ހުޅުމާލޭގައި ނޭޕާލް އަންހެނަކަށް ތޫނު އެއްޗަކުން ހަމަލާދީ ޒަހަމްކޮށްލި މައްސަލާގައި ބަނގްލަދޭޝް މީހަކު ހައްޔަރު ކޮށްފިއެވެ.

އުމުރުން 25 އަހަރުގެ ޖަހަންގީރު މިއާ ހައްޔަރު ކޮށްފައިވަނީ ސެޕްޓެމްބަރ 27 ވަނަ ދުވަހުގެ ހަވީރު ކަމަށް ފުލުހުން ވަނީ ބުނެފައެވެ.

އެމީހާ ހައްޔަރުކޮށްފައިވަނީ ސީސީޓީވީ ކެމެރޭ ފުޓޭޖު ބަލައިގެންނާއި އަދި އެހެން ގޮތްގޮތުންކުރެވުނު ތަހުގީގީ މަސައްކަތުން އެމީހާ ލޮކޭޓުކޮށްގެން ކަމަށް ފުލުހުން ވިދާޅުވިއެވެ. އެމީހާ ހައްޔަރު ކޮށްފައިވަނީ ހުޅުމާލޭ ފޭސް ދެއަކުން ކަމަށްވެސް ފުލުހުން ވަނީ ވިދާޅުވެފައެވެ.

މިހާދިސާގައި ހަމަލާދީ ޒަހަމްކޮށްފައިވަނީ ހުޅުމާލޭ ފޭސް އެކެއްގައި ހުންނަ ފިހާރައެއްގައި މަސައްކަތްކުރާ 21 އަހަރުގެ އަންހެނެކެވެ. އޭނާއަށްދަނީ ހޮސްޕިޓަލުގައި ފަރުވާ ދެމުންނެވެ.

ފުލުހުން ބުނީ މައްސަލަ ތަހުގީގުކުރަމުން އަންނަ ކަމަށެވެ.