މުނިފޫހި ފިލުވާދޭ ސިނާޢަތް އެންމެ ވަރުގަދަ އެއް ގައުމަކީ އެމެރިކާއެވެ. އެމީހުންގެ ޓީވީ ސިލްސިލާ ސިމްސަންސްއަށް ބަލާލަމާތޯއެވެ؟ މިސިލްސިލާގައި ކަލާނގެއަށް ހަޖޫޖަހައި ކަލާނގެ ބޮޑު ޖޯކެއްގެގޮތުގައި ސިފަކޮށްދީފައިވެއެވެ. މީގެއިތުރަށް ރަސޫލުންނާއި ނަބިއްޔުންގެ މައްޗަށް ފިލްމުހަދައި އެބޭކަލުންގެ ޢިއްޒަތާއި ހުރުމަތް ވެއްޔާއި މޮޑެފައިވެއެވެ. އެބޭކަލުން ގެންނެވި މުޢުޖިޒާތްތަކާމެދު ވެސް މީޑިއާގައި މީހުން ފުރައްސާރަކުރެއެވެ. މިއީ އަޅުގަނޑުމެން ދިރިއުޅެމުންދާ ޒަމާނީ ދައުރުގެ ފަހުގެ ހާލަތެވެ. މިއީ ހަމަ ކޮންމެ ކަމެއް ޖޯކަކަށް ހަދާ ޒަމާނެވެ. މާތްކޮށްހިތުމަކީ މިހާރު އެކަމަށް ފުރައްސާރަކުރެވޭ ކަމެކެވެ. އެހެންވެ މާތްކޮށްހިތަން މީހުން ފަސްޖެހި ބިރުގަނެއެވެ. މާތްކޮށް ހިތާނަމަ އެކަންކުރަނީ އެކަން ކުރަންނުޖެހޭ ފަރާތަކަށެވެ.
މިދަނޑިވަޅުގައި ހިތާމަޔާއެކު ފާހަގަކުރަންޖެހޭ އެއްކަމަކީ ޚުދު ބައެއް މުސްލިމުން އެމީހުންގެ ދީނަށާއި ކީރިތި ޤުރްއާނަށާއި ރަސޫލުﷲ ﷺ އަށް ނިސްބަތްކޮށް ދައްކަންނުވާ ޒާތުގެ ވާހަކަދެއްކުމެވެ. ނުވަތަ ފާޑުކިއުމުގެ ނަޒަރަކުން ކީރިތި ޤުރްއާނާއި ކީރިތި ރަސޫލާ ﷺ އާމެދު ބަސްބުނުމެވެ. އަދި އެފަދަ ވާހަކައަކީ ހެޔޮނިޔަތުގައި އިޚުލާސްތެރިކަމާއެކު ދައްކާ ވާހަކަކަމަށް އެފަދަ މީހުންނަށް ހީވުމެވެ. ހަގީގަތުގައި އެމީހުންނަށް ކީރިތި ޤުރްއާނާއި ކީރިތި ނަބިއްޔާ ﷺ ނޭގޭކަން ޚުދު އެމީހުންނަށްވެސް ނޭގެއެވެ. ކީރިތި ޤުރްއާން ދެނެގަތުމަށްޓަކައި އެފޮތުގެ ތަފްސީރަށް އެނބުރި ތަދައްބުރުކުރަންޖެހެއެވެ. ރަސޫލުﷲ ދެނެގަތުމަށްޓަކައި އެކަލޭގެފާނުގެ ސިޔަރަތަށް ރުޖޫޢަވެ އިބުރާހީމްގެފާނުގެ ހަޔާތްޕުޅު ދެނެގަންނަންޖެހެއެވެ.
ކަންއޮތީ މިހެން ކަމުގައިވިޔަސް އެއްވެސް ރަސޫލަކަށް ނުވަތަ ނަބިއްޔަކަށް ފުރައްސާރަކޮށް ހަޖޫ ޖެހުމަކީ މުސްލިމުން ގަބޫލުކޮށް ބަލައިގަންނަކަމެއް ނޫނެވެ. އެއީ މުސްލިމުން ނަފުރަތުކޮށް އެކަމާ ދެކޮޅުހަދާ ކަމެކެވެ. ވަކިން ޚާއްޞަކޮށް އަޅުގަނޑުމެންގެ މާތް ނަބިއްޔާ މުޙައްމަދު ﷺ އަށް ފުރައްސާރަކޮށް ބަދުބަސް ބުނުމުން މުސްލިމުން އެކަމާދެކޮޅަށް ތެދުވުމަކީ ޠަބީޢީކަމެކެވެ. އެހެނީ އެއީ މުސްލިމުންނަށާއި އެމީހުންގެ ދީނަށް ފުރައްސާރަކޮށް މަލާމާތްކުރުން ކަމުގައި ވާތީއެވެ. އެކަމަކުވެސް ދުނިޔޭގެ އެކިކަންކޮޅުގައި ދޭތެރެދޭތެރެއިން މިފަދަ ނޭއްގާނީ އަމަލުތައް ހިންގައެވެ. އެފަދަ ކޮންމެ ވަގުތަކު އިސްލާމީ އުންމަތް އެކަމަށް ކޮންމެވެސް ސިފައެއްގައި ރައްދުދެއެވެ.
ވިސްނާލަމާ ހިނގާށެވެ. ރަސޫލުﷲ ﷺ އަށް ފުރައްސާރަކުރާ މީހުން އެކަންކުރުމުގެ އެއްބޭނުމަކީ މުސްލިމުން ރުޅިއަރުވައި އެމީހުން ކެއްކުވުމެވެ. މުސްލިމުން ލައްވައި އަތުންފައިން ގޯސްހެއްދުމެވެ. މިއީ މުސްލިމުން ހޭލަންޖެހޭ ނުކުތާއެކެވެ. ދީނުގެ ޢަދުއްވުން ޖަހާ ކޮންމެ މަޅިއެއްގައި މުސްލިމުން ޖެހިގެން ނުވާނެއެވެ. މުސްލިމުން ޢިލްމާއި ޙިކުމަތުޢަމަލީ ބޭނުންކޮށްގެން އެފަދަ މަޅިތަކުން ސަލާމަތްވާންޖެހެއެވެ. އަދި ނަބިއްޔާއަށް އެމީހުން ކުރާ ފުރައްސާރައާއި ކުރިމަތިލާންޖެހެނީ ވިސްނުންތެރިކަމާއެކު ފިސާރިމޮޅަށެވެ. މިނޫންގޮތަކަށް ރައްދުދެވޭ ކޮންމެ ފަހަރަކު ހަގީގަތުގައި އެކިލަނބުކޮށްލެވެނީ އަޅުގަނޑުމެންގެ ދީނާއި އުއްމަތުގެ ތަސައްވުރެވެ. އެކަމުން ގެއްލުންވަނީ މުސްލިމް އުންމަތަށެވެ.
-ނުނިމޭ
