ސިޔާސީ ބައެއް މީހުން ޕޯޑިއަމްތަކުގައި ވާހަކަ ދައްކަމުން ދޮގުހަދަނީ އެއްވެސް ވަރެއްގެ އިޚްލާސްތެރި ކަމެއްނެތީމާ ކަމަށް ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
އޭނާ ވިދާޅުވީ ވެރިކަމަށް އައުމަށްޓަކައި ބޮޑެތި ދޮގު ވައުދުވަމުންދާއިރު އެކަންކަން ނުވާނޭކަން އެފަދަ މީހުންނަށް ރަނގަޅަށް އެނގޭނޭ ކަމަށެވެ. ”ސިޔާސީ ޕޯޑިއަމް ތަކުގައި އެހަދަނީ ކަނޑައެޅިގެން ދޮގު. އެފަދަ މީހުންނަށް އެނގޭނެ މިވެނި ޕްރޮޖެކްޓަކީ ނުހިންގޭނޭ ޕްރޮޖެކްޓެއްކަން. އެކަން އެނގި ތިބެމެވެސް އެވާހަކަ އެދައްކަނީ އިހްލާސްތެރިކަމާއި ދެތުވެރިކަން ނެތީމާ. އެކަންވަރަށް ސާފުވޭ، ވެރިކަމަށް އައުމަށްފަހު. އެ ތެދުވެރިކަމާއި އިހްލާސްތެރިކަން ނެތްކަމަށް. އެނގިތިބެ ދޮގުހަދަނީ ވަގުތީ ފައިދާއެއް ހޯދަން،“ އުމަރު ވިދާޅުވިއެވެ.
އެއީ އާޚިރުގައި ސިޔާސީ ބޮޑު އަގެއް ދައްކަންޖެހޭ ހުތުރު އަމަލެއް ކަމަށް ވެސް އުމަރު ވިދާޅުވިއެވެ. ”ކޮބައިތޯ އެގޭ ސިޔާސީ ނަތީޖާއަކީ. ސިޔާސީ ނަތީޖާއަކީ ފަސްއަހަރު އެކަނި ލިބޭނީ. އިތުރު އެއްޗެއް ނުލިބޭނެ،“ އުމަރު ވިދާޅުވިއެވެ. އެގޮތަށް ހަދަނީ ކުރުމަގަކުން ވެރިކަމަށް އައުމަށެވެ. އެކަމުގެ ނަތީޖާއަކަށްވަނީ އެމީހަކަށް ހަމައެކަނި ފަސް އަހަރު ލިބުން ކަމަށް ވިދާޅުވިއެވެ. ތެދު ހަދަމުން ދިގުމަގަކުން ވެސް ވެރިކަމަށް އާދެވޭނޭ ކަމަށް އޭނާ ވިދާޅުވިއެވެ. ”ނަތީޖާއަކީ ދެމެހެއްޓެނިވިގޮތެއްގައި ވެރިކަންވެސް ކުރުން. އަދި ވެރިކަންކޮށް ނިންމާފައި ސުވަރުގެއަށްވެސް ދިއުން. އަދި މީހުންގެ ބޮޑުތާއީދަކާއެކު ވެރިކަން ނިންމާލުން. އެހެންވީމާ ޕޮލިޓީޝަނަކު ނިންމަންވީ އޭނާ ވެރިކަމަށް އަންނާނީ ކުރުމަގަކުން ދޮގުހަދަމުންތޯ، ދިގުމަގުން ތެދުހަދަމުންތޯ،“ އުމަރު ވިދާޅުވިއެވެ.
ތެދުހަދަމުން ދިގުމަގުން އަންނަ މީހާގެ ”ޓާމްސްތައް“ ދިގުވެސްވާނޭކަމަށާއި އެހެން ނަމަވެސް ނިމޭއިރު އެތައްބައެއްގެ ތާއީދުވެސް އޮންނާނޭ ކަމަށް އޭނާ ވިދާޅުވިއެވެ. ދޮގުހަދަމުން ކުރުމަގުން އަންނަ މީހާގެ ވެރިކަން ނިމޭއިރު އޭނާ އޮންނަނީ މުޅިން ބަދަލުވެފައި ކަމަށް ވެސް އުމަރު ވިދާޅުވިއެވެ. ދޮގު ހަދަމުން ކުރުމަގުތަކުން ވެރިކަމަށް އައި މީހުން ނެރެދީފައިވަނީ ހުތުރު ނަތީޖާއެއް ކަމަށް ވެސް ވިދާޅުވިއެވެ. އެހެން ކަމުން އޭނާ ވެރިކަމަށް އަންނީ ތެދުވެރިކަމާއެކު ދިގު މަގުން ކަމަށް ވެސް ވިދާޅުވިއެވެ.
