ސަމްސުއްނިސާއަށް ބުނާނެ އެއްޗެއްވެސް ނޭންގުނު ކަހަލައެވެ. އެހެނީ، އޭނާއަށް އެނގިފައި އޮތްގޮތުގައި ނަފީސާގެ މާޒީގެ އެ ޞަފްޙާތަކަކީ، އަރުޝީގެ ކުރިމަތީގައި ނުހުޅުވާ އޮތް ބާބެކެވެ. އެހެނީ އެކަން އެނގިއްޖެނަމަ، އަރުޝީގެ ހިތުގައި އެތައް ސުވާލުތަކެއް އުފެދޭނެއެވެ. ނަފީސާއަކީ ދުވަހަކުވެސް ދަރިޔަކު ލިބިފައިނުވާ އަންހެނެއްކަންވެސް އަރުޝީއަށް އަނގޭނެއެވެ. އަރުޝީގެ ހިތުގައި ނަފީސާއާއި މެދު ނަފުރަތު އުފެދުމަކީވެސް އެކަށިގެންވާ ކަމެކެވެ. އަދި ނަފީސާއަކީ އަރުޝީގެ އުފަން މަންމަ ނޫންކަންވެސް އަރުޝީއަށް އެނގިގެން ދާނެއެވެ. އެހެނަސް ކަންވެގެން ގޮސްފައި އެވަނީ ސަމްސުއްނިސާ ވިސްނި ގޮތާއި މުޅިން ޚިލާފަށެވެ. އެހެނީ، ނަފީސާގެ އެފަދަ ޙަޤީޤަތެއް އެނގިގެން ދިޔައިރުވެސް އަރުޝީގެ ހިތުގައި، ނަފީސާއަށްޓަކާ ޒައްރެއްގެ މިންވަރަށްވެސް ނަފުރަތެއް ނެތެވެ. ”އަހަރެން އަރުޝީޔާ މެދު ފަޚުރުވެރިވަން.“ ސިއްސައިގެން ދިޔަ ކަހަލަ ނަޒަރަކުން އަރުޝީ، ސަމްސުއްނިސާއާއި ދިމާއަށް ބަލައިލިއެވެ. ”އަނެއްކާ އަހަރެން ކީއްކުރީ؟“ ހައިރާނުގެ ރާގަކަށް އަރުޝީ ސުވާލު ކޮށްލިއެވެ. ދެލޯ ބޮޑުކޮށް ވައްކަޅިން ބަލައިލުމާއި އެކުގައެވެ. ”އަހަރެންނަށް މިހެން މި ބުނެވުނީ އަސްލު ކީއްވެގެން ކަމެއް ޚުދު އަހަރެންނަކަށްވެސް ބުނެދޭކަށް ނޭންގެ. އެކަމަކު އަހަރެންނަށް ވިސްނޭ ގޮތުގަ އަރުޝީ މަން…މަންމަގެ އެވަރުގެ ޙަޤީޤަތެއް އަރުޝީއަށް ކޮންމެސް ގޮތަކުން ތިއޮތީ އެނގިފަ. އެކަމަކުވެސް އަރުޝީ އެކަމާ ރުޅިއައިސް ނޫނީ ހިތްހަމަ ނުޖެހިފަ ހުރިހެނެއް ހިއެއް ނުވޭ. މިހާތަނަށް ޖެހެންދެން އެކަން ސިއްރުކޮށްފަ އޮތްއިރުވެސް.“ ސަމްސުއްނިސާގެ ވާހަކައިން އަރުޝީއަށް އެންމެ ބޮޑަށް ފާހަގަވީ ތަންކޮޅާއިމެދު  ވިސްނާލިއެވެ.  އެއީ، ސަމްސުއްނިސާގެ ދުލުން ނަފީސާއަށް ނިސްބަތްކޮށް ’މަންމަ‘ އެ ލަފުޒު ކިޔަން އުނދަގޫވިކަމެވެ. އެހެންނަމަވެސް އެކަމާއި ގުޅުވައިގެން އަރުޝީ އެއްވެސް އެއްޗެކޭ ބުނާކަށް ގަސްތެއް ނުކުރިއެވެ. އެހެނެއްކަމަކު ސަމްސުއްނިސާއާއި ދައްކަން ބޭނުންވި ވާހަކަ ކުރިއަށް ގެންދިއުމަށް އަރުޝީ ގަސްތުކުރިއެވެ. ”އަހަރެންގެ މަންމަ އަހަރެންނަކަށް އެއްވެސް އެއްޗެއް ސިއްރެއް ނުކުރޭ. މަންމަޔާ ބެހޭގޮތުން އަހަރެންނަށް ނޭންގޭ އެއްވެސް އެއްޗެއް ނޯންނާނެ. އަދި ތީކާކޫކަންވެސް އަހަރެންނަށް މިހާރު ހަމަ ރަނގަޅަށް އެނގޭ.“ އަރުޝީގެ އެންމެ ފަހު ޖުމްލަ ބުނުމާއިއެކު ސަމްސުއްނިސާގެ މެއަށް ހީވީ ހޫނުފެން އެއްޗެއް އޮއްސާލިހެންނެވެ. ހަމަ އެހެންމެ އެހާ ބާރަށް ފުންމައިގެން ތެދުވިއެވެ. ގަނޑުވެފައިވާ ކަހަލަ ގޮތަކަށް އަރުޝީއާއި ދިމާއަށް ބަލަހައްޓައިގެން ސަމްސުއްނިސާއަށް ހުރެވުނީއެވެ.

އެވަޤުތު ސަމްސުއްނިސާ ސިއްސައިގެން ދިޔައީ، އަރުޝީގެ ފޯނު ރިންގުވާންފެށި އަޑަށެވެ. އަރުޝީވެސް ފާޑަކަށް ތެޅިގަތްފާ ފޯނާއި ދިމާއަށް ބަލައިލިއެވެ. އެގުޅަނީ ސާމިރުއެވެ. އަރުޝީ ފޯނަށް ޖަވާބުދޭން ތައްޔާރުވިއެއްކަމަކު، އޭނާގެ ކަޅި ހުއްޓިފާ ހުރީ ސަމްސުއްނިސާއާއި ދިމާއަށެވެ. ނަފުރަތުގެ ނަޒަރަކުން ބަލާ ޒާތަކަށެވެ. ”ސާމިރު، މިގަޑީގަ މިގެއަށް އާދެވިދާނެތަ؟“ އަނެއްކޮޅުން ސާމިރު ޖަވާބުދިނުމާއިއެކު އަރުޝީ ފޯނު ކަނޑާލިއެވެ. އޭރުވެސް އަރުޝީގެ ނަޒަރު އިތުރު އެހެން ދިމާއަކަށް ނުދެއެވެ. ސަމްސުއްނިސާއަށް ހުރެވުނީ ވާނުވާ ނޭންގޭ ޙާލުގައެވެ. އެހެންނަމަވެސް އޭނާ ބޭނުންވީ އަރުޝީއަށް ދަރިފުޅާއޭ ކިޔާ ގޮވާލާށެވެ. އެހިނދު އޭނާގެ ފިޔަވަޅު ކުރިޔަށް ޖައްސާލަން މަސައްކަތްވެސް ކުރިއެވެ. އެހެންނަމަވެސް އަރުޝީގެ ލޯމަތިން ފެންނަން ހުރީ މުޅިން އެހެން މަންޒަރެކެވެ. އެއީ އޭނާގެ އުފަން މަންމަކަން އެނގިހުރެވެސް އެއްވެސް ކަހަލަ ކުލުނެއް އޭނާގެ ހިތުގައި ނެތްކަން ސަމްސުއްނިސާއަށް ވިސްނުނެވެ. އެހުރިހާ ކަމަކަށް ވިސްނާލުމާއިއެކު، ސަމްސުއްނިސާ އެއްފިޔަވަޅު ފަހަތަށް ޖައްސާލިއެވެ. އަރުޝީދެކެ އެހާ ޖެހިލުމެއް  އެވެވެނީ ކީއްވެގެން ކަމެއްވެސް ޚުދު ސަމްސުއްނިސާއަކަށް ނޭންގުނެވެ. ކަންކުރެވިފާ އޮތްގޮތުން ބާވައެވެ. ނޫނީ އަރުޝީގެ ހިތުގައި ނަފީސާއަށް އޮތް ކުލުނު ސަމްސުއްނިސާއަށްޓަކާ ނޯވެދާނެ ކަމަށް ވިސްނާފަ ބާވައެވެ. ކަންއޮތީ ކޮންމެ ގޮތަކަށް ކަމަށްވިޔަސް ސަމްސުއްނިސާ އަދިވެސް އެހުރީ ވާނުވާ ނޭންގޭ ޙާލުގައެވެ. އޭނާ ކަންކުރަން ވިސްނިގޮތާއި ޚިލާފަށް ހުރިހާ ކަމެއް ދާހެންވެސް ސަމްސުއްނިސާއަށް ހީވާން ފެށިއެވެ.

އެފަދަ ވިސްނުމެއްގައި ހުއްޓާ، ކުއްލިޔަކަށް ސާމިރު އައިސް ގެއަށް ވަނެވެ. އަދި އަރުޝީއަށް ގޮވާލިއެވެ. އަރުޝީއަށް ކުއްލިޔަކަށް ރޮއެގަނެވުނެވެ. ވަރަށް ބާރަށެވެ. ހީވާގޮތުން އެއީ އެތައް ދުވަހެއް ވަންދެން އޭނާގެ އެތެރޭގައި ފޮރުވައިގެން ހުރި ވޭނާއި އާހުތެކެވެ. ކުއްލިޔަކަށް ސާމިރު ކަންބޮޑުވާ ގޮތްވިއެވެ. އަރުޝީ ރޯނީ ސަމްސުއްނިސާގެ ސަބަބުންކަމަށް ސާމިރުއަށް ހީވިއެވެ. އެހެނަސް އެއްވެސް އެއްޗެކޭ ނުބުނެ ސާމިރު މަޑުކޮށްލިއެވެ. ކޮންމެގޮތެއް ވިޔަސް އެއީ އަރުޝީގެ މަންމައެވެ. އެގުޅުމަށް އިހުތިރާމުކުރަން ސާމިރުއަށް އެނގެއެވެ. އެހިނދު،

ބޭއިޚްތިޔާރުގައި ސަމްސުއްނިސާގެ ދުލުން ނިކުތީ ހަމަ އެންމެ ލަފުޒެކެވެ. ”ދަރިފުޅާ.“ ކަންބޮޑުވެފައިވާ ގޮތަކަށް ސަމްސުއްނިސާ، އަރުޝީއަށް ގޮވާލިއެވެ. ހަމަ އެވަޤުތު އަރުޝީއާއި ދިމާއަށް އަތްދިއްކޮށްލުމާއިއެކު އޭނާގެ ކައިރިޔަށް ދިޔުމަށް ހިނގައިގަތެވެ. އެމަންޒަރު ފެނިފައި އަރުޝީއަކަށް ކެތެއް ނުވިއެވެ. ”ޚަބަރުދާރު، އަހަރެން ކައިރިއަށް އައިސްގެން ނުވާނެ. އެންމެ ފިޔަވަޅެއްވެސް ތިއަށްވުރެ އިތުރަށް ނުނަގާތި. ހަމަ މިހާރު ތިހުރިތާ ހުރޭ.“ އަރުޝީގެ އެޖުމުލަތަކުން ސަމްސުއްނިސާގެ މުޅި ހަށިގަނޑު ޒަޚަމް ކޮށްލިކަހަލައެވެ. މުޅި މީހާ ތުރުތުރު އަޅަން ފެށިއެވެ. ހަމަ އެވަޤުތު ސަމްސުއްނިސާއަށް އޭނާގެ ފައިކޮޅުން ވާގިދާހެން ހީވިއެވެ. އެހެނީ އޭނާ ހުރިދިމާއިން ބިންމައްޗަށް ތިރިވިއެވެ. ސާމިރު އޭރުވެސް ހުރީ އަރުޝީ ކައިރީގައެވެ. ދުލުން އެއްވެސް އެއްޗެއް ނުބުނެއެވެ. އެހެނަސް ސާމިރުގެ ބެލުން ހުރިގޮތުން ހީވަނީ ސަމްސުއްނިސާއާއި ދިމާއަށް ލައްކަ އެއްޗެހި ބުނެލަން ބޭނުންވެފާ ހުރިހެންނެވެ. ”ދަރިފުޅާ، މީ ދަރިފުޅުގެ މަންމަ، މި މަންމަދެކެ ދަރިފުޅު ތިހާ ނަފުރަތެއް ތިކުރަނީ ކީއްވެގެންތަ؟ އަހަރެންގެ ކުށަކީ ކޮބައިތަ؟ އަހަރެންނަށް އޭރުވެސް އެނގޭ ނަފީސާ އަހަރެންނަށް ހަދާނީ އެހެންކަން. އެ ނަފީސާޔާހެދި އަހަރެންގެ މުޅި ދިރިއުޅުން އޭރުވެސް ބަރުބާދުވީ، ދެންވެސް އެދިޔައީ އަހަރެންގެ ދަރިފުޅުގެ ހިތުގަ އަހަރެންނަށްޓަކާ ނަފުރަތު އުފައްދާފަ. އެއީ ހާދަ ވިޔާނުދާ އަންހެނެކޭ.“ ބިންމައްޗަށް ތިރިވި ގޮތަށް ދެއަތް ވިއްދައިގެން އިނދެ ސަމްސުއްނިސާ ރޮމުން ގިސްލަމުން ވާހަކަ ދައްކަމުން ގެންދިޔައެވެ. އޭރުވެސް އަރުޝީގެ ރުއިމަކަށްވެސް ހުއްޓުމެއް ނާދެއެވެ. އެހެންނަމަވެސް ސަމްސުއްނިސާގެ ދުލުން ނަފީސާއަށް ބަދުބަސް ބުނި އަޑު އިވިފާ އަރުޝީގެ ރުޅިގަނޑު އިތުރަށް ގަދަވިއެވެ. ”އަހަރެންގެ މަންމަޔަކީ ވިޔާނުދާ އަންހެނެއް ނޫން. ވިޔާނުދާ އަންހެނަކީ ތީ.“ އެހެން ބުނުމާއިއެކު އަރުޝީގެ އަތް ސަމްސުއްނިސާއާއި ދިމާއަށް ދިއްކޮށްލިއެވެ. އެވަޤުތު ސާމިރު މަސައްކަތްކުރީ އަރުޝީ ކޮންޓްރޯލު ކުރާށެވެ. އޭނާގެ ރުޅި މައިތިރި ކުރުވާށެވެ. އެހެންނަމަވެސް އަރުޝީ ހުރީ މައިތިރިވާ ކަހަލަ ވިސްނުމެއްގައެއް ނޫނެވެ. ”އަހަރެންނަށް އެނގޭ ތީ އަހަރެންގެ އުފަން މަންމަކަން. އެކަން އަހަރެންނަށް އެނގުނީކީ މިއަދަކު ނޫން. މަންމަ ނިޔާވި ދުވަސް ނޫން އަނެއް ދުވަހު އަހަރެންނަށް އެކަން އެނގިއްޖެ.“ އަރުޝީގެ ގިސްލުމަކަށް ބަދަލެއް ނާދެއެވެ. ”އެކަމަކު އަހަރެން ބޭނުންވީ ކަމުގެ ޙަޤީޤަތް ރަނގަޅަށް ބަލަން. އަހަރެން ހުރީ ތީ އަހަރެންގެ މަންމަގެ ގޮތުގަ ބަލައިގަންނަންވެސް ތައްޔާރަށް. ކޮންމެ ގޮތެއްވިޔަސް މަންމަ ވާނީ މަންމަކަމަށް އަހަރެންވެސް ޤަބޫލުކުރަން. އެކަމަކު ތީ މަންމަ ކިޔާވަރުގެ މީހެއްނޫން.“ އަރުޝީގެ އަޑު ދިޔައީ ޖުމުލައަކަށްވުރެ ޖުމުލައެއް ބާރުވަމުންނެވެ. ”އަރުޝީ އަހަރެންދެކެ ތިހާ ރުޅިއެއް ތި އަންނަނީ ކީއްވެގެންތަ؟ އަހަރެން ކީއްތަ ކުރީ؟ ހުރިހާ ނުބައެއްވެސް ހެދީ އެ ނަފީސާ.“ ސަމްސުއްނިސާ ވާހަކަދައްކަމުން ގެންދިޔައީ އާދޭހުގެ ރާގަކަށެވެ. އަމިއްލަ ނަފްސު ސަލާމަތްކޮށް ހުރިހާ ތުހުމަތެއް ނަފީސާގެ ބޮލުގައި އަޅުވަމުން ގެންދިޔައެވެ. ”މަންމަ އެއްވެސް ނުބައެއް ނުހަދާ. ހުރިހާ ގޯހެއްވެސް ހެދީ….“  ”ނިކަން އަހަރެން ދައްކާ ވާހަކަވެސް ނިކަން އަޑުއަހާލަބަލަ.“ އަރުޝީގެ ޖުމުލަ ނުނިމި އުޅެނިކޮން ސަމްސުއްނިސާ އާދޭސް ކުރަން ފެށިއެވެ. ”އެންމެ ރަނގަޅު، ތިބުނަން އުޅޭ ވާހަކައެއް ބުނެބަލަ. މަންމަގެ ޙަޤީޤަތް ތި ދުލުންވެސް އަޑު އިއްވާލަން ފުރުޞަތު ދޭނަން. އެކަމަކު ބުނާ އެއްޗެއް ބުނަންވާނީ އެއްވެސް ދޮގަކާނުލާ.“ އަރުޝީ، ސަމްސުއްނިސާއަށް ދިން ފުރުޞަތަކީ އޭނާއަށް ހިތްވަރެއް ލިބިގެން ދިޔަކަމަކަށް ވިއެވެ. ހަމަ އެވަޤުތު ހިތްވަރުކޮށްލާފައި ކޮޅަށް ތެދުވިއެވެ. އަދި ކައިރީގައި ހުރި ގޮނޑީގައި މަޑުމަޑުން އިށީންދެލިއެވެ. ކޮންމެވެސް ވަރަކަށް ވެއްޓެން އުޅޭކަހަލަ ގޮތަކަށް އަރިވެސް އަޅާލިއެވެ. އެވަޤުތު އެހީތެރިކަމުގެ އަތެއް ދިއްކޮށްލަންވެސް އަރުޝީ ބޭނުންވިއެވެ. އެހެންނަމަވެސް އެކަން ނުދައްކަން އަރުޝީ މަސައްކަތްވެސް ކުރިއެވެ.

އާނއެކެވެ. ސަމްސުއްނިސާގެ ޙަޤީޤަތް އެނގުނެއްކަމަކު އެއީވެސް އިންސާނެއްކަން އަރުޝީވެސް ޤަބޫލުކުރެއެވެ. ކޮންމެ ގޮތެއްވިޔަސް އެއީ އަރުޝީގެ އުފަން މަންމައެވެ. ސަމްސުއްނިސާގެ ފަރާތުން މައިވަންތަކަމުގެ ކުލުނަކަށް އަރުޝީ އުންމީދެއް ނުކުރެއެވެ. އެހެނަސް އިންސާނިއްޔަތުކަން އޮންނާނެތާއެވެ. އަރުޝީގެ ކުރިމަތީގައި އެއްވެސް މީހަކު އެފަދަ ޙާލެއްގައި އުޅޭތަން ދެކޭހާ ހިތްވެސް ގަދައެއް ނޫނެވެ. އަރުޝީއަށް ސަމްސުއްނިސާގެ އެފަދަ ޙާލަތެއް ދެކެން ކުޅަދާނަ ނުވީ، އެސަބަބަށްޓަކާ ކަމަށްވެސް ވެދާނެތާއެވެ. އެވަޤުތު ސާމިރުވެސް އަރުޝީއާއި ދިމާއަށް ބަލައިލިއެވެ. އޭނާއަށްވެސް އެމަންޒަރު ދެކެން އުނދަގޫވީއެވެ. އެވަޤުތު އަރުޝީ ވިސްނާނެ ގޮތްވެސް ސާމިރުއަށް އިހުސާސް ކުރެވުނީއެވެ. ކޮންމެއަކަސް، ސަމްސުއްނިސާ އިށީންދެ ހަމަޖެހިލަންދެން އެ ދެމީހުންވެސް މަޑޫކޮށްލިއެވެ. ސަމްސުއްނިސާ ތެދުވެ ހަމަޖެހިލިއެވެ. އަދި ފުން ނޭވާއެއްލިއެވެ. ވަރުބަލިވެފައިވާ ޒާތަކަށެވެ. ”ދެން ދައްކަން އުޅޭ ވާހަކައެއް ދައްކަބަލަ. އަހަރެން މިހުރީ އަޑުއަހަން. އެކަމަކު ތަކުރާރުކޮށް މިބުނަނީ އެއްވެސް ދޮގެއް ހިމެނިގެން ނުވާނެ.“ އަރުޝީގެ އަޑުގައި މިހާރުހުރީ މަޑުމައިތިރި ގޮތެކެވެ. އެހެނަސް ރާގަކަށް ބަދަލެއް ނާދެއެވެ. އަރުޝީ މިހާރު އެހުރީ ފިސާރި ކެރިގެން ކުރިމަތިލާން ތައްޔާރަށެވެ. ދެފައިމައްޗަށް ހަމައަށް ކޮޅަށް ތެދުވެލުމާއިއެކު ހަށަން ބަނދެލިއެވެ. ”އަހަރެން ދައްކަން މިއުޅޭ ވާހަކަ ވަރަށް ކަނުލާ އަޑުއަހާފަ ދެން ތިކޮޅުން ގޮތެއް ނިންމާ. އަހަރެން ބޭނުމެއް ނޫން އަރުޝީއަށް އެއްވެސް އެއްޗެއް އޮޅުވާލާކަށް.“ ސަމްސުއްނިސާ އަނެއްކާވެސް ފުން ނޭވާއެއް ލިއެވެ. އޭނާ ބޭނުންވީ އަރުޝީގެ ހިތުގައިވާ ޖަޒުބާތުގެ ފައިދާ ނަގާށެވެ. އެހެނީ އޭނާ އަރިއަޅާލި ވަޤުތު އަރުޝީގެ ހަރަކާތް ހުރިގޮތް ފެނުނެވެ. ސަމްސުއްނިސާއަށް ވިސްނޭ ގޮތުގައި އަރުޝީއަކީ ޖަޒުބާތީ ކުއްޖެކެވެ. އޭނާ ދައްކާ ވާހަކަ އަޑު އެހުމަށްފަހު، އޭނާ ބޭނުންވާގޮތަށް ޢަމަލުވެސް ކުރާނެއެވެ. ސަމްސުއްނިސާއަށް އެނގިފައިނުވާ ކަމަކީ، އަރުޝީގެ ކިބައިގާ ހުންނަ ހިތްވަރާއި ނުގުޑާފަދަ ޢަޒުމެވެ. ޙައްޤާއި އިންސާފަށްޓަކާ އެންމެ ގާތްމީހާވެސް ދޫނުކުރާނެކަމެވެ. ވީއިރު އޭނާގެ މަރުހޫމު މަންމަގެ ނަމަށް ހުތުރު އަރާފަދަ ތުހުމަތެއްގެ ވާހަކަ އަޑުއަހަން އަރުޝީއަށް ކެތްކުރެވޭނެހެއްޔެވެ. ކަންއޮތީ އެހެންކަމަށް ވިޔަސް، އަރުޝީ އެހުރީ ސަމްސުއްނިސާއަށް ފުރުޞަތު ދީގެންނެވެ. މިހާރު ސަމްސުއްނިސާ ސަލާމަތްވާނެ މަގު ފަހިކުރުން އޮތީ ޚުދު އޭނާގެ އަތްމަތީގައެވެ. އެހެނީ ސަމްސުއްނިސާ ތެދުބަހުން ވާހަކަ ދައްކައިފިނަމަ އަރުޝީ އޭނާއަށް މަޢާފުކުރުމަކީ، އެކަށީގެންވާ ކަމެކެވެ. އެހެނަސް ސަމްސުއްނިސާއަށް ޙައްޤުވާ ޢަދަބު ލިބުމަށް ފަހުގައެވެ. ނަފީސާގެ މަރުގެ ތުހުމަތު ސާބިތުވެއްޖެނަމަ ދެން ވާނެގޮތެއް ނޭންގޭނެތާއެވެ.

ލިބުނު ފުރުޞަތުގެ ބޭނުންކޮށްގެން ސަމްސުއްނިސާ ވާހަކަ ދައްކަން ފެށިއެވެ. ”އަހަރެން މިތަނަށް އައީ ހަމަ ޙަޤީޤަތުގަވެސް އަރުޝީއަށް އަހަރެން މިއީ އަރުޝީގެ މަންމަކަން ބުނެދޭން. އެކަމަކު… “ ސަމްސުއްނިސާގެ ވާހަކައަށް ހުއްޓުމެއް އެރިއެވެ. އިރުކޮޅަކު އިސްދަށަށް ޖަހާލައިގެން އިނެވެ. ވަރުބަލިވެފައި އިނުމާއިވެސް އެކުގައެވެ. ”އެކަމަކު ކިހިނެއްވީ؟“ އަރުޝީގެ ސުވާލުން ސަމްސުއްނިސާ ސިއްސައިގެން ދިޔައެވެ. އެހެނަސް އިސް އުފުލައިލީ ވަރަށް މަޑުމަޑުންނެވެ. އަދި އޭނާގެ ވާހަކަ ކުރިއަށް ގެންދިޔައެވެ. ”އެކަމަކު އަރުޝީ މިކޮޅަށް އައުމުގެ ކުރިން ނަފީސާ މިދުނިޔެއަށް އަލްވަދާޢު ކިޔައިފި. އަހަރެން ބޭނުންވީ ނަފީސާގެ ދުލުން އެހުރިހާ އެއްޗެއް އަރުޝީއަށް އޮޅުންފިލުވައިދޭން.“ ސަމްސުއްނިސާ ވަރަށް މަޑުމައިތިރި ގޮތަކަށް އަރުޝީއާއި ދިމާއަށް ބަލައިލިއެވެ. ”ދެން އެހެންވިއްޔާ މަންމައަށް އެހެން ހެދީ ކީއްވެ؟“ އަރުޝީގެ އެސުވާލުން ސަމްސުއްނިސާއަށް ލިބުނީ ހައިރާން ކަމެކެވެ. އަރުޝީ އެކުރަނީ ކޮން ސުވާލެއްކަމެއް މިފަހަރު ހަމަ ޙަޤީޤަތުގައިވެސް ސަމްސުއްނިސާއަކަށް ނުވިސްނުނެވެ. އެހެނީ ސަމްސުއްނިސާގެ ރޭވުން އަރުޝީއަށް ފަޅާއަރާފާނެ ކަމަކަށް ސަމްސުއްނިސާ ހިތަށްވެސް ނާރައެވެ. ”އަހަރެން ނަފީސާއަށް ކިހިނެއް ހެދީތަ؟ އަރުޝީ ތިކިޔާ އެއްޗެއް ތަންކޮޅެއް ސާފުކޮން ކިޔާބަލަ. އަހަރެންނަކަށް ނޭންގެ އަރުޝީ އަހަރެންދެކެ ތިހާ ރުޅިއެއް ތި އަންނަނީ ކީއްވެގެން ކަމެއް.“ ސަމްސުއްނިސާގެ ސުވާލަށް ޖަވާބުދޭން އަރުޝީ ފިސާރި ރަނގަޅަށް ތައްޔާރުވެލިއެވެ. ކައިރީގައި ހުރި ގޮނޑި އަނބުރާލާފައި، އޭގައި ހަމަޖެހިލައިގެން އިށީންދެލިއެވެ. ”އަހަރެންގެ އެންމެ ފުރަތަމަ ސުވާލަކީ އަހަރެންކުރާ ސުވާލުތަކަށް ތެދުތެދަށް ޖަވާބު ދޭނަންތޯ.“ ސަމްސުއްނިސާ ވަރަށް މަޑޫމައިތިރި ކަމާއިއެކީ ބޯޖަހާލިއެވެ. ދުލުން އާނބަސް ބުނުމާއިއެކުގައެވެ. ”އެހެންވިއްޔާ އެންމެ ފުރަތަމަ ބުނެދީބަލަ އަހަރެން އެ މަންމަޔާ އަހަރެން ހަވާލުކުރީ ކީއްވެ؟ އަހަރެންގެ ބައްޕަކަމަށް އެބުނާ މީހަކާ އެ މަންމައަށް ކައިވެނި ކުރަން ޖެހުނީ ކީއްވެ؟“ އަރުޝީ ސުވާލުކުރަމުން ގެންދިޔައީ، ސަމްސުއްނިސާއާއި ދިމާއަށް ބަލަހައްޓައިގެން އިނދެއެވެ. އެހެންނަމަވެސް ސަމްސުއްނިސާ އިނީ އިސްދަށަށް ޖަހައިގެންނެވެ. ”އަހަރެން އަރުޝީ ނަފީސާޔަކާ ޙަވާލެއް ނުކުރަން. އޭނަ އަހަރެންނަށް އޮޅުވާލައިގެން އަހަރެން އަތުން އަރުޝީ ގެންދިޔައީ.“ ސަމްސުއްނިސާގެ ޖަވާބު އަޑުއިވުމާއިއެކު، އަރުޝީއަށް ގޮނޑީގައި ނީންދެވިގެން ފުންމައިގެން ތެދުވިއެވެ. އޭރުވެސް ސާމިރު ހުރީ ކެތްތެރިކަމާއިއެކު، ކުރިމަތީގައި ހިނގަމުންދިޔަ ކަންތައް ބަލާށެވެ. އަރުޝީގެ ހިމާޔަތް ކުރުމުގެ ވަރުގަދަ އަޒުމުގައިވެސް މެއެވެ. ސާމިރު އަރުޝީއަށް އިތުބާރު ކުރެއެވެ. އަރުޝީގެ ފަރާތުން އެއްވެސް ގޯހެއް ނުހަދާނެ ކަމުގެ ޔަޤީންކަން ސާމިރުއަށް އޮތެވެ. އެހެނަސް އަނެއްކޮޅުން ކުރިމަތި ކުރުވާނީ ކިހާވަރެއްގެ ނުރައްކަލެއް ކަމެއް ނޭންގޭނެތާއެވެ. ”އަދިވެސް ތިހަދަނީ ބުހުތާން ދޮގު. އަހަރެން ބުނީމެއްނު ހުރިހާ އެއްޗެއްވެސް ކިޔައިދޭންވާނީ އެއްވެސް ދޮގަކާނުލައޭ. މިހާރު އަހަރެންގެ ކެތްތެރިކަން ކޮޅުންލާން ފަށައިފި.“ ސަމްސުއްނިސާވެސް ކޮޅަށް ތެދުވެލިއެވެ. ”އަހަރެން ކީއްކުރަން ދޮގު ހަދަންވީ؟“ ސަމްސުއްނިސާގެ އެޖުމުލަ އަޑުއިވުމާއިއެކު، އަރުޝީ ހިނގައިގަތީ ކޮޓަރިއާއި ދިމާއަށެވެ. އެބަ އަންނަމޭ ބުނުމާއިއެކުގައެވެ.

އަރުޝީ އިސާހިތަކު އަނބުރާ އަތުވެއްޖެއެވެ. މިފަހަރު އޭނާގެ އަތުގައި އޮތީ ނަފީސާގެ ދަތުރުނާމާއެވެ.  އިތުރު އެއްވެސް ވާހަކައެއް ނުބުނެ، އަރުޝީ، ސަމްސުއްނިސާއަށް ދިއްކޮށްލީ އެޑައިރީއެވެ. އަހަރެން ހުރިހާ ވާހަކައެއްވެސް މިދައްކަނީ މީގައި މަންމަ ލިޔެފައިއޮތް ހުރިހާ ވާހަކަތަކެއްގެ މައްޗަށް ބިނާކޮށްފަ. އޭގެ އިތުރުން މީގެ އިރުކޮޅެއް ކުރިން ކޮޓަރީގެ އިނދެގެން ކޮންމެސް ބީފާނުއައްތަޔަކާ ދެއްކި ވާހަކަ

އަޑުއަހާފަ. މަންމަގެ އެނދުގެ ދަށުގަ އެއްޗިހިތަކެއްވެސް ޖަހާފަ ހުރިވާހަކަ ދެއްކީމެއްނު؟ އެ އެއްޗެހި އެތާ ހުރެގެން އަހަރެންނަށް ގެއްލުމެއް ލިބިދާނެތީ ބިރުގަންނަ ވާހަކަވެސް މިބުނާ ބީފާނުއައްތައެއްގެ ކައިރީގަ ބުނީމެއްނު.“ އަރުޝީގެ އެވާހަކަތައް އަޑު އިވުމުން ސަމްސުއްނިސާ ކަންބޮޑުވެ ހިންދިރުވާލިއެވެ. އެހެނަސް މިހާހިސާބަށް ދިޔުމުން ސާމިރުއަކަށް އަނގަމަޑުން ލައިގެންނެއް ނުހުރެވުނެވެ. ”އެހެންވީމަ މަންމަގެ އެނދުދަށުގަ އެހުރި ޕިންތައް އެއީ ދައްތަ ހަރުކޮށްފަ ހުރި އެއްޗެއްކަން މިއޮތީ ސާބިތުވެފައެއްނު. އަނެއްކާ އެކަމެއް ކޮށްފަ އެއޮތީ އެކަންޏެއްވެސް ނޫންތާ.“ ސާމިރުގެ ވާހަކަ ނިމުމާއިއެކު އަރުޝީއާއި ސަމްސުއްނިސާ އެއްފަހަރާ ސާމިރުއާއި ދިމާއަށް ބަލައިލިއެވެ. ސަމްސުއްނިސާގެ ބެލުމުގައިވަނީ ހައިރާން ކަމެވެ. އެހުރިހާ އެއްޗެއް އެދެމީހުންނަށް އެހާ ފަސޭހައިން އެނގިދާނެ ކަމަކަށް ސަމްސުއްނިސާ ހިތަށްވެސް ނާރައެވެ. އެހެނީ ވަގަކު ވައްކަންވެސް ކުރާނީ އޭނާ އެކުރާ ވައްކަން ފަޅާނާރާނެ ކަމުގެ ޔަޤީންކަންވެސް އޮވެގެންތާއެވެ. ހަމަ އެފަދައިން ނުބައި ޢަމަލެއް ކުރަން ކޮންމެ މީހަކުވެސް ކުރިމަތިލާނީ، އެއީ ހަމައެކަނި އޭނާގެ ނިވަލުގައި އޮންނާނެ ކަމެއްކަމަށް ދެކިގެންނެވެ. އެމީހުންގެ ހަނދާނުން ކައްސާލައިގެން  ދާކަމަކީ،  އިންސާނާ ކުރާ ކޮންމެ ޢަމަލެއްވެސް ދެކެދެނެވޮޑިގެންވާ ފަރާތެއް ވާކަމެވެ. ކުރާ ހުރިހާ ފާފައަކީ ވަންހަނާކޮށް ބޭއްވޭނެ އެއްޗެއް ނޫންކަމެވެ. ފަޅާއަރަން ކަނޑައޅުއްވާފަ އޮތްކަމެއްނަމަ، ފަޅާއަރާނެ މަގުވެސް ފަހިކުރައްވާނެ ކަމެވެ. ސަމްސުއްނިސާއަށްވެސް މިއޮތީ އެދުވަސް ދައްކަވާފައެވެ. މިއަދު އޭނާ ސަލާމަތްވާން ވަންނާނީ ކޮންތާކަށް ހެއްޔެވެ؟ އެހެނީ، އޭނާއާއި އިދިކޮޅަށް ނިކުމެ އެހުރީ ޚުދު އޭނާގެ އުފަން ދަރިފުޅެވެ. ސަމްސުއްނިސާ ހަދާނެގޮތް ހުސްވިއެވެ. ބުނާނެ އެއްޗެއްވެސް ނޭންގިފާ އިނދެވުނީއެވެ. އެވަޤުތު އަރުޝީ ފުން ނޭވާއެއްލިއެވެ. އަމިއްލަ ނަފްސު ހަމަޖެއްސުމަށް މަސައްކަތް ކުރިއެވެ. އަދި ތަންކޮޅެއް މަޑުމައިތިރި ކަމާއިއެކު ވާހަކަ ދައްކަން މަސައްކަތް ކުރަމުން ގެންދިޔައެވެ. ”އަހަރެން ބުނަންތަ ރަނގަޅު ވާހަކައެއް. އަދިވެސް ވަޤުތު އެބައޮތް. ރަނގަޅަށް ތެދުތެދަށް ހުރިހާ ކަމެއް ކިޔާލަދީ. ތީކީ ކުޑަކަމެއް ނޫން. މީހަކު މަރާލި ކަމުގެ ތުހުމަތު. އަހަރެންވެސް ޤަބޫލުކުރަން ތިކަހަލަ ކަންކަން އަމިއްލައަށް އިޢުތިރާފު ނުވާހާ ހިނދަކު އެއްވެސް ކަހަލަ ޢަދަބެއް ނުލިބޭނެކަން. އެކަމަކު މުޅި އުމުރު ތިގޮތަށް ހޭދަކޮށްލާނެހާ ހިތްވަރު އެބަހުރިތަ؟ އަބަދަކު ދުނިޔެއަކުވެސް ނުހުންނާނެތާ ދޯ؟ ދެން އޭގެފަހުން ވަންނާނީ ކޮންތާކަށް. އެންމެ ރަނގަޅު ގޮތަކީ ކުރެވުނު ފާފައަށް ތަޢުބާވުން. މީގެ ކުރިންވެސް ކަންކަން ކުރެވުނީކީ ރަނގަޅަކަށް ނޫންތާ. އޭގެ ހިތި ނަތީޖާ މިހުރީ ކުރިމަތީގަ ފެންނަން.“ އަރުޝީގެ އެންމެ ފަހު ޖުމުލައާއައެކު، އޭނާގެ ފައިން ފެށިގެން ބޮލާއި ހަމައަށް އަމިއްލައަތް ހިންގާލިއެވެ. ހަމަ އެވަޤުތު ސަމްސުއްނިސާވެސް އަރުޝީއާއި ދިމާއަށް ބަލައިލިއެވެ. ސަމްސުއްނިސާއަށް ކޮންމެވެސް އެއްޗެއް އިހުސާސް ކުރެވުނު ކަހަލައެވެ. އެހެނީ އަމިއްލަ މޫނުގައި ބާރަށް އަތްއެޅުމާއިއެކު، އެހާމެ ބާރަށް ރޮއެގަތެވެ. ”ދަރިފުޅާ އަހަރެންނަށް މަޢާފުކުރޭ. މުޅި އުމުރު އަހަރެން މި ހޭދަކޮށްލީ ފާފަޔަކަށްފަހު ފާފައެއް ކުރަމުން. ދުނިޔޭގެ ލައްޒަތާ އުފާ ހޯދަން މަސައްކަތް ކުރަމުން. އެކަމަކު އެއިން އެއްވެސް ކަމަކުން އަހަރެންނަށް ލިބުނު މޮޅެއްވެސް ނެތް. ނުވިތާކަށް މިއަދު އަހަރެންގެ އަތުން އަހަރެންގެ ދަރިފުޅުވެސް މިގެއްލުނީ.“ ސަމްސުއްނިސާގެ ވާހަކަތައް އަޑުއިވުމާއިއެކު އަރުޝީގެ ލޮލުންވެސް ހިފެހެއްޓުމެއްނެތި ކަރުނަ އޮހެންފެށިއެވެ. އެހެންނަމަވެސް ރޯން ބޭނުންނުވާކަން އަމިއްލަ ނަފުސަށް ވިސްނައިދޭކަހަލަ ޝުޢޫރެއްގައެވެ. އެހެނަސް އަރުޝީގެ މޭގައިވެސް ވިންދުޖަހަނީ ހިތެކެވެ. އެހިތަށްވެސް ކެތްކުރެވޭނީވެސް ވަކި ވަރަކަށްތާއެވެ. ދަރިއެއްގެ ފަރާތުން މަޔަކަށް އެފަދަބޮޑު ވޭނެއް ދޭކަށްވެސް ހިތެއް ނުރުހޭނެތާއެވެ. ކަންއޮތީ އެހެންކަމަށް ވީނަމަވެސް އަރުޝީ މިއަދު އަޅަން ގަސްތުކޮށްފައިވާ ފިޔަވަޅަކީ، ސަމްސުއްނިސާއަށްވެސް އޭނާގެ އާޚިރަތް ބާއްޖަވެރިކުރަން ލިބޭ ފުރުޞަތެކެވެ. އެފުރުޞަތުގައި ސަމްސުއްނިސާ ހިފައިފިއްޔާ ކިތަންމެހާވެސް ރަނގަޅެވެ.

އަރުޝީގެ ވާހަކަ އަޑުއެހުމަށްފަހު، ސަމްސުއްނިސާގެ ރުއިމުގެ އަޑު މަޑުމަޑުން ކަނޑުވާލިއެވެ. އަދި ހަމަޖެހުމުގެ ނޭވާއެއް ލުމާއިއެކު ރަނގަޅަށް ހިންދެމިލިއެވެ. ވަރުގަދަ ޢަޒުމަކާއި އެކުގައެވެ. ހީވީ، ހަނގުރާމައަކަށް ތައްޔާރުވެލިހެންނެވެ. ”އެންމެ ރަނގަޅު އަހަރެން މިހުރީ ހުރިހާ ވާހަކައެއްވެސް ތެދުތެދަށް ކިޔައިދޭން ތައްޔާރަށް. އަހަރެންގެ ކުށްތަކަށް އަޢުތިރާފުވާންވެސް ތައްޔާރަށް. އަހަރެންގެ މައްޗަށް އަންނާނެ އުޤޫބާތަކަށް ކުރިމަތިލާންވެސް ތައްޔާރަށް. އަހަރެން ތަޢުބާވާންވެސް ބޭނުން. ކޮންމެސް ދުވަހަކުން އަހަރެންގެ ދަރިފުޅު އަހަރެންނަށް ލިބޭނެކަމުގެ އުންމީދުގަ. މި ދުނިޔެމަތިން އަހަރެން ބޭނުން އިތުރު އެއްވެސް ނެތް.“ ސަމްސުއްނިސާގެ ވާހަކަދައްކާ ނިމުމުން އަރުޝީ، ސާމިރުއާއި ދިމާއަށް އެނބުރިލިއެވެ. ހީވަނީ އަރުޝީގެ ޢިޝާރާތް ސާމިރުއަށް ވިސްނުނު ހެންނެވެ. ސާމިރު، އޭނާގެ މާބައިލް ފޯނު ނަގާ ޕޮލިހަށް ގުޅިއެވެ. އިސާހިތަކު އެމީހުން އެގެއަށް އަތުވެއްޖެއެވެ. ސަމްސުއްނިސާގެ ބަޔާން ނެގުމަށްފަހު، މުޅި ގޭތެރެ ބަލާ ފާސްކުރިއެވެ. ސަމްސުއްނިސާގެ ފޮށިން އެތައް ބައިވަރު ފޮތްތަކެއް ނެގިއެވެ. ނަފީސާގެ އެނދު ދަށުގައިވާ ޕިންތަކުގެ ޙަޤީޤަތްވެސް ސަމްސުއްނިސާ

ފުލުހުންނަށް ކިޔައިދިނެވެ. އަދި ބީފާނުއައްތަގެ ޙަޤީޤަތްވެސް އޮޅުންފިލުވައިދިނެވެ. އާނއެކެވެ. ބީފާނުއައްތައަކީ ސިހުރު ފަންޑީތައިގެ އެދުރުދައިތައެއްކަން އެރަށުގެ އެތައް ބައެއްގެ ބަޔާނުންވެސް އެނގިގެން ދިޔައެވެ. އެހެންކަމުން ސަމްސުއްނިސާއާއިއެކު، ބީފާނުއައްތަވެސް ހައްޔަރުކުރިއެވެ. ދެމީހުންނަށްވެސް އައީ އުމުރުދުވަހުގެ ޖަލު ހުކުމެކެވެ. އެމީހެއްގެ ބަނޑުން ތިމާ އުފަންވި މައިމީހާއަށް އެވަރުގެ އަދަބެއް ދޭން ޖެހުނުކަމުގެ ހިތާމަ އަރުޝީގެ ހިތުގައި މުޅި އުމުރަށްވެސް އޮނާނެތާއެވެ. އެހެންނަމަވެސް އޭނާ މީހަކަށް ހެދުމަށްޓަކާ އެތައް ޤުރުބާނީއެއް ވަމުންދިޔަ ބަލާބޮޑޫކުރި މަންމައަށް އިންސާފު ހޯދައިދެވުމަކީވެސް ކުޑަކަމެއް ނޫންތާއެވެ. މިހުރިހާ ކަމެއްގައިވެސް ސާމިރު ހުރީ އަރުޝީއަށްޓަކާ ފިސާރި ސާބިތުކަމާއެކީގައެވެ. އަރުޝީއާއި އެކުގައެވެ. އޭނާއަށް ކުރިމަތިވެދާނެ ނުރައްކަލަކާއިމެދު ހިނދުކޮޅަކަށް ވިސްނާނުލައެވެ. ޙަޤީޤީ ލޯތްބަކީ އެއީނޫންހެއްޔެވެ. އާނއެކެވެ. ސަމްސުއްނިސާގެ ހިތުގައި އަރުޝީއަށްޓަކާ ޒައްރެއްގެ މިންވަރުވެސް ނުރުހުމެއް ނެތެވެ. އެހެނެއްކަމަކު އޭނާ އަދިވެސް ބޭނުންވަނީ އަރުޝީއާއިއެކު ބާއްޖަވެރި ދުވަސްތަކެއް ހޭދާކުރާށެވެ. އެކަން އެހެންވުމަކީ ނާދިރުކަމަކަށް ވިޔަސްވެސްމެއެވެ. އުންމީދު ކުރުމަކީ ގޯހެއް ނޫންތާއެވެ. ދުނިޔެވެސް ދެމި އޮންނަނީ އުންމީދެއްގެ މައްޗަށް ބިނާވެފައޭ ބުނެއުޅޭނޫން ހެއްޔެވެ.

އަރުޝީއަށް ދެން ކުރިމަތިލާން ޖެހިފައި އޮތީވެސް ކުޑަ އިމްތިޙާނެއް ނޫނެވެ. ސާމިރުއާއިއެކު، ދިރިއުޅުމެއް ބިނާކުރުމަށެވެ. އެކަމަށްޓަކާ ކުރިމަތިލާން ޖެހިފައިވާ އިމްތިޙާނަކީވެސް ކުޑަކަމެއް ނޫންތާއެވެ. އަރުޝީގެ ޙަޤީޤަތަކީވެސް މިހާރު ސާމިރުގެ ޢާއިލާއަކަށް ވަންހަނާވެފައިވާ  ކަމެއް ނޫނެވެ. އެހެނަސް އަރުޝީއާއި ސާމިރުގެ ގުޅުމަށް ރުހުން ލިބޭނެކަން އެއީ ހަމަގައިމުވެސް އަރުޝީއަށް އެނގިފައިނުވާ ކަމެކެވެ. ސާމިރުގެ ޢާއިލާއަކީ އަރުޝީއަށް ބީރައްޓެހި ބައެކޭ ނުބުނެވޭނެއެވެ، އެހެނީ އެންމެ ތުއްތުއިރުއްސުރެވެސް، އަރުޝީ އެގެއަށް ގޮސް އުޅުނެވެ. އަރުޝީގެ ގެއަށް ސާމިރު ދާފަދައިންނެވެ. ސާމިރުގެ ގާތް ރަޙުމަތްތެރިއެއްގެ ގޮތުގައި، އަރުޝީ ބަލައިގަތްފާވާކަންވެސް އެއީ ޙަޤީޤަތެކެވެ. އެހެންނަމަވެސް މިއަދު، ސާމިރުގެ ޢާއިލާގެ ކުރިމަތީގައިވަނީ އަރުޝީގެ އެހެން ތަސްވީރެކެވެ. އެތަސްވީރު ގުޅިފައިވަނީ، ސާމިރުގެ މުސްތަޤުބަލާއެވެ. އޭނާގެ ދިރިއުޅުން ބިނާކުރުމާއެވެ. އަރުޝީއެކޭ އެއްފަދައިން ސާމިރުގެ ހިތްވެސް ބާރަށް ތެޅެމުން ދިޔައެވެ. އެހެނީ ސާމިރުގެ މައިންބަފައިންގެ ނިންމުން އަދި އޮތީ ސާމިރުއަށްވެސް ނޭންގޭ ޙާލުގައެވެ. ހުކުމް އިއްވުން އޮތީ ދެމީހުންގެ ހާޟިރުގައެވެ. ސާމިރުގެ ޢާއިލާއިންވަނީ، އަރުޝީއަށް ދަޢުވަތެއް ދީފައެވެ. ދަޢުވަތު ދީފައިވާ ގަޑިއަށް އަރުޝީ އެގެއަށް ދިޔައެވެ. އަރުޝީ އެގެއަށް ދިޔައިރު، ސާމިރުގެ މަންމައާއި ބައްޕަ އަދި ބޭބެމެންނާއި ފަހަރިން ތިއްބެވެ. އަރުޝީ ވަނުމާއިއެކު، އިށީނުމަށް ދަޢުވަތު ދިނެވެ. އެވަޤުތު އަރުޝީއަށް ފާހަގަވި ކަމެއް އޮތެވެ. މީގެ ކުރިން އެގެއަށް އަރުޝީ ދިޔުމުން، ސާމިރުގެ މަންމަ މަރުޙަބާ ކިޔާ ފަދައިން މަރުޙަބާ ނުކިޔާ ކަމެވެ. އެންމެންވެސް ތިބީ ވަރަށް މަޑުމައިތިރިކޮށެވެ. ސާމިރު ހުރީ ވާންއުޅޭ ގޮތެއް ނޭންގޭ ޙާލުގައެވެ. ”މަންމާ، މީހަކު ޝަރީޢަތަށް ހުށައަޅާފަ ބައިންދާހެން ނުބައިންދާ ދެން އަވަހަށް މަންމަގެ ޖަވާބު ދީބަލަ. ކޮއްކޮ އެހުރީ ބިރުން ހަލާކުވާވަރު ވެފައޭ.“ ސާމިރުގެ އެންމެ ދޮށީ ބޭބެގެ އަޑު އިވިގެން ދިޔައެވެ. އަރުޝީވެސް ސާމިރުގެ ބޭބެއާއި ދިމާއަށް ބަލައިލިއެވެ. އަރުޝީ އިނީ ކިރިޔާ ނުރޮވިއެވެ. އެހެނީ އަރުޝީއަކީ މިހާރު އެކަނިވެރިއެކެވެ. ސާމިރުގެ ޙާޔާތަށް އޭނާއަށް އައުމުގެ ފުރުޞަތު ނުލިބިއްޖެނަމަ ޤައުމު ދޫކޮށްލާފަ ދިޔުން ފިޔަވާ އިތުރުގޮތެއް އަރުޝީއަކަށް ނޯންނާނެއެވެ.

ކުޑައިރުކޮޅެއް ވަންދެން އަރުޝީ ބޭންދުމަށްފަހު، ސާމިރުގެ މަންމަ އަރުޝީއަށް ގޮވާލިއެވެ. ”އަހަރެން ކުރާނީ ހަމަ އެންމެ ސުވާލެއް. އެ ސުވާލަށް އަރުޝީ ޖަވާބު ދީފާނަންތަ؟“ އަރުޝީ ޖެހިލުންވެ އިނދެ، އެއީ އަނެއްކާ ކޮންސުވާލެއްތޯ ސުވާލުކޮށްލިއެވެ. ”އަރުޝީ ދުނިޔެއަށް އައީ އަމިއްލައަށްތަ؟“ ސާމިރުގެ މަންމަގެ އެސުވާލު ވެގެންދިޔައީ، އަރުޝީގެ ހިތުގެ އެންމެ ހިމަ ނާރާއި ކުޅެލި ސުވާލަކަށެވެ. އެތައް ދުވަސްތަކެއް ވަންދެން އަރުޝީގެ ހިތުގައި އުފެދެމުންދިޔަ ބިޔަ ރާޅުތަކެއް އެއްފަހަރާ ބިންދާލިކަހަލައެވެ. ހަމައެއާއިއެކު، ހިތަށް ހަމަޖެހުމެއްވެސް ލިއްބައިދީފިއެވެ. އަރުޝީގެ ލޮލުން ހިފެހެއްޓުމެއްނެތި ކަރުނަ އޮހެން ފެށިއެވެ. ކަންބޮޑުވުމާއި، ހިތާމައާއި އުފާވެރިކަން އެއްކަރުނައަކަށް ވެގެންދިޔައެވެ. އެހެނީ އެސުވާލުގެ ފަހަތުގައިވާ މަޤުޞަދުވެސް އަރުޝީއަށް ވިސްނުނީތީއެވެ. އެއީ އަރުޝީގެ އުޖާލާ މުސްތަޤުބަލަށް ކޮށައިދިން މަގަކަށް ވީތީވެ. ސާމިރުގެ ޢާއިލާއަށް އަރުޝީގެ ވަންހައާއި ދަރިފަސްކޮޅަކީ، ސާމިރާއި އަރުޝީގެ ގުޅުމަށް އޮތް ހުރަހެއްކަމަށް ނުދެކޭ ކަމުގެ ބަޔާނެކެވެ. އުފާވެރިކަމުގެ ކޮޅެއްނެތެވެ. ސާމިރުވެސް ހަމަޖެހުމުގެ ނޭވާއެއްލިއެވެ. އާއެކެވެ. އެއީ އަރުޝީއާއި ސާމިރުގެ ބާއްޖަވެރި ޙަޔާތެއްގެ ފެށުމެވެ. ދެން ކުރިޔަށް އޮތީ އަރުޝީއާއި ސާމިރުގެ ޙަޔާތުގެ ދަތުރުނާމާ ލިޔަން ފެށުމެވެ. ދުޢާއަކީ އެ ދަތުރުނާމާއަކީ ކުލަރީތި ޞަފްޙާތަކަކުން ފުރާލެވޭނެ ފުރިހަމަ ދަތުރުނާމާއަކަށް ވެގެންދިޔުމެވެ.

• ނިމުނީ –