އީރާނުން އެދެނީ އެގައުމުގެ ނިއުކްލިއަރ ޙައްޤުތަކަށާއި، ބިމުގެ ސިޔާދަތަށާއި، ހުރުމުޒު ކަނޑުއޮޅީގެ މައްޗަށް އޮތް ބާރުވެރިކަމަށް އިޙްތިރާމް ކުރުމަށް ކަމަށް އެގައުމުގެ ޤާނޫނީ ކަންކަމާ ބެހޭ ނައިބު ރައީސް މާޖީދު އަންޞާރީ ވިދާޅުވެއްޖެއެވެ.
ހޮނިހިރު ދުވަހު ބޭއްވެވި ބައްދަލުވުމެއްގައި ވާހަކަފުޅުދައްކަވަމުން އަންޞާރީ ވަނީ 12 ދުވަހުގެ ހަނގުރާމައިން ފެށިގެން ރަމަޟާން ހަނގުރާމައާ ހަމައަށް އީރާނުގެ ރައްޔިތުން ދެއްކި ސާބިތުކަމާއި ހިތްވަރު ފާހަގަކުރައްވާފައެވެ. އަދި ރައްޔިތުންގެ ކެރުމާއި، ކެތްތެރިކަމާއި، ޒިންމާދާރުކަމާއެކު ތިބުމުގެ ސަބަބުން ހަތަރު ފަރާތުގެ ރޭވުންތަކާއި މަޤުޞަދުތައް ނާކާމިޔާބުވެގެންދިޔަ ކަމަށް ވިދާޅުވިއެވެ.
ހަތަރު ފަރާތަށް އެމީހުންގެ ލަނޑުދަނޑިތައް ޙާޞިލުނުކުރެވުނުކަން ފާހަގަކުރައްވަމުން، މި ނާކާމިޔާބީތަކުން ޢިބުރަތް ޙާޞިލުކޮށް، އިންޒާރާއި ބިރުދެއްކުމުގެ ބަދަލުގައި އީރާނުގެ ރައްޔިތުންނަށް އިޙްތިރާމްކޮށް، ބައިނަލްއަޤްވާމީ ޤާނޫނުތަކާއި އުޞޫލުތަކާ އެއްގޮތަށް އީރާނާ މުޢާމަލާތްކުރާނެ ކަމަށް އުންމީދުކުރައްވާ ކަމަށް އޭނާ ވިދާޅުވިއެވެ.
ނިއުކްލިއަރ މައްސަލާގައި އީރާނުގެ ރައްޔިތުންގެ ޙައްޤުތަކަށް އިޙްތިރާމްކުރުން މުހިންމުކަން ފާހަގަކުރައްވަމުން އަންޞާރީ ވިދާޅުވީ، ފިއްތުންތަކާއި ބާރުގެ ބޭނުންކުރުމުން އެއްވެސް ނަތީޖާއެއް ނުނިކުންނާނެ ކަމަށެވެ.
އަދި އީރާނުގެ ނިއުކްލިއަރ ޙައްޤުތަކާއި، ބޯޑަރުތަކުގެ މައްޗަށް އޮތް ސިޔާދަތާއި، ހުރުމުޒު ކަނޑުއޮޅީގެ ކަންކަމަށް ވެސް ބޭނުންވަނީ ޢަދުލުވެރި އަދި ހަމަހަމަ މުޢާމަލާތެއް ކަމަށް އޭނާ ވިދާޅުވިއެވެ.
