ފޯނު ބޭއްވުމާއިއެކު، ހިތްހަމަ ޖެހުމުގެ ފުން ނޭވާއެއް ލިއެވެ. އެހިނދު، ލުއިލުއި ހިނިތުންވުމެއް ސަމްސުއްނިސާގެ ތުންފަތްމައްޗަށް ވެރިވެގެން ދިޔައެވެ. ހުޅުވިފައިވާ ލޮލުންވެސް ސަމްސުއްނިސާއަށް މިހާރު ފެންނަނީ، އަރުޝީއާއި އެކު އަބުރުވެރި ދިރިއުޅުމެއް އުޅޭ މަންޒަރެވެ. ކުލަ ރީތި ފިލްމެއް ފެންނަ ފަދައިންނެވެ. އަރުޝީ އޭނާގެ ވަޒީފާއިން ވަރުބަލި ކަމާއިއެކު ގެއަށް އަންނަ މަންޒަރެވެ. ސަމްސުއްނިސާގެ އަތުން ތައްޔާރު ކޮށްފައިވާ މީރު ކާނާ، އޭނާގެ އަތުން ލަވައިގެން ކާންދޭ މަންޒަރެވެ.  އަރުޝީގެ ޒަވާޖީ ޙަޔާތް ހޭދަކުރާ ގޮތުގެ ކުލަރީތި ތަސްވީރުތަކެވެ. މާމަ ދަރިފުޅުގެ އިނގިލިކުރީގައި ހިފާލައިގެން ހިނގާލަންދާ މަންޒަރެވެ. އާނއެކެވެ. އުފާވެރިކަމުގެ ކޮޅެއް ނެތެވެ. އެހެނީ ސަމްސުއްނިސާ ދެކޭގޮތުގައި އެދުވަސްތައް ދެން އޮތީ މާ ދުރަކު ނޫނެވެ. އެ ހުވަފެންތަކުގައި ކުލަޖެހުން އޮތީ ދާދި ގާތުގައެވެ. ކޮށްލަންވީ ހަމަ އެންމެ ކަމެކެވެ. ނަފީސާގެ ނޭދެވޭ ތަސްވީރެއް އަރުޝީގެ ކުރިމަތީގައި ބަހައްޓާލަންވީއެވެ. އެތަސްވީރު މިހާރު ސަމްސުއްނިސާ ވަނީ ކުރަހާވެސް ނިންމާފައެވެ. އޭރުން ފުތްޓަތްކެއް ޖަހާލާހާ އަވަހަށް އަރުޝީ އޭނާގެ އަތުތެރެއަށް އަންނާނެއެވެ. މިފަދަ އެތައް ޚިޔާލުތަކެއް ސަމްސުއްނިސާގެ ހިތަށްއަރާ ފައިބަމުން ދިޔައެވެ. ”ކޮންމެ ގޮތެއްވިޔަސް އަރުޝީއަކީ އަހަރެންގެ ދަރިއެއް ނޫންކަމަކަށް ނުވާނެ. މި ޒަމާނަކީ އެކަހަލަ ކަންކަން ނުލާހިކު ފަސޭހައިން ސާބިތުވެސް ކުރެވޭ ޒަމާނެއް. ސާބިތުކުރަން ޖެހިއްޖެއްޔާ އަހަރެން އެކަންވެސް ކުރާނަން. އޭރުން ނަފީސާ އަހަރެންނަށް އޮޅުވާލައިގެން އަހަރެން އަތުން އަރުޝީ ގެންދިޔައީ ކަމަށް ބުންޏަސް އަރުޝީ ޤަބޫލުކުރާނެ. އަރުޝީގެ ބައްޕައަށްވެސް ނަފީސާ އޮޅުވާލީކަމަށް އަހަރެން ބުނާނަން. ރަނގަޅުކަމަށް ހެދިގެން އުޅުނަސް އެއީ ވިހަގަދަ ހަރުފައެއްކަމަށް އަހަރެން އަރުޝީކައިރީގަ ބުނެދޭނަން. އޭރުން އަހަރެންނަށް އަހަރެންގެ މަޤުޞަދު ވަރަށް ފަސޭހައިން ޙާޞިލު ކުރެވޭނެ. އަރުޝީ އުފަންވީ އަހަރެންގެ ބަނޑުން. ވީއިރު، އަހަރެންގެ ޚިޔާލާ ވިސްނުން އޭނާގެ ކިބައިގަވެސް ހުންނާނެ. ލެޔާ، ލޭގެ ގުޅުމަށްވުރެ ވަރުގަދަ ގުޅުމެއް ނޯންނާނެ.“ ސަމްސުއްނިސާ އޭނާގެ ރޭވުންތައް އަމިއްލަ ނަފުސަށް އިއްވަމުން ގެންދިޔައެވެ. އެހިނދު ޝައިޠާނީ ހިނިތުންވުމެއް އޭނާގެ މޫނުމައްޗަށް ވެރިވެފައި ހުއްޓެވެ. ހަމަ އެވަޤުތު މަތިހަށި ރަނގަޅަށް ހިއްލާލުމާއިއެކު، ކަނދުރާވެސް މައްޗަށް ހިއްލާލިއެވެ. ބޮޑާވެރި ގޮތަކަށެވެ. ބަލާބެލުމަށް ހީވަނީ ރަނިކަމަނާއަކު، އޭނާގެ ތަހުތުގައި އިށީންދެ ވަޑައިގަތުމަށް ތައްޔާރުވެ ވަޑައިގެން ހެނެވެ. އެވަޤުތު ހިތްހަމަ ޖެހުމުގެ ނޭވާއެއްވެސް ލިއެވެ.

ކޮޓަރިން ބޭރަށް ނިކުމެ ބަލައިލިއިރު، އަރުޝީ އިނީ ސިޓިންގ ރޫމުގައެވެ. ފެންވަރާ ތައްޔާރު ވެލައިގެންނެވެ. އަރުޝީ މިހާރު އެއިނީ، ބޭރަށް ދިއުމަށް ތައްޔާރު ވެގެންނެވެ. ”އަރުޝީ ތައްޔާރުވީތަ. އެހެންވިއްޔާ ތި އިންނަނީ އެއްވެސް މީހެއްގެ އިންތިޒާރުގަތަ؟“ އަރުޝީ މަޑުމަޑުން ތެދުވެލިއެވެ. ސަމްސުއްނިސާގެ ސުވާލަށް ޖަވާބު ދެމުންނެވެ. ”އާން. ސާމިރު މިހާރު އަންނާނެ. އެހެންވެގެން އޭނަ ގުޅަންދެން މިއިނީ.“ އަރުޝީގެ ޖަވާބުގައިވަނީ މަޑުމައިތިރި ކަމާއި އަދަބުވެރި ކަމެވެ. އެހެނަސް އޭނާގެ އެތެރެހަށީގައި ވަނީ ޒާތެއްގެ ބިރުވެރިކަމެއް އުފެދިފައެވެ. އެކަން ސަމްސުއްނިސާއަށް ފާހަގަ ވިޔަ ނުދިނުމަށް އަރުޝީ މަސައްކަތް ކުރަމުން ގެންދިޔައެވެ. ފެންނަމުންދާ މަންޒަރުތަކުގެ ބިރުވެރިކަމުންނެވެ. އެހެނީ އަރުޝީ ވިސްނަމުން ގެންދިޔައީ، މިއަދު ނަފީސާގެ އެނދު ދަށުން ފެނުނު ޕިންތަކާއި މެދުގައެވެ. ހަމައެއާއިއެކު، ނަފީސާގެ އެންމެ ފަހުގެ ޖުމުލަތައްވެސް އަރުޝީގެ ކަންފަތަށް އިވެމުން ދިޔަކަހަލައެވެ. ގޮތް ނޭންގޭ އުނދަގޫތަކެއް ވަމުންދިޔަ ވާހަކައެވެ. އެފިކުރުތަކަށް އަރުޝީ ގެއްލިފައި އިނެވެ. އެވަޤުތު ސިއްސައިގެން ދިޔައީ ސަމްސުއްނިސާ އަނގައިން ބުނި އަޑަށެވެ. “ މިހާރަކަށް އައިސް ސާމިރު ހާދަގިނައިން އަރުޝީ ގޮވައިގެން ބޭރަށް ދެޔޭ ދޯ. އަނެއްކާ އެހެންކަހަލަ ކަމެއް އުޅެނީތަ؟“ ސަމްސުއްނިސާގެ ވާހަކައިގާ ހުރީ މައިވަންތަކަމުގެ އަމުރުވެރި ގޮތެއް އެކުލެވިފައެވެ.  އަރުޝީ ގަތީ އަމަށަކު ބިރެއް ނޫނެވެ.  ސަމްސުއްނިސާއާއި ދިމާއަށް އަރުޝީ ބަލައިލިއެވެ. ކަންބޮޑުވެފައިވާ ނަޒަރަކުންނެވެ. އެހެނަސް ސަމްސުއްނިސާގެ މޫނުމަތިން ފެންނަން ހުރީ ސަމާސާ ޒާތުގެ ހިނިތުން ވުމެކެވެ. ސަމްސުއްނިސާ އެކޮށްލީ ސަމާސާއެއްކަން އަރުޝީއަށް ވިސްނުނީ އެވަޤުތުއެވެ. އަރުޝީ ކޮންމެވެސް ވަރަކަށް ހަމަޖެހިލަން މަސައްކަތް ކުރިއެވެ. އަދި އޭނާގެ މޫނުމައްޗަށް ހިނިތުންވުމެއް ގެނައުމަށް މަސައްކަތް ކުރިއެވެ. ”ތިއެއް އެނގޭނީ ސާމިރުއަށް. ހަމަގައިމުވެސް އަހަރެންނަށް ޤަބޫލުކުރެވެނީ، އެއީ އަހަރެންގެ އެންމެ ގާތް އެކުވެރިޔާ ކަމުގަ.“ ވަރަށް ލަދުވެތި ގޮތަކަށް އަރުޝީ ޖަވާބުވެސް ދިނެވެ. ހަމަ އެވަޤުތު އިސްދަށަށްވެސް ޖަހާލެވުނެވެ. އަރުޝީގެ ޒާތީ ވާހަކަތައް ސަމްސުއްނިސާގެ ކުރިމަތީގައި ދައްކަން އަރުޝީ ޖެހިލުންވަނީ ކަންނޭންގެއެވެ. ނުވަތަ ބޭނުން ނުވަނީ ކަމަސް ވެދާނެއެވެ.  އެހެނީ ސަމްސުއްނިސާއަކީ އެފަދަ ގާތް ގުޅުމެއް އުފެދިފައިވާ ފަރާތެއް ކަމަކަށް އަދިވެސް އަރުޝީއަކަށް ޤަބޫލެއް ނުކުރެވެއެވެ.

ދެމީހުންގެ މެދުގައި ކުރިޔަށް ދިޔަ ވާހަކައަށް އިތުރު ކުރިއެރުމެއް ނުލިބެނީސް، ބޭރުން މީހަކު ސަލާމް ގޮވާލި އަޑު އިވުނެވެ. ކުޑަ އިރުކޮޅެއްގެ ތެރޭގައި ގެއަށް އައިސް އެވަނީ ސާމިރެވެ. ”އާދަކާދައިގެ މަތިން ބުނާނަމަ ސާމިރުގެ އުމުރު ވަރަށް ދިގު.“ ސަމާސާ ރާގަކަށް ސަމްސުއްނިސާ ބުނެލިއެވެ. ”އަހަރެންގެ ވާހަކަ ދެއްކާހެން ހާދަ ހީވެޔޭ.“ ސާމިރުވެސް ކޮށްލީ ސަމާސާއެކެވެ. ”އަހަރެން މި އައީ އަރުޝީ ބަލާ. ދައްތަގެ ހުއްދައަކަށް އެދެން.“ އެހެން ބުނުމާއިއެކު، ސާމިރު ބަލައިލީ އަރުޝީއާއި ދިމާއަށެވެ. ނަމަވެސް ވައްކަޅިންނެވެ. އޭނާއަށް އެބުނެވުނު އެއްޗަކާމެދު އަރުޝީ އިނީ ނުރުހިފާތޯ ބަލައިލުމުގެ ނިޔަތުގައެވެ. ޙާލަތާއި ވަޤުތުގެ ގޮތުންވެސް މެއެވެ. ”ދައްތަ ކީއްވެ ތި ދެކުދިން ބޭރަށްދާން ހުއްދަ ނުދޭންވީ؟ ސާމިރަކީ ދައްތަ ވަރަށް އިތުބާރުކުރާ ކުއްޖެއް.“ ސަމްސުއްނިސާއަށް އަރުޝީގެ ޙަޔާތުގައި އޭނާގެ މުހިންމުކަން އިހުސާސް ކުރެވުނު ކަހަލައެވެ. އެހެނީ މިފަހަރު އޭނާގެ ވާހަކައިގާ ހުރީ، މައިވަންތަކަމުގެ ހަރުދަނާ ރާގެކެވެ. މައެއްގެ ފަރާތުން ދަރިޔަކަށްޓަކާ ބަސްބުނާ ގޮތްފާޑުގަނޑެވެ. އަރުޝީގެ ބެލެނިވެރިޔާގެ ގޮތުގައި ސަމްސުއްނިސާ ބަލައިގެންފި ކަމުގެ ފަޚުރުވެރި އިހުސާސެވެ. އެހެނަސް އަރުޝީގެ މޫނުމަތިން ފެންނަމުން ދިޔައީ ހިތްހަމަ ނުޖެހުމުގެ ކުލަވަރު ތަކެވެ. އެ ހިތްހަމަ ނުޖެހުން މިފަހަރު އޮތީ ސާމިރުގެ މައްޗަށެވެ. އެހެނީ ސަމްސުއްނިސާގެ ހުއްދައަކަށް އެދުން އެއީ އަރުޝީ ކުރަން ބޭނުންކަމަކަށް ނުވީތީއެވެ. އެކަން ސާމިރުއަށްވެސް ރަނގަޅަށް އެނގެއެވެ. އެވަޤުތު އަރުޝީ ހުރީ ސާމިރުއަށް ބަލަހައްޓައިގެންނެވެ. އަރުޝީގެ ހިތުގައިވާ އެއްޗެއް ސާމިރުއަށް އެނގުނު ކަހަލައެވެ. އެހެނީ އެވަޤުތު ސާމިރުވެސް މަޑުމަޑުން އެއްލޯ މަރާލިއެވެ. ސަމްސުއްނިސާއަށް ނުފެންނާނެ ހެންނެވެ. އެހެނީ އެއީ ސަމްސުއްނިސާއާއި ކޮށްލި ސަމާސާއެއްކަން ސާމިރު، އަރުޝީއަށް އަންގާލީއެވެ. އެކަން އަރުޝީއަށްވެސް އެނގެއެވެ. އެހެންނަމަވެސް އަރުޝީއަށް އެވަރުވެސް ކަމުނުދިޔައީތާއެވެ. މާގިނައިރު ވާހަކަ ދައްކަން އަރުޝީ މަޑުކުރަން ބޭނުންނުވާކަން އޭނާގެ މޫނުމަތީގެ ޝުޢޫރުން ސާމިރުއަށް ދޭހަވިއެވެ. ދަނޑިވަޅުގެ ބޭނުންކޮށްފާ، ސާމިރު ބޭރަށް ނިކުތެވެ. އަރުޝީއަށް އަވަހަށް ދިއުމަށް ބުނެލަމުންނެވެ. ދެކުދިން ސައިކަލުގައި ދިއުމުން ހިތްހަމަ ޖެހުމުގެ ފުން ނޭވާއެއްލުމާއިއެކު، ސަމްސުއްނިސާވެސް ވަނީ އޭނާގެ ކޮޓަރިއަށެވެ.

ސާމިރު، އަރުޝީ ގޮވައިގެން ދިޔައީ އަބަދުވެސް އެދެމީހުން ކޮފީ ބޯން ދާ ރެސްޓޯރެންޓަށެވެ. އެތަނުގައި ހަމަޖެހިލުމަށްފަހު އަރުޝީ އޭނާގެ ވާހަކަ ފެށިއެވެ. ”ހޫން ދެން ބުނެބަލަ، ކޮންކަހަލަ ވާހަކައެއް ވީމަތަ އަހަރެން ގޮވައިގެން ބޭރަށް ތި އައީ؟“ އަރުޝީ ކެތްމަދުވެފާ ހުރިކަހަލައެވެ. ”އަރުޝީ ހަމަޖެހިލަ ބަލަ. އިހަށް ކޮންމެސް އެއްޗަކަށް އޯޑަރު ދޭންވީނު. ކޮފީ ބޮމުންވެސް ވާހަކަ ދެއްކޭނެތާ ދޯ.“ އަރުޝީ ކޮންމެވެސް ވަރަކަށް ހަމަޖެހެން މަސައްކަތް ކޮށްލިއެވެ. އަދި އެއްވެސް އެއްޗެއް ނުބުނެ އިރުކޮޅަކު މަޑުކޮށްލިއެވެ. ”އަނެއްކާ އަހަރެން އެހެން ބުނީމަ ހިތްހަމަ ނުޖެހުނީތަ؟“ އަރުޝީ ފާޑަކަށް ސާމިރުއާއި ދިމާއަށް ބަލައިލިއެވެ. ”ނޫން ހިތްހަމަ ނުޖެހުނީކީ ނޫން. އެއްވެސް ކަމެއްގަ ވާނުވާ ނޭންގޭތީ ކުޑަކޮން ހާސްވީ. ގޭތެރޭގެ އެއްވެސް ކަމެއްވެސް ރަނގަޅަކަށް އޮޅުމެއް ނުފިލާ. ނުވިތާކަށް އެހާ ބިރުވެރި ކަމެއް ފެންނަން އޮތްއިރުވެސް ތި އިންނަނީ ހަމަޖެހިލައިގެން. އެކަމަކު އަހަރެންގެ ހިތް ހީވަނީ ބިރުން ހަލާކުވެދާނެހެން ވިއްޔަ.“  އަރުޝީ އޭނާގެ ހިތުގެ ޝުޢޫރު އެއްނޭވާއިން އިއްވާލިއެވެ. ”ތެދުތެދަށް ބުނަންޏާ އަހަރެންވެސް އަސްލު މި އިންނަނީ ވަރަށް ބިރުން. މިހާރު އެއީ އަރުޝީ އުޅެން އެހާ ރައްކާތެރި މާހަޢުލެއްހެނެއް ހިޔެއްނުވޭ.“ ސާމިރުވެސް އޭނާ ދެކޭގޮތް ހާމަކޮށްލިއެވެ. ”ސާމިރު ބުނަން ތިއުޅޭ އެއްޗެއް އަހަރެންނަކަށް ރަނގަޅަކަށް ސާފެއްނުވި. ތި ބުނަނީ އޭނަގެ ފަރާތުން އަހަރެންނަށްވެސް ނުރައްކާ އެބަ އޮތޭތަ؟ ދެން އެހެންވިއްޔާ އެއީ ހަމަ ޙަޤީޤަތުގަވެސް އަހަރުމެން މި ހީކުރާ ކަހަލަ މީހަކީތަ؟“ އަރުޝީގެ ވާހަކައިގެ ރާގު ހުރީ، ސަމްސުއްނިސާއާއިމެދު ޝައްކު ކުރަން ބޭނުންނުވާ ކަހަލަ ގޮތަކަށެވެ. އެހެނީ އެއީ އެފަދަ ޢަމަލެއް ކޮށްފާނެ މީހެއް ކަމަކަށް އަރުޝީއަކަށް ޤަބޫލެއް ނުކުރެވެއެވެ. ޤަބޫލުކުރަން ބޭނުންވެސް ނުވަނީއެވެ. ”ސަމްސުއްނިސާ ދައްތައަކީ އެވަރުގެ ކަމެއް ކޮށްފާނެ މީހެކޭ އަހަރެންނެއްވެސް ނުބުނަމެއްނު. އެކަމަކު އަރުޝީ މަންމަގެ އެނދު ދަށުން ތި ފެނުނު އެއްޗެހީގެ ސަބަބުން އަހަރެން މި ބުނަނީ އަރުޝީއަށްވެސް ނުރައްކާ އޮވެދާނޭ. އެއީ ކޯޗެއް ކަމެއް އަދި ކާކު ކުރި ކަމެއްކަން ނުވެސް އެނގޭތާ. ދެން އަނެއްކޮޅުން އަރުޝީ ޤަބޫލުކުރަން ބޭނުން ނުވިޔަސް އެއީ އަރުޝީގެ އުފަން މަންމަ. އެހެންވިއްޔާ އޭނަ އަރުޝީއަށް އެއްވެސް ގެއްލުމެއް ދޭނެކަމަށް ވިސްނައިގެންވެސް ނުވާނެ.“ ސާމިރުގެ ވާހަކައަށް އެއްބަސްވުމުގެ ގޮތުން އަރުޝީ މަޑުމަޑުން ބޯޖަހާލިއެވެ. ”އެކަމަކު އަހަރެން ބޭނުން މިހުރިހާ ކަމެއްގެ ހަޤީޤަތް ބަލަން. އެ ޕިން ތަކަކީ ކޯޗެއްތޯ، އަހަރެންގެ މަންމަގެ ނިމިދިއުމާ ސިހުރު ހާހޫރަޔާ އެއްވެސް

ގުޅުމެއް އޮތްތޯ ބަލަންވެސް އަހަރެން ބޭނުން.“ ”އޭގެ އިތުރުން ސަމްސުއްނިސާދައްތަގެ އަސްލު ޙަޤީޤަތްވެސް ބަލަން އެބަޖެހޭ. ވަރަށް ބޮޑަށް ސޮރީ އިނގޭ މިހެން ބުނަން ޖެހޭތީވެސް. އެކަމަކު އެއީވެސް ކުރަންޖެހޭ ކަމެއްހެން އަހަރެންނަށް ހަމަ ހީވާތީ މިހެން މިބުނެލީ.“ އަރުޝީގެ އުފަން މަންމައަށް ނިސްބަތްކޮށް ބުނަން ނުޖެހޭ ކަހަލަ ވާހަކައެއް ބުނެވުނު ކަމަށް ސާމިރުއަށް ޤަބޫލުކުރެވުނެވެ. ”ނޫނޭ. މަންމަ އަބަދުވެސް ބުނާނެ އިންސާފުން ކަންތައް ކުރެވޭނީ ވަކި މީހަކަށް ނުބަލާ ކުރަން އުޅުނީމައޭ. އެހެންވީމަ އޭނަޔާމެދުވެސް ޝައްކު ކުރެވެންޏާ ބަލަންވެސް ޖެހޭނެކަމަށް އަހަރެންނަށްވެސް ޤަބޫލުކުރެވޭ.“ އަރުޝީގެ އަޑުގައިވަނީ ވަރުގަދަ ޢަޒުމެކެވެ. ކަމުގެ ޙަޤީޤަތް ރަނގަޅަށް ހޯދަން ބޭނުންވާ ކަމުގެ ޚިޔާލެވެ. އާނއެކެވެ. ނަފީސާގެ ޙަޔާތުގެ އެންމެ އާރޯ ޒަމާނުގައި އޭނާ މަސައްކަތްކުރީ ސަމްސުއްނިސާއަށް އިންސާފާއި ޙައްޤު ހޯދައިދޭށެވެ. ވީއިރު މިއަދު ނަފީސާއަށްވެސް އިންސާފު ލިބުން ޙައްޤުތާއެވެ. އަރުޝީ ބޭނުންވަނީވެސް އެގޮތެވެ. އެހެނީ ނަފީސާ ނިމިގެން އެދިޔައީ ޤުދުރަތީ މަރަކުން ނޫންކަން މިހާރު އަރުޝީއަށްވެސް ޤަބޫލުކުރެވެއެވެ. އެހެނަސް އެއީ ސަމްސުއްނިސާ ކުރިކަމެއް ކަމުގައިވާނަމަ އެކަން އޭނާ ކުރީ ކޮން މަޤުޞަދެއްގައިތޯވެސް ބަލަން ޖެހޭނެތާއެވެ. ސަމްސުއްނިސާގެ ދަރިފުޅުގެ ގެންގުޅެ ބޮޑުކުރީ ރަނެއް މަލެއް ހެނެވެ. ފުރިހަމަ ތަރުބިއްޔަތަކާއި އެކުގައެވެ. އެތައް ފުރައްސާރައަކާއި އަނިޔާތަކެއްގެ ޝިކާރައަކަށް ވެހުރެއެވެ. އެއީ ޚުދު ސަމްސުއްނިސާއަކަށްވެސް ވަންހަނާ ވެފައިވާ ކަމެއް ނޫނެވެ. އެހެންވިއްޔާ ސަމްސުއްނިސާ، ނަފީސާއަށް އެހެން ހަދާފާނެ ބާއެވެ. އަރުޝީއަށް ޤަބޫލުކުރަން ދަތިވަނީ އެ ސަބަބުތަކާއި ހެދިއެވެ. މިފަދަ އެތައް ޚިޔާލުތަކެއްގެ ތެރެއަށް އަރުޝީ ގެއްލިފާ އިނެވެ.

އަރުޝީ ސިއްސައިގެން ދިޔައީ، ސާމިރުގެ އަޑު އިވުމުންނެވެ. ”މިހާރު ކޯޗެއް ތިވިސްނަނީ؟“ ނިތް މައްޗަށް ހިއްލާލުމާއިއެކު ސާމިރު ސުވާލުކޮށްލިއެވެ. ”މި ވިސްނަނީ ދެން ކުރިޔަށް ކަންތައް ކުރާނެ ގޮތަކާމެދު. އަހަރެންނަށް ޤަބޫލުކުރަންވެސް އުނދަގޫކަމުން.“ ”ކޯޗެއް ޤަބޫލުކުރަން އުނދަގޫވަނީ؟“ ސާމިރު ސުވާލުކޮށްލިއެވެ. ”އޭނަ އެވަރުގެ ކަމެއް ކޮށްފާނެކަމަށް. ކޮންމެ ގޮތެއްވިޔަސް އެއީވެސް އިންސާނެއްތާ. އެހާ ގާތްމީހަކަށް އެހެން ހަދާފާނެބާއޭ އަހަރެންގެ ހިތަށް މިއަރަނީ. އަހަރެންމީ އޭނަގެ ދަރިއެއްކަން އޭނައަށްވެސް އެނގޭ. އެހެންވިއްޔާ އަހަރެންނަށްޓަކާވެސް  އެކަހަލަ ކަމެއް ނުކުރާނެއެއް  ނޫންތަ.“ އަރުޝީ ދެއްކި ވާހަކައާއި އެއްބަސްވާން ސާމިރު ބޭނުންވިއެވެ.  އެހެންނަމަވެސް މިޒަމާނަކީ، އެއްވެސް މީހަކު އަނެއް މީހާގެ އިހުސާސްތަކަށް ބަލާ ޒަމާނެއް ނޫންތާއެވެ. ވީއިރު ސަމްސުއްނިސާއަށް ވަކި އިތުބާރު ކުރެވޭނެ ހެއްޔެވެ؟ އޭނާގެ މާޒީގެ ޞަފްޙާތައް ހުޅުވާލުމުން އެކަން ސާބިތުވާންވެސް އެއޮތީތާއެވެ. ”އެންމެ ރަނގަޅު، އަރުޝީ ތިބުނަނީ ދޮގެއް ނޫން. އެކަމަކުވެސް އަރުޝީ ވިސްނާލަބަލަ މީގެ ކުރިން ކަންތައް ވެފަ ހުރިގޮތަށް. އަރުޝީގެ ބައްޕަޔާމެދު ކަންތައް ކުރިގޮތް، އަރުޝީ އުފަންވުމުން ދެން ކަންތައް ކުރިގޮތް.“ އަރުޝީއަށް ވިސްނައިދޭން ސާމިރު މަސައްކަތް ކުރަމުން ގެންދިޔައެވެ. ކޮންމެހެން ސަމްސުއްނިސާގެ ނޭދެވޭ ތަސްވީރެއް އަރުޝީއަށް ދެއްކުމުގެ ނިޔަތަކު ނޫނެވެ. އެހެންނަމަވެސް މީގެ ކުރިން ދުވަހަކުވެސް ފެނިފައިނުވާ މީހަކު ގެއަށް އައުމާއިއެކު ކަންތައް ވެގެންދިޔަ ގޮތަކީ ފޮރުވެން ނެތް ޙަޤީޤަތަކަށް ވީތީއެވެ. ނަފީސާގެ މަރުގެ އަސްލަކީ މިހާރު ފެންނަން ހުރި ކަންތައްތަކަކުން ވީކަމެއްނަމަ އެކަމަށް ޝައްކު ކުރެވޭނެ އިތުރު ފަރާތެއްވެސް ނެތްތާއެވެ. ވީއިރު، ކަމުގެ ޙަޤީޤަތް ހޯދާބެލުމަކީ، ނުކޮށް ދޫކޮށްލާވަރުގެ ކަމެއްވެސް ނޫންތާއެވެ. ސުވާލަކީ އެކަން ކުރާނީ ކިހިނެއް ބާއެވެ. ސަމްސުއްނިސާގެ ޙަޤީޤަތް ފަޅާއަރާނީ ކިހިނަކުން ބާއެވެ. ”މިހާރު ސާމިރު ތިވިސްނަނީ ކޮންކަމަކާ؟“ އަރުޝީ ވަރަށް ހައިރާންވެ އިނދެ ސާމިރުއާއި ސުވާލު ކޮށްލިއެވެ. ސާމިރު އޭނާ ވިސްނަމުން ގެންދިޔަ ކަންތައް އަރުޝީއަށް ކިޔައިދިނެވެ. އަރުޝީވެސް އެކަން ޤަބޫލުކުރިއެވެ.

އެކި ގޮތްގޮތަށް ޚިޔާލު ބަދަލުކުރުމަށްފަހު، އަރުޝީ އިސްނަގައިގެން ސަމްސުއްނިސާއާއި ވާހަކަ ދެއްކުމަށް ނިންމިއެވެ. ކަމުގެ ނުރައްކާތެރިކަން އެނގިހުރެމެއެވެ. ސަމްސުއްނިސާގެ ބޮލުގައި އެޅުވެނީ ދޮގު ތުހުމަތެއް ކަމުގައިވާނަމަ ދެން ނިކުންނާނެ ނަތީޖާވެސް އެނގިހުރެމެއެވެ. އެހެނީ ސަމްސުއްނިސާ ދަޢުވާއެއް ކޮށްފިނަމަ އޭގެ ނަތީޖާ ހިތިވާނެކަންވެސް އަރުޝީއަށް އެނގެއެވެ. އެހެންވިޔަސް ވަރިހަމަ ކަމަށް އަރުޝީ އެއްބަސްވިއެވެ. އެހެނަސް މަކަރާއި ހީލަތުން އެއްވެސް ކަމެއް ކުރިޔަށް ގެންދާކަށް އަރުޝީ ބޭނުމެއް ނޫނެވެ. އިސްކުރަން ބޭނުންވަނީ ތެދުވެރިކަމާއި އިހުލާސްތެރިކަމެވެ. ސާމިރުގެ ހިތް ބިރުގަނެއެވެ. އެހެނީ އަރުޝީއަށް އެއްވެސް ކަހަލަ ގެއްލުމެއް ލިބޭކަށް ސާމިރު ބޭނުމެއް ނޫނެވެ. އަރުޝީއާއި ބެހޭގޮތުން ނޭދެވޭ އެއްވެސް ވާހަކައެއް އޭނާގެ މައިންބަފައިންނާއި ހަމައަށް ދިޔުމަކީވެސް ސާމިރު ބޭނުންވާނެ ކަމެއް ނޫންތާއެވެ. އެހެނީ، އެހެންވެއްޖެނަމަ ސާމިރުގެ ހަޔާތަށް އަރުޝީ ގެނައުމަކީ ދަތިކަމަކަށް ވާނެއެވެ. އެމީހުންގެ ރުހުން ލިބުމަކީވެސް ވުމަށްވުރެ ބޮޑަށް ނުވުމާއި ގާތުގައި ވާނެކަމެކެވެ. އެހެނަސް އަރުޝީ ވިސްނުން މިވަޤުތު ހުރީ އޭނާގެ ޙަޔާތް ބާއްޖަވެރި ކުރުމަކަށް ނޫނެވެ. އެއާއި ޚިލާފަށް އޭނާގެ މަންމައަށް އިންސާފު ހޯދައިދިނުމަށެވެ.

އަރުޝީ ގެއަށް ދިޔައިރު، ސަމަސުއްނިސާ ފެންނާކަށް ނެތެވެ. ކޮންމެވެސް ވަރަކަށް ދެކޮޅު ބަލައިލުމަށްފަހު، ސަމަސުއްނިސާގެ ކޮޓަރިއާއި ދިމާއަށް އަރުޝީ މިސްރާބު ޖެހިއެވެ. ކޮޓަރިއާއި ކައިރިވެލިއިރު، ސަމްސުއްނިސާ ކޮންމެވެސް މީހަކާއި ވާހަކަދައްކާ އަޑުއިވުނެވެ. އަރުޝީއަށް ލިބުނީ ހައިރާން ކަމެކެވެ. އެހެނީ އެގޭގައި އުޅެނީ އެދެމީހުން އެކަންޏެވެ. އަރުޝީއަށް އެނގިފައިވާ ގޮތުގައި ސަމްސުއްނިސާއަކީ ފޯނެއްވެސް ގެންގުޅޭ މީހެއް ނޫނެވެ. އެހެންވީއިރު، ސަމްސުއްނިސާ އެވާހަކަ ދައްކަނީ ކާކުއާއި ބާއެވެ؟ އެވިސްނުމުގައި ހުރެ، އަރުޝީ މަޑުމަޑުން ކޮޓަރިއާއި ކައިރިވެލިއެވެ. ދޮރުވެސް ހުރީ ކޮންމެވެސް ވަރަކަށް ހުޅުވިފައެވެ. ކޮޓަރިތެރެއިން ފެނުނު މަންޒަރު ޤަބޫލުކުރަން އަރުޝީއަށް އުނދަގޫވިއެވެ. އެހެނީ ސަމްސުއްނިސާ އިނީ ފޯނެއް ކަންފަތުގައި ޖަހައިގެން މީހަކާ ވާހަކަ ދައްކާށެވެ. ”އަނެއްކާ އެ އެއްޗެހި އެތާ ހުރެގެން މަގޭ އަރުޝީއަށް އެއްވެސް ގެއްލުމެއް ލިބިދާނެބާ ބީފާނުއައްތާ؟ މިހާރުދެން އެތަކެތި އެތަނުން ނެގިޔަސް އެންމެ ރަނގަޅުތަ އައްތާ؟ އެފަކީރަށް ގޮތެއް ވެއްޖެއްޔާ އަހަރެން ދާނީ ކޮންތާކަށް؟ އަދި މިއުޅެނީ އަހަރެން މިއީ އޭނަގެ މަންމަކަންވެސް އެމަންޖެއަށް ބުނެނުދީ.“ ސަމްސުއްނިސާ ދެއްކި ވާހަކަ އަޑުއިވިފައި، އަރުޝީގެ މޭގަނޑު އަނގަޔަށް އަންނަވަރު ވިއެވެ. ހަމައެވަޤުތުމެ ސާމިރުއަށް ގުޅަން ބޭނުންވިއެވެ. އެހެންނަމަވެސް އަރުޝީ އެތަނުގައި ހުރިކަން ސަމްސުއްނިސާއަށް އެނގިދާނެކަމުގެ ބިރުވެސް އަރުޝީގެ ހިތުތެރޭގައި އޮތެވެ. ހަމައެހެންމެ އަރުޝީއަށް ރޮވޭގޮތްވެސް ވިއެވެ. އެހެނީ އެފަދަ މީހެއްގެ ބަނޑުން އަރުޝީ އުފަންވުމަކީ އެނާއަށް ބަލައިގަންނަން އުނދަގޫވި ކަމަކެވެ. އެހެންނަމަވެސް ފޯނުގެ އަނެއްކޮޅުން ސަމްސުއްނިސާއާއި ވާހަކަ ދައްކަމުން ދިޔަ މީހަކު ބަލަން އަރުޝީ ބޭނުންވިއެވެ. އެއީ ކޮން ބީފާނުއައްތައެއް ބާއެވެ؟ ކޮންތަނެއްގެ މީހެއް ބާއެވެ؟ ސަމްސުއްނިސާ އަތުގައި ފޯނެއް އޮތްއިރު މީގެ ކުރިން އެކަން އަރުޝީއަށް ނޭންގުނީ ކީއްވެގެން ބާއެވެ. އެވާހަކަ ޚުދު ސަމްސުއްނިސާ އަރުޝީ ކައިރީގައި ނުބުނީ ކީއްވެބާއެވެ؟ ހަމަ ޙަޤީޤަތުގައިވެސް ނަފީސާގެ މަރުގެ ފަހަތުގައިވަނީ ސަމްސުއްނިސާ ބާއެވެ؟ ހައްތަހާވެސް ސުވާލެވެ. ޖަވާބު ލިބެންޖެހޭނެ އެތައް ސުވާލެކެވެ. އެހެންނަމަވެސް ކޮންމެ ފިޔަވަޅެއްވެސް އަޅަން ޖެހޭނީ ވަރަށް ވިސްނައިގެންކަން އަރުޝީއަށް އެނގެއެވެ. އެހެނަސް އެޚިޔާލުތަކުން ދުރަށްޖެހިލުމާއިއެކު، އަރުޝީ އޭނާގެ މޯބައިލް ފޯނު ނެގިއެވެ. އަދި ސާމިރުއަށް މެސެޖެއް ކޮށްލިއެވެ. އެވަޤުތު ކަން ހިނގަމުން ދާގޮތުގެ މަޢުލޫމާތު ސާމިރުއަށް ދިނުމުގެ ބޭނުމުގައެވެ. ބީފާނުއައްތަގެ ވާހަކަވެސް ސާމިރުއަށް ކިޔައިދިނެވެ. އެއީ ކޮންތަނެއްގެ ކާކުތޯ ބަލާނެ ގޮތަކާއިމެދު މަޝްވަރާވެސް ކޮށްލިއެވެ. އެވަޤުތު އަރުޝީ ހުރީ ކޮޓަރީގެ ދޮރާއި ނިވާވެގެންނެވެ. އޭނާ އެތަނުގައި ހުރިކަން ސަމްސުއްނިސާއަށް އެނގިދާނެ ކަމުގެ ބިރަށެވެ. ސާމިރު އިރުޝާދު ދިނީ، ކޮންމެ ޙާލަކާއި ލައިގެންވެސް ސަމްސުއްނިސާ ދައްކަމުންދިޔަ ވާހަތައް ރަނގަޅަށް އަޑުއެހުމަށެވެ. އެހެންކަމުން އަރުޝީގެ އެއްކަންފަތް ހުރީ ސަމްސުއްނިސާއަށްޓަކާ ހުސްކޮށްލައިގެންނެވެ. އަރުޝީއަށް އެއީ އެހާ ރައްކާތެރި ކަމެއް ނޫންކަން ރަނގަޅަށް އެނގި ހުރެމެއެވެ.

ސާމިރުއަށް މެސެޖުކޮށް ނިންމާލުމަށްފަހު، އަރުޝީ އަނެއްކާވެސް ސަމާލުކަން ދިނީ ސަމްސުއްނިސާއަށެވެ. އޭނާގެ ވާހަކަ ނިމުމާއިއެކު، ފޯނު ކަންފަތުން ދުރަށް ޖައްސާލިއެވެ. އަދި ފޯނަށް ބަލައިލުމަށްފަހު، ލުއިލުއި ހިނިތުން ވުމަކުން މޫނުމައްޗަށް އުފާވެރިކަން ގެނުވިއެވެ. އެއަށްފަހު، ވަރަށް މަޑުމައިތިރި ކަމާއިއެކީ ފޯނު ބާލީސަދަށަށް ލިއެވެ. ހަމަޖެހުމުގެ ފުންނޭވާއެއް ލުމާއިއެކު، ކޮޓަރިން ބޭރަށް ނިކުތުމަށް ހިނގައިގަތެވެ. އަރުޝީ ދުވެފައި ކަހަލަ ގޮތަކަށް އެތަނުން ދުރަށްގޮސް ސިޓިންރޫމުގެ ސޯފާގައި އިށީންދެލިއެވެ. ސަމްސުއްނިސާއަށް އަރުޝީ އިށީންދެގެން އިންތަން ފެނުމުން އޭނާގެ ކައިރިއަށް އައެވެ. އަދި ވަރަށް މަޑުމައިތިރިކޮށް އަރުޝީ ކައިރީގައި އިށީންދެލިއެވެ. އަރުޝީ އިނީ ވަރަށް ޖެހިލުންވެފައެވެ. މަޑުމަޑުން ދުރަށް ޖެހިލަންވެސް މަސައްކަތް ކޮށްލިއެވެ. އެހެނަސް ވަރަށް ނޭންގެ ގޮތަށެވެ. ”ކޮންއިރަކު ގެއަށް އައީ؟ ދައްތައަކަށް ނުވެސް އެނގޭ. ކީއްވެ ގޮވާނުލީ؟“ ސަމްސުއްނިސާ ވާހަކަ ދައްކަމުން ދިޔައިރު އަރުޝީގެ ގައިގާ އަތްޖައްސާލަން ބޭނުންވާކަހަލަ ޢިޝާރާތެއް ކޮށްލިއެވެ. އެހެންނަމަވެސް އަތެއް ނުލައެވެ. އަރުޝީ ނުރުހިދާނެ ކަމުގެ ބިރަށް ކަމަށްވެސް ވެދާނެއެވެ. މީގެ ކުރިންވެސް އެކަހަލަ ބަސްތައް އަރުޝީގެ ދުލުން ބުނެވިފައި ހުރުމުން ކަމަށްވެސް ވެދާނެއެވެ. ”އިރުކޮޅެއް ވެއްޖެ އައިތާ. ފެންނަށް ނެތީމަ ހިތަށްއެރީ މިތާ މަޑުކޮށްލާނީއޭ.“ އަރުޝީ ވާހަކަދައްކަމުން ގެންދިޔައިރުވެސް ހިތްބުނަމުން ގެންދިޔައީ ސީދާސީދާ ސުވާލު ކުރުމަށެވެ. އެހެނީ އަރުޝީ މިހާރު އެއިނީ ކެތް މަދުވެފައެވެ. އިރުކޮޅަކު އިނުމަށްފަހު، ބޭއިޚްތިޔާރުގާ އަރުޝީއަށް ސުވާލެއް ކޮށްލެވުނެވެ. ސުވާލު ކޮށްލުމުގެ އިޒުނައަށް އެދުމަކާއިވެސް ނުލައެވެ. ”ދެން އެހެންވިއްޔާ އަހަރެންގެ މަންމަ އިތުރު ކައިވެންޏެއް ކުރިތަ؟“ އަރުޝީގެ ދުލުން އެސުވާލު ކުރެވުނީ ކީއްވެގެން ކަމެއް ޚުދު އަރުޝީއަކަށްވެސް ނޭންގުނެވެ. އެހެންނަމަވެސް އަރުޝީގެ އެސުވާލުން ސަމްސުއްނިސާ ދިޔައީ ސިއްސައިގެންނެވެ.

• ނުނިމޭ –