ޕާކިސްތާނުގެ ސަރުކާރުން، ސަލާމަތީ ގޮތުން ވަރުގަދަ އަދި ޒަމާނީ ފީޗާސްތައް ހިމެނޭ އައު ފައިސާ ނޫޓުތަކެއް ތައާރަފުކުރުމަށް ނިންމައިފިއެވެ. މި ނިންމުން ނިންމާފައިވަނީ ބޮޑުވަޒީރު ޝެހްބާޒް ޝަރީފްގެ ރިޔާސަތުގައި ބޭއްވުނު ކެބިނެޓް ބައްދަލުވުމެއްގައެވެ.
މި ބައްދަލުވުމުގައި ކެބިނެޓް މެންބަރުންނަށް މައުލޫމާތު ދީފައިވާ ގޮތުގައި، އަލަށް ނެރުމަށް ހަމަޖެހިފައިވަނީ 100 ރުޕީސް، 500 ރުޕީސް، 1،000 ރުޕީސް އަދި 5،000 ރުޕީސްގެ ނޫޓުތަކެވެ. މި ނޫޓުތަކަކީ މިހާރު ބޭނުންކުރާ ނޫޓުތަކަށްވުރެ ރައްކާތެރިކަން އިތުރުކުރެވިފައިވާ ނޫޓުތަކެއް ކަމަށް އޮފިޝަލުން ވިދާޅުވިއެވެ.
އަލަށް ފަރުމާކުރާ ނޫޓުތަކުގައި ޕާކިސްތާނުގެ ސަރަހައްދީ އަދި ޖިއޮގްރަފީގެ މުއްސަނދިކަމާއި، ތާރީޚީ މުހިންމު ބިނާތައް ދައްކުވައިދޭނެއެވެ. މީގެ އިތުރުން، މި ނޫޓުތަކުގެ ފަރުމާގައި ގައުމީ ތަރައްގީގައި އަންހެނުން އަދާކުރާ މުހިންމު ދައުރު ފާހަގަކުރުމުގެ ގޮތުން ހާއްސަ ސިފަތަކެއް ހިމެނުމަށް ވަނީ ނިންމާފައެވެ.
ކެބިނެޓުން ނެރުނު ބަޔާނެއްގައިވާ ގޮތުން، އައު ނޫޓުތަކުގައި މޫސުމަށް އަންނަ ބަދަލުތައް ފަދަ އިޖުތިމާއީ މުހިންމު މައުޟޫއުތަކަށްވެސް އަލިއަޅުވާލާނެއެވެ. މިއީ ގައުމީ ފެންވަރުގައި ހޭލުންތެރިކަން އިތުރުކުރުމަށް ކުރެވޭ މަސައްކަތުގެ ބައެއް ކަމަށް ބެލެވެއެވެ.
