ކޮންގްރެސްގެ އޯވަރސައިޓް ކޮމިޓީން މި ހަފްތާގައި އާންމުކުރި އެތައްހާސް ޞަފްޙާގެ ލިޔެކިޔުންތަކެއްގެ ތެރޭގައި ހިމެނޭ ޖެފްރީ އިޕްސްޓައިންގެ އީމެއިލްތަކުން ހާމަވާ ގޮތުގައި ރައީސް ޑޮނަލްޑް ޓްރަމްޕަށް އެޕްސްޓެއިންގެ ޖިންސީ ވިޔަފާރީގެ އޮޕަރޭޝަންގައި ހިމެނޭ ’އަންހެން ކުދިން‘ އެނގިވަޑައިގަންނަވައެވެ. 20,000 އަށް ވުރެ ގިނަ ޞަފްޙާގެ މި ލިޔެކިޔުންތަކުގެ ތެރޭގައި 2019 ވަނަ އަހަރު ބަދަލުކޮށްފައިވާ އީމެއިލް ހިމެނެއެވެ. އެގޮތުން އިޕްސްޓައިން ވަނީ އޭނާގެ ބަދިގޭގައި ބިކިނީ ލައިގެން ތިބި އަންހެނުންނާއެކު ޓްރަމްޕް ފެންނަން ހުރި ފޮޓޯއެއް ލިޔުންތެރިޔާ މައިކަލް ވޮލްފަށް ހުށަހަޅާފައެވެ. އެޕްސްޓައިން އީމެއިލްގައި ލިޔެފައިވެއެވެ: . ”ބިކިނީގައި ތިބި އަންހެން ކުދިންނާއެކު ޑޮނަލްޑް އަހަރެންގެ ބަދިގޭގައި ހުރި ފޮޓޯއެއް ބޭނުންތަ؟“

އިޕްސްޓައިންގެ އީމެއިލްތަކުގައި ޓްރަމްޕް ސިފަކޮށްފައިވަނީ ”އެހާ ނުބައި އަދި ހަޤީޤީ ދިރިއުޅުމުގައިވެސް އަދި ގާތުން ބަލާއިރު ވަރަށް ނުބައި“މީހެއްގެ ގޮތުގައެވެ. އަދި އިޤްތިޞާދީ މާހިރު ލެރީ ސަމަރސްއަށް އެޕްސްޓެއިން ބުނެފައިވަނީ ރައީސްގެ ގައިގައި އެންމެ ރަނގަޅު ގުނަވަނެއްވެސް ނެތް ކަމަށެވެ.

މީގެ އިތުރުން، އެ އީމެއިލްތަކުގައި ބުނެފައިވާ ގޮތުގައި ޓްރަމްޕް ވަނީ 2011 ވަނަ އަހަރު އިޕްސްޓައިންގެ ނިއުޔޯކްގެ ގޭގައި އެޕްސްޓައިންގެ ޖިންސީ ގޯނާގެ ޝިކާރައަކަށްވި ވާޖީނިއާ ގުއުފްރީއާއެކު އެތައް ގަޑިއެއް ހޭދަކޮށްފައެވެ. ނަމަވެސް ގުއުފްރީ ވަނީ މީގެ ކުރިން ހުވައިކޮށްގެން ޓްރަމްޕް އޭނާއާއެކު ޖިންސީ ގުޅުން ނު ބާއްވާ ކަމަށް ބުނެފައެވެ. ގުރުފްރީ ވަނީ ދަންޖެހިގެން މަރުވެފައެވެ.

މި ހާމަކުރުންތަކާ ގުޅިގެން ވައިޓް ހައުސްގެ އޮފިޝަލުން ވަނީ މިކަންކަން އެޕްސްޓައިންގެ މަގު ފުރެދިފައިވާ ސިކުނޑީގައި ހުރި ކަންކަން ކަމަށް ބުނެ ވާހަކަ އޮޅުވާލާފައެވެ. އަދި ޓްރަމްޕްގެ ފަރާތުން ކުށެއް ހިނގިކަމުގެ އެއްވެސް އާ ހެއްކެއް މި އީމެއިލްތަކުން ފެނިފައިނުވާ ކަމަށް ބުނެފައި ވެއެވެ. ޓްރަމްޕް ވެސް ބުރާސްފަތި ދުވަހު ނޫސްވެރިންނާ ވާހަކަ ދައްކަވަމުން މި ލިޔެކިޔުންތަކަކީ ”ފޭކް ނިއުސް“  އަދި  ”ޑިމޮކްރެޓިކް ޕާޓީން ނަން ހުތުރު ކުރުމަށް ކުރާ ކަމެއް“  ކަމަށް ވިދާޅުވިއެވެ.

މި ލިޔެކިޔުންތަކުން އެޕްސްޓައިން އާއި ޓްރަމްޕް، އަދި އިޒްރޭލުގެ ކުރީގެ ބޮޑުވަޒީރު އެހޫދު ބަރާކް އަދި އިންޓެލިޖެންސް އޮޕަރޭޓިވް ޔޯނީ ކޮރެން އާއި ރާއްޖޭގެ ރައީސް ޑރ. ވަހީދުއާއި ޔޫއޭއީގެ ރައީސް މުހައްމަދު ބިން ޒާއިދުގެ މުޝީރު ވިޔަފާރިވެރިޔާ ސުލްޠާން އަހުމަދު ބިން ސުލައިމާނު ފަދަ މަޝްހޫރު ފަރާތްތަކާ ދެމެދު ހިނގާފައިވާ މުޢާމަލާތްތައް ހާމަވެއެވެ.

މި ލިޔެކިޔުންތަކުން ދޭހަވާ ގޮތުގައި އެޕްސްޓައިންގެ މުޅި މަސައްކަތް ބިނާވެފައި އޮތީ ޖިންސީ ވިޔަފާރިއަށް ވުރެ ބޮޑަށް އިޒްރޭލުގެ މޮސާޑް ޖާސޫސީ އިދާރާއަށް ޖާސޫސްކޮށްދީ މައުލޫމާތު ހޯދައިދޭ އޮޕަރޭޝަންތަކާ ގުޅިފައިވެއެވެ. ރިޕަބްލިކަން މެމްބަރު ތޯމަސް މާސީ ވެސް ވަނީ މި ގުޅުންތައް އަދި އިތުރަށް ފުރިހަމައަށް ހާމަކުރުމަށް ގޮވާލާފައެވެ.

އެޕްސްޓެއިން އަކީ އެމެރިކާގެ ރައީސުންނާއި މަތީފެންވަރުގެ ވިޔަފާރި ވެރިންނަށް އުމުރު ހަމަނުވާ އަންހެން ކުދިން ހޯދައިދިން ދައްލާލެކެވެ. އޭނާގެ މައްޗަށް 2019 ޝަރީއަތް ކުރަން އުޅެނިކޮށް ޖަލުގައި ދަންޖެހިފައި ހުއްޓާ ފެނިފައި ވެއެވެ. ލަފާ ކުރެވެނީ އެކަމަކީ އަޑީ ދައުލަތުން ކޮށްފައިވާ ކަމެއް ކަމަށެވެ.

އެޕްސްޓެއިންއާއި ޓްރަމްޕާ ދެމެދު 1990 ގެ އަހަރުތަކުން ފެށިގެން ދިގު މުއްދަތެއް ވަންދެން އަންހެނުންނާ ގުޅޭ ގުޅުންތައް ބާއްވާފައި ވެއެވެ. ނަމަވެސް ވިޔަފާރި މުއާމަލާތެއްގައި ކުނި ޖެހުމުން ދެމީހުން 2004 ން ފެށިގެން ރުޅި ވެފައި ވެއެވެ.

ކޮންގްރެސްގެ މެމްބަރުން ދެކެނީ އެޕްސްޓައިން އަކީ ބޮޑެތި ޖާސޫސީ ޖިއޯޕޮލިޓިކަލް ނެޓްވޯކްތަކާ ގުޅުންހުރި މީހެކެވެ. އިޒްރޭލުން އެމރިކާގެ ވެރިން އަތްދަށުލައި އެމީހުންގެ މަސައްކަތަށް ބްލެކްމެއިލް ކުރާކަމުގެ ތުހުމަތު އަބަދުވެސް ކުރެވެއެވެ.

އެމެރިކާގެ ޖަސްޓިސް ޑިޕާޓްމަންޓުން ވަނީ އެޕްސްޓައިން އާއި ކުރީގެ ރައީސް ބިލް ކްލިންޓަން ފަދަ ގިނަ ބޮޑެތި މީހުން އެޕްސްޓެއިންއާ އެކު ބޭއްވި ގުޅުން ތަހުގީގު ކުރާ ކަމަށް ހުކުރު ދުވަހު ބުނެފައެވެ.