އއ. މާޅޮހު ކައުންސިލުން 492,867 ރުފިޔާ ގެއްލިފައިވާކަން އޮޑިޓަރ ޖެނެރަލްގެ އޮފީހުގެ އޮޑިޓް ރިޕޯޓަކުން ހާމަވެއްޖެ އެވެ.

މިދިޔަ ހަފުތާގައި ނެރުނު އޮޑިޓް ރިޕޯޓުގައި ބުނެފައިވަނީ 2017 އަދި 2018 ވަނަ އަހަރު ކައުންސިލުގެ ބޭންކް އެކައުންޓުތަކުންނާއި ތިޖޫރީން ނެގި ފައިސާގެ ތެރެއިން މި އަދަދުގެ ފައިސާ ގެއްލިފައިވާ ކަމަށެވެ. އޭގެ ތެރޭގައި ކައުންސިލުގެ އެކައުންޓުން ނެގި ފައިސާގެ ތެރެއިން ތިޖޫރީއަށް ނުވައްދާ 255,584 ރުފިޔާ އާއި ކައުންސިލް އިދާރާގެ އެކި ބޭނުންތަކަށް ކަމަށް ބުނެ އޮޅުވާލައިގެން އެކައުންޓުން ނެގި 112,500 ރުފިޔާ ހިމެނެ އެވެ.

އޮޑިޓް ރިޕޯޓުގައި ބުނެފައިވާ ގޮތުން މުވައްޒަފުންނަށް މުސާރަ އާއި އެލަވަންސްގެ ގޮތުގައި ދޭންޖެހޭ ވަރަށްވުރެ އިތުރަށް ތިޖޫރީ އާއި ބޭންކް އެކައުންޓުން 82,579 ރުފިޔާ ނަގާފައިވެއެވެ. އަދި ނަގުދު ފައިސާގެ ތެރެއިން ކައުންސިލުގެ ބޭންކް އެކައުންޓަށް ޖަމާކުރަން ނެގި ފައިސާގެ ތެރެއިން 42,204 ރުފިޔާ ބޭންކް އެކައުންޓަށް ޖަމާކޮށްފައި ނުވާ ކަމަށް ވެސް އެ ރިޕޯޓުގައި ބުނެއެވެ.

އޮޑިޓް ރިޕޯޓުން ހާމަވި ގޮތުގައި އެ މުއްދަތުގައި އާމްދަނީގެ ގޮތުގައި ބަލައިގެންފައިވަނީ 593,490 ރުފިޔާ އެވެ. ނަމަވެސް ބޭންކަށް ޖަމާކޮށްފައިވަނީ އެހެނިހެން ފައިސާ ހިމެނޭ ގޮތަށް ޖުމުލަ 298,335 ރުފިޔާ އެވެ. މި މައްސަލަ ތަހުގީގުކުރުމަށް އޮޑިޓަރޖެނެރަލް ވަނީ އަންގަވާފަ އެވެ.