ސާމިރު ގޮވައިގެން އަރުޝީ ދިޔައީ ހެނދުނުގެ ނާސްތާއަށް އިންސާފުކުރުމަށެވެ. ސުފުރާމަތީގައި ހުރި ތަކެތި ފެނިފައި ސާމިރު ހައިރާންވިއެވެ. އެހާ ކުޑަވަޤުތުކޮޅެއްގެ ތެރޭގައި، ނާސްތާއަށް ތައްޔާރު ކޮށްފައިވާ ވައްތަރުތަކުގެ ގިނަކަމުންނެވެ. އޭގެ ތެރޭގައި އަރުޝީއަށް އެންމެ ކަމުދާ ތަކެތިވެސް ތައްޔާރު ކޮށްފައި ހުއްޓެވެ. އަރުޝީއަށް ލިބުނު ހައިރާންކަމެއްވެސް ކުޑައެއް ނޫނެވެ. ”މި ހުރިހާ އެއްޗެހި ތި ތައްޔާރުކޮށްލީ ހާދަހާ އަވަހަކަށޭ ދޯ. މަންމައަކަށް ދުލެއް ނުކުރި.“ އެހެން ބުނުމާއިއެކު، އަރުޝީގެ ބަސް ހުއްޓިގެން ދިޔައެވެ. ނަފީސާއާއި، ސަމްސުއްނިސާ އެއްހަމަ ކުރަން އަރުޝީ  ބޭނުންނުވި ކަހަލައެވެ. އެހެނީ، އަރުޝީގެ ހިތުގައި ނަފީސާއަށް ދެވިފައިވާ ޤަދަރާއި ލޯބި ސަމްސުއްނިސާއަށް ދިނުމަކީ ވަރަށް އުނދަގޫ ކަމެއްކަން ޚުދު އަރުޝީވެސް ޤަބޫލުކުރެއެވެ. އެކަމަށްޓަކާ އަރުޝީގެ އަމިއްލަ ނަފްސު ރުއްސަން މަސައްކަތް ކުރަމުން ގެންދިޔަކަމުގައި ވިޔަސްވެސް މެއެވެ. ތަރުބިއްޔަތު ދޭ ފަރާތަކަށްވުރެ އުފަންކުރުވާ މައިމީހާގެ ދަރަޖަ މަތިވެރިވާނެކަން ޚުދު އަރުޝީއަށް އެނގި ހުރެވެސްމެއެވެ. އަރުޝީގެ ބަސްހުއްޓުނު ސަބަބަކީ އެއީކަމަށްވެސް ވެދާނެއެވެ. ”ދައްތައަކީވެސް އަރުޝީގެ މަންމަ ގޮތަށް މީރުކޮން ކައްކާ މީހެއްތާ ދޯ. އެހެންވީމައެއްނު މިހާ އަވަހަށް މިހާ ފުރިހަމަ ނާސްތާއެއް ތައްޔާރު ކޮށްލެވޭނީ ދޯ އަރުޝީ.“ ސާމިރުގެ ވާހަކައަށް އަރުޝީ ޖަވާބުދިނީ، ލުއި ލުއި ހިނިތުން ވުމަކުންނެވެ. އެހެނީ އޭގެ ރައްދުގާ އިތުރު އެއްޗެއް ބުނަން އަރުޝީ ބޭނުންނުވި ކަހަލައެވެ. އެހެނަސް ސަމްސުއްނިސާއަކަށް ނުހުރެވުނެވެ. ހީވަނީ އަރުޝީގެ ހިތް ރުއްސަން ބޭނުންވެފާ ހުރިހެންނެވެ. ”ނޫނޭ ސާމިރު، ދައްތައަކަށް ނަފީސާޔާ ގާތަށްވެސް ކާއެއްޗެއް ހަދާކަށް ނޭންގޭނެ. މީ ދައްތަ މިކޮޅަށް އައިފަހުން ނަފީސާގެ ފަރާތުން ދަސްވެފަ ހުރިހާ ކަންކަން. ނަފީސާ ކައްކާ ތަކެތީގެ ރަހަވެސް މުޅިން ތަފާތުވާނެ. އެރަހަތަށް އެއްވެސް ކާއެއްޗެއްގަ ލައްވާކަށް ދައްތައަކަށް ނޭންގޭނެ. ރަހައަކީ އަތުގައި ހުންނަ ހުނަރެކޭ ބުނެއުޅޭ އަޑު ތިކުދިންވެސް އަހާނެ ކަންނޭންގެ.“ ސާމިރު މަޑުމަޑުން ބޯޖަހާލިއެވެ. ސަމްސުއްނިސާގެ ވާހަކައަށް އެއްބަސް ވެލުމުގެ ގޮތުންނެވެ. ”އެކަމަކު މި ނާސްތާވެސް ވަރަށް ފުރިހަމަ. ދޯ އަރުޝީ.“ ސަމްސުއްނިސާ ކޮށްފައިވާ މަސައްކަތުގެ އަގުވެސް ސާމިރު ވަޒަންކޮށްލަން ބޭނުންވި ކަހަލައެވެ. އެހެންނަމަވެސް މިފަހަރުވެސް، ސާމިރު ދިން ދޯ ގެ ރައްދު، އަރުޝީ ފުއްދާލީ ހަމައެކަނި ހިނިތުން ވުމަކުންނެވެ.

ކާމޭޒުދޮށުން ސާމިރު ތެދުވީ ބަނޑު ފުރިގެންނެވެ. އެހެނަސް ހިތް ފުރިގެންނެއް ނޫނެވެ. އެހެނީ އަދި ކޮންމެވެސް ދުވަހަކުން ސަމްސުއްނިސާގެ އަތުން ކައްކާފައިވާ ކެއުމަކަށް ދަޢުވަތު ދިނުމަށް ޚުދު ސާމިރު ސަމްސުއްނިސާގެ ކިބައިން އެދުނެވެ. ސަމްސުއްނިސާ އުފަލާއިއެކު އެކަމަށް އެއްބަސް ވިއެވެ. ތަށިތައް ނެގުމުގައި ސަމްސުއްނިސާއަށް އެހީތެރިވުމަށް އަރުޝީ އިސްނެގިއެވެ. އެހެންނަމަވެސް، އަރުޝީ ކުރަން ހުރި އެހެން ކަމެއް ހުރިއްޔާ އެކަމަށް ދިއުމަށް ސަމްސުއްނިސާ ބުންޏެވެ. ކިޔަމަންތެރި ދަރިއެއް ފަދައިން އަރުޝީވެސް އެގޮތަށް އެއްބަސް ވެލިއެވެ. ވޭތުވެދިޔަ ދުވަސްތަކުގައި، އަރުޝީގެ އުޅުމާއި ވައްޓަފާޅިއަށް ބަދަލުތަކެއް އައިކަން ސަމްސުއްނިސާ ފާހަގަކޮށްފާވެއެވެ. އެހެންނަމެސް މިހާރު އޭނާއަށް އެ ފެންނަނީ އެންމެ ފުރަތަމަ ފަހަރު ސަހަރާގެ ދޮރުމަތިން ފެނުނު އަރުޝީކަންވެސް މިހާރު ސަމްސުއްނިސާއަށް ފާހަގަވާން ފަށައިފިއެވެ. އަދި އެއީ ހެޔޮ ބަދަލެއްގެ ގޮތުގައި އޭނާއަށް ޤަބޫލުކުރެވެއެވެ. އެ ވިސްނުމުގައިހުރެ، އޯގާތެރި ހިނިތުންވުމަކުން އަރުޝީއާއި ދިމާއަށް ސަމްސުއްނިސާ ހީލިއެވެ. އަރުޝީވެސް ލުއިލުއި ހިނިތުންވުމަކުން ރައްދު ދިނެވެ. އަދި އެތަނުން ތެދުވެގެން ދިޔައީ ކޮޓަރިއަށެވެ. ސާމިރުވެސް ފަހުން އަންނާނަންކަމަށް ބުނެ ދިޔައީ ގެއަށެވެ. އެވަޤުތު ސަމްސުއްނިސާއަށް ހިތްހަމަ ޖެހުމުގެ ފުން ނޭވާއެއް ލެވުނެވެ. އަދި ދަތްދޮޅީގައި އަތްވިއްދާލައިގެން މަޑުމަޑުން މޭޒުދޮށުގައި އިށީންދެލިއެވެ. ހަމައެއާއިއެކު، ފުން ޚިޔާލުތަކަކަށް ގެނބިގެން ދިޔައެވެ. އަދި ހިތާއި ހިތުން އަމިއްލަ ނަފުސާއި ވާހަކަ ދައްކަން ފެށިއެވެ.

”އަހަރެން މިގެއަށް މިއައީވެސް އަހަރެންގެ ދަރިފުޅު އަނބުރާ އަހަރެންގެ ހަޔާތަށް ގެންނަން ވިއްޔަ. ނަފީސާ އޭނާ ގެންގުޅެ ބޮޑުކުރިޔަސް ޙަޤީޤަތުގަ އެއީ އަހަރެންގެ ދަރިއެއް. މިއޮއް ހުރިހާ ދުވަހު އަހަރެން އޭނާޔާ ދުރުގަ ހުރީ، އޭނަގެ ބައްޕަގެ ފަރާތުން ލިބިދޭންޖެހޭ ޙައްޤަށްޓަކާ. އަހަރެން މިތަނަށް ނައިސް ހުރީވެސް އެ ޢަލީ ފިރާޤުގަނޑު އަހަރެން ފެނުނީމަ ހިތްހަމަ ނުޖެހޭތީ. އެމީހާ މަރުވީމަ މި އައީވެސް އަރުޝީއާއި އެކީ މިގޭގަ ރީތިކޮން އުޅެންވެގެން. އެކަމަށްޓަކާވެސް އަހަރެންނަށް ހާދަ މަސައްކަތެއް ކުރަން ޖެހުނޭ. އެހާ ދުރުގަ ހުރެގެންވެސް އަހަރެން މިކަންކަން ޙާޞިލުކުރުމަށްޓަކާ ރެއާދުވާލު ނުނިދާ ކުރި މަސައްކަތުގެ ކޮންމެސް ރާހަތެއް އަހަރެންނަށްވެސް ލިބެން ޙައްޤުވާނެތާ ދޯ.“

ސަމްސުއްނިސާގެ މޫނުމައްޗަށް ޝާއިޠާނީ ހިނިތުންވުމެއް ވެރިވެގެން ދިޔައެވެ. އެ ހިނިތުންވުމުގައި ފޮރުވިފައިވަނީ، ކާމިޔާބީއާއި ހަމައަށް

ވާޞިލުވެވޭ ކަމުގެ އުފަލެވެ. ދުނިޔެ މުށުތެރެއަށް ލެވުނުކަމުގެ ހިތްހަމަ ޖެހުމެވެ. ހަމައެއާއިއެކު، އަނެއްކާވެސް ޚިޔާލީ ދުނިޔޭގެ ތެރެއަށް ގެއްލިގެން ދިޔައެވެ. ”މިގެއަކީ މިހާރު ނަފީސާގެ ގެއެއްކަމަކު، އޭނަ މަރުވީމަ މިގެވެސް ލިބޭނީ އަރުޝީއަށް. އެހެންވީމަ އަހަރެންނަކަށް މިގޭގަ އުޅޭކަށް އުނދަގުލެއްވެސް ނުވާނެ. އެއީ މަގޭ ދަރިއެއް. އޭނަގެ ކޮންމެ އެއްޗެއްގެ މައްޗަށްވެސް އަހަރެންނަށްވެސް ޙައްޤު އޮންނާނެ. އޭރުގަވެސް އަހަރެންގެ ލޯބި އަހަރެންނަށް ނުލިބުނީ ނަފިސާޔާ ހެދި. އެންމެފަހުން މަގޭ ދަރިފުޅުވެސް އޭނަޔާ ހަވާލުކުރަން ޖެހުނީ އެކުއްޖާފުޅުގެ ހައްޤުތަކަށްޓަކާ. އެނޫން ގޮތަކަށް ޢަލީ ފިރާޤު އެއްބަސްވެސް ނުވީމަ. މިއޮއް ހުރިހާ ދުވަހު އަހަރެން އެހާ ހާލުގަ މިއުޅުނީ، މިދުވަހަށް އިންތިޒާރު ކޮށްގެން. ނަފީސާގެ ދުވަސް ދުއްވާލަންވެސް އަހަރެންނަށް  ހާދަ މަސައްކަތެއް ކުރަން ޖެހުނޭ. އަހަރެން އުޅުނު ރަށުގެ ދައްތަގެ އެހީގަ އަހަރެން ދަސްކުރި އެއްޗެއް ބޭކާރުވެގެންނެއް ނުދިޔަތާ. އެކަމަކު އަހަރެން މިހުރިހާ މަސައްކަތެއްވެސް  މިކުރަނީ އަރުޝީގެ ކުރިމަތީގަ އޯގާތެރި މަންމައަކަށް ވާން. މިހާ ހިސާބަށް އައިސް ދެން އަހަރެން ބަލި ޤަބޫލުކޮށްގެން އަނބުރާ ދާކަށް ބޭނުމެއް ނޫން. ސާމިރު އުޅޭގޮތުންވެސް ބައެއްފަހަރަށް ޖެހިލުންވޭ. އަންނަ ނާންނައިރެއްވެސް ނޭންގެ. މާ ކަންތައް ބޮޑުވަންޏާ އޭނަގެ ދުވަސްވެސް ދުއްވާލަން ޖެހިދާނެ. އެކަމަކު ސާމިރަކީވެސް އަރުޝީއަށް ހެޔޮއެދޭ ކުއްޖެއް. އޭނަގެ ފަރާތުން ނުރައްކަލެއް އޮވެދާނެހެނެއް ހިއެއްނުވޭ. ދެން އެންމެ ރަނގަޅުތާ ދޯ. އަހަރެން ބޭނުންވި ހުރިހާ ކަމެއްވެސް މިހާރު އެބަ ޙާޞިލުވޭ. އަރުޝީވެސް އަހަރެންދެކެ ރުޅި އަންނަހެނެއް ހިއެއްނުވޭ. އޭނައަށް އެއްވެސް ކަހަލަ ގެއްލުމެއް ވިޔަކަ ނުދޭނަށް. އެހެން އެންމެންގެ ދުވަސް ދުއްވާލައިގެންވެސް އަހަރެން ބޭނުންވަނީ އަހަރެންގެ މަޤުޞަދު ޙާޞިލުކުރަން. އަރުޝީއާއިއެކީ މިގޭގަ ރީތިކޮން އުޅެން. މިއީ އަހަރެންގެ ތަނަކަށް ހަދަން.“ އެވަޤުތު ސަމްސުއްނިސާއަށް ހިތްހަމަ ޖެހުމުގެ ފުން ނޭވާއެއް ލެވުނެވެ. އަދި އަމިއްލަ ނަފުސާއިމެދު ފަހުރުވެރިވާފަދަ ގޮތަކަށް ހިންދެމިލިއެވެ. އޭނާއަށް ދުނިޔެއިން ޙާޞިލުކުރަން ބޭނުންވި ހުރިހާ ކަމެއްވެސް ކާމިޔާބުވާކަމުގެ އިހުސާސެއް ކުރެވުނު ކަހަލައެވެ. އެކަމަށްޓަކާ އޭނާ އިޚްތިޔާރުކުރީ ނުކިއްސަރު މަގެކެވެ. ފުރަތަމަ މަރުހަލާއިން ފެށިގެންނެވެ. އެގޮތްވެސް އޭނާއަށް އެންމެ ރަނގަޅީތާއެވެ. ޢަލީ ފިރާޤު ޙާޞިލުކުރުމަށްޓަކާ އޭނާގެ އެކުވެރިޔާއަށް ދިން ކެއްސަކީވެސް ކުޑަކަމެއް ނޫންތާއެވެ. ބަނޑުއަޅާ ވިހޭ ދަރިފުޅު ދޫކޮށްލާފައި ދިއުމަކީވެސް ހިލަހިތެއްގެ ވެރިޔަކު ނޫނީ ކުރާނެފަދަ ކަމެއް ނޫންތާއެވެ. މިހާރު އޭނާ އިޚްތިޔާރު ކޮށްފައިވާ މަގަކީ، އާޚިރަތުގައިވެސް އޭނާއަށް ސަލާމަތްކަމެއް ނެތް މަގެކެވެ. އާނއެކެވެ. މިހާރު ސަމްސުއްނިސާއަކީ ސިހުރާއި ފަންޑިތަވެރިކަން ރަނގަޅަށް ދަސްކޮށްގެން ހުރި އެދުރެކެވެ. ސަމްސުއްނިސާ މިފަހަރު އެއައީ، އޭނާ ބޭނުންވާ ހުރިހާ ކަމެއް ޙާޞިލުކުރުމަށް ފިސާރި ރަނގަޅަށް ތައްޔާރުވެގެންނެވެ.

އާނއެކެވެ. ދުނިޔޭގެ އެދުމަކީ، ޝައިޠާނީ ވަސްވާހެއް ފަދަ އެއްޗެކެވެ. އެދުން ފުދެމުންދާ ވަރަކަށް ދަހިވެތިކަންވެސް ވާނީ އިތުރެވެ. ސަމްސުއްނިސާއަށްވެސް ވީ އެހެންކަމަށް ވެދާނެއެވެ. އޭނާގެ ޙަޤީޤީ މަޤުޞަދަކަށް އެއިރު ވީ، ޢަލީ ފިރާޤު ޙާޞިލުކުރުމެވެ. ކޮންމެވެސް ސިފައެއްގައި އޭނާއަށް އެކަން ޙާޞިލުވެސް ވީތާއެވެ. ވަޤުތީ ލައްޒަތެއްގެ ސިފައިގާ ކަމަށްވިޔަސްވެސް އެންމެ ރަނގަޅުތާއެވެ. ހިތާމައަކީ، އެކަމުން ނިކުތް ނަތީޖާގެ ހިތިކަމެވެ. ތަހަންމަލު ކުރަންޖެހުނު ވޭނެވެ. ސަމްސުއްނިސާގެ ހިތުގައި ބަދަލު ހިފުމުގެ ރޫޙު އާލާވި ސަބަބަކީވެސް އެއީއެވެ. އެއަށްފަހު އޭނާ އެޅި ކޮންމެ ފިޔަވަޅެއް އަޅާފައި އެވަނީ ފިސާރި ވިސްނައިގެންނެވެ. ފުރިހަމަ ރޭވުންތެރި ކަމާއިއެކުގައެވެ. އެކަމަށްޓަކާ ހަތާވީސް އަހަރު ވަންދެން ކުރަމުން އައި މަސައްކަތުގެ ނަތީޖާވެސް ޙާޞިލުކުރެވިއްޖެއެވެ. ދެން އޮތީ އަރުޝީގެ ހިތުގައި އޭނާއަށްޓަކާ ލޯތްބާއި ކުލުނު އުފެއްދުމެވެ. އެކަމަށްޓަކާ އަރުޝީއަށް އެއްވެސް ކަހަލަ ގެއްލުމެއް ދޭކަށް ހުވަފެނެއްގައިވެސް ސަމްސުއއްނިސާ ނުވިސްނާނެއެވެ. އެހެނަސް މިފަހަރު މިއޮތީ ކެތްތެރިކަން އިޚްތިޔާރުކުރަން ޖެހިފައެވެ. އެހެނެއްކަމަކު، ކެތްތެރިކަމަކީ އޭނާގެ ޙަޔާތުގެ ރަދީފުގައި ހިމެނޭ ބަހެއްވެސް ނޫނެވެ. ކޮންމެ ކަމެއްވެސް ޙާޞިލުކުރުމަށް އަވަސްމަގު އިޚްތިޔާރު ކުރުމަކީ ސަމްސުއްނިސާގެ މިޒާޖުގައި ހަރުލާފައި ހުންނަ ނޭދެވޭ ސިފައެކެވެ. އެއްގޮތަކުން ނުވިއްޔާ އަނެއް ގޮތަކުންނެވެ. މުޅި ޙަޔާތުގައިވެސް އޭނާ ކެތްކުރީ ހަމައެކަނި އަރުޝީއާއި ހަމައަށް ވާޞިލުވުމަށް ކުރި މަސައްކަތުގައެވެ. އެހެނަސް އެވަޤުތުވެސް ސަމްސުއްނިސާ ގެންދިޔައީ އެކަމަށް މަގުފަހި ކުރަމުންތާއެވެ.

ސަމްސުއްނިސާގެ ހިތުގައި އޮތީ ވަރުގަދަ ޢަޒުމެކެވެ. އަރުޝީގެ އިތުރުން ނަފީސާގެ ގެދޮރާއި މުދަލަށްވެސް އޭނާގެ ބާރު ހިންގުމެވެ. އޭނާގެ މިލްކިއްޔާތަކަށް އެތަކެތި ހެދުމެވެ. ސަމްސުއްނިސާ ޤަބޫލުކުރާ ގޮތުގައި މިފަހަރު އޭނާއަށް ހުރަސްއެޅޭނެ އެކަކުވެސް ނުހުންނާނެއެވެ. އެހެނީ، އެންމެބޮޑު ހުރަހެއް ކަމަށްވާ ނަފީސާވެސް މިހާރަކު ނެތްތާއެވެ. މިހުރިހާ ވިސްނުމަކާއިއެކު، އަނެއްކާވެސް ހިތްހަމަ ޖެހުމުގެ ފުން ނޭވާއެއް

ލިއެވެ. ކުރަމުން ގެންދިޔަ ބޮޑު ހަނގުރާމައަކުން ފަތަހަ ޙާޞިލުކުރެވުނު ކަހަލައެވެ. ރަނގަޅަށް ދެކޮޅު ބަލައިލާފާ، އޭނާގެ މަސައްކަތައިގެން

ކުރިއަށް ދާން ފެށިއެވެ. އެހެނީ ސަމްސުއްނިސާ މިހާރު އެގޭގައި އެއުޅެނީ، އޭނާގެ އަމިއްލަ ގެއެއްގައި ދިރިއުޅެމުންދާ ފަދައިންނެވެ. ވީއިރު ކުރާ ހުރިހާ މަސައްކަތެއްވެސް ވާނީ އޭނާގެ އަމިއްލަ މަސައްކަތަށް ތާއެވެ. އުފާވެރި ކަމުގެ ކޮޅެއް ނެތެވެ. އެހެނީ އޭނާގެ ޙަޤީޤީ މަޤުޞަދު ޙާޞިލުކުރުންވެސް ދެން އޮތީ މާދުރަކު ނޫނެވެ. ސަމްސުއްނިސާއަށް ޤަބޫލުކުރެވޭ ގޮތުގައި އަރުޝީވެސް މިހާރު އޭނާ ބަލައިގެންފިއެވެ. ދެން އޮތީ އަރުޝީގެ ދުލުން އޭނާއަށް މަންމާއޭ ކިޔާފައި ގޮވާލާނެ ވަޤުތަކަށް އިންތިޒާރު ކުރުމެވެ. އެކަމަށްޓަކާ، އަރުޝީއާއި ވާހަކަ ދެއްކުން މުހިންމު ކަމުގައި އޭނާއަށް ޤަބޫލުކުރެވެއެވެ. އެކަން ކުރަން ޖެހޭނީވެސް ޚުދު އޭނާއަށްކަން ސަމްސުއްނިސާ ޤަބޫލުކުރެއެވެ. އެކަމަށްޓަކާ، އަރުޝީގެ ކުރިމަތީގައި ބަހައްޓަންޖެހޭ ނަފީސާގެ ތަސްވީރުވެސް ސަމްސުއްނިސާއަށް ކަނޑައަޅަން ޖެހޭނެއެވެ. އެހެނީ ސަމްސުއްނިސާ، އަރުޝީގެ މަންމަގެ ގޮތުގައި ބަލައިގަންނާނީ އަރުޝީގެ ހިތުގައި  ނަފީސާއަށްޓަކާ ނަފުރަތު އުފައްދައިގެންނެވެ. ސަމްސުއްނިސާއަތުން އަރުޝީ ގެންދިޔަ ގޮތުގެ ވާހަކަ ދައްކައިގެންނެވެ. އެކަން އެގޮތަށް ޤަބޫލުވެސް ކުރުވައިގެންނެވެ. ދެން އޮތީ އެކަމަށް ތައްޔާރުވުން ކަމުގައި ސަމްސުއްނިސާއަށް ޤަބޫލުކުރެވެއެވެ. އެކަމަށްޓަކާ ސަމަސުއްނިސާގެ ސިކުނޑީގައިވާ ޝައިޠާނީ ހުޅުކޮޅު ދިއްލާލުމަށް ފިސާރި ރަނގަޅަށް ތައްޔާރުވެލިއެވެ.

އަނެއްކޮޅުން އަރުޝީ ވިސްނަމުން ގެންދިޔައީ، އަމާންކަމާއެކީ، ހުރިހާ ކަމެއް ހަމައަކަށް އަޅުވާށެވެ. ނަފީސާގެ ސިޓީގައިވާ ގޮތުގެ މަތިން ސަމްސުއްނިސާއަށް ލިބެންޖެހޭ ޙައްޤު ދޭށެވެ. އެހެނީ އަރުޝީގެ މަންމަގެ ގޮތުގައި އޭނާ ބަލައިގަންނާށެވެ. އެކަމަށްޓަކާ ސަމްސުއްނިސާއާއި ވާހަކަ ދައްކާނެ ގޮތެއް، އަރުޝީ ވިސްނަމުން ގެންދިޔައެވެ. ނަފީސާގެ ޑައިރީ ސަމްސުއްނިސާއަށް ދައްކާނީ ބާއެވެ؟ ނޫނީ ސަމްސުއްނިސާއާއި ސުވާލުކޮށްގެން އޭނާގެ ވާހަކަތައް އަޑު އަހާނީބާއެވެ؟ ނޫނީ މަޑުމަޑުން ހުރިހާ ކަމެއް ހަމައަކަށް އެޅެންދެން މަޑުކުރާނީބާއެވެ؟ މިކަހަލަ އެތައް ޚިޔާލުތަކެއް އަރުޝީގެ ހިތަށް އަރާ ފައިބަމުން ދިޔައެވެ. ހަމައެއާއިއެކު، އޭނާ ވިސްނަންޖެހޭ އެހެން ކަމެއްވެސް އެބައޮތްކަން އަރުޝީގެ ހަނދާނަށް އައެވެ. އަރުޝީގެ މަންމަ ނަފީސާ، އޭނާއަށްޓަކާ ދެކެމުން އައި ހުވަފެނުގައި ކުލަ ޖެއްސުން އަދި އޮތީއެވެ. އަރުޝީއަށް ރަނގަޅު ތަޢުލީމެއް ހޯދައިދިނުމަށް ނަފިސާ ވީ ޤުރުބާނީ ހަނދާން ނައްތާލާނީ ކިހިނަކުން ހެއްޔެވެ. އަރުޝީ މީހަކަށް ހެދުން އެއީ ނަފިސާ ދެކެމުން އައި އެންމެ ބޮޑު ހުވަފެނެވެ. އެކަން ފުރިހަމަ ކުރުމަކީ، އެންމެ މުހިންމު ޒިންމާކަމުގައި އަރުޝީ އަބަދުވެސް ޤަބޫލުކުރެއެވެ. އެހެނަސް އެކަމަށްޓަކާ ރަނގަޅު ވަޤުތެއްގެ އިންތިޒާރުވެސް ކުރަން ޖެހޭނެތާއެވެ. މިހާރު ވިސްނަން ޖެހިފައި މިއޮތީ، ޒާތީ ދިރިއުޅުމުގެ ޙާލަތު ހަމައަކަށް އަޅުވާށެވެ. މިކަހަލަ ވިސްނުމާއި ފިކުރެއްގައި އިނދެ، އަރުޝީއަށް ބޭއިޚްތިޔާރުގައި އޭނާގެ މަންމަގެ ކޮޓަރިއާއި ދިމާއަށް މިސްރާބު ޖެހުނެވެ. ނަފީސާގެ ހަނދާންތައް އައުކޮށްލާ އޭނާގެ މަންމައާއި ވާހަކަ ދައްކާލުމުގެ ޚިޔާލެއް އާލާވެގެން ދިޔުމުންނެވެ.

އަރުޝީ މަޑުމަޑުން ނަފީސާގެ ކޮޓަރީގެ ދޮރު ހުޅުވާލިއެވެ. ނަފީސާ އޭނާއަށް ގޮވާލިކަހަލަ އިހުސާސެއް އަރުޝީއަށް ކުރެވުނެވެ. ފުން ނެވާއެއް ލުމާއިއެކު، މަންމާއޭ ކިޔާފައި އަރުޝީވެސް އެގޮވާލުމަށް އިޖާބަ ދިނެވެ. އަދި މަޑުމަޑުން ގޮސް ނަފީސާގެ އެނދުމަތީގައި އިށީންދެލިއެވެ. އެވަޤުތު އަރުޝީގެ ހަނދާނަށް އަންނަން ފެށީ، އެންމެ ތުއްތުއިރުން ފެށިގެން އޭނާގެ މަންމައާއި ބައްދަލުވި ދުވަހުގެ ހަނދާންތަކެވެ. އެޚިޔާލުތަކުގެ ތެރެއަށް ގެއްލިފައި އިނދެ، އަރުޝީއަށް ނަފީސާގެ އެނދުގެ ފަޑީގެ ދަށުބަޔަށް ވާގޮތަށް ދެއަތް އަޅުވާލެވުނެވެ. އަރުޝީ ސިއްސައިގެން ދިޔައީ، އޭނާގެ އަތުގައި ތޫނު އެއްޗެއް އަޅައިގަތުމުންނެވެ. ކުއްލިޔަކަށް އަތްދަމައިގެންފާ ދެއަތަށް ބަލައިލެވުނެވެ. އެއްވެސް ކަމެއް ވެފައެއް ނެތެވެ. އެހެންނަމަވެސް އެވީ ކިހިނެއްތޯ ބަލައިލަން އަރުޝީ ބޭނުންވިއެވެ. ހަމައެވަޤުތު އެނދުން ތެދުވެލާފާ، އެނދުގެ ދަށަށް ބޯދިއްކޮށްލެވުނެވެ. ކޮންމެވެސް އެއްޗެއް ވިދާހެން އަރުޝީއަށް ހީވިއެވެ. އަތުގައި އޮތް މޯބައިލް ފޯނުގެ ބައްތި ދިއްލާލައިފާ، އެއީ ކޮންވިދުމެއްތޯ ކަށަވަރު ކޮށްލަން އަރުޝީ ބޭނުންވިއެވެ. އެނދު ދަށަށް ޖަހާފައި އެހުރީ ކޮން ޕިން ތަކެއްބާއެވެ. މަދަކަށް ބައިވަރެއް ނޫނެވެ. އަރުޝީގެ ހިތުގައި އެތައް ބައިވަރު ސުވާލުތަކެއް އެއްފަހަރާ އުފެދުނެވެ. ”މީ ކޯޗެއްބާ؟ ކޮންކަމަކު މަންމަ ޖަހާފަހުރި އެއްޗެއްބާ؟ އެނދުން އެއްވެސް ތަނެއް ހަލާކުވެފަ ހުރިހެނެއްވެސް ހިއެއްނުވޭ.“ އެވަޤުތު އަރުޝީގެ ޚިޔާލަށް އައީ އެ ޕިންތަކުގެ ފޮޓޮއެއް ސާމިރުއަށް ފޮނުވާށެވެ. އޭނާއަށް އެކަމާގުޅޭ އެއްވެސް އެއްޗެއް އެނގިފައި އޮތްތޯ ބެލުމަށެވެ. އެހެނީ އަރުޝީގެ ޣައިރު ޙާޟިރުގައި، އެކި ކަންކަމުގައި ނަފީސާއަށް އެހީތެރިވި އެކަކީ ސާމިރު ކަމަށް ވީތީއެވެ. ފޮޓޯތައް ލިބުމާއިއެކީ ސާމިރު، އަރުޝީއަށް ގުޅިއެވެ. އަދި އެއީ ކޯޗެއްތޯ ވަޤުތުން ސުވާލުކުރިއެވެ. އެހެންކަމުން އެކަމާބެހޭ އެއްވެސް މަޢުލޫމާތެއް ސާމިރުއަށް ލިބިފައި ނެތްކަން އަރުޝީއަށް ވިސްނުނެވެ. އަރުޝީއަށް ލިބުނު ހައިރާންކަން

އިތުރުވެގެން ދިޔައެވެ. ހަމައެއާއިއެކު، އެއީ ކޮންތާކު ހުރި އެއްޗެއްކަން އަރުޝީ، ސާމިރުއަށް އޮޅުން ފިލުވައިދިނެވެ. ސާމިރުވެސް ދިޔައީ ސިއްސައިގެންނެވެ. އެހެނީ އެކަމުގައި ސާމިރުގެ ވިސްނުން ތަފާތެވެ. ސާމިރުގެ ހަނދާނަށް އައީ ހެނދުނު އަރުޝީއާއި ދެކެވުނު ވާހަކައެވެ.  އަރުޝީގެ ހިތުގައި އުފެދިފައިވާ ޝައްކާއި މެދުގައެވެ. މިކަމަކީ އޭގެ ހެއްކެއް ނޫންބާއޭ ސާމިރުއަށް ހިތަށްއެރިއެވެ. އެހުރިހާ ޚިޔާލުތަކެއް ކުރެވެމުން ދިޔައިރު، ސާމިރު އިނީ ބަސްހުއްޓިފައެވެ. އަނެއްކޮޅުން އަރުޝީ އިނީ ސާމިރުގެ އަޑެއް ނީވެގެން ހައިރާން ވެފައެވެ. ސާމިރު ސިއްސައިގެން ދިޔައީ އަނެއްކޮޅުން އަރުޝީ ގޮވާލި އަޑަށެވެ. ”އަރުޝީ، އަހަރެން ބޭނުން އަރުޝީއާ ބައްދަލުކޮށްލަން. ހިނގާބަލަ މިރޭ ބުރެއް ޖަހާލަން ދާން.“ ސާމިރު އެބުނި އެއްޗެއް އަރުޝީއަށް ނުވިސްނުނު ކަހަލައެވެ. ”އަހަރެންގެ ކަންބޮޑުވުން ސާމިރުއަށް ނުވިސްނިގެން އުޅޭހެން ހާދަ ހީވެޔޭ.“  ”ކިހިނެއްވީ؟“ ވަރަށް އަވަސްގޮތަކަށް ސާމިރު ސުވާލުކޮށްލިއެވެ. ”ކިހިނެއްހޯ ވީ.. އަހަރެން ސާމިރުއަށް ފޮނުވި ފޮޓޯޔާ ބެހޭގޮތުން އެއްވެސް އެއްޗެއް ނުބުނެ އަދިވެސް ތި ބުނަނީ ބުރުޖަހަން ހިނގާށޭ ވިއްޔަ.“ ޝަކުވާ ކުރާކަހަލަ ރާގަކަށް އަރުޝީ ބުނެލިއެވެ. ރައްދުގައި ލުއިލުއި ގޮތަކަށް ސާމިރު ހީލިއެވެ. ”ބަލަ މަންޖޭ، ބުރުޖަހަން ދާން މިބުނަނީ އެވާހަކަ ދައްކަން ވެގެންނޭ. މަށަށް ހީވާގޮތުގަ ތިކަމާ ބެހޭގޮތުން ގޭތެރޭގަ ތިވާހަކަ ދެއްކުން އެހާ ރައްކާތެރިއެއް ނޫން.“ ސާމިރުގެ ޖަވާބުން އަރުޝީގެ ހާސްކަން އިތުރުވިއެވެ. ”ސާމިރު ތިއުޅެނީ އަހަރެން ބިރުގަންނަވަންތަ؟ ކީއްވެ ގޭގަ މިވާހަކަ ނުދެއްކެންވީ؟ އަނެއްކާ ސާމިރު ތި ވިސްނަނީ ކޮންކަމަކާ؟“ އެއްފަހަރާ އެތައް ސުވާލުތަކެއް އަރުޝީ ކޮށްލިއެވެ. އަރުޝީގެ ހިތްއަވަސްވާ ގޮތްވިއެވެ. ”ހިނގާ ހަވީރުން ދަމާ.“ ”އަރުޝީ ހާދަ ބޮޑަށް ހާސްވެފަ ހުރިހެން އެބަ ހީވޭ.“ ސާމިރު ހަމަޖެހިފާ ހުރިކަމަށް ދައްކަމުން ބުނެލިއެވެ. އެހެނަސް ސާމިރުވެސް އެހުރީ ހާސްކަމެއްގެ ތެރޭގައެވެ. ވާނުވާ ނޭންގޭ ޙާލުގައެވެ. އެހެނީ ސާމިރުއަށް މިހާރު ޤަބޫލުކުރެވޭ ގޮތުގައި، އަރުޝީވެސް އެހުރީ ނުރައްކަލެއްގެ ތެރޭގައެވެ. ”އެންމެ ރަނގަޅު، ފަހެއްޖަހާއިރަށް އަރުޝީ ތައްޔާރު ވެގެން ހުންނާތި. އަހަރެން ދާނަން އަރުޝީ ބަލާ.“ އެގޮތަށް އެއްބަސްވުމާއިއެކު، އަރުޝީ ފޯނު ކަނޑާލިއެވެ. ހަމަޖެހުމުގެ ނޭވާއެއް ލުމާއިއެކު ލުއިލުއި ގޮތަކަށް އަރުޝީ ހިނިތުން ވެލިއެވެ. އަމިއްލަ ނަފުސަށް ހަމަޖެހުމެއް ދިނުމަށްޓަކައެވެ. އަދި ނަފީސާގެ ކޮޓަރިން ނިކުންނަށް ހިނގައިގަތެވެ.

އަރުޝީ ކޮޓަރިން ނުކުތުމާއިއެކު، ސިއްސައިގެން ގޮސް އެއްފިޔަވަޅު ފަހަތަށް ޖެހިލެވުނެވެ. ފުންމައިގެން ކަހަލަ ގޮތަކަށެވެ. އަރުޝީގެ މޭ ބާރަށް ތެޅެން ފެށިއެވެ. ”އަހަރެން ދިޔައީ ސިއްސައިގެން. ކުއްލިޔަކަށް ތިހެން ކުރިމައްޗަށް އަރާނެކަމެއް އަހަރެންނަކަށް ނޭންގޭނެ އެއްނު.“ ހަމަޖެހިލަން މަސައްކަތް ކޮށްލަމުން އަރުޝީ ބުނެލިއެވެ. އާނއެކެވެ. އަރުޝީ ކޮޓަރިން ނިކުތްއިރު ކުރިމަތީގައި ހުރީ ސަމްސުއްނިސާއެވެ. ހަށަން ބަނދެލައިގެން އަރުޝީއާއި ދިމާއަށް ބަލަހައްޓައިގެންނެވެ. ”ވަރަށް ބޮޑަށް މަޢާފުކުރޭ. އަރުޝީ ތިޔަހެން ސިއްސައިގެން ދާނެކަމަކަށް ދައްތަ ހިއެއް ނުކުރަން. އަސްލު ގެއަށް ބޭނުންވާ ބައެއް އެއްޗިހި ގަންނަން ވެފަ ހުރީމަ އެވާހަކަ ބުނެލަންވެގެން އަރުޝީ މިހޯދަނީ. ކޮޓަރިއަށް ދިޔައިރު އެތާ ނެތީމަ ފަހަރެއްގަ މިކޮޓަރީގަ ހުރެދާނެ ކަމަށް ބަލާލަންވެގެން މި އައީ.“ އަރުޝީގެ ކަންބޮޑުވުން ފިލުވައިދޭން ސަމްސުއްނިސާ މަސައްކަތް ކުރިއެވެ. ”ބޭނުންވާ އެއްޗިހި އަހަރެން ކައިރީގަ ބުނެލާ. އަހަރެން ހަވީރު ބޭރަށް ގޮއްސަ އަންނަމުން ގެންނާނަން.“ އެހެން ބުނުމާއިއެކު، އަރުޝީ އޭނާގެ ކޮޓަރިއާއި ދިމާއަށް މިސްރާބު ޖެހިއެވެ. އަރުޝީގެ ފަހަތުން ކަހަލަ ގޮތަކަށް ސަމްސުއްނިސާވެސް ހިނގައިގަތެވެ. ”އަރުޝީ ދަނީ އެކަނިތަ؟ އެހެންވިއްޔާ ދައްތަވެސް ގެންގޮއްސާނަންތަ؟“ އަރުޝީގެ ފަހަތުން ދަމުން ސަމްސުއްނިސާ ބުނެލިއެވެ. އަރުޝީ ކުއްލިޔަކަށް ހުއްޓުނެވެ. ”ބޭރަށް ދާން ބޭނުންވަނީތަ؟ ދާން ބެނުމިއްޔާ ހަމަ ދާންވީ. އެކަމަކު އަހަރެން މިދަނީ އެކަންޏެއް ނޫން. އެހެންވީމަ އެކީގަ ގެންދަން ތަންކޮޅެއް އުނދަގުވާނެ.“ އަދަބުވެރި ކަމާއިއެކީ ވާހަކަ ދެއްކޭތޯ އަރުޝީ މަސައްކަތް ކުރަމުން ގެންދިޔައެވެ. އެހެނީ ދެންމެ ހިނގާދިޔަ ކަންތަކުން އަރުޝީ އަދިވެސް އެހުރީ ހިތްހަމަ ނުޖެހިފައެވެ. ސިއްސައިގެން ދިޔަވަޤުތު ހިތުގައި އުފެދުނު ބިރުވެރިކަން އަދިވެސް  ނުފިލާ ހުރީތީއެވެ. އެވަޤުތު އަރުޝީއަށް ކުރެވުނީ ސަމްސުއްނިސާ، އޭނާއަށް ފާރަލާން އުޅޭ ކަމުގެ އިހުސާސަކަށް ވީތީވެސް މެއެވެ. ”ނޫން، ކޮންމެހެން ބޭރަށް ދާންޖެހިފަ އޮތީމައެއް ނޫން. އެއީ ދެން މިހެން ގޭގަ އިނދެ އިނދެ ފޫހިވެގެން ނިކުމެލަން ބޭނުންވީ. އަހަރެންގެ ރައްޓެއްސަކުވެސް ނޫނީ ދަންނަ މީހަކުވެސް މިތާކު ނެތްތާ ދޯ. އެހެންވީމަ އެކަނި ދާނެ ތަނެއްވެސް އަނެއްހެނެއް ނެތް. އެހެންވެ އެކުގަ ގެންދާށޭ މިބުނީ.“ ސަމްސުއްނިސާގެ ވާހަކައިން އަރުޝީގެ ހިތުގައި ހަމްދަރުދީއެއް އުފެދުނު ކަހަލައެވެ. ކޮންމެވެސް ވަރަކަށް ދެރަވެސް ވިއެވެ. ”އާން ޤަބޫލުކުރަން އަބަދު ގޭގަ ތި އިންނަނީ އެކަނިކަން. ވާހަކަ ދައްކާލާ ހިތްހަމަ ޖައްސާލާނެ ރައްޓެއްސެއްވެސް ނެތްކަން. އެކަމަކު ބައެއްފަހަރު ބޭރަށްވެސް ނިކުމެލާ ހަދާލަން ވާނެއެއްނު. އޭރުން ރައްޓެހިންވެސް ލިބޭނެ.“ އަރުޝީގެ ވާހަކައިން ސަމްސުއްނިސާއަށް ހިތްހަމަ

ޖެހުން ލިބެމުން ދިޔައެވެ. އޭނާގެ ދަރިފުޅުގެ ހިތުގައި އޭނާއަށްޓަކާ ކުލުނެއް އޮތްކަމުގެ އިހުސާސް ކުރެވެމުން ދިޔައެވެ. ހަމަ އެހިނދު ސަމްސުއްނިސާއަށް ލެވުނީ ހިތްހަމަ ޖެހުމުގެ ފުން ނޭވާއެކެވެ. ”ދައްތަޔާމެދު ތިވަރަށް ވިސްނީތީ ވަރަށް އުފާކޮށްފިން. ދަ.. އަރުޝީ ތިބުނިގޮތަށް ކަންތައް ކުރެވޭތޯ ބަލާނަން.“ ސަމްސުއްނިސާގެ ދުލުން ނިކުތް ފަހު ޖުމުލަ ފެށި ހިސާބުން އަރުޝީއަށް ލިބުނީ ސިހުމެކެވެ. އޭނާގެ ދުލުން ”ދަރިފުޅު“ މި ލަފުޒު ބުނެލުމަކީ، އަރުޝީއަށް އަޑުއަހަން އަދި އެހާ ފަސޭހަ ކަމަކަށް ނުވާތީއެވެ. އެކަމަށްޓަކާ އޭނާ ތައްޔާރުނުވާހާ ހިނދަކުއެވެ. އަރުޝީއަށް ޙަޤީޤަތް އެނގޭކަން ސަމްސުއްނިސާއަށް އެނގޭނެ ދުވަހެއް އަންނަންދެނެވެ. ސަމްސުއްނިސާ ބުނި ވާހަކައަށް އިތުރު ޖަވާބެއް އަރުޝީ ނުދިން ސަބަބަކީ އެއީ ކަމަށް ވެދާނެއެވެ. އެހެނީ، ސަމްސުއްނިސާ ބުނި ވާހަކައަށް އިތުރަށް އެއްޗެއް ނުބުނެ ކޮޓަރިއާއި ދިމާއަށް އަރުޝީ ހިނގައިގަތެވެ. އެހެނަސް ސަމްސުއްނިސާއަށް ލިބުނީ ބުނެދޭން ނޭންގޭ ވަރުގެ ހިތްހަމަ ޖެހުމެކެވެ. އޭނާގެ މުޅި ދުނިޔެ އުޖާލާވެގެން ދިޔަކަހަލައެވެ. ލިބުނު އުފަލުގެ ބޮޑުކަމާއިއެކު، އަވަސްގޮތަކަށް ހިނގާލާފާ އޭނާގެ ކޮޓަރިއާއި ދިމާއަށް ހިނގައިގަތެވެ.

ސަމްސުއްނިސާ ކޮޓަރިއަށް ވަނުމާއިއެކު، އެނދުމަތީގައި އިށީންދެލިއެވެ. އަދި ބާލީސްދަށަށް އަތްބޭނުމާއިއެކު، އެނެގީ އާދައިގެ ނޮކިޔާ ބައްތި  ފޯނެކެވެ. ފޯނުން ކޮންމެވެސް ނަންބަރަކަށް ގުޅާލިއެވެ. އަނެއްކޮޅުން ފޯނު ނެގި މީހަކު ސަލާމް ގޮވާލުމުން ސަމްސުއްނިސާ ރައްދު ދިނެވެ. ”ބީފާނުއައްތަ ޙާލު ކިހިނެއްތަ؟ މީ ސަމްސު އިނގޭ. މިގުޅާލީ އައްތަޔަށް ވަރަށް އުފާވެރި ޚަބަރެއް ދޭންވެގެންނޭ.“ ސަމްސުއްނިސާ ވާހަކަ ދައްކަމުން ގެންދިޔައީ ވަރަށް ހިތްހަމަ ޖެހުމާއި އެކުގައެވެ. ކާމިޔާބުގެ ތަޅުދަނޑި އޭނާގެ އަތަށް އަރައަރާ އޮތްކަހަލަ އިހުސާސަކާއިވެސް އެކުގައެވެ. ”އެހެންތަ؟ އައްތަ ބުނި ގޮތަށް ކަންތައް ކުރަމުން ގެންދާނަމަ ބޭނުން ކަންތައް ކާމިޔާބު ކުރާކަށް މާކަށް އުނދަގުލެއް ނުވާނެ. އައްތަ ބުނިގޮތަށް ހެދީމަ އެންމެ އުނދަގޫ ކަންތައްވެސް ތިއޮތީ ކާމިޔާބުވެފަ.“ ހަމަޖެހުމުގެ ފުން ނޭވާއެއް ލުމާއިއެކު، ބީފާނުއައްތަގެ ވާހަކައަށް ސަމްސުއްނިސާ ޖަވާބުދިނެވެ. ”އާން. ސަމްސުއަށް އައްތަ ދަސްކޮށްދީފަ ހުރި އެއްޗެއްގެ ބޭނުން މިހިފަނީ ވަރަށް ވިސްނައިގެން. ސަމްސުގެ ޙަޤީޤަތް އެކަކަށްވެސް ނޭންގޭނެ. ދެން ދަރިފުޅު ލިބުނީމަ މިކަންތައްވެސް ހުއްޓާލާނަން. އައްތަ ދީފަހުރި ފޮތްތައްވެސް އަނބުރާ އައްތައަށް ފޮނުވާލާނަން.“ ސަމްސުއްނިސާގެ ވާހަކަ ނިމުމާއިއެކު ބީފާނުއައްތަ ބާރަށް ހީގަތެވެ. ”ދަރިފުޅާ ސަމްސު، އައްތަ ބުނަންތަ ރަނގަޅު ވާހަކައެއް. ތިޔަކަހަލަ ކަންކަމަކީ، އެހާ ފަސޭހައިން ހުއްޓާލެވޭނެ ކަންކަމެއް ނޫން. އެހެން ނޫންނަމަ އައްތަމެންވެސް މިހާރު ތިކަން ހުއްޓާލައިފީމުސް. އެއްކަމެއް ކާމިޔާބު ވީމަ ދެން އަނެއްކާ އަނެއް ކަންތައް ކުރިމަތީގަ އޮންނާނެތާ ދޯ. އެހެންވީމަ އައްތަ ބުނަންދެން އިހަށް ތި ތަކެތި ސަމްސު އަތުގަ ބަހައްޓާ.“ ބީފާނުއައްތަގެ ވާހަކައަށް އެއްބަސް ވަމުން ސަމްސުއްނިސާ އޭނާއަށް ވަރަށް ބޮޑަށް ޝުކުރު އަދާކުރިއެވެ.  އައްތަ ވެދިން އެހީތެރިކަން ދުވަހަކުވެސް ހަނދާން ނައްތާނުލާނެ ކަމަށް ބުންޏެވެ. އަދި ހުރިހާ ކަމެއް ހަމައަކަށް އެޅުމުން އައްތަ މާލެއަށް ގެންނާނެ ކަމަށްވެސް ބުންޏެވެ. ސަމްސުއްނިސާ އޭނާގެ ފޯނު އަނބުރާ ބާލީސްދަށަށް ލިއެވެ. އަދި ހަމަޖެހުމުގެ ފުން ނޭވާއެއް ލިއެވެ.

• ނުނިމޭ –