ފަލަސްތީނުގެ ޣައްޒާ ހިމެނޭހެން މުޅި ސަރަޙައްދުގައި ހިންގަމުންދާ އިންސާނިއްޔަތާ ޚިލާފު ޖަރީމާތައް ހިންގުމުގައި މަސްއޫލުވާ ފަރާތްތައް އިންސާފުގެ ކުރިމައްޗަށް ގެނައުމަށް މަސައްކަތް ކުރައްވާނޭ ކަމަށް ތުރުކީވިލާތުގެ ރައީސް ރަޖަބް ތައްޔިބު އުރުދުޣާން ވިދާޅުވެއްޖެއެވެ. އޭނާ ވިދާޅުވެފައިވަނީ އަނިޔާވެރި އެފަދަ އަމަލުތައް ހަރުކަށި އިބާރާތުން ކުށްވެރި ވެސް ކުރައްވާ ކަމަށެވެ.
އެކްސްގައި ކުރައްވާފައިވާ ޕޯސްޓެއްގައި އުރުދުޣާން ވިދާޅުވެފައިވަނީ ޣައްޒާއިން 74,000 އަޚުންނާއި އުޚްތުންގެ ލޭ އޮހުރުވާލި މީހުންނާއި ލުބުނާނުން ފެށިގެން ސޫރިޔާއާ ހަމައަށް "އަޅުގަނޑުމެންގެ ސަރަޙައްދުގައި ނާމާންކަމާއި ނުރައްކާތެރިކަން އުފައްދާ ފަރާތްތަކުން އިންސާފާ ކުރިމަތިލާންޖެހޭނެ،" ކަމަށެވެ.
މިފަދަ ޖަރީމާތައް ހިންގަމުންދާ ފަރާތްތައް ޤާނޫނީ ގޮތުން ޖަވާބުދާރީ ކުރެވެންދެން ސާބިތުކަމާއެކު ތުރުކީ ސަރުކާރު ދެމި އޮންނާނޭ ކަމަށް ވެސް ވިދާޅުވިއެވެ. އަބަދުވެސް ތުރުކީވިލާތް ދެމި އޮންނާނީ ހަޤީޤަތް ހާމަކުރުމާއި، ބިރުވެރިކަމެއް ނެތި ތެދު ބުނުމުގައި" ކަމަށް ވެސް އެމަނިކުފާނު ވިދާޅުވިއެވެ.
