ފެން ކުންފުނީގެ ދަށުން ހިންގާ އައިލެންޑް ބެވެރޭޖަސް މޯލްޑިވްސް (އައިބީއެމް) އިން ބިދޭސީ މުވައްޒަފުން ބޭތިއްބުމަށް ކުއްޔަށް ހިފި ތަނެއްގެ އަގު ކުއްލިގޮތަކަށް ތިން ގުނައަށް ބޮޑުކޮށްފައިވާ މައްސަލައެއް ބެލުމަށްފަހު އެ އެއްބަސްވުން ބާތިލުކޮށްފިއެވެ.
މި މައްސަލައިގައި ފާހަގަކުރެވުނު ގޮތުގައި އޯގަސްޓު 27 ވަނަ ދުވަހު ޓެލެ މޯލްޑިވްސް އާއެކު ހެދި އެއްބަސްވުމުގައި މަހަކު 60،000 ރުފިޔާއަށް ކުއްޔަށް ހިފި ތަން، އޮކްޓޯބަރު 22 ވަނަ ދުވަހު އަލުން އެއްބަސްވުމެއް ހަދައި 200،000 ރުފިޔާއަށް ބަދަލުކޮށްފައިވެއެވެ. މިއީ 233 ޕަސަންޓުގެ އިތުރުވުމެކެވެ.
އެމްޑަބްލިއުއެސްސީގެ މެނޭޖިންގ ޑިރެކްޓަރު އަބްދުލްމަތީން ވިދާޅުވި ގޮތުގައި މި މައްސަލައާ ގުޅޭ ޝަކުވާއެއް ލިބުމާ ގުޅިގެން އިންޓަރނަލް އޮޑިޓް ޓީމުން ވަނީ މައްސަލަ ބަލައި، އަޅަންޖެހޭ ފިޔަވަޅުތައް އެޅުމަށް އައިބީއެމްއަށް އަންގާފައެވެ. އަދި އެއްބަސްވުން ބާތިލުކުރުމަށްފަހު، ބިދޭސީ މުވައްޒަފުން ބޭތިއްބުމަށް އާ ތަނެއް ހޯދުމަށް ވަނީ އަންގާފައެވެ.