ގޮވުންތައް ގޮވަނީއެވެ. މިއީ ޣައްޒާގެ ކުދިބޮޑު އެންމެންނަށް އާކަމެއް ނޫނެވެ. މިއީ ދުވަހުން ދުވަހަށް ކުރިމަތިވާ ބިރުވެރި ނާމާންކަމެކެވެ. މި ބިރުވެރިކަމާއި ބިރުވެރި އަޑުތަކުން އެ މީހުންގެ ނިދިވަނީ ލޮލާވަކިވެފައެވެ.
މި ހާލަތުގައި ޣައްޒާގެ ބިމުން މީހަކު، ކުޑަކުއްޖަކު ޝަހީދު ނުވާ ދުވަހެއް މަދެވެ. ޒަޔަނިސްޓުންގެ އަނިޔާވެރި ކަމުގައި މީހަކު ޒަޚަމް ނުވާ ދުވަހެއް ނުދެއެވެ. މި ހިތްދަތި ކަމާއި ވޭނުގައި ދުވަސްތައް ވޭތުކުރަމުން ދަނިކޮށް ފިނިމޫސުން ވެސް މިވަނީ ކައިރިވެފައެވެ. މިހާރު މިވަނީ ފިނިމޫސުމުގެ ވާރެޔާއި ވައިން ރައްކާތެރިވާނެ ގޮތްތަކެއް ހޯދަން ޖެހިފައެވެ. އެމަސައްކަތް ޣައްޒާގެ ރައްޔިތުން އެބަކުރެއެވެ. އެ މީހުންގެ ޙާލަތު ބޮޑަށް ދެނެވޮޑިގެންވަނީ މާތްﷲ އެވެ.
ފަލަސްތީނުގެ ރައްޔިތުން ބުނާގޮތުގައި ހަނގުރާމަ ހުއްޓުމަށްވީ އެއްބަސްވުން އެއީ ނަމެކެވެ. "ހަމަލާތައް ހުއްޓާލުމެއް" ނާދެއެވެ. ކޮންމެ ވަގުތެއްގައިވެސް ހަމަލާއެއް އަތުވެދާނެއެވެ. އިސްރާއީލުގެ އަސްކަރިއްޔާއިން ދަނީ މަގުތަކުގެ މެދުގައި ހުންނަ އުޅަނދުފަހަރު ގޮއްވަމުންނެވެ. އޭގެ ސަބަބުން މަގުމަތީގައި ތިބޭ އާންމުންނަށް ގިނަފަހަރަށް އަނިޔާވެއެވެ. މިއީ ގިލަންވެރި ކަމެކެވެ.
ދުވަހުން ދުވަހަށް އާންމުން އުފުލަމުންދާ ތަކުލީފުތައް ދަނީ އިތުރުވަމުންނެވެ. ދިރިއުޅުން ވަނީ އިންތިހާއަށް ދަތިވެފައެވެ. ކުދިން ސްކޫލަށް ދާން ބޭނުންވެއެވެ. އެކަމަށް މަސައްކަތް ކުރެއެވެ. ނަމަވެސް، މެދުކެނޑުމެއްނެތި ދެވޭ ހަމަލާތަކުގެ ސަބަބުން ބެލެނިވެރިން ތިބީ ކުދިން ފޮނުވަން ބިރުންގަނެފައެވެ. ޣައްޒާގެ ރައްޔިތުންނަށް އެހީވާން ދުނިޔެ ވަނީ ނުކުޅެދިފައެވެ. ބާރުގަދަ ދަގަނޑު އަތްތަކުން ކުދިކުދިވެގެންދަނީ ފަލަސްތީނާއި އެޤައުމުގެ ރައްޔިތުންނެވެ.
