އުމުރުން 39 އަހަރުގެ އިންޑިއާ ނަސްލުގެ އެމެރިކާގެ ސިޔާސީ ސްޓްރެޓެޖިސްޓެއް ކަމަށްވާ ސައިކަތު ޗަކްރަބަތީ ވަނީ ނެންސީ ޕެލޯސީ ހުސްކުރާ އެމެރިކާގެ ކޮންގްރެސްގެ ގޮނޑިއަށް ވާދަ ކުރުމަށް ނިންމައި ޕްރައިމަރީއަށް މަސައްކަތް ފަށާފައެވެ.

ނެންސީ ޕެލޯސީ ވަނީ ސެންފްރެންސިސްކޯގެ މި ގޮނޑި 30 އަހަރު ވަންދެން ފުރުއްވާފައެވެ. އަދި ދެން ކުރިމަތި ނުލާނެ ކަމަށް އޭނާ ވަނީ ވިދާޅުވެފައެވެ.

ހާވަޑް ޔުނިވަރސިޓީން ތައުލީމު ހާސިލުކުރައްވާފައިވާ ޗަކްރަބަތީ އަކީ ޓެކްސަސްގައި އުފަންވެފައިވާ ބެންގާލީ މުހާޖިރު ދެމަފިރިއެއްގެ ދަރިއެކެވެ. ކުރިން ޓެކް އެންޓަރޕްރަނަރެއްގެ ގޮތުގައި މަސައްކަތް ކުރެއްވުމަށްފަހު، އޭނާ ވަނީ ކޮންގްރެސްގެ މެންބަރު އަލެކްސަންޑްރިއާ އޮކާސިއޯ-ކޯޓޭޒްގެ ޗީފް އޮފް ސްޓާފްގެ މަގާމުވެސް ފުރުއްވާފައެވެ.

ޕްރޮގްރެސިވް ޑިމޮކްރެޓެއްގެ ގޮތުގައި ވާދަކުރައްވާއިރު، އޭނާ ވަކާލާތު ކުރައްވަނީ މުއްސަނދިންގެ މުއްސަދިކަމުން ޓެކްސް ނެގުމަށާއި ޓެކްސްގެ އޮނިގަނޑު އިސްލާހުކުރުމަށެވެ. މީގެ އިތުރުން، އޭނާ އަކީ ޖަސްޓިސް ޑިމޮކްރެޓްސްގެ ކޯ-ފައުންޑަރެއްވެސް މެއެވެ. އަދި 2016 ވަނަ އަހަރު ބާނީ ސެންޑާސްގެ ކެމްޕޭނުގައިވެސް އޭނާ ވަނީ މަސައްކަތް ކުރައްވާފައެވެ.

ޗަކްރަބަތީގެ ކެމްޕޭން ރަސްމީކޮށް ފެށިފައިވަނީ 2025 ވަނަ އަހަރުގެ އެޕްރީލް މަހުއެވެ. އޭނާ މިހާރު ދަނީ ގްރާސްރޫޓްސް ސަޕޯޓް ހޯދުމަށް މަސައްކަތް ކުރަމުންނެވެ. އޭނާގެ މައިގަނޑު އެޖެންޑާގައި ހިމެނެނީ ދިރިއުޅުމުގެ އަގުތައް ހެޔޮކުރުމާއި، ސިޔާސީ އިސްލާހުތަކާއި، ޑިޖިޓަލް ވަސީލަތްތައް ބޭނުންކޮށްގެން ރައްޔިތުންނާ ގުޅުން ބަދަހިކުރުމުގެ ހުށަހެޅުންތަކެވެ.

ނިއުޔޯކްގެ މޭޔަރުކަމުގެ އިންތިޚާބު ޒަހްރާން މަމްދާނީ ކާމިޔާބުކުރެއްވުމަށްފަހު، ޗަކްރަބަތީގެ ކެންޑިޑެސީއަށް ވަނީ އިތުރު ހިތްވަރެއް ލިބިފައެވެ. އޭނާ ވިދާޅުވެފައިވަނީ  ރައްޔިތުން ހަގީގީ ބަދަލަކަށް ތެދުވެއްޖެނަމަ، ބޮޑު ކާމިޔާބެއް ހޯދޭނެ ކަމަށެވެ.

ޑިމޮކްރެޓިކް ޕްރައިމަރީ ބާއްވަން ހަމަޖެހިފައިވަނީ 2026 ވަނަ އަހަރުގެ ޖޫން މަހުއެވެ.

ޗަކްރަބަތީ މި އިންތިޚާބު ކާމިޔާބުކުރައްވައިފިނަމަ، އޭނާ ވެގެންދާނީ އެމެރިކާގެ ކޮންގްރެސްގައި ހިމެނޭ ހަވަނަ އިންޑިއާ ދަރިކޮޅުގެ މެންބަރަށެވެ. މި ގޮނޑިއަށް ވާދަކުރައްވާ ކެންޑިޑޭޓުންގެ ތެރެއިން ޗަކްރަބަތީގެ ޕްރޮގްރެސިވް ހިޔާލުތަކަށް ޑިމޮކްރެޓިކް ޕާޓީގެ ތެރެއިން ލިބޭ ތާއީދު މޮނީޓާ ކުރަން ޖެހެއެވެ.