ރިޔާސީ އިންތިޚާބުގައި ”ކަނޑަށް ނުކުތް އޮޑިފަހަރުގެ“ ތެރެއިން އެންމެގިނައިން ”މަސްބޭނީ“ ލ. އަތޮޅު ފުނަދޫ ބަނަފްސާ، ޢަބްދުއްރަޙީމް ޢަބްދުﷲގެ ޕީއެންސީއެވެ.
މަހުން ލަފައި މަސް ބަހައި ނިމުމުން ޢަބްދުއްރަޙީމަށް އެޅުނު ބައި ބޮޑުވުމުން ކުދިކިޔަން ފެށި މީހުންނަށް އޮތް ޖަވާބު މިއޮތީއެވެ.
އެއީ އޮޑިވެރިޔާއެވެ. އޭނާއަށް ފަންސާސް ޕަސެންޓު ލިބޭނެއެވެ. އޭނާއަކީ ފަޅުވެރިޔެކެވެ. ފަޅުވެރިންގެ ބައިން ވެސް ބައެއް ލިބޭނެއެވެ. އޭނާއަކީ އެން ކެޔޮޅެކެވެ. އެންއުކި ދުވަސްދުވަހަށް އެ މަސައްކަތަށް ބައި ލިބޭނެއެވެ. އޭނާ އަކީ ދޮށިއަޅާ ކެޔޮޅެކެވެ. ގަލަށްކިޔަން ދަންނަ ހުށިޔާރު މީހެކެވެ. ޖީޕީއެސް އަށް ފަރިތަ މާލިމީއެކެވެ. ދޯނީގެ މަރާމާތަށް ފަރިތަ ވަޑިއެކެވެ. މަސްވިއްކަން ފަރިތަ ވިޔަފާރިވެރިއެކެވެ. މިއިން ކޮންމެ ކަމަކަށް ބައިލިބޭނެއެވެ.
ދަރިފުޅު ފައިސަލަކީ ވެސް ފަޅުވެރިއެކެވެ. އެންދަމަން ފީނާ ޑައިވަރެކެވެ. ފިޝްފައިންޑަރ އޮޕަރޭޓްކުރާ ޓެކްނިކަލް މީހެކެވެ. ނަގިލި ލުމާއި ނަގިލި ނެގުމުގައި އަޑިއަށް ފީނުމަކީ އޭނާގެ މަސައްކަތެވެ. މިއިން ކޮންމެ ކަމަކަށް ވެސް ބައި އޮންނާނެއެވެ.
މިހުރިހާ ބައެއް އެއްކޮލުމަށްފަހު އަބްދުއްރާހީމަށް ލިބުނު ބައިބޮޑުވެގެން ކުދިކިޔުން އެންމެ ރަނގަޅު ހެއްޔެވެ؟ ކުދިކިޔުމުގެ ކުރިން މިހަގީގަތް ދެނެގަތުން ރަނގަޅެއް ނޫންހެއްޔެވެ؟
މަޖިލީސް އިންތިހާބުގައި ވެސް ކުރި ހޯދީ ޢަބްދުއްރަޙީމްގެ ޕީއެންސީއެވެ. އެހިސާބުން އެވާހަކައަށް ނިމުން އަންނަންޖެހެއެވެ.
ޢަބްދުއްރަޙީމަކީ ރައްޔިތުންގެ މަޖިލީހުގެ މިހާރުގެ ރައީސެވެ. ދައުލަތުގެ ނިޝާނާއި މަހަލްދީފްގެ ދިދަޖެހި ކާރުކޮޅެއްގައި ދިވެހިސިފައިންގެ ހިމާޔަތުގައި އުޅުއްވާ ވެރިއެކެވެ. ދަރިފުޅަކީ ދިވެހި ސަރުކާރުގެ ޓޫރިޒަމް މިނިސްޓަރެވެ. އެބޭފުޅުންގެ ރުހުމާއެކު ސިޔާސީ މަގާމްތަކަށް އައްޔަންކޮށްފައިވާ މީހުންގެ އަދަދެއް ނޭނގެއެވެ. އެހެންވީމާ ޢަބްދުއްރަޙީމްގެ ދެބައިންގެ ސިޔާސީ ބާރާއި ތަޖުރިބާއާއި ހައިސިއްޔަތާއި މަޝްހޫރުކަން މިގައުމުން ފެންނާން މި އޮތީއެވެ.
ފަސްމަގަށް ބަލާއިރު ޕީއެންސީއޮޑިއަށް މިހިސާބަށް އާދެވިފައިވަނީ ކެޕްޓަން ޢަބްދުއްރަޙީމްގެ ހިސާބުޖެހުން މޮޅު ކަމުންނެވެ. އެހެންވެ އޭނާއަށް ހިސާބު ސޯ ވެސް ކިޔައެވެ.
ރާއްޖޭގެ ސިޔާސީ މަސްރަހު ބަދަލުވަމުން އައިސް ޢަބްދުއްރަޙީމަކީ ދައުލަތުގެ ތިންބާރުގެ ތެރެއިން އެންމެމަތީ އެއްބާރުގެ ވެރިޔާއެވެ. އާދައިގެ މީހަކަށް އެހިސާބަށް ނާދެވޭނެއެވެ. އެހިސާބަށް އާދެވޭނީ ސިކުނިޑިއެއްވެސް ހުރެގެންނެވެ. ވިސްނުމެއްވެސް ހުރެގެންނެވެ. ފިކުރުކުރަންވެސް އެނގިގެންނެވެ. ސިޔާސީ އެތައް މަގާމެއް އަދާކުރައްވަމުން މިއަދު އެހިސާބަށް ވަޑައިގެންފައި ދައުލަތުގެ އެންމެ މަތީމަގާމް ވެސް އަދާކުރެއްވޭނޭ ގާބިލްކަން ހުރިކަން އެ ދެބަފައިން އެދަނީ ދައްކަވަމުންނެވެ. ނެޝަނަލް ފެންވަރުގައެވެ. އިންޓަރނޭޝަނަލް ފެންވަރުގައެވެ. ރާއްޖެއިން ބޭރުގައި އެންމެ ފަހުން ދެއްވި ތަގުރީރަކީ ހަމަ ގައިމުގައި ވެސް ފެންވަރުގެ ތަގުރީރެކެވެ.
ޢަބްދުއްރަޙީމުގެ ހަލުވި، ބާރުގަދަ ފިޔަގަނޑު ކޮށައި ތިރިކޮށްލެވޭނޭ ވަރުގެ ޕަވަރއެއްހުރި ސިޔާސީ އަތެއް ނިކަންދައްކާލަ ބަލާށެވެ. އޭނާގެ ބުރަކަށި ސަލާމަތްކޮށްދޭން އެހުންނެވީ ދަރިފުޅު ޒުވާން ފައިސަލެވެ. ބާރުގަދަ ވަޒީރެކެވެ. ރައީސްގެ ބްލެސިން ލިބިވަޑައިގެން ހުންނެވި ޅަނދޮޅު ޅަބާޅަ ހަށިހެޔޮ ޒުވާނެކެވެ. އޭނާއަށް ތަބާވާ އެތައް ޒުވާނުންނެއް އޭނާގެ ފަހަތުން އެއަންނަނީ ބިލްޑްވަމުންނެވެ.
ސިޔާސީ މަސްރަހާއި މަންޒަރު ބަދަލުވަމުންއައިސް އެ ދެބަފައިން މިހާރު އެވަނީ އެންމެ މަތީ ފަޑީގައެވެ. މިގައުމުގެ ވެރިކަން ކުރެވޭނޭ ތަޖުރިބާއާއި ގާބިލްކަމާއި ކެރުމާއި ވިސްނުން މިދެބަފައިންގެ ކިބައިން ފެންނަމުންދާ ގޮތަށް ވިސްނައިފިނަމަ މިއީވެސް އިބުރަތެކެވެ.
