ޕާކިސްތާންގެ އިގްތިސާދު އެއް ޓްރިލިއަން ޑޮލަރުގެ އިގްތިސާދަކަށް ހެދުމަށް، ޓެކްނޮލޮޖީއަކީ މުހިންމު ވަސީލަތެއް ކަމަށާއި ޕާކިސްތާން ސަރުކާރުން ޓެކްނޮލޮޖީއަށް ވާސިލު ވުމަށް ޒުވާނުންނަށް އަޅަމުންދާ ހުރަސްތައް ނައްތާލުމަށް ޕާކިސްތާން ޕީޕަލްސް ޕާޓީގެ ޗެއަރމަން ބިލާވަލް ބުއްޓޫ ޒަރްދާރީ ގޮވާލައްވައިފިއެވެ.
އައިބީއޭ ސުއްކޫރު ޔުނިވަރސިޓީގައި ބޭއްވި ހަރަކާތެއްގައި ވާހަކަ ދައްކަވަމުން ބިލާވާލް ވިދާޅުވީ، ޒުވާނުންގެ ހައްގުތައް ހަނިކުރުމަށް ސަރުކާރުން ކުރާ މަސައްކަތްތަކާސާބިތު ކަމާއެކު ޒުވާނުން ކުރިމަތިލާން ޖެހޭނެ ކަމަށެވެ.
އޭނާ ވަނީ އެ ޔުނިވާސިޓީ މެދު ފަޚުރުވެރިވާކަމަށް ވިދާޅުވެފައެވެ. އެ ޔުނިވާސިޓީ އުފެއްދެވީ އޭނާގެ މަރުހޫމް މަންމަ ބެނާޒީރު ބުއްޓޫއެވެ.
”މި އޮށް މިހާރު ބޮޑުވެފައިވަނީ ދުނިޔޭގެ ފެންވަރުގައި ފާހަގަކުރެވޭ ގަހަކަށް، ޕާކިސްތާނުގެ އެކި ހިސާބުތަކުން ދަރިވަރުން ޝައުގުވެރިވާ އިހުތިރާމް ލިބިގެންވާ މުއައްސަސާއަކަށް މިތަން ވެފައި މިވަނީ،“ ބިލާވަލް ވިދާޅުވި އެވެ.
ބިލާވާލް ވަނީ މަރުކަޒީ ފެންވަރެއްގައި ކަންކަން ކޮންޓްރޯލު ކުރުމަށް ސަރުކާރުން ގެންގުޅޭ ނަޒަރިއްޔާއަށް އަލިއަޅުވާލައްވައި، ތައުލީމީ މުއައްސަސާތަކާއި ފަރުދީ މިނިވަންކަން ހިމެނޭ ގޮތަށް ހުރިހާ ކަމެއް ރެގިއުލޭޓް ކުރަން ސަރުކާރުން ގެންގުޅޭ ވިސްނުން ދޫކޮށްލަން ޖެހޭނެ ކަމަށް ވިދާޅުވެފައެވެ.
ޕާކިސްތާންގައި އިންޓަރނެޓް ކޮންޓްރޯލު ކޮށް ހަނިކުރުމަށް ސަރުކާރުން މަސައްކަތްތައް ކުރަމުން ދެއެވެ. އެކަމާ ގުޅިގެން ކޮންޓްރެކްޓް މަސައްކަތް ކުރާ ޒުވާނުންނަށްވެސް އިންޓަރނެޓް ބޭނުން ކުރުމުގައި ދަތިތަކާ ދިމާވެ، އާމްދަނީއަށް ހުރަސް އެޅިފައި ވެއެވެ.
