އަހަރެން ވަރަށް އޯގާތެރިކަމާއެކީ، ޖުމާނާއަށް ގޮވާލީމެވެ. ބަލަން ނުކެރިފައި އިންކަހަލަ ގޮތަކަށް އިނދެ އަހަރެންނާއި ދިމާއަށް ޖުމާނާ އިސް އުފުލައިލިއެވެ. ”ދޮންބެ ކުރި ސުވާލަށް ޖުމާނާ ޖަވާބު ނުދިނީ ކީއްވެ؟ އަދިވެސް ތި އިނީ ދޮންބެ ދެކެ ރުޅި އައިސްތަ؟“ އަހަރެން ކުރި ސުވާލުގެ ޖަވާބުގައި އެއްވެސް ބަހެއް ނުބުނެވި އުޅެނިކޮށް ޖުމާނާއަށް ރޮވިއްޖެއެވެ. ޖުވޭދާ، ޖުމާނާގެ ތަންކޮޅެއް ކައިރިއަށް ޖެހިލާފައި ކޮނޑުގައި އަތް އަޅާލިއެވެ. އަހަރެންނަށް އިސްދަށަށް ޖަހާލެވުން ފިޔަވާ އިތުރު އެއްވެސް ކަމެއް ނުކުރެވުނެވެ. ”ދޮންބޭ“ ޖުމާނާ ގިސްލަމުން އަހަރެންނަށް ގޮވާލިއެވެ. އަހަރެން އިސް އުފުލާ، ޖުމާނާއާއި ދިމާއަށް ބަލައިލީމެވެ. އޭރު ޖުމާނާވެސް އިނީ އަހަރެންނާއި ދިމާއަށް ބަލަހައްޓައިގެންނެވެ. ”ދޮންބެ ތީ އަހަރުމެން ދެބެންނަށްވުރެ ހައަހަރު ބޮޑު މީހެއް. އަހަރެން ޤަބޫލުކުރަން އަހަރުމެންނަށްވުރެ މާގިނަ ކަންކަން ދޮންބެއަށް ފެނިފަ ހުންނާނެކަމަން. އަނެއްކޮޅުން ފިރިހެން ކުއްޖެއްވީމަ، ކުރިމަތިލާންޖެހޭ އެތައް ދަތިތަކެއް ހުންނާނެކަން. ބައްޕަޔަކު ހުރެ، ބައްޕައެއްގެ ލޯބި ނުލިބޭތީ އުފުލަންޖެހޭ ހިތްދަތިކަންވެސް އޮންނާނެ.“ ޖުމާނާގެ ވާހަކަ އެހީސާބަށް ދާންވާއިރަށް އަހަރެންގެ ލޮލުން ހިފެހެއްޓުމެއްނެތި ކަރުނަ އޮހެން ފެށިއެވެ. އެހެންނަމަވެސް އެއްވެސް އެއްޗެއް ނުބުނެ ޖުމާނާ ދައްކަމުން ގެންދިޔަ ވާހަކަ އަޑުއަހަން އިނީމެވެ. ”އެކަމަކު މަންމަވެސް ވަރަށް ހިތްވަރު ކޮށްގެން ދޮންބެ ތިހާ ހިސާބަށް ގެނެއްސަ ތިހުރީ. ސްކޫލް ދަޢުރުގެ ވަކި ހިސާބަކުން ކިޔެވުން ހުއްޓާލަން ޖެހުނީވެސް ސަބަބެއް އޮވެގެން. އެކަހަލަ ކަންތަކާވެސް ދޮންބެ ދެރަވެ ވިސްނާނެކަން އަހަރުމެންނަށް އެނގޭ.“ އެވަޤުތު އަހަރެން ގޮސް ޖުމާނާގެ ކައިރީގައި އިށީންދެލީމެވެ. އޭރުވެސް އަހަރެންގެ ލޮލުން އޮހެމުންދިޔަ ކަރުނައަކަށް ހުއްޓުމެއް ނާދެއެވެ. ”ތީ ދެން މިހާރު ދައްކަން ބޭނުން ވާހަކަތަކެއް ނޫންހެން ދޮންބެއަށް ހީވަނީ.“ އަހަރެން އެހެން ބުނުމުން ޖުމާނާ ކޮންމެވެސް ވަރަކަށް ހައިރާންވިއެވެ. އަދި އަހަރެންނާއި ދިމާއަށް އިސް އުފުލާ ބަލައިލިއެވެ. ”ކީއްވެ މިހާރު އެވާހަކަތައް ނުދައްކަންވީ؟ ދޮންބެއަށް ތި އެޅުނު ކަތި ގޯޅި އަޅަން މެދުވެރިވި އަސްލު ސަބަބުތަކަކީ އެއީ ދޯ.“ މިފަހަރު އަހަރެންނަށް ލިބުނު ހައިރާންކަމެއް ވަކި ކުޑައެއް ނުވިއެވެ. އެހެނީ ޖުމާނާގެ ވާހަކަތައް ހުރީ އުމުރުން ފަނަރަ ސޯޅަ އަހަރުގެ ކުއްޖެއްގެ ވާހަކަތަކަށް ވުރެ މާ ހަރުދަނާކޮންނެވެ. އަހަރެންގެ ލޮލުން އޮހެމުންދިޔަ ކަރުނަތަކާއިއެކު މޫނުމައްޗަށް ޒާތެއްގެ ހިނިތުންވުމެއް ވެރިވިއެވެ. ”ދޮންބެ ކީއްވެ ތި ހެނީ؟“ ޖުވޭދާ އަހާލިއެވެ. ދައްކާނެ ވާހަކައެއް ނޭންގުނެއް ކަމަކު، އޭނާވެސް އިނީ ވަރަށް ސީރިއަސް ވެފައެވެ. ބަލާބެލުމަށް ހީވަނީ ވަރަށް ހަރުދަނާ އަދި ދިރިއުޅުމުގެ ތަޖުރިބާއާއި އާޖުފާޖު ހުރި ކަނބަލެއް ހެންނެވެ. އަހަރެން ދެކުދިންނާއި ދިމާއަށް ވަރަށް ސަމާލުކަމާއިއެކު ބަލައިލީމެވެ. ދެކުދިންވެސް ތިބީ އަހަރެންގެ ހިނިތުންވުމާއިމެދު ހައިރާންވެފާކަން އެނގެއެވެ. ”ދޮންބެ ކައިރިއަށް ހިނިއައިމަ އެހާބޮޑަށް ހައިރާންނުވޭ ކޮއްކޮމެންނޭ. ދޮންބެ މި ހިތަށްއަރަނީ، ތި ޢުމުރުގަވެސް ހާދަހާ ހަރުދަނާކަމެއް ދެކުދިންގެ ކިބައިގަވެސް އެބަހުއްޓޭ. ދެން އެކަމާ ހައިރާން ވެވުނީ ކަމެއް ނޫނީ އުފާވީކަމެއް ދޮންބެއަކަށްވެސް ބުނެދޭކަށް ނޭންގެ.“ އެވަޤުތު ޖުމާނާ އަހަރެންގެ ކައިރިއަށް ޖެހިލިއެވެ. އަދި ވަރަށް އޯގާތެރިކަމާއިއެކީ އަހަރެންގެ ކޮނޑުމަތީގައި އަތް ބާއްވާލިއެވެ. ”އަހަރުމެން ތިންބެއިންނަށް މިހާ ޅައުމުރުގަ މި ހަރުދަނާކަން ދަސްކޮށްދިނީ އަހަރުމްންގެ ދިރިއުޅުމުގެ ޙާލާތު. މިކަމާ އަހަރުމެން ތިންބެއިންކުރެ އެކަކުވެސް ހައިރާންވާކަށް ނުޖެހޭ. އެކެމަކު ދޮންބެއަށް ތިމަގުން ދާން މަގުފަހި ކޮށްދިނީ އެ ޙާލާތޭ ބުނާކަށް އަހަރެން ބޭނުމެއް ނޫން. ހެވާއި ނުބައި އިޚްތިޔާރު ކުރުމަކީ، ކޮންމެ މީހެއްގެވެސް އިޚްތިޔާރުގަ އޮންނަން ޖެހޭނެ ކަމެއް. އަހަރެން މި ދައްކާ ވާހަކައިން ދޮންބެ ފަހަރެއްގަ ހިތްހަމަ ނުޖެހިދާނެ. އެކަމަކު އަހަރެންވެސް އަދި ޖުވޭދާ ކޮއްކޮވެސް ބޭނުންވަނީ ދޮންބެއަށް ރަނގަޅު ދިރިއުޅުމެއް ލިބެން.“ ޖުމާނާ ދައްކަމުން ގެންދިޔަ ވާހަކަ ކަނުލާ އަޑުއަހަން އަހަރެން އިސްދަށަށް ޖަހައިގެން އިނީމެވެ. ޖުމާނާގެ ވާހަކަ ނިމުމުން އަހަރެން  އިސް އުފުލާ ބަލައިލީމެވެ. ޖުމާނާގެ ހަތަރުކަޅި އަހަރެންނާއި ހަމަވި ވަޤުތު އޭނާއަށް ރޮވޭގޮތް ވިއެވެ. އެހެންނަމަވެސް އެއީ ހިތްވަރުގަދަ ކުއްޖެކެވެ. އަދި މިއަދު އަހަރެންނަށް ދެމުން އެގެންދަނީ މަންމައަކު ދަރިޔަކަށް ދޭނެފަދަ ނަސޭހަތެކެވެ. އެކަން އަހަރެން ހިތުން ރުހުމުން ބަލައިވެސް ގަންނަމެވެ. އާނއެކެވެ. އަހަރެންނަށްވެސް ހެޔޮއެދޭނެ ކުޑަކުޑަ ޢާއިލާއެއް އެބަ އޮތެވެ. އަހަރެން އެމީހުންނަށްޓަކާ ސަލާމަތުން ހުންނަން ބޭނުމެވެ. ތަޢުބާވާންވެސް ބޭނުމެވެ. ހަރުދަނާ މީހަކަށް ވާންވެސް ބޭނުމެވެ. އިންޝާﷲ އަހަރެން އެކަން ކުރާނަމެވެ. އެގޮތުގެ މަތިން އަހަރެން، އަހަރެންގެ ދެކޮއްކޮއަށް ވަޢުދު ވީމެވެ. ބަދަލުވެ ހަރުދަނާ މީހަކަށް ވުމަށް ޢަޒުމު ކަނޑައެޅީމެވެ. އެހެންނަމަވެސް އަހަރެންގެ ހިތުގައި އޮތް ބިރުވެރިކަން އަދިވެސް އޮތީ އޮތްގޮތަށެވެ. މަންމައަށް ވާނެގޮތަކާއި މެދުގައެވެ.

ކޮއްކޮމެންނާއި މަޝްވަރާ ކުރުމަށް އިރުކޮޅަކު މަޑުކޮށްލުމަށްފަހު، އަހަރެން ދިޔައީ ގަރާޖަށެވެ. ރޭގައި އަހަރެން ބޭނުންކުރި ތަކެތީގެ އަސަރު އަދިވެސް ބޮލުގައި ހުއްޓެވެ. އެހެނީ އަހަރެންގެ ބޮލަށް ހުރީ ކޮންމެވެސް ވަރަކަށް ބަރުވެފައެވެ. އެހެންނަމަވެސް ޒިންމާއިން އެއްކިބާ ވެވޭކަށްވެސް

ނޯންނާނެތާއެވެ. އެހެންކަމުން މަސައްކަތައިގެން ކުރިޔަށް ދިޔުމުގެ ޢަޒުމުގައި ގެއިން ނިކުތީއެވެ. އެހެންނަމަވެސް އަހަރެން ވަކި ހިސާބަކަށް ދާންވާއިރަށް އަހަރެންނަށް މީހަކު ގޮވާލިހެން ހީވެގެން އެނބުރި ބަލައިލީމެވެ. ”އޭ ބަލަ ޖުނޭ، ކޮންތާކަށް ތިދަނީ؟“ ގޮވާލީ އަހަރެންނާއިއެކު ގަރާޖުގައި މަސައްކަތްކުރަން އުޅޭ ހާޝިމްއެވެ. އަހަރެން ހައިރާންވެ ހުރެ، އޭނާއާއި ދިމާއަށް ހިނގައިގަތީމެވެ.  ”ހާޝިމް ގަރާޖަކަށް ނުދަންތަ؟ ބަލީތަ؟“ އަހަރެން ކުރި ސުވާލަށް ހާޝިމް ޖަވާބުދިނީ ބާރަށް ހީގަތުމާއި އެކުގައެވެ. އަހަރެންނަށް ލިބުނު ހައިރާންކަން އިހުނަށްވުރެ ބޮޑުވިއެވެ. ”ބަލަ ޖުނޭ، މިއަދު މީ ހުކުރު ދުވަސްކަން ހަނދާން ނެތުނީތަ؟ ހަމަ ގައިމުވެސް މީގެ ކުރިން ހުކުރު ދުވަހު އަހަރުމެންނަށް ޗުއްޓީ ލިބޭ. މިއަދު އަނެއްކާ ޚާއްޞަކަމެއް އޮތީތަ؟“ ދިމާކުރާ ޒާތަކަށް ހާޝިމް ބުނެލިއެވެ. އަހަރެންނަށް ރެއަކާލީ ދެނެވެ. ހަމަ ޙަޤީޤަތުގައިވެސް އަހަރެން ހަނދާނެއް ނެތެވެ. ވާނީވެސް އެހެންތާއެވެ. ދިރިއުޅުމުގައި ކޮންމެ ދުވަހަކު ކަހަލަ ގޮތަކަށް ކުރިމަތިލާން ޖެހޭ ތޫފާނެއް މަދެއް ނޫނިއްޔާއެވެ. މީހާގެ ވިސްނުމާއި ފިކުރު ހަމައަށް ބެހެއްޓޭނީވެސް ވަކި ވަރަކަށްތާއެވެ. އެވަޤުތު އަހަރެންގެ އަމިއްލަ ނަފްސާއިމެދުވެސް ހިނި އާދެވުނެވެ. ”ބައެއް ފަހަރު އެހެންވެސް ވާނެ. އިންސާނުންވިއްޔަ ދޯ. ރޭގަ ނިދިއިރު މިއަދު މީ ހުކުރުދުވަސްކަން ހަނދާންނެތުނީ ދޯ.“ ހާޝިމް ސުވާލު ކޮށްލިއެވެ. އަހަރެން އެއްބަސްވުމުގެ ގޮތުން ބޯ ޖަހާލީމެވެ. އަދި އަނބުރާ ގެއާއި ދިމާއަށް ދިޔުމަށް ހިނގައިގަތީމެވެ. އެވަޤުތު އަނެއްކާވެސް ހާޝިމް އަހަރެންނަށް ގޮވާލިއެވެ. އަހަރެން އަނބުރާ އޭނާ ކައިރިޔަށް ދިޔުމުން އަހަރެންގެ ފައިން ފެށިގެން ބޮލާއިހަމައަށް މަޑުމަޑުން ބަލައިލިއެވެ. ކިހިނެއްވީތޯ އަހަރެން ސުވާލުކޮށްލީމެވެ. ”ހަމަ އަސްލުވެސް އެއްވެސް ކަމެއް ނުވޭތަ؟“ ހާޝިމް އެކުރި ސުވާލުގެ މާނަ ތަންކޮޅެއް ފުންކަމުގައި އަހަރެންނަށް އިހުސާސް ކުރެވުނެވެ. ”އަސްލު ކީކޭ ކިޔަން ހިތަށް އަރައިގެން ހާޝިމް ތިއުޅެނީ؟“ ވަރަށް ރަނގަޅަށް ހަމަޖެހިލާފައި އަހަރެން ސުވާލުކޮށްލީމެވެ. ”އަހަރެން މިކުރި ސުވާލު ހަމަ އަސްލުވެސް ޖުނޭއަކަށް ނުވިސްނުނުތަ؟ ނޫނީ އަހަރެންގެ ކުރިމަތީގަ ނޫންކަމަށް ހަދަނީތަ؟“ ހާޝިމް ބުނަން އުޅުނު ވާހަކައެއް ހަމަ ޙަޤީޤަތުގައިވެސް އަހަރެންނަކަށް ނުވިސްނުނެވެ. އެހެންކަމުން ހައިރާންވެ ހުރެ، އަހަރެން މަޑުމަޑުން ބޯ ހޫރާލީމެވެ. ”ދެން އެހެންވިއްޔާ ކޮބައިތަ މިހާރު އެއްކަލަ ކުއްޖާ؟“ ވަރަށް ސިއްރުން ކަހަލަ ގޮތަކަށް ހާޝިމް ސުވާލުކޮށްލިއެވެ. ”ކޮން…. ކުއްޖެއް؟“ އަހަރެން ސުވާލުކޮށްލީމެވެ. ”އޭގެފަހުން ވައިކޮޅެއް ޖަހާލާކަށް ނާދޭތަ؟“ ހާޝިމްގެ އެ ސުވާލުން އަހަރެން ދިޔައީ ސިއްސައިގެންނެވެ. އަހަރެން ހަމަ އެއްގޮތަކަށްވެސް އެކުއްޖާ މައްޗަކުން ހަނދާނެއް ނެތެވެ. މި ފާއިތުވި ވަޤުތުތަކުގައި، ކުރިމަތިވި ކަންތައްތަކުގެ ސަބަބުން ކަމަށްވެސް ވެދާނެއެވެ. އެވަޤުތު އަހަރެން ސިއްސައިގެން ދިޔައީ ހާޝިމް އަހަރެންގެ ކޮނޑުގައި ހިފާ ބާރަށް ތަޅުވައިގަތުމުންނެވެ. ”އަނެއްކާ އެކުއްޖާގެ ޚިޔާލަށް ގެއްލުނީ ދޯ؟ ހާސްނުވޭ. އިންޝާﷲ އެކުއްޖާ އަދި އަންނާނެ. ވައިވެސް ޖަހާނެ. ވައި އަޅުވަންވެސް އަޅުވާނެ.“ އެހެން ބުނުމާއިއެކު ދިމާކުރާ ޒާތަކަށް ހާޝިމް ހީގަތެވެ. އަހަރެންނަށް ލަދުން އިސްދަށަށް ޖަހާލެވުނެވެ. އެހެނީ އަހަރެންގެ ޙަރަކާތްތައް ޙާޝިމް ވަރަށް ރަނގަޅަށް ބަލާފައި ހުރިކަން އަހަރެންނަށް އެނގުނީތީއެވެ. އެހެންނަމަވެސް ހާޝިމްގެ އެވާހަކަތަކަކީ އަހަރެން ދައްކަން ޝައުގުވެރިވި ވާހަކަތަކަކަށް ވިއެވެ. ”ހިނގާ ކޮފީއަކަށް އަރަމާ ދޯ. އެބަ ޖެހޭ ތިވާހަކަ ހާޝިމްއާ ދައްކާލަން.“ ”ހޭވައްލާ ތައްޔާރު.“

ހާޝިމް ގޮވައިގެން އަހަރެން ދިޔައީ، ކެފޭއަކަށެވެ. އެތަނުގައި ރަނގަޅަށް ހަމަޖެހިލުމާއިއެކު، ކޮފީއަކަށް އޯޑަރު ދިނީމެވެ. އަދި އަހަރެން ދައްކަން ބޭނުންވި ވާހަކައާއިގެން ކުރިޔަށް ދިޔައީމެވެ. ”އަހަރެންނަށް ހަމަ އަސްލުގަވެސް އެކުއްޖާ ވަރަށް ރީތި ވެއްޖެ. ހާޝިމްއަށް އެނގޭތަ، އެކުއްޖާގެ ގެވެސް މިހާރު އަހަރެން ހޯދައިފިން. ނަންވެސް އެނގިޖެއްޔާ ވަރަށް ފައްކާވާނެ.“ އަހަރެން ދައްކަމުންދިޔަ ވާހަކަ އަޑުއަހަން ހާޝީމް އިނީ ވަރަށް ޝައުގުވެރި ކަމާއެކުގައެވެ. ކުރިމަތީގައި ހުރި ކޮފީތަށިން ކުޑަ ކޯވަރެއް ބޯލުމާއިއެކު ހާޝިމް އަހަރެންނާއި ސުވާލުކުރަން ފެށިއެވެ. ”ޖޫނޭ ހަމަ އަސްލުވެސް އެކުއްޖާ ބޭނުންތަ؟“ ހާޝިމްގެ އެސުވާލަށް ދޭނެ ޖަވާބެއް އަހަރެންނަކަށް ނޭންގުނެވެ. އަހަރެންގެ ހިތުގައި އެކުއްޖާއާއިމެދު ކޮންމެ ކަހަލަ އިހުސާސެއް އުފެދުނަސް، އެދެވޭ ނަތީޖާއަކާއި ހަމައަށް އެކަން ގެނައުމަކީ އަހަރެންނަށް ކުރެވޭނެ ކަމެއް ނޫންކަން އެނގެއެވެ. އެހެނީ އަހަރެންގެ ޙަޔާތަށް ގެންނަ މީހެއްގެ ދިރިއުޅުން އާބާދުވުމަށް ވުރެ ގާތްވާނީ ބަރުބާދު ވުމާއެވެ. ޚުދު އަހަރެންނަކީވެސް ވަކި މަންޒިލަކަށް ވިސްނައިގެން ދިރިއުޅޭ މީހެއް ނޫންތާއެވެ. ވީއިރު ކިތަންމެ ބޭނުންވިޔަސް މީހެއްގެ ދިރިއުޅުން ބަރުބާދު ކުރާކަށް އަހަރެން ބޭނުމެއް ނޫނެވެ. ”ނޫން، ކޮންމެހެން އެކުއްޖާ ބޭނުންވެގެންނެއް ނޫން.“ އަހަރެންގެ ޖަވާބުން ހާޝިމްއަށް ހައިރާންކަމެއް ލިބުނުކަހަލައެވެ. ”ދެން އެހެންވިއްޔާ އޭނަގެ ވަނަވަރު ހޯދަން ތިއުޅެނީ ކީއްކުރަން؟“ ހާޝިމްގެ އެސުވާލަށް ދޭނެ ޖަވާބެއް އަހަރެންނަކަށް ނޭންގުނެވެ. އެހެންނަމަވެސް އަހަރެންގެ ޖަވާބަކަށް އިންތިޒާރުކޮށްގެން އިނީތީ ކޮންމެސް އެއްޗެކޭ ބުނަންޖެހޭނެތާއެވެ. ”ވަކި ކަމެއް ނުވޭ. ޗާންސެއް ލިބުނީމަ ފަހަތުން ގޮސް ވަންނަނީ ކޮންތާކަށްތޯ ބަލައިލީ.“ އަހަރެން އެހެން ބުނުމާއިއެކު އިސްދަށަށް ޖަހާލީމެވެ. ހާޝީމް އިނީ އަހަރެނަށް ވަމުންދިޔަ ގޮތް ވަރަށް ރަނގަޅަށް ބަލާށެވެ. އަހަރެންގެ

ހިތުގައިވާ އެއްޗެއް އޭނާއަށް އެނގުނުކަހަލައެވެ. ”އެހެންވިއްޔާ އަހަރެން މިކުރާ ސުވާލަށް ވަރަށް ތެދުތެދަށް ޖަވާބު ދެއްޗޭ އިނގޭ.“ އަހަރެން އިސްއުފުލާ ބަލައިލީމެވެ. އަދި ހީނލާފާ ސުވާލު ކޮށްލީމެވެ. ”އަހަރެން މި އިނީ ހޫނުގޮނޑީޔަށް ލާފަތަ؟“ އެހެން ހީކޮށްލިޔަސް އެންމެ ރަނގަޅު ކަމުގައި ހާޝިމް ބުނެލިއެވެ. އެގޮތުން އޭނާ އަހަރެންނާއި ކުރަން ބޭނުންވެފައިވާ ސުވާލުތައް ކުރަން ފެށިއެވެ. ”އެކުއްޖާ ސައިކަލަށް ވައިޖަހައިގެން ދިޔަފަހުން އޭނަމަތިން ހިތަށްއެރިތަ؟“ އާން، ކޮންމެސް ވަރަކަށް.“ ”ދެވަނަ ފަހަރަށް އޭނަ ފެނުނީމަ އެހެން މީހުން ކުރިމަތިން ގެއްލުނުހެން ހީވިތަ؟“ އާން އޭގެ ފަހަކުން އިތުރު އެހެން މީހަކު ނުފެންނަހެން ހީވި.“ ”އޭނަ ފަހަތުން ދިޔައީ ކޯޗެއް ވިސްނާފަ؟“ ”ވަކި އެއްޗެއް ވިސްނަގައިނެއް ނޫން. ހިތަށްއެރީ ދާން. އެހެންވެ އިޚްތިޔާރަކާ ނުލާ ދެވުނީ.“ އަހަރެންގެ ޖަވާބުތައް އަޑުއަހާފަ، ހާޝިމް އަތްޖަހަން ފެށިއެވެ. އަދި ހޭންފެށިއެވެ. އޭނާ އަތްޖަހާ ނިމެނެދެން ބަލަހައްޓައިގެން އިނުމުގެ އިތުރަށް އެއްވެސް ކަމެއް އަހަރެންނަކަށް ނުކުރެވުނެވެ. ”ތިޔަށް ކިޔާނީ ފުރަތަމަ ނަޒަރުން ލޯބި. އަދިވެސް ޖުނޭއަކަށް ނުވިސްނޭތަ؟“ އަހަރެންނަށް ނުވިސްނިގެންނެއް ނޫޅެމެވެ. އެކަހަލަ މަގަކުން ދާން އަހަރެން ބޭނުން ނުވަނީއެވެ. ކިތަންމެ ބޭނުންވިޔަސް އެއީ ކުރެވޭނެ ކަމެއް ނޫންކަން އަހަރެންނަށް އެނގޭތީއެވެ. އެހެންނަމަވެސް ހާޝިމްގެ އެވާހަކައަށް ދޭނެ ޖަވާބެއް އަހަރެންނަކަށް ނުވިސްނުނެވެ. އެހެންކަމުން އަހަރެން އެތަނުން ތެދުވެގެން ދާން ގަސްތު ކުރީމެވެ. ހާޝިމް ވަޤުތުން އަހަރެންނަށް ގޮވާލިއެވެ. އަހަރެން ހުއްޓުނީމެވެ. އެހެނަސް ހުރިގޮތަށް ގުޑާނުލާ ހުރީއެވެ. އޭނާ އައިސް އަހަރެންނާއި އަރާ ހަމަކުރިއެވެ. އަދި މަޑުކޮށްލުމަށް ބުނެ، އަނބުރާ ގޮސް ކޮފީގެ ބިލް ދައްކާފައި އަނެއްކާވެސް އަހަރެން ކައިރިޔަށް އައެވެ. ”އަހަރެންނަށް ހާދަ ހީވެޔޭ ހިތާދެކޮޅަށް ނިންމުމެއް ނިންމަން މަސައްކަތް ކުރާހެން.“ އަހަރެންގެ ހިތުގައި އޮތް އެއްޗެއް ހާޝިމްއަށް އެނގުނު ކަހަލައެވެ. އެހެނީ އޭނާ އެބުނި އެއްޗަކަށް އަހަރެންނަކަށްވެސް ދެކޮޅެއް ނުހެދުނެވެ. އޭނާއާއި ދިމާއަށް އެނބުރިލާފައި ވާހަކަ ދައްކަން ފެށީމެވެ. ”ބައެއްފަހަރު ކަންކަން ނިންމުމުގަ ހިތް ބޭނުންވާގޮތް ނޫން އެހެން ގޮތަކަށްވެސް ޢަމަލުކުރަން ޖެހިދާނެ ދޯ.“ ހާޝިމްއަކީ ރައްޓެއްސެއް ކަމަކު، އަހަރެންގެ ޒާތީ ދިރިއުޅުމުގެ އެއްވެސް ކަމެއް އެނގޭ މީހެއް ނޫނެވެ. އެހެންކަމުން ޖަވާބުވެސް ދޭން ޖެހެނީ ވަރަށް ވިސްނާފަތާއެވެ. އެހެނީ އަހަރެންގެ ޒާތީ ދިރިއުޅުމުގެ ބައެއް ކަންކަމަކީ އެންމެ ގާތް ދެއެކުވެރިންނަށްވެސް އެނގިފައި ނެތް ކަންކަމެވެ. އަންގަންވެސް ބޭނުންނުވާ ކަންކަމެވެ. ”ޖުނޭ.“ އެވަޤުތު ހާޝިމް ވަރަށް އޯގާތެރިކަމާއިއެކީ އަހަރެންނަށް ގޮވާލިއެވެ. އަދި ކައިރީގައި ހުރި މޭޒުދޮށުގައި އިށީނުމަށް ދަޢުވަތު ދެމުން އޭނާވެސް އިށީންދެލިއެވެ. އިށީންދެ ހަމަޖެހިލާފައި، އަހަރެން އޭނާއާއި ދިމާއަށް ބަލައިލިއިރު އޭނާ އިނީ ވަރަށް ފަރުވާތެރި ކަމާއިއެކީ އަހަރެންނާއި ދިމާއަށް ބަލަހައްޓައިގެންނެވެ. ”އަހަރެންނަކީ ފަލްސަފާގެ ޢިލްމުވެރިއެއް ނޫން. އެކަމަކު އަހަރެންނަށްވެސް މީހެއްގެ މޫނުމަތި ބަލައިލާފަ އޭނާގެ އެތެރެހަށީގައި ހިނގާ ކަމެއް އަންދާޒާ ކޮށްލަން އެނގިދާނެތާ ދޯ؟“ މިފަހަރު ހާޝިމް ބުނަން އުޅުނު ވާހަކައެއް އަހަރެންނަކަށް ނުވިސްނުނެވެ. އެހެންކަމުން އޭނާގެ ވާހަކަ ކުރިޔަށް ގެންދަން ފުރުޞަތު ދީގެން އެއްވެސް އެއްޗެއް ނުބުނެ މަޑުން އިނީމެވެ. ”އަހަރެން ޖުނޭއާއެކު މަސައްކަތް ކުރާތާ ދުވަސްކޮޅެއް ވެއްޖެ. މިވީ މުއްދަތުގެ ތެރޭގަ އަހަރެންނަށް ފާހަގަވީ ޖުނޭގެ ދިރިއުޅުމުގަ ލައްކަ ތޫފާނުތަކާ ކުރިމަތިލާން ޖެހިފަ ހުރިކަން. ޖުނޭގެ ޢަމަލުތަކާ އުޅުން ހުންނަގޮތުން މިހެން މިބުނީ އިނގޭ. އަހަރެންނަށް މި ހީކުރެވުނީ ރަނގަޅަށްތަ؟“ ހާޝިމްގެ އެ ޖުމުލަތަކުން އަހަރެން ފެންކަޅި ކުރުވިއެވެ. އާނއެކެވެ. އަހަރެންގެ ހިތުގެ އުދާސްތައް ބޭރުކޮށްލާނެ ހެޔޮއެދޭ ރަޙުމަތްތެރިޔަކު އަހަރެންވެސް ބޭނުމެވެ. ރަނގަޅު ލަފަޔާއި އިރުޝާދު ދޭނެ މިތުރަކު އަހަރެންވެސް ބޭނުމެވެ. އެގޮތުން އަހަރެންނަށް ހާޝިމްއަށް އިތުބާރު ކުރެވިދާނެކަމަށް ބެލެވެން ފެށުނެވެ.  ހިތުގައިވާ ހުރިހާ އުދާސްތަކާއި ޝަކުވާތައް ހާޝިމްގެ ކުރިމައްޗަށް ބަންޑުން ޖަހާލުމަށް ހިތް ބުނަމުން ގެންދިޔައެވެ. އެވަޤުތު އަހަރެންނަށް ލެވުނީ ފުން ނޭވާއެކެވެ. އެއީ ހާޝިމް ހީކުރަމުންދިޔަ ހީކުރުން ޔަޤީންކަމަށް ބަދަލުވި ކަމެއް ކަމަށް އޭނާ ހަމަ އެވަޤުތުމެ ބުނެލިއެވެ.

ހާޝިމްގެ އަތް އަހަރެންގެ އަތްމަތީގައި ބާއްވާލިއެވެ. އަހަރެންނަށް ހީވީ އުފަން ބޭބެއަކު އަހަރެންނާއިއެކު ވީހެންނެވެ. އަހަރެން އަނެއްކާވެސް މަޑުމަޑުން ހާޝިމްއާއި ދިމާއަށް ބަލައިލީމެވެ. އޭނާ މަޑުމަޑުން ބޯ ޖަހާލިއެވެ. އަހަރެންނަށް ވާހަކަ ދެއްކުމުގެ ފުރުޞަތު ދިނުމުގެ ގޮތުންނެވެ. ވަރަށް ޖެހިލުންވެ އިނދެ އަހަރެންގެ ޙަޔާތުގެ އަނދިރި ޞަފްޙާތައް ހާޝިމްގެ ކުރިމަތީގައި ހުޅުވާލަން ފެށީމެވެ. އެންމެ ތުއްތުއިރުން ފެށިގެން މިއަދާއި ހަމައަށް ޖެހެންދެނެވެ. އަހަރެންގެ ވާހަކަ ނިމުނުއިރު ހާޝިމްވެސް އިނީ ފެންކަޅި ވެފައެވެ. އެހާމެ ރުޅިވެސް ގަދަވެފައެވެ. އަހަރެންގެ ވާހަކަ ނިމުމުން ފުން ނޭވާއެއްލުމާއިއެކު ހާޝިމް އަނެއްކަވެސް އަހަރެންނާއި ސުވާލުކުރަން ފެށިއެވެ. ”ޖުނޭ ތި ހުރިހާ ކަމެއް ތަޙަންމަލު ކުރަމުން ތި އައީ ތި ވާހަކަތައް ހަމަ އެއްވެސް މީހެއްގެ ކައިރީގަ ހިއްސާނުކޮށްތަ؟“ ހައިރާން ކަމާއިއެކީ ހާޝިމް އަހާލިއެވެ. އާނއެކޭ ބުނުމުގެ ގޮތުން އަހަރެން މަޑުމަޑުން ބޯ ޖަހާލީމެވެ. އޭރުވެސް އަހަރެންގެ ހިތުގައި ވަނީ ޒާތެއްގެ ބިރުވެރިކަމެއް އުފެދިފައެވެ. އެވާހަކަތައް ހާޝިމްއާއި ހިއްސާ

ކުރެވުނީތީއެވެ. އެކަން ހާޝިމްވެސް ފާހަގަ ކުރިއެވެ. އަދި ވަރަށް އޯގާތެރިކަމާއިއެކީ އަހަރެންނާއި ވާހަކަ ދައްކަން ފެށިއެވެ. އަހަރެންގެ އެވާހަކަތައް

އޭނާގެ ފަރާތުން އިތުރު އެއްވެސް ދިމާއަކަށް ނުދާނެކަމުގެ ޔަޤީންކަން އަހަރެންނަށް ދިނެވެ. ކޮންމެ ގޮތެއްވިޔަސް ހާޝިމްއަށް އިތުބާރުކުރުން ނޫންގޮތެއް ދެނެއް އަހަރެންނަކަށް ނެތެވެ. އެވަޤުތު ޒާތަކަށް ހީލާފައި ހާޝިމް އަނެއްކާވެސް ފެށީ އެއްކަލަ އަންހެން ކުއްޖާގެ ވާހަކައެވެ. ސާމާސާ ރާގަކަށެވެ. ”އަހަރެން ހީކުރީ ހުރިހާ ވާހަކަތަކެއް ކިޔައިދިނީމަ އަހަރެން އެކަމައިގެން ކުރިޔަށް ދާން މިޖެހިލުންވަނީ ކީއްވެގެންކަން ހާޝިމްއަށް ވިސްނޭނެ ކަމަށް.“ އަހަރެން ބުނި އެއްޗެއްގެ ޖަވާބު އަނެއްކާވެސް ހާޝިމް ދިނީ ހީލާފައެވެ. ”ޖުނޭ ކޮން ކަމަކާ ހާސްވަނީ؟ އިންޝާﷲ ހުރިހާ ކަމެއްވެސް ދާނީ ރަނގަޅަށް. މިހާރު ޖުނޭވެސް ތިހުރީ ހުރިހާ ކަމެއް ހަމަމަގަށް އަޅުވަން އަޒުމު ކަނޑައަޅައިގެން. ރަނގަޅު، އުފާވެރި ހިތްހަމަޖެހޭ ދިރިއުޅުމެއް އުޅުމުގެ ޙައްޤު ކޮންމެ މީހަކަށްވެސް އޮންނާނެ. ޖުނޭއަށްވެސް އެ ޙައްޤު ލިބިގެންވޭ. އެހެންވީމަ އުންމީދު ކަނޑާނުލާ. އެއީ މީހެއްގެ އަތްބަކަށް ނުވަންޏާ އިންޝާﷲ ޖުނޭއަށް އެކަން ކާމިޔާބު ކޮށްދިނުމުގެ އަހަރެންގެ ފުރިހަމަ އެއްބާރުލުން ދޭނަން.“ ހާޝިމްގެ ވާހަކަތަކުން އަހަރެންނަށް ހިތްވަރެއް ލިބެމުން ދިޔައެވެ. ”އަލްޙަމްދުﷲ، މިއަދު އަހަރެންގެ ހިތަށް ވަރަށްބޮޑު ލުޔެއް ލިބިއްޖެ. އެތައް ދުވަހެއް ވަންދެން ހިތުތެރޭގަ ފިއްތައިގެން ހުރި އުދާސްތަކަކާ އާހުތަކެއް މި ބޭރުކޮށްލެވުނީ. ޝުކުރިއްޔާ ރަޙުމަތްތެރިޔާ.“ ހާޝިމްގެ އަތްމަތީގައި މަޑުމަޑުން އަތްބާއްވާލަމުން އަހަރެން ބުނެލީމެވެ. ”ޖުނޭ ހާސްނުވޭ، އިންޝާﷲ ޖުނޭގެ ތި އިތުބާރު އަހަރެން ހިފަހައްޓާނަން. އެކަމަކު ދެން އިހަށް ބަލަންވީ އެއީ ހުސްހަށިބައި ކުއްޖެއްތޯއެއްނު.“ ހާޝިމް އަނެއްކާވެސް އޭނާގެ މަޖާ މިޒާޖުގައި ބުނެލިއެވެ. އަހަރެންވެސް ހީލާފައި އެކަމާ އެއްބަސް ވެލީމެވެ. ”އެހެންވީމަ ދެން ހިނގާ އެކަމާ އުޅެމާ ދޯ. ’މިޝަން ހުސްހަށިބައި‘ މިއަދުން ފެށިގެން މި ފެށުނީ.“ އެހެން ބުނުމާއިއެކު އަހަރެންނާއި ދިމާއަށް ހާޝިމްގެ އަތް ދިއްކޮށްލިއެވެ. އަހަރެންވެސް އޭނާ ދިއްކޮށްލި އަތުގައި ޖަހާލީމެވެ.

އަހަރެން ގެއަށް ދިޔައީ މީގެ ކުރިން ލިބިފައިނުވާ ވަރުގެ ހިތްހަމަ ޖެހުމަކާއި އެކުގައެވެ. މިއޮއް ހުރިހާ ދުވަހު އެތެރެހަށީގައި އުފެދިފައިހުރި ބަރުކަންވެސް ނެތްކަހަލައެވެ. ގެއަށް ވައިންއިރު، ގޭތެރެވެސް ފެންނަން އޮތީ ވަރަށް އަމާންކޮންނެވެ. ހީވަނީ ބައްޕަ ގޭގައި ނޫޅެނީހެންނެވެ. އަހަރެން ގެއަށް ވަދެގެން ދިޔަ ވަޤުތު، ކޮއްކޮމެންވެސް އަހަރެންގެ މޫނުމަތީގެ އުޖާލާކަން ފާހަގަ ކުރިއެވެ. އަހަރެން ފެނިފައި، އެކުދިންނަށްވެސް ހިތްހަމަޖެހުން ލިބުނެވެ. އެވަޤުތު ޖުމާނާ އަހަރެންނަށް ގޮވާލިއެވެ. ”ދޮންބޭ! އަނެއްކާ ކިހިނެއްވީ؟ ހާދަ ހިތްހަމަ ޖެހިފަ ހުރިހެން ހީވޭ؟ އަނެއްކާ…؟“ އަހަރެން ދުވެފައި ކަހަލަ ގޮތަކަށް އެކުދިން ކައިރިއަށް ދިޔައީމެވެ. ”ނޫނޭ ކޮއްކޯ. ތި ހީކުރާ ކަހަލަ ކަމެއް ނޫން. އެކަމަކު ހީވަނީ އެކަމަށްވެސް ދެން މާގިނަ ދުވަހެއް ނުވެ މަގެއް ފަހި ވެދާނެހެން.“ ޖުވޭދާ އިނީ ވާނުވާ ނޭންގިފައެވެ. ”ތި ދެމީހުން އަހަރެންނަށް ސިއްރުން ކޮންކަމެއް ރާވަނީ؟ އަހަރެން ކައިރީގަވެސް ބުނެބަލަ.“ އެހެން ބުނުމާއިއެކު ތުއްތު ކުއްޖެއްހެން ޖުވޭދާ ދެފައި ތަޅައިގަތެވެ. ”ތީ އަދި ކުޑަކުއްޖެއް. މީ ކުޑަކުދިން އަޑުއަހާ ކަހަލަ ވާހަކައެއް ނޫން ދޯ ދޮންބޭ.“ ޖުމާނާ އެހެން ބުނުމުން ޖުވޭދާ ކޮންމެވެސް ވަރަކަށް ނުރުހޭ ގޮތް ވިއެވެ. ”އޯ ކަމޯން ދޮންތާ. ދޮންތަވެސް އަހަރެންނަށްވުރެ ބޮޑުވާނީ ހަމަ އެންމެ ދެއަހަރު ކަންނޭންގެ.“ ”އެވަރުވެސް ބޮޑު ވާހަކައެއްނު ތިބުނީ.“ ޖުމާނާ ހީގަތްފާ ބުންޏެވެ. ދެކުދިންގެ ދެބަސްވުން ވިހަ ވެދާނެ ކަމަށް ބަލާފައި އަހަރެން އެދެމެދަށް ވަނީމެވެ. ”ދެން އެންމެ ރަނގަޅު، މީކީ ކޮންމެހެން ޖުވޭކޮއްކޮ ކައިރީގަ ނުބުނެވޭ ވަރުގެ ވާހަކައެއް ނޫން. އެހެންވީމަ ދެންވެސް އަޑުއަހާ.“ އަހަރެން އެހެން ބުނުމުން ޖުވޭދާ އުފަލުން ފުންމައިގެންފާ އަޑުއަހަން ސަމާލުކަން ދިނެވެ. އެވަޤުތު އަހަރެންގެ ޚިޔާލަށް އައީ މަންމައެވެ. ކީއްވެގެން ކަމެއް ނޭންގުނެވެ. ”މަންމަ ކޮބާ؟“ ވަރަށް ސީރިޔަސް ވެލާފައި އަހަރެންނަށް ސުވާލު ކޮށްލެވުނެވެ. ”އަނެއްކާ ކިހިނެއްވީ ދޮންބޭ؟ މަންމަ އެބައޮތް ނިދިފަ. އެކަމަކު މިއަދު ވަރަށް ވަރުދެރަ.“ އަހަރެން މަޑުމަޑުން މަންމަގެ ކޮޓަރިއަށް ވަދެލާފައި މަންމަ ކައިރިޔަށް ހުއްޓިލީމެވެ. ކޮއްކޮމެންވެސް ހައިރާންވެ ހުރެ، އަހަރެންގެ ފަހަތުން ކޮޓަރިޔަށް އައެވެ. ދައްކަމުން ދިޔަ ވާހަކަ މެދުކަނޑާލާފައި މަންމައަށް ސަމާލުކަން ދިނުން އެއީ އެކުދިންނަށް ވާނުވާ ނޭންގުނު ކަމެކެވެ. ”އެހެން އެއްވެސް ކަމެއް ނުވޭ. މަންމަ ނުފެނި ގިނައިރު ވުމުން އަހަރެން މަންމަ ދެކިލާހިތްވީ.“ އަހަރެން މަންމަގެ ނިތްކުރި މަތީގައި މަޑުމަޑުން އަތް ޖައްސާލުމާއިއެކު އެތަނުން ދުރަށް ޖެހިލަމުން އެހެން ބުނެލީމެވެ. އެވަޤުތު ދެކުދިންވެސް ހަމަޖެހުމުގެ ނޭވާއެއް ލިއެވެ. އަހަރުމެން ތިންބެއިން ކޮޓަރިން ބޭރަށް ނިކުމެ، ކުރިން ދައްކަމުން ގެންދިޔަ ވާހަކަ ކުރިޔަށް ގެންދިޔައީމެވެ. ޖުވޭދާ އިނީ އަހަރެންގެ ވާހަކަ އަޑުއަހަން ކެތްމަދުވެފައެވެ. ”ދޮންބޭ، ދެން މާ ދިގު ނުދަންމާ ކިޔައިދީބަލަ.“ ބޮޑާ ހާކާލާ ކަހަލަ ރާގަކަށް ޖުވޭދާ ބުނެލިއެވެ. އަހަރެމެން ތިންބެއިންވެސް ސޯފާގައި ހަމަޖެހިލައިގެން އިށީންދެލީމެވެ. އަދި އެދުވަހު ފެނުނު ކުއްޖާގެ ވާހަކަ ފެނުނު ވަޤުތުން ފެށިގެން ދެން ކަންތައް ވީގޮތާއި ހަމައަށް ދެކުދިންނަށްވެސް އަހަރެން ކިޔައިދިނީމެވެ. ކޮއްކޮމެން ތިބީ އުފަލާއި ހައިރާންކަން ފަދަ މަސްހުނި އިހުސާސްތަކަކާއިއެކު އަހަރެންނާއި ދިމާއަށް ބަލަހައްޓައިގެންނެވެ. ”ދެން އޭގެ ފަހުން އެކުއްޖާއެއް ނުދެކެންތަ؟“

ޖުވޭދާ ސުވާލުކޮށސްލިއެވެ. ”އެކަމަކު އެންމެ ފުރަތަމަ ބަލަން ޖެހޭނީ އެއީ ވާނެ ކަމެއްތޯއެއްނު ދޯ ދޮންބޭ.“ ޖުމާނާ އޭނާގެ ބުއްދި ބޭނުން ކުރިއެވެ. އެބުނަނީ ރަނގަޅު ވާހަކައެކެވެ. ކަމަކަށް ހިތްއެދުނަސް އެއީ ޙާޞިލު ކުރެވޭނެ ކަމެއްތޯ ބަލާފައި ނޫނީ އުންމީދެއް ކޮށްގެން ވާނީވެސް ގެއްލުންތާއެވެ. ”ކޮއްކޮމެން ދޮންބެއަށްޓަކާ ދުޢާ ކޮށްދީ އިނގޭ. އެއީ ދޮންބެ ކުރަން ބޭނުން ކަމަކަށްވިޔަސް، އެއަށްވުރެ މާ މުހިންމު ކަމަކާ ޢަޒުމު ކަނޑައަޅައިގެން މިއުޅެނީ. އެކަމަށްޓަކާ ތި ދެކުދިންގެ އެހީތެރިކަމާ އެއްބާރުލުން ދޮންބެ ބޭނުން.“ ”އިންޝާﷲ ދޮންބެއަށް ކާމިޔާބުވާނެ. އަހަރުމެން ދެކުދިންވެސް މިތިބީ ދޮންބެޔާ އެކީ.“ ދެކުދިން އެކަކު އަނެކަކުގެ އަތުގާ އަތްޖަހާލަމުން ބުނެލިއެވެ. އަހަރެން ހަމަޖެހުމުގެ ފުން ނޭވާއެއް ލީމެވެ. އެވަޤުތު އަހަރެންގެ ފޯނަށް މެސެޖެއް އައެވެ. މަންމަގެ ޓެސްޓުތަކުގެ ރިޕޯޓު ނިމުނުކަން ހޮސްޕިޓަލުން އެންގީއެވެ. އަހަރެންގެ މޭ ބާރަށް ތެޅެން ފެށިއެވެ. އަހަރެން ކަންބޮޑުވެފާ އިން މަންޒަރު ކޮއްކޮމެންނަށް ފާހަގަވިއެވެ. އަދި އެކަމާ ސުވާލުވެސް ކުރިއެވެ. އެހެންނަމަވެސް އަދި އެވާހަކަ ބުނުން މާ އަވަސްކަމަށް އަހަރެންނަށް ފެންނާތީ، މާބޮޑުކަމެއް ނުވާކަމަށް ބުނެލުމާއިއެކު އަހަރެން ދިޔައީއެވެ.

ގެއިން ނިކުމެގެން އަހަރެން ދިޔައީ ސީދާ ހޮސްޕިޓަލަށެވެ. ވީހާވެސް އަވަހަކަށް މަންމަގެ ސިއްޚީ ޙާލަތު ދެނެގަންނަން އަހަރެން ބޭނުންވެސް ވީތީއެވެ. ރިޕޯޓު ނަގައިގެން އަހަރެން އެންމެ ފުރަތަމަވެސް ދިޔައީ މަންމަ އެންމެ ފުރަތަމަ ޑޮކްޓަރަށް ދެއްކި ކްލިނިކަށެވެ. ކަންދިމާކުރި ގޮތުން އެވަޤުތު ޑޮކްޓަރ ކްލިނިކްގައި އިންނެވިއެވެ. ރިސެޕްޝަނަށް ގޮސް ހުއްދަ ހޯދައިގެން ވީހާވެސް އަވަހަކަށް ޑޮކްޓަރަށް ރިޕޯޓުތައް ދެއްކޭތޯ އަހަރެން މަސައްކަތް ކުރީމެވެ. ޑޮކްޓަރ ރިޕޯޓުތައް ބައްލަވާފައި އިސްދަށަށް ޖަހާލިއެވެ. ބުނުއްވާނެ އެއްޗެއް ނޭންގިފައި އިންނެވި ކަހަލަ ގޮތަކަށެވެ. ޑޮކްޓަރުގެ ހަރަކާތް ފެނިފައި އޭނާގެ ފަރާތުން އިތުރު އެއްޗެއް އަހަރެންނަކަށް އޮޅުންފިލުވާކަށް ނުޖެހުނެވެ. އެހެނީ ޑޮކްޓަރ އިންނެވި ގޮތާއި ޢަމަލު، ހުރިހާ އެއްޗެއްވެސް ބުނެދީފިއެވެ. އަހަރެންގެ ފައިދަށުން ބިންގަނޑު ކެހިގެން ދިޔަކަހަލައެވެ. އަހަރެންނަށް މޭޒުގައި ދެއަތް އަޅުވާލެވުނެވެ. އަދި އިތުރު އެއްވެސް ސުވާލެއް ނުކޮށް އަހަރެންނަށް އަހާލެވުނީ ދެން ހެދޭނެ އިތުރުގޮތެއް އޮތްތޯއެވެ. ޑަކްޓަރ އޭނާގެ ބޯ މަޑުމަޑުން ދެއަތަށް ހޫރާލިއެވެ. އަހަރެންގެ ލޮލުން ހިފެހެއްޓުމެއްނެތި ކަރުނަ އޮހެން ފެށިއެވެ.

• ނުނިމޭ –