ރިޕޯޓްތައް ބުނާ ގޮތުގައި، ޓުރަމްޕު ވަނީ ސަޢޫދީ ޢަރަބިއްޔާއާއި، ޢަރަބި ޢިމާރާތާއި، އަދި ޤަޠަރު ފަދަ މުއްސަނދި ޢަރަބި ޤައުމުތަކުން ”އީރާން ހަނގުރާމައިގެ ޚަރަދު ދެއްކުމަށް“ ރަސްމީކޮށް ގޮވާލާފައެވެ. މިއީ، ޓްރަމްޕުގެ އިންތިހާއީ ލޭންދޭނު ”އެމެރިކާ ފުރަތަމަ“ ޚާރިޖީ ސިޔާސަތަށް، ބުނިޔާދީ ގޮތެއްގައި އެނބުރި އައި އައުމެއް ކަމަށް ބެލެވެއެވެ.

އޯވަލް އޮފީހުގެ މަންޠިޤު ވަރަށް ސާފެވެ. އެމެރިކާގެ އަސްކަރިއްޔާއިން ދަނީ މި ހަނގުރާމައަށް ބޮޑެތި ޚަރަދުތައް ކުރަމުންނެވެ. 10،000 އަށް ވުރެ ގިނަ ސިފައިން ވަނީ އިތުރުކޮށްފިއެވެ. އެމެރިކާ މީހުންގެ ފުރާނަ ވަނީ ނުރައްކަލަށް ހުށަހެޅިފައެވެ. އެންމެ މުހިންމު ކަމަކީ، އެމެރިކާއިން ހަނގުރާމަ ކުރަނީ، އެމެރިކާގެ އެކުވެރި ޢަރަބި އަވަށްޓެރިންނަށް ހިރާސްއަކަށް ވެފައިވާ ވެރިކަމެއްގެ އާރާއި، ބާރު ކަނޑުވާލުމަށެވެ. އެހެންކަމުން ވޮޝިންޓަނުން ޤަބޫލުކުރާ ގޮތުގައި، އެ އަވަށްޓެރިން އެމެރިކާއަށް ”ބްލޭންކް ޗެކްތަކެއް“ ދޭން ޖެހޭނެއެވެ.

އެކަމަކު، އެކަމުގެ ސަބަބުން ޤަލްފުގެ ޤައުމުތައް ވެއްޓިގެން ދާނީ ވަރަށް ބިރުވެރި، އަދި އެއްވެސް ބަޔަކަށް ކާމިޔާބު ނުކުރެވޭނޭ މުސްތަޙީލު ޙާލަތަކަށެވެ. މިވަގުތު ޢަރަބި ޑިޕްލޮމެޓުން އިސްލާމްއާބާދުގައި ނާއުއްމީދުވެފައި އެތިބީ، މި ހަނގުރާމަ ހުއްޓުވުމަށްޓަކައި މެދުވެރިއެއްގެ ދައުރު އަދާކުރުމަށެވެ. އެހެންކަމުން، އެމެރިކާގެ އަސްކަރީ ކެމްޕޭނަށް ފައިސާ ދޭން ޢަރަބިން އެއްބަސްވެއްޖެނަމަ، ތެހެރާނުން ވަގުތުން ޢަރަބިންނާ މެދު ދެކޭނީ، ޢަދާވާތްތެރި ހަނގުރާމައިގެ ބައިވެރިންގެ ގޮތުގައެވެ. އަދި އީރާނުގެ ބެލިސްޓިކް މިސައިލްތަކުގެ ދެވަނަ އަމާޒަކަށް ސަޢޫދީ ޢަރަބިއްޔާއާއި، ޢަރަބި ޢިމާރާތް ވެގެން ހިނގައިދާނެއެވެ. އެކަމަކު، ޓުރަމްޕްގެ ހަނގުރާމައިގެ ބިލު ދައްކަން ޢަރަބިން ދެކޮޅު ހަދައިފިނަމަ، އެމެރިކާގެ ދިފާޢީ މަރުކަޒުތައް ހުސްކޮށް، ޢަރަބި ޤައުމުތައް އެކަނިކޮށްލާފައި އެމެރިކާ ހިނގައިދާނެއެވެ. މި ހަނގުރާމައަށް އެމެރިކާއިން ދުވާލަކު އެތައް ބިލިއަން ޑޮލަރެއް އެދަނީ ޚަރަދު ކުރަމުންނެވެ. އަދި މާލީގޮތުން އެމެރިކާ އެވަނީ ރަސްމީކޮށް މަރުތަޅު އެޅުވިފައެވެ. ސުވާލަކީ ޢަރަބިން އެ ތަޅު ހުޅުވައި ދޭނެ ހެއްޔެވެ؟ އަދި ހުޅުވައިދީފިއްޔާ، ދެން ކަންތައްތައް ވެގެން ދާނީ ކިހިނެއް ހެއްޔެވެ؟