަހަރެންނަށް އެނގޭނީ ތިބުނާ ސިޓީއެއްގަ އޮތް އެއްޗެއްވެސް އެނގިގެންތާ ދޯ.“ އެހެން ބުނުމާއިއެކު އަރުޝީ ދިއްކޮށްލި ޑައިރީގައި ސާމިރު ހިފިއެވެ. ކުޑަ ވަޤުތުކޮޅެއްގެ ތެރޭގައި، އެސިޓީ، ސާމިރު ކިޔާ ނިންމާލިއެވެ. އެސިޓީއިން ސާމިރުއަށް އެންމެ މުހިންމުވި ވާހަކައާއި ބެހޭގޮތުން ސާމިރު ސުވާލުކުރިއެވެ. އެއީ ޙަޔާތުގެ ބައިވެރިއެއްގެ ކިބައިގާ ހުންނަން ޖެހޭނެ ސިފަތަކުގެ ވާހަކައެވެ. އެޝަރުތުތަކަށް ސާމިރު ފެތޭތޯވެސް އަހާލިއެވެ. ވާނީވެސް އެހެންތާއެވެ. ސާމިރުއަށް އެންމެ މުހިންމު ވާނީވެސް އެވާހަކަތައް ތާއެވެ. ”އަހަރެންނަށް މާކުރިންވެސް އެނގޭ ސާމިރު އެންމެ ފުރަތަމަވެސް ފާހަގަ ކުރާނީ އެޕޮއިންޓުކަން.“ ލަދުވެތި ގޮތަކަށް އަރުޝީ ބުނެލިއެވެ. ”އާން ދެން އެހެންތާ ވާނީ ދޯ.“ އަރުޝީގެ ބަހަށް އެއްބަސް ވެލުމާއިއެކު ސާމިރު އަނެއްކާވެސް އަރުޝީއާއި ސުވާލުކޮށްލިއެވެ. ”ދެން އޭގެ އިތުރުން އަހަރެންގެ ފަރާތުން އަރުޝީ ބޭނުންވަނީ ކޮންކަހަލަ ހިޔާލެއް؟“ މިފަހަރު ސާމިރު އިނީ ވަރަށް ސީރިއަސް ވެފައެވެ. ”އަހަރެން މިހުންނަނީ މިކަމުގަ އަހަރެން ހަދާނެ ގޮތެއް  ނޭންގިފަ. މަންމަ އެބައޮތްތާ ދޯ އޭނައަށް ނަފުރަތު ނުކޮށް މަންމަގެ ގޮތުގަ ބަލައިގަންނަން ބުނެފަ. މިހާތަނަށް ކަންތައް ވެފަ އޮތްގޮތުން އަހަރެންނަށް އެކަން ކުރަން ވަރަށް އުނދަގޫ. އަހަރެން މިބުނީ އޭނައެއީ އަހަރެންގެ މަންމަ ނޫންކަމަށް ބުނާ ވާހަކައެއް ނޫން. އެކަމަކު މަންމަގެ ސިޓީގަ ބުނެފަ އޮތް ވާހަކައަކަށް އަހަރެންގެ ވިސްނުން ގޮސް ހުއްޓެނީ އޭނައާއިމެދު އަހަރެންގެ ހިތުގަ އެހެންކަހަލަ ޝައްކެއްވެސް އުފެދޭތީ.“ ވަރަށް ޖެހިލުންވެ އިނދެ އަރުޝީ ބުނެލިއެވެ. ”އަނެއްކާ ކޮންކަހަލަ ޝައްކެއް؟“ ބޯ އަރިކޮށްލާފައި، އަރުޝީއާއި ދިމާއަށް ބަލައިލަމުން ސާމިރު ސުވާލުކޮށްލިއެވެ. އެހެނަސް ސާމިރުގެ އެސުވާލަށް ޖަވާބުދޭން އަރުޝީ ޖެހިލުންވިއެވެ. މީހެއްގެ ބޮލުގައި ހަޤީޤަތެއްނެތް އިލްޒާމެއް އެޅުވޭކަހަލަ އިހުސާސެއް އަރުޝީއަށް ކުރެވުނެވެ. އެވަޤުތު ސާމިރު އޭނާގެ ސުވާލު އަނެއްކާވެސް ތަކުރާރު ކޮށްލިއެވެ. ”މަންމަގެ ޑައިރީ ފެށިއިރުވެސް އަދި ފަހުން އަހަރެންނަށް ލިޔެފަ އޮތް ސިޓީގަވެސް ބުނެފަ އެބައޮތް ފަހަކަށް އައިސް މަންމައަށް ބުނެދޭން ނޭންގޭ ކަހަލަ އުނދަގޫތަކެއް ވަމުން އައި ވާހަކަ. އެކަމާ އަހަރެންނަށް ޝައްކު ކުރެވެނީ….“ އަރުޝީ އެހާހިސާބަށް ބުނުމާއިއެކު ބުނަން އުޅުނު ވާހަކަ ހުއްޓާލިއެވެ. އެހެނަސް އަރުޝީ ބުނަން އުޅުނު އެއްޗެއް ސާމިރުއަށް ވިސްނުނެވެ. ”އެހެން ވެދާނެތަ؟ އެކަމަކު އެފަދަކަމެއް ކޮންމެ މީހަކު ކުރިޔަސް ކުރާނީ ވަރަށްބޮޑު މަޤުޞަދެއް އޮވެގެންތާ ދޯ. އެވަރުގެ ކަމެއް ކުރަން މީނަގެ އޮންނާނީ ކޮން

މަޤުޞަދެއް؟ މީނަ ބޭނުންނަމަ، އަރުޝީ އަނބުރާ މީނައަށް ލިބޭނެތާ ދޯ.“ ”ދެން ސާމިރު ދައްކާ ވާހަކަ. އަހަރެންނަކި މިހާރު ބޮޑުވެ ތަޞައްރަފު ފުދިފަ ހުރި އަންހެނެއް. އަހަރެންގެ އިހުތިޔާރަކާނުލާ އެކަހަލަ އެއްވެސް ކަމެއް ނުކުރެވޭނެތާ. ދެން ކޮންމެ ގޮތެއްވިޔަސް އަހަރެންނަށް ޙަޤީޤަތް އެނގުމަށްފަހު މީނަ މަންމަގެ ގޮތުގަ އަހަރެން ބަލައިނުގަންނާނެކަން މީނައަށް ހަމަ ރަނގަޅަށް އެނގޭނެ. އެހެންވިމަވެސް އެކަހަލަ ކަމެއް ކޮށްފާނެއެއްނު.“ އަރުޝީގެ ވާހަކަ އެހާ ހިސާބަށް ދިއުމުން އަމިއްލައަށް އޭނާގެ މޫނުމަތީގައި ބާރަށް އަތްއަޅާ ފިއްތާލެވުނެވެ. އެއްވެސް އިޚުތިޔާރަކާއި ނުލައެވެ. އަދި ދެފަރާތަށް ބޯހޫރާލިއެވެ. ”އަހަރެންވެސް މިއޮއް ދައްކާ ވާހަކައެއްދޯ. ކޮންމެ ގޮތެއްވިޔަސް އެއި އަހަރެންގެ މަންމަ. މަންމަޔާ ބެހޭގޮތުން އެކަހަލަ ވާހަކައެއް ދައްކާކަށް ނުވެސްވާނެ. އަހަރެން މިހާ ގޯސްވީ ކޮންއިރަކު؟“ ސަމްސުއްނިސާއާއިމެދު ޝައްކުގެ ނަޒަރަކުން ބަލަން އަރުޝީ ބޭނުންނުވި ކަހަލައެވެ. އެހެނީ އެއީ އޭނަގެ އުފަން މަންމައެވެ. އެފަދަ  ގޮތަކަށް މަންމައާއިމެދު ދެކިގެން އޭނާގެ ބޮލުގައި ފާފައެއް އަޅުވާކަށް އަރުޝީ ބޭނުމެއް ނުނެވެ. ”އަރުޝީ، އަރުޝީގެ ތި އިހުސާސްތައް އަހަރެންނަށްވެސް ޤަބޫލުކުރެވޭ. މިހާރު ތި ހުރެވެނީ ދެކަފިވެފަވާ މަގެއްގެ އެއްކޮޅޫގަ. ދާނެ ވަކި ދިމާއެއްވެސް ނޭންގޭ ޙާލުގަ. އުފަން މަންމަ، މަންމަގެ ގޮތުގަ ބަލައިގަންނަން އަރުޝީ މިހާރު ތިވިސްނަނީ، އރުޝީ ބަލާބޮޑުކުރި މަންމަގެ އެދުމުގެ މަތިން އޭނައަށް ކޮށްދޭ ކަމެއްގެ ގޮތުގަ. އެހެންވެއްޖެ ކަމަށްވާނަމަ، އަރުޝީގެ ފަރާތުން މީނައަށް ދޭންވާ ޙާޤީޤީ ލޯތްބާ ކުލުނާ ނުދެވޭނެ. އަދިވެސް ތިވިސްނަނީ އެ މަންމަގެ ޙައްޤުގަ. އެންމެރަނގަޅު، އޭނައާއިމެދު ނާއިންސާފުން ކަމެއް ހިނގާފަ އޮތްކަމަށް އަރުޝީއަށް ޤަބޫލުކުރެވޭނަމަ، އިންސާފު ހބޯދައިދޭން މަސައްކަތް ކުރަންވާނެ. އެކަމަކު އެކަމާ މި މަންމައަށް އަރުޝީގެ ފަރާތުން ލިބެންވާ ހައްޤަކާ އެޅުވުން އެހާ ރަނގަޅެއް ނުވާނެ.“ ސާމިރު އެދައްކަނީ ރަނގަޅު ވާހަކައެއްކަން އަރުޝީ ޤަބޫލުކުރިއެވެ.  އެހެންނަމަވެސް އެހުރިހާ ކަމަކާއިމެދު ވިސްނާލުމުން އަރުޝީގެ ހިތަށް އުނދަގޫވާފަދަ ކަމެއް އެބައުޅޭކަމަށް އޭނާގެ ހިތް ބުނަމުން ގެންދިޔައެވެ. އަދި އެހުރިހާ ކަމެއްގެ ޙަޤީޤަތް ބަލަން ބޭނުންވާ ކަމަށްވެސް ސާމިރު ގާތުގައި އަރުޝީ ބުންޏެވެ. އެކަމަށް ސާމިރުގެ އެހީތެރިކަން ދޭނެކަމަށްވެސް ސާމިރު ބުންޏެވެ.

މިހުރިހާ ކަމެއްގެ ތެރެއިންވެސް ސާމިރުއަށް އުނދަގޫވާ އެއްކަމެއް އެބައޮތެވެ. އެއީ އަރުޝީގެ ޙަޤީޤަތް އޭނާގެ މައިންބަފައިންނަށް އަންގައިދޭނެ ގޮތެކެވެ. އެހުރިހާ ކަމެއް އެނގުމުން އެމީހުން އަރުޝީއާއިމެދު ދެކޭނެ ގޮތެވެ. އެމީހުންގެ ރުހުން އަރުޝީއަށް ނުލިބިދާނެ ކަމުގެ ބިރެވެ. އެހެންނަމަވެސް، އެއިން އެއްވެސް ކަމަކުން އުންމީދު ކަނޑާލާކަށް ސާމިރު ބޭނުމެއް ނޫނެވެ. އެހެނީ، ސާމިރުގެ ހިތުގައި، އަރުޝީއަށްޓަކާ އުފެދިފައިވާ ޖަޒުބާތާއި ލޯބި އެއަށްވުރެ މާފުރިހަމައެވެ. ހަމައެފަދއިން، އަރުޝީގެ ހިތުގައިވެސް ސާމިރުއަށްޓަކާ ފުރިހަމަ ޖާގައެއް އެބައޮތްކަން ސާމިރުއަށް އެނގެއެވެ. މިފަދަ ޚިޔާލެއްގެ ތެރެއަށް ސާމިރު ގެއްލިފައި އިންދާ، މީހަކު ދޮރުގައި ޓަކިޖަހާލި އަޑަށް ސިއްސައިގެން ދިޔައެވެ. ޓަކި ޖަހާލީ ސަމްސުއްނިސާއެވެ. ހެނދުނުގެ ނާސްތާ ތައްޔާރުވެފައި ހުރި ވާހަކަ ބުނުމަށެވެ. އަރުޝީވެސް ސަމްސުއްނިސާގެ އެބުނުމަކަށް ދެކޮޅެއް ނުހަދައެވެ. އެހެނީ ވޭތުވެދިޔަ ދުވަސްތަކުގައި އަރުޝީއާއި ސަމްސުއްނިސާގެ ގުޅުމަށްވަނީ ހީނަރުކަމެއް އައިސްފާތާއެވެ. އެހެނަސް މިހާރު ސަމްސުއްނިސާގެ އުންމީދުތައް އައުވާން ފެށިކަހަލަ އިހުސާސެއް އޭނާއަށް ކުރެވެއެވެ. އެހެނީ، މިފަހަރު އަރުޝީގެ ކޮޓަރީގައި ސަމްސުއްނިސާ ޓަކި ޖަހާލީ އެއްވެސް ކަހަލަ ޖެހިލުމެއް ނެތިއެވެ. އަރުޝީގެ ނުރުހުމާއި ކުރިމަތިލާން ނުޖެހޭނެ ކަމުގެ ޔަޤީންކަން އޭނާގެ ހިތުގައި އޮތަތީވެސް މެއެވެ. ވަކިކަމެއް ޙާޞިލުކުރުމަށްޓަކާ ޒަމާންތަކެއް ކުރިއްސުރެ، ސަމްސުއްނިސާ ކުރަމުން އަންނަ ބުރަ މަސައްކަތެއްގެ ފޮނި މޭވާ އޭނާއަށް ލިބެން އުޅޭކަމުގެ އުފާވެރި ޝުޢޫރު އޭނާގެ މޫނުމަތިން ފެންނަންވެސް ހުއްޓެވެ.

• ނުނިމޭ –