ދަރީންނަށް ކީރިތި ޤުރުއާން އުނގަނައިދިނުމަށް ބެލެނިވެރީން މިހާރުވެސް ކުރަމުންދާ މަސައްކަތަށް މާލޭސިޓީގެ މޭޔަރު އާދަމް އާޒިމް ސާބަސް ދެއްވައި ތަޢުރީފް ކުރައްވައިފިއެވެ.

މާލޭ ސިޓީކައުންސިލުން ބޭއްވި ޤުރުއާން މުބާރާތާއި މަދަހަ މުބާރާތުގެ ނަތީޖާ ފާޅު ކުރުމަށް ރޭ ބޭއްވި ޖަލްސާގައި ވާހަކަ ދައްކަވަމުން މޭޔަރު ވިދާޅުވީ ”ދުނިޔެ ތަރައްޤީ ވެފައި ވިޔަސް، ދަރިންނަށް  ކީރިތި ގުރުއާން އުނގަންނައި ދިނުމަށް، ބެލެނިވެރިން ކުރައްވާ މަސައްކަތަށް އައްސަރިބަހާއި ސާބަސް ރައްދު ކުރަން ޖެހޭ. ސްކޫލުން ޤުރުއާން ކިޔަވައިދޭ މިންވަރަށް ވުރެ އިތުރަށް، ޤުރުއާން ކިޔަވައި ދިނުމަށް ޓަކައި، ކޮންމެ ވެސް ޤުރުއާން ކުލާހަކަށް ދަރިފުޅު ފޮނުވާނެ. ނޫންނަމަ ޤުރުއާން މުދައްރިސަކު ގެއަށް ގެނެސްގެން ޤުރުއާން އުނގަންނައި ދޭނެ. ކުރުގޮތަކަށް ދަންނަވާނަމަ ދަރިންނަށް ކީރިތި ޤުރުއާން އުނގަންނައި ދެއްވުމަށް ބެލެނިވެރިން ހޭލަމޭލައަށް އުޅެމުންދާ ތަން ފެނުމަކީ، އަޅުގަނޑު ވަރަށް އިޙުތިރާމާ އެކު ބަލައިގަންނަ ކަމެއް،“ ކަމަށެވެ.

މޭޔަރު ވިދާޅުވީ 1980 ގެ އަހަރުތަކުގެ ކުރީގައި، އޮތޮޅު ތެރޭގެ ރަށްރަށުގައި ތަޢުލީމު ޢާއްމުކޮށް ފެތުރިގެން ނުދާއިރު، ކޮންމެ ރަށެއްގައި ވެސް އެތައް އެދުރުގެ ހުރި ކަމަށެވެ. އެ ތަންތަނުން މައިގަނޑު ގޮތެއް ގައި އުނގަންނައިދެނީ ކީރިތި ގުރުއާނެވެ. އެދުވަސްވަރަކީ އެދުރުގެއަށް ނުދާ ކުދީންނާއި ޤުރުއާން ކިޔަވަންނޭނގޭ ކުދީންނާމެދު މުޖުތަމަޢުން ވަރަށްދަށް ނަޒަރުކުން ދެކެމުން އައިދުވަސްވަރެއް ކަމަށްވެސް ވިދާޅުވިއެވެ. ”އޭރު ކޮންމެ ރެއެއްގެ، ކޮންމެ ރަށެއްގައި މަޣުރިބު ނަމާދާ ޢިޝާ ނަމާދާ ދެމެދު، ރަށުގެ މާހައުލު ގުގުމާފަ އޮންނީ، ކިރިތި ގުރުއާނުގެ މޫރިތި އަޑުން. އެއް ގެއަށް ވުރެ އަނެއް ގެއިން ގުރުއާން ކިޔަވާ އަޑު ބާރު ކުރުމަށް މަސައްކަތް ކުރާނެ،“ އާޒިމް ވިދާޅުވިއެވެ. މިއިން ދައްކުވައިދެނީ ދިވެހިންގެ ހިތުގައި، ޒަމާނުއްސުރެ ކީރިތި ޤުރުއާނަށް އޮންނަ ލޯތްބެވެ. ރީތިކޮށް ކީރިތިޤުރުއާން ކިޔަވަން އިސްކަންދޭ މިންވަރު ކަމަށް ވެސް މޭޔަރު ވިދާޅުވިއެވެ.

އާދަކާދަ އަކީ ބަދަލުވަމުން އަންނަ އެއްޗަކަށްވިޔަސް ގަދީމީ ޒަމާނުއްސުރު ދިވެހިންގެ ތެރޭގައި އޮތް، ދެ ނަމާދު ދޭތެރޭގައި ޤުރުއާން ކިޔެވުމުގެ އާދާކާދައަކީ، ދިރުވައި އާލާކޮށް ދަމަހައްޓަން ޖެހޭ އާދަކާދައެއް ކަމަށް މޭޔަރު ވިދާޅުވިއެވެ. ”އެހެން ކަމުން ކުރީ ޒަމާނެއެކޭ އެއް ގޮތަށް، ކީތިރީ ޤުރުއާނުގެ މޫރިތި އަޑުން، އަޅުގަނޑުމެންގެ މި ސައްތައިން ސައްތަ މުސްލިމް މުޖުތަމުޢަށް ދިރުން ގެނައުމަށް ޓަކައި، ދެ ނަމާދު ދޭތެރޭގައި ގުރުއާން ކިޔެވުމުގެ އާދަކާދާ ދިރުވައި އާލާކުރުމަށް އަޅުގަނޑު ދިވެހި ލޮބުވެތި އަޚުންނާއި އުޚުތުންނަށް އިލްތިމާސް ކުރަށް،“ މޭޔަރު ވިދާޅުވިއެވެ.

އާޒިމް ވިދާޅުވީ މި ފަދަ މުބާރާތްތައް މާލެ ސިޓީ ކައުންސިލުން އިންތިޒާމް ކޮށްގެން ބާއްވަނީ ހަމައެކަނި މާލެ ސޓީ ކައުންސިލުގެ މެންޑޭޓްގެ ތެރޭގައި މި ފަދަ މުބާރާތްތައް ބޭއްވުން ހިމެނޭތީ އެކަނި ނޫންކަމަށެވެ. އެކަން ކުރުމުގައި އެއަށްވުރެން މާ މަތިވެރި މާ މާތް މަޤުޞަދެއް އެބައޮތް ކަމަށް އޭނާ ވިދާޅުވިއެވެ. އެއީ ދީނަށް ލޯބިކުރާ ޖީލެއް ބިނާ ކުރުމުގައި، މާލެ ސިޓީ ކައުންސިލުން ވެސް ބައިވެރިވާން ބޭނުންވުން ކަމަށް ވެސް ވިދާޅުވިއެވެ.

މިއަހަރުވެސް މި ދެ މުބާރާތް ބާއްވާނޭ ކަމަށް މޭޔަރު ވިދާޅުވިއެވެ.