ވަގަށް ނަގާފައިވާ ފަލަސްތީނުގެ ގައިދީންނަށް އަނިޔާކުރާ ކަމުގެ ގިނަ ރިޕޯޓުތަކާ ގުޅިގެން،އދން އިސްރާއީލާ ސުވާލުކޮށްފިއެވެ. ޚާއްޞަކޮށް 2023 ވަނަ އަހަރުގެ އޮކްޓޯބަރު 7 ގައި އަޤްޞާ ޠޫފާނާ ގުޅިގެން ޖެނޮސައިޑް ނަސްލު ނައްތާލުމުގެ ހަނގުރާމަ ފެށި ފަހުން، ޔަހޫދީން ހިްނގާ އަނިޔާތައް ސާފުކޮށްދިނުމަށް އެދިފައި ވެއެވެ. ޔަހޫދީ ދައުލަތާ ސުއާލުކޮށްފައި ވަނީ އަންގާރަ ދުވަހާއި ބުދަ ދުވަހު އެވެ. ސުއާލުތައް ކުރީ އަނިޔާކުރުން ހުއްޓުވުމާ ބެހޭ އ.ދ. ގެ ކޮމިޓީ (ކޮމިޓީ އެގެއިންސްޓް ޓޯޗާ) ގެ ކުރިމަތީގައި އިސްރާއީލުން ކަން ކުރަމުންދާ ގޮތް މުރާޖަޢާކުރަމުން ދިޔަ ވަގުތުގައެވެ.

ކޮމިޓީގެ މުޤައްރިރު ޕީޓަރ ފިޑެލް ކީސިންގ ވިދާޅުވީ:

”ފަލަސްތީނުގެ މީހުންނަށް، އޭގެ ތެރޭގައި ކުޑަކުދިންނާއި ނާޒުކު ފަރުދުން ވެސް ހިމެނޭ ގޮތަށް، ވަކި އުޞޫލެއްގެ މަތިން ފުޅާ ދާއިރާއެއްގައި އަނިޔާކުރުމާއި ނޭދެވޭ މުޢާމަލާތްތައް ކުރާ ކަމުގެ ގިނަ އަދަދެއްގެ ރިޕޯޓުތައް ލިބިފައި ވެއެވެ. އަދި އެކަންކަމާ މެދު ކޮމިޓީ ވަރަށް ބޮޑަށް ކަންބޮޑުވެއެވެ.“

އޭނާ އިތުރަށް ވިދާޅުވީ،:

”ރިޕޯޓުތައް ބުނާ ގޮތުން އަނިޔާކުރުމަކީ ޔަހޫދީ ދައުލަތުގެ ސިޔާސަތެއްގެ ތެރެއިން ގަސްތުގައި، ފުޅާ ދާއިރާއެއްގައި ބޭނުންކުރާ ވަސީލަތެކެވެ. މިކަން ކުރަނީ ހައްޔަރުކުރުމުން ފެށިގެން ތަހުގީގު ކުރުމާއި ޖަލުތަކާ ހަމައަށް“ ހުރިހައި ފައްތަރއެއްގައެވެ.

އަނިޔާކުރުން ހުއްޓުވުމާ ބެހޭ ކޮމިޓީގައި މިނިވަން 10 މާހިރުން ހިމެނެއެވެ. އެމީހުންގެ މަސައްކަތަކީ، އަނިޔާކުރުމާއި އެނޫން ވެސް އަނިޔާވެރި، އިންސާނިއްޔަތާ ޚިލާފު ނުވަތަ ނިކަމެތިކޮށްލާ މުޢާމަލާތްތަކާއި އަދަބުތައް ހުއްޓުވުމާ ބެހޭ މުޢާހަދާ (ކޮންވެންޝަން އެގެއިންސްޓް ޓޯޗާ) ގައި ބައިވެރިވާ ދައުލަތްތަކުން އެ މުޢާހަދާއަށް ތަބާވާ މިންވަރު ބަލައި ﷲާރަވެރި ވުމެވެ. ކޮމިޓީގެ އަށްޑިހަ ތިންވަނަ ދައުރު ހިނގަމުން ދަނީ ނޮވެމްބަރު 10 އިން 28 އަށެވެ. މި ދައުރުގައި އަލްބޭނިޔާ، އަރޖެންޓީނާ، ބަޙްރައިން އަދި އިސްރާއީލުން މި މުޢާހަދާގެ ޙުކުމްތައް ތަންފީޒުކުރުމަށް ކުރާ މަސައްކަތްތައް މުރާޖަޢާކުރުން ހިމެނެއެވެ.

ކޮމިޓީއަށް ހުށަހެޅިފައިވާ ރިޕޯޓުތަކަށް އިޝާރާތްކުރައްވައި ކީސިންގ ވިދާޅުވީ، 2023 ވަނަ އަހަރުގެ އޮކްޓޯބަރު މަހު ނަސްލު ނައްތާލުމުގެ ހަނގުރާމަ ފެށުނު ފަހުން، އަނިޔާކުރުމާއި ނޭދެވޭ މުޢާމަލާތްތައް ”ކުރިން ދެކެފައިނުވާ މިންވަރަކަށް“ އިތުރުވެފައިވާ ކަމަށާއި، އަދި އެކަމަށް އެއްވެސް އަދަބެއް ނުލިބޭ ކަމަށެވެ. އޭނާ އިތުރަށް ވިދާޅުވީ، މި ރިޕޯޓުތައް ލިބިފައިވަނީ އ.ދ. ގެ އެކި އިދާރާތަކާއި، އިސްރާއީލުގެ، ފަލަސްތީނުގެ އަދި ބައިނަލްއަޤްވާމީ ޖަމްޢިއްޔާ ޖަމާޢަތްތަކާއި އެނޫން ވެސް މަޞްދަރުތަކުން ކަމަށެވެ. ކީސިންގ ފާހަގަކުރެއްވި ގޮތުގައި، ”ފަހުން ދޫކޮށްލެވުނު ގިނަ އަދަދެއްގެ ފަލަސްޠީނުގެ ގައިދީންނަށް އަނިޔާކުރުމާއި އެނޫން ވެސް ނޭދެވޭ މުޢާމަލާތްތައް ކުރާ ކަމުގެ ރިޕޯޓުތައް ލިބިފައިވެއެވެ.“

އޭނާ މިސާލު ދެއްވަމުން ވިދާޅުވީ، ”ވޭން ދެނިވި ގޮތަކަށް ތަޅައިގަތުން، އޭގެ ތެރޭގައި ޖިންސީ ގުނަވަންތަކުގައި ތަޅައިގަތުން ވެސް ހިމެނޭ. ކަރަންޓުގެ ޝޮކު ދިނުންވެސް ހިމެނޭ.؛ ގިނަ ވަގުތުތަކަށް އުނދަގޫވާނެ ގޮތަށް ބެހެއްޓުމަށް މަޖުބޫރުކުރުވާ؛ ގަސްތުގައި އިންސާނިއްޔަތާ ޚިލާފު ޙާލަތްތަކާއި ބަނޑުހައިކަމާއި؛ ފެން ބޭނުން ކޮށްގެން އަނިޔާ ދިނުމާއި އަދި ޖިންސީ ގޮތުން މީހާ ނިކަމެތިކޮށްލުމާއި ރޭޕްކޮށްލާނެ ކަމުގެ އިންޒާރު ދިނުން“ ފަދަ ކަންކަން ހިމެނޭ ކަމަށެވެ. ނަމަވެސް، ޖެނީވާގައި ހުންނަ އ.ދ. ގެ އިސްރާއީލުގެ ސަފީރު ޑެނިއަލް މެރޯން ވަނީ ކަމާސްއިން ދައްކާ ޒާތުވެ ވާހަކަ ކަމަށް ބުނެ އެއީ ”އޮޅުވާލުމުގެ މައުލޫމާތު“ ކަމަށް ސިފަކކޮށްފައެވެ.