ޝަހާ ފުންމައިގެން ތެދުވިއެވެ. އަޙްސަންވެސް ހަމަ އެކުއެކީގައި ތެދުވެއްޖެއެވެ. ޝަހާގެ މަންމައާއިއެކު، ހައްވަ އަދި އަޙްމަދުވެސް ކައިރިޔަށް އައިސް ހުއްޓިއްޖެއެވެ. ”ފަރީ، ކޮބާ ފާތުން؟ ބޭބީ ކިހިނެއް؟ ފާތުން ހޭއަރައިފިތަ؟“ ކަންބޮޑުވެފައި ހުރެ ޝަހާ ސުވާލުކުރަން ފެށިއެވެ. ”އައި އޭމް ސޮރީ ޝަހާ.“ ޑރ. ފަރީޝާގެ އެޖުމުލަ ވެގެން ދިޔައީ އެތަނުގައި ތިބި އެންމެން އެއްފަހަރާ ގަނޑުކޮށްލި ޖުމުލައަކަށެވެ. އެހެނީ. ހުރިހާ އެންމެން ވަޤުތުން ހުއްޓުން އެރިއެވެ. ފަރީޝާ މަޢާފަށް އެ އެދުނީ ސީދާ ކިހިނެއް ވެގެން ކަމެއް ނޭނގުނެއް ކަމަކު ފާތުންގެ ދެމައިން ކުރެ އެއްވެސް ފުރާނައަކަށް ނުރައްކާ ވުމަކީ އެތަނުގައި މިވަޤުތު ޙާޟިރުވެ ތިބި އެއްވެސް ފަރުދަކަށް ކެތްކުރަން އެހާ ފަސޭހަ ކަމަކަށް ނުވާނެއެވެ. ”ސޮރީއެވެ؟ ކީއްވެ ސޮރީއޭ ތިބުނީ ފަރީ؟ ތި ބުނަންއުޅޭ ވާހަކައެއް ތަންކޮޅެއް ސާފުކޮށް ތަންކޮޅެއް އަވަހަށް ބުނެދީބަލަ.“ ޝަހާ މިހެން ބުނުމާއިއެކު، ހައްވަވެސް ޝަހާ އެބުނި އެއްޗަކަށް އާނބަސް ބުނެލިއެވެ. ”ތެދެއް ޑޮކްޓަރ. އަހަރެން ވަރަށް ބިރުން މިހުރީ. މަގޭ ދަރިފުޅު ކޮބާ؟ ބުނެބަލަ ރަނގަޅޭ. ކުއްޖާވެސް ރަނގަޅޭ ބުނެބަލަ.“ ހައްވަގެ މޭގައި އަތް އަޅައިގެން ހުރެ ރޮވިފައި ހުރި ގޮތަކަށް އަޑު ތުރުތުރު އަޅުވަމުން ޑރ. ފަރީޝާއާއި މުޚާތަބު ކުރިއެވެ. ”ޝަހާ، އަހަރެން ބުނަން މިއުޅޭ ވާހަކަ ރަނގަޅަށް އަޑުއަހާބަލަ. ފާތުން އަދިވެސް ހޭނާރާ. އެކަމަކު ޙާލަތު ގޯހެއް ނޫން. އެކަމަކު..“ ޑރ. ފަރީޝާ މިހާ ހިސާބަށް ބުނުމާއިއެކު ކޮންމެވެސް ވަރަކަށް ހުއްޓުން އެރިއެވެ. ”އެކަމަކު ކިހިނެއްވީ؟ ފަރީ ޕްލީސް.“ އާދޭހުގެ ރާގަކަށް ޝަހާ ބުނެލިއެވެ. ޙާލަތު އޮޅުން ފިލުވަން ކެތްމަދުވެފައި ހުރެމެއެވެ. އެހެނަސް ޑރ. ބުނަން އެއުޅޭ ވާހަކައެއް އެހާ ފަސޭހައިން ބުނެ ނުދެވިގެން އެއުޅެނީ ކޮންމެވެސް ކަހަލަ ނޭދެވޭ ކަމެއް ވެގެންކަން ޝަހާއަށް އެނގެއެވެ. ”ފާތުން ސަލާމަތް ކުރެވިއްޖެ. އެކަމަކު ބޭބީ ސަލާމަތެއް ނުކުރެވުނު.“ އެއްނޭވާއިން ކަހަލަ ގޮތަކަށް ޑރ، ފަރީޝާ ބުނެދޭން އުޅުނު ވާހަކަ ބުނެ ނިންމާލިއެވެ. ފަރީޝާގެ އެޖުމުލަ އަޑު އިވުމާއިއެކު، މުޅި މާޙައުލު އެއްފަހަރާ ހަމަހިމޭން ވިއެވެ. ޝަހާއަކަށް ބުނާނެ އެއްޗެއް އަދި ހަދާނެ ގޮތެއްވެސް ނޭންގުނެވެ. ހައްވަ އަދި ޝަހާގެ މަންމަ ރޯން ފެށީއެވެ. އަޙްމަދުވެސް ހުރިތަނަށް ގައުވިއެވެ. އަޙްސަން ދުއްވައިގަތީ ވިއްސާ ކޮޓަރިއާއި ދިމާއަށެވެ. ފާތުން ދެކިލަން ބޭނުންވެފައި ހުރި ކަހަލަ ގޮތަކަށެވެ. މި ދަނޑިވަޅުގައި ފާތުންއަށް ބޭނުންވާނީ ތަސައްލީއެއް ދޭނެ މީހެއްކަން ޤަބޫލުކުރެވޭތީވެސް މެއެވެ. ޑރ. ފަރީޝާ ދުވެފައި ކަހަލަ ގޮތަކަށް ގޮސް އަޙްސަން ހިފެހެއްޓިއެވެ. ”އަޙްސަން އިހަށް މަޑުކޮށްބަލަ. މިވަޤުތު ތި ހުރިހާ އެންމެންނަށްވެސް ކުރާނެ އަސަރު އަހަރެންނަށް އިހުސާސް ކުރެވޭ. އެކަމަކު މި ވަޤުތު އަދި ފާތުން ކައިރިއަކަށް ނުދެވޭނެ. ފާތުން ރޫމަށް ޝިފްޓު ކުރަންދެން މަޑުކޮށްލާ. އަދި ވިސްނާލާ އެތިބަ ހުރިހާ އެންމެންނަށްވެސް އަޅާލާނެ މީހަކު މިވަޤުތު އެބަ ބޭނުންވޭ. ހިނގާ މަށާއެއްކޮން.“ ޝަހާމެން ތިބި ދިމާލަށް އިނގިލި ދިއްކޮށްލާ އަޙްސަންއަށް އެމީހުންގެ ޙާލަތު ދައްކާލަމުން ޑރ. ފަރީޝާ ބުންޏެވެ. އަދި އަޙްސަން ގޮވައިގެން އެދިމާއަށް ހިނގައިގަތެވެ.

އަޙްސަން ގޮސް ހުއްޓުނީ ޝަހާ ކައިރިއަށެވެ. ޝަހާ އަދިވެސް ހުރީ އެހުރި ގޮތަށް ހުއްޓިފައެވެ. އަޙްސަން ޝަހާއަށް ގޮވާލިއެވެ. އެވަޤުތު އަޙްސަންއަށް ފެނުނީ ޝަހާގެ ލޮލުން ހިފެހެއްޓުމެއްނެތި އޮހޮރެމުން ދިޔަ ކަރުނައެވެ. އޭރުގައިވެސް އެއްވެސް ބަހެއް ދުލަކުން ނުބުނެއެވެ. އަޑެއްވެސް ލައްވާނުލައެވެ. ޝަހާގެ މޫނުމައްޗަށް އަމާޒުކޮށް ތަންކޮޅެއް ބާރަށް އަހްސަން އަތް ޖަހާލިއެވެ. ހަމައެއާއިއެކު، ތަންކޮޅެއް ބާރަށް ޝަހާއަށް ގޮވާލިއެވެ. ”އަޅެ ފާތުން ކައިރީގަ އަހަރެން ބުނާނީ ކީކޭ؟ ފާތުން ދިރިހުރުމުގެ ހުރިހާވެސް އުންމީދަކަށް ވެފަ އޮތީ އެ ބޭބީ ވިއްޔަ. ދެން ފާތުން ހަދާނީ ކިހިނެއް؟“ ޝަހާ މަޑުމަޑުން އޭނާގެ އަމިއްލަ ނަފްސާއި ވާހަކަ ދައްކަމުން ގެންދިޔައެވެ. ބޭބީ ސަލާމަތް ނުކުރެވުނު ވާހަކަ ބުނި ވަޤުތުން ފެށިގެން ގަނޑުވެފައި ހުރި ޙާލަތުގައި ހުރެ ޝަހާ ވިސްނަމުން އެގެންދިޔައީ ފާތުންއަށް ކުރާނެ އަސަރާއި މެދުގައެވެ. ޑރ. ފަރީޝާ، ޝަހާގެ އަތުގައި ހިފާ، ކޮންމެވެސް ވަރަކަށް ތަޅުވާލިއެވެ. އަދި މަޑުމަޑުން ޝަހާއަށް ގޮވާލިއެވެ. އެވަޤުތު ޝަހާއަށްވެސް ރޮވިއްޖެއެވެ. އަޙްމަދުގެ ވިސްނުމާއި ޚިޔާލު ހުރީ މުޅިން އެހެން ގޮތަކަށެވެ. މޫނުމަތިން ފެންނަމުން ދިޔައީ ރުޅިވެރި ކަމެވެ. ގަދަ ރުޅިއެއްގައި ހުރެ ހޮސްޕިޓަލްއިން ނިކުތުމަށް ހިނގައިގަތެވެ. އެވަޤުތު އަޙްސަން ގޮސް އަޙްމަދު ހިފެހެއްޓިއެވެ. އޭނާ ހުރިގޮތުން ހުރީ ރުޅިގަދަ ވެފައިކަން އަޙްސަންއަށްވެސް ވިސްނުނެވެ. ”އަޙްމަދުކޮއްކޮ ތިދަނީ ކޮންތާކަށް؟ ކީއްވެ ތިހާ ރުޅިގަދަވެގެން ތިދަނީ؟“ އަޙްމަދުގެ ލޮލުން ފެން ފައިބަން ފެށިއެވެ. ”މިހުރިހާ ކަމެއް މިހެން މިދިމާވީ އެ ރަޝީދުއާ ހެދި. އިއްޔެގަ ރަށުން ގުޅި ރައްޓެއްސަކު ބުނި ރަޝީދު މާލޭގަ އެބަ އުޅެޔޭ. މިދަނީ އޭނަ ހުރިތާކުން ނެރެފަ ސުވާލު ކުރަން. އަދި ޕޮލިހާ ޙަވާލުކުރަން.“ އަޙްމަދުގެ ރުޅި ކޮންޓްރޯލު ނުވި ކަހަލައެވެ. ”އަޙްމަދުކޮއްކޮ ހަމަޖެހިބަލަ. އަހަރެންވެސް އެބަ ހުރީމެއްނު.  ރަޝީދުއަށް އޭނައަށް ލިބެންވާ ޙައްޤު ޢަދަބު ދިނުމުގަ އަހަރެން މިހުރީ އަޙްމަދުކޮއްކޮޔާ އެކީ. އެކަމަކު އަންނަ ރުޅީގަ ތިހެން ގޮސްގެން ކުރާ އެއްވެސް ކަމަކުން ވާނެ ފައިދާއެއް ނޯންނާނެ. އެއާއި ޚިލާފަށް އަޙްމަދުކޮއްކޮއަށްވެސް ނުރައްކަލަކާ ކުރިމަތިލާން ޖެހިދާނެ.“ އަޙްސަން އެދިން ޔަޤީންކަން އަޙްމަދު ޤަބޫލުކުރިއެވެ. އަދި ކޮންމެވެސް ވަރަކަށް ހަމަޖެހިލާފައި، އަޙްސަންއަށް ހުރިހާ ވާހަކައެއް ކިޔައިދިނެވެ. އަޙްމަދުގެ ލޮލުން ފެނުނު މަންޒަރު ތަކެވެ. ފާތުން ތަޙައްމަލު ކުރަމުން ގެންދިޔަ ކަންތައްތަކެވެ. ރަޝީދުގެ ޚިދުމަތުގައި ފާތުން ވީ ޤުރުބާނީއެވެ. ފާތުން އަޅަމުންދިޔަ ވޭނުގެ ވާހަކަތަކެވެ. އޭގެ ތެރެއިން ބައެއް ވާހަކަތަކަކީ، އަޙްސަންއަށް ކުރިން އެގިފައިހުރި ކަންތައްތަކެވެ. އެހެންކަމުން ރަޝީދުއަށް އޭނާ ކުރި ކުށުގެ ޙައްޤު ޢަދަބު ދިނުމަކީ،  އަޙްސަންގެވެސް މަޤްޞަދެކެވެ. ފާތުންގެ ޙާލަތާއި މެދު ދެމީހުން ވާހަކަ ދައްކަން ދުރުގައި ތިބުމަށްފަހު، އަޙްމަދު އޭނާގެ މަންމަ ކައިރިއަށް އަދި އަޙްސަން ޝަހާ ކައިރިއަށް ދިޔައެވެ. މިހާރު އެންމެންވެސް ތިބީ ކޮންމެވެސް ވަރަކަށް ހަމައަކަށް އެޅިފައެވެ. ޙައްވަ ފިޔަވައެވެ. އޭނާގެ ރުއިމެއް ނުހުއްޓުނެވެ. ވާނީވެސް އެހެންތާއެވެ. އަމިއްލަ ދަރިއެއްހެން ފާތުން ގެންގުޅޭތާ ދުވަސްތަކެއް ވެއްޖެއެވެ. މާލެ ދޫކޮށް ދިޔަ ދުވަހުން ފެށިގެން ފާތުންގެ ބެލެހެއްޓުން ތެރިޔަކީ ޙައްވައެވެ. މައެއް ފަދައިންނެވެ. ފާތުންގެ މުޅި ދިރިއުޅުން އެންމެ ގާތުން ދުށް އެކަކަކީ ޙައްވައެވެ. ފާތުންއަށް ހޭވެރިކަން ވުމާއިއެކު، ދެން ވާނެ ގޮތްވެސް އެންމެ ބޮޑަށް އިޙުސާސް ކުރެވެނީވެސް ޙައްވައަށެވެ.

މިކަހަލަ ޙާލެއްގައި ހުރިހާ އެންމެން ތިއްބާ، ވިއްސާ ކޮޓަރިން ނަރުހަކު ނިކުމެ، ޑރ. ފަރީޝާއަށް ގޮވާލިއެވެ. ފަރީޝާ ދިއުމަށް ހިނގައިގަތުމުން، ޝަހާ، އޭނާއާއިއެކު ވިއްސާ ކޮޓަރިއަށް ވެއްދުމަށް އިލްތިމާސް ކުރިއެވެ. ހިތްވަރު ކޮށްގެން ހުރުމަށް ބުނަމުން އޭނާއާއެކު ވަނުމަށް ޝަހާއަށް ހުއްދަ ދިނެވެ. ވާނުވާ ނޭންގޭ ޙާލުގައި ތިބެ ދެ ޑޮކްޓަރުން އެކުގައި ގޮސް ވިއްސާ ކޮޓަރިއަށް ވަނެވެ. ނަރުސް، ޑޮކްޓަރަށް ގޮވާލީ، ފާތުންއަށް ކޮންމެވެސް ވަރަކަށް ހޭވެރިކަން ވީ ވާހަކަ ބުނާށެވެ. ޑރ. ފަރީޝާ އާއި ޝަހާ ގޮސް ކައިރިއަށް ހުއްޓިލިއެވެ. އަދި ޑރ. ފަރީޝާ ފަތުންއަށް މަޑުމަޑުން ގޮވާލިއެވެ. ފާތުން މަޑުމަޑުން ލޯ ހުޅުވާލިއެވެ. އަދިވެސް ވަރަށް ވަރުބައްޔެވެ. ފާތުން ލޯ ހުޅުވާލި ވަޤުތު އެންމެ ފުރަތަމަވެސް ފެނުނީ ޝަހާއެވެ. ލުއިލުއި ހިނިތުން ވުމަކުން ޝަހާއާއި ދިމާއަށް ބަލައިލާފައި ހީލިއެވެ. ޝަހާވެސް ރައްދުގައި ހީލީއެވެ. ”ޝްޝްޝަހާ، ކޮބާ މަގޭ ބޭބީ؟“ އެވަޤުތު ޑރ. ފަރީޝާ، ފާތުންގެ އަތުގައި ވަރަށް އޯގާތެރި ކަމާއިއެކު، އަތް ބާއްވާލިއެވެ. އަދި އިހަށް ވާހަކަ ނުދެއްކުމަށް ބުންޏެވެ. ފަރީޝާ، ފާތުންއާއި ވާހަކަ ދައްކަން ފެށުމުން ޝަހާ ކުޑަ ތަންކޮޅެއް ފަހަތަށް ޖެހިލިއެވެ. ރޮވޭ ގޮތް ވުމުންނެވެ. ޝަހާއަކީ އެކި މީހުންގެ ނަފްސާނީ ދުޅަހެޔޮކަން ރައްކާތެރިކޮށްދޭން މަސައްކަތްކުރާ ޑޮކްޓަރަކަށް ވިއެއްކަމަކު، މިއަދު ޝަހާއަށް ކުރިމަތި ވެފައި މިއޮތީ ތަޙަންމަލު ކުރަން އުނދަގޫ ޙާލަތެކެވެ. އެހެނެއް ކަމަކު ޝަހާގެ އަޒުމެއް އެބަ އޮތެވެ. ފާތުން އެޙާލަތުން އަރައިގަތުމަށް ޝަހާއަށް ކުރެވުނު ހުރިހާ ކަމެއް ކޮށްދިނުމަށް އޮތް ވަރުގަދަ ޢަޒުމެވެ. އެވަޤުތު ޑރ. ފަރީޝާ ވަރަށް ރަނގަޅަށް ފާތުން ތަހުލީލުކޮށް ބަލާ ހެދިއެވެ.  މަޑުމަޑުން ލޯމެރެމުން ގޮސް ފާތުންއަށް ނިދުނީއެވެ.  ”އަލްޙަމްދުﷲ، މިހާރު ވަރަށް ބޮޑަށް ސްޓޭބްލް ވެއްޖެ. މިހާރު އެއޮތީ ނިދިފަ. ދެން ކުޑަ އިރުކޮޅެއްގެ ތެރޭގައި ރޫމަށް ޝިފްޓް ކުރާނަން. ޝަހާވެސް ދެން ހަމަޖެހިލާ. އިންޝާﷲ ހުރިހާ ކަމެއްވެސް ރަނގަޅުވާނެ.“ ޝަހާ ހަމަޖެހުމުގެ ނޭވާއެއް ލިއެވެ. އެހެންނަމަވެސް ޝަހާ ބޭނުންވީ، ރޫމަށް ބަދަލު ކުރަންދެން ފާތުން ކައިރީގައި މަޑުކުރާށެވެ. ޑރ. ފަރީޝާ ބޭރަށް ނިކުމެ ދެން ތިބި އެންމެންނަށް ފާތުންގެ ޙާލަތު ރަނގަޅު ކަމުގެ ޚަބަރު ދިނެވެ. އަދި އިރުކޮޅެއްގެ ތެރޭގައި ކޮޓަރިއަށް ބަދަލު ކުރާނެ ވާހަކަވެސް ބުންޏެވެ. ހުރިހާ އެންމެންނަށްވެސް ހިތްހަމަ ޖެހުމުގެ ނޭވާއެއް ލެވުނީ އޭގެ ފަހުންނެވެ.

ވިއްސާ ކޮޓަރިން ފާތުން ނެރުނުއިރު، ހެނދުނު ނުވައެއް ޖަހަނީއެވެ. ފާތުން ނެރުނު ވަޤުތު ޙައްވަ ދުވެފައި ކަހަލަ ގޮތަކަށް ފާތުން ކައިރިއަށް ދިޔައެވެ. އަދި ދަރިފުޅާއޭ ކިޔާފައި މަޑުމަޑުން ގޮވާލިއެވެ. ފާތުން ގެންގޮސް އެނދަށް ބަދަލު ކުރުމާއިއެކު، ޙައްވަ، ކައިރިން ދުރަށްވެސް ނުގޮސް އިނެވެ. ފާތުންގެ ޙާލަތު ތަންކޮޅެއް ރަނގަޅު ކަމަށް ފެންނާތީ ޝަހާގެ މަންމަވެސް ދިޔައީ ގެއަށެވެ. ފަހުން އަންނަން ބުނެފައެވެ. އެހެނީ ޝަހާގެ މަންމަވެސް އެއޮއް ހުރިހާއިރު ހޮސްޕިޓަލްގައި ހޭދަކުރީ ލޮލުފިއެއް ނުޖަހައެވެ. އަޙްސަންވެސް އެވަޤުތު ދިޔައީ ގެއަށެވެ. ދާން ބޭނުން ނުވެގެން އެތައް ބަހަނާއެއް ދެއްކިއެވެ. އެހެންނަމަވެސް ޝަހާ ބޭނުންވީ ޝަހާ ނެތް ވަޤުތު ތަކުގައި އަޙްސަންއަށް ފާތުން ކައިރީގައި މަޑުކުރެވޭ ގޮތަށް ކަންކަން އިންތިޒާމު ކުރާށެވެ. އަޙްމަދުވެސް ހަމަ އެފަދައެވެ. އެހުރިހާ ކަމެއްގެ ތެރެއިން ޝަހާގެ ނަޒަރު އަޙްމަދަށް ގޮސް ހުއްޓުނެވެ.  އޭނާ އިނީ ފުން ޚިޔާލެއްގެ ތެރެއަށް ގެއްލިފައެވެ. ކޮންމެވެސް ކަމަކާއިމެދު، ވަރަށް ފުންކޮށް ވިސްނަނީކަން ޝަހާއަށް އެނގުނެވެ. އަޙްސަންއާއި އަޙްމަދާއި ދެމެދު ދެކެވުނީ ކޮން ވާހަކައެއްކަން ޝަހާއަކަށް ނޭންގެއެވެ. އެހެނަސް އަޙްމަދުގެ ޚިޔާލުތައް ގުޅިފައިވަނީ، ފާތުންއަށް އިންސާފު ހޯދައިދިނުމާއިމެދުކަން ޝަހާއަށް އެނގެއެވެ. އެހެންކަމުން އަޙްމަދު ތަންކޮޅެއް ދުރަށް ގެންގޮސްގެން އެކަމާއި ގުޅޭގޮތުން ވާހަކަ ދައްކާލަން ޝަހާ ބޭނުންވިއެވެ. އެހެނަސް ޝަހާ މިފަހަރު ބޭނުންކުރީ އެހެން އުކުޅެކެވެ.  ”ބޮޑުދައިތަ ކޮންމެސް އެއްޗެއް ކާންވާނެއެއްނު. މިހާރު ހުންނާނީ ވަރަށް ބަނޑުހައިވެސް ވެފައެންނު ދޯ. އަޙްމަދު ކޮއްކޮ ހިނގާ ދައްތައާއި އެއްކޮން ކޮންމެވެސް އެއްޗެއް ކާލަން. މަވެސް މީނީ ވަރަށް ބަނޑުހައިވެފަ. ހަމަ ޔަޤީން ކޮއްކޮވެސް މިހާރު އިންނާނީ ދައްތަޔާ އެއް ޙާލެއްގަކަން. އަންނަމުން ބޮޑުދައިތައަށް ކޮންމެސް އެއްޗެއް ގެންނާނީ. އެގޮތް ރަނގަޅުވާނެ ދޯ ބޮޑުދައިތާ؟“ އަޙްމަދު ގޮވައިގެން ވާހަކަ ދައްކާލަން ދިޔުމުގެ ނިޔަތުގައި ޝަހާ ބުންޏެވެ. ޙައްވަވެސް އެގޮތަށް އެއްބަސްވިއެވެ. އޭރުވެސް ފާތުންއަށް އޮތީ ނިދިފައެވެ. އަޙްމަދު ދާން ނުދާން ހުރިކަހަލަ ގޮތަކަށް ތެދުވެފައި ޝަހާއާއި ދިމާއަށް ބަލައިލިއެވެ. އެވަޤުތު ޝަހާ ލޮލުން ޢިޝާރާތް ކޮށްލުމުން ޝަހާގެ އަސްލު މަޤްޞަދު އަޙްމަދަށް ވިސްނުނެވެ. އެހެންކަމުން މިހާރު އަޙްމަދު އެ ހިނގައިގަތީ ދާން ބޭނުން ވެގެންނެވެ.

ޝަހާ، އަހްމަދު ގޮވައިގެން ދިޔައީ ހޮސްޕިޓަލްގެ ކެންޓީނަށެވެ. ކައުންޓަރުން ކާއެއްޗެހި ނަގައިގެން ދެމީހުން ގޮސް އިށީނީ ކުރީ ދުވަހުވެސް ތިބި މޭޒު ދޮށުގައެވެ. އެހެނީ އެއީ، ތަންކޮޅެއް ދުރުގައި ހުރި މޭޒަކަށް ވެފައި، އެތަނުގައި ތިބެގެން ދައްކާ ވާހަކަ އެހާ ބޮޑަށް އަޑު ނީވޭ ހިސާބެއްގައި ހުރި މޭޒަކަށް ވާތީއެވެ. މޭޒުދޮށުގައި އިށީނުމާއިއެކު ރަނގަޅަށް ހަމަޖެހިލާފައި ޝަހާ، އޭނާ ދައްކަން ބޭނުންވާ ވާހަކަ ފެށިއެވެ. ”އާން ދެން ބުނެބަލަ، އެހާ ފުންކޮން މިހާރު ތި ވިސްނަނީ ކޮންކަމަކާ؟ ފާތުންގެ ބޭބީ އާއި މެދުގަތަ؟“ އޭރުވެސް އަޙްމަދުގެ މޫނުމަތިން ކޮންމެވެސް ވަރެއްގެ ނުތަނަވަސް ކަމެއް ފެންނަން ހުއްޓެވެ. ”ޝަހާދައްތައަށް އެނގޭތަ؟ ރަޝީދު މިހާރު މާލޭގަ އެބަހުރި.“ އަޙްމަދުގެ އެ ޖުމުލަ އަޑު އިވުމާއިއެކު، ޝަހާގެ މޭ ބާރަށް ތެޅެން ފެށިއެވެ. ޒާތެއްގެ ބިރުވެރިކަމެއް ޝަހާ ވަށާލިކަހަލައެވެ. ”އަނެއްކާ ފާތުން ހޯދަންބާ އައިސްގެން އެއުޅެނީ؟ ހޮސްޕިޓަލް ތެރެއިން ފެނުނަސް އަހަރެންނަކަށް ނޭންގޭނެ ރަޝީދު ވަކިކުރާކަށްވެސް. އަނެއްކާ ފާތުން ވީތަނެއް އޭނާއަށް އެނގޭބާ؟“ ޝަހާގެ ކަންބޮޑުވުން ފާޅުކުރިއެވެ. ”މާލެ އައީ ކީއްކުރަން ކަމެއް މަށަކަށް ނޭންގެ. އެކަމަކު އޭނަ ވީތަނެއް ހޯދައިގެން ޕޮލިހާ ހަވާލުކުރަން ބޭނުން. އެކަމާ މި ވިސްނަނީ. އަހަރެން ކުރިމައްޗަށް އައިއްސިއްޔާ ހެދޭނެ ގޮތެއްވެސް ނޭންގެ. ސަލާމަތުން ދިޔަކަ ނުދޭނަން.“ އަޙްމަދު އެހާ ރުޅިއައިސް ހުއްޓާ ފެނުމުން ޝަހާ ހައިރާންވިއެވެ. އެހެނަސް އެއީ ޖާއިޒް ރުޅިއެއްކަން ޝަހާވެސް ޤަބޫލުކުރެއެވެ. ކަން އޮތީ އެހެންކަމަށް ވީނަމަވެސް، މިފަދަ ނާޒުކު ދަނޑިވަޅެއްގައި އަޙްމަދުގެ ފަރާތުން ގޯހެއް ހެދުން އެއީ ބުއްދިވެރި ގޮތެއް ނޫންކަމަށްވެސް ޝަހާ ޤަބޫލުކުރެއެވެ. ”އަޙްމަދުކޮއްކޮގެ ތި ހިތްހަމަ ނުޖެހުމާ ރުޅި ޖާއިޒްކަންވެސް ޝަހާދައްތަ ޤަބޫލުކުރަން. އެކަމަކު މިހާރު އިހަށް ވިސްނަންވީ ދޮންތަޔާ ދޭތެރޭގަ. ދޮންތަ ހަމައަށް ހޭވެރިކަން ވާއިރަށް އެންމެ ފުރަތަމަވެސް ސުވާލުކުރާނީ ބޭބީއާ ބެހޭގޮތުން. އަޙްމަދުކޮއްކޮ ހަމަޖެހިގެން ހުރެގެން ނޫނީ ދޮންތަ އެޙާލަތުން ހަމަޔަކަށް އެޅުވުމަކީ ވަރަށް އުނދަގޫ ކަމަކަށް ވާނެ. ދޮންތަ ހޭއަރާއިރު ދައްތައަށް އެތަނުގައި ނުހުރެވުންވެސް އެކަށީގެންވޭ. މިއަދުވެސް މިހުރީ ޑިއުޓީއަށް ސަލާމް ބުނެފަ. ކޮންމެ ދުވަހަކު އެހެންނެއްވެސް ނުހުރެވޭނެތާ ދޯ. އެހެންވީމަ އަޙްމަދުކޮއްކޮގެ އެހީތެރިކަން އިންތިހާއަށް ބޭނުންވާއިރު، އެކަން ރަނގަޅު ގޮތުގަ ކުރެވޭނީ ކޮއްކޮގެ ފޯކަސް ހަމައެކަނި ދޮންތައަށް ދީގެން. ދައްތަވެސް އަދި އަހްސަންވެސް ކޮއްކޮޔާ އެއްކޮން އެބަ ތިބިކަމަށް ޤަބޫލުކުރޭ. އިންޝާﷲ ދައްތަގެ އެކުވެރިޔާއަށް އިންސާފު ހޯދައިދޭނަން. އެކަމަކު އެކަމަށްޓަކާ އަހަރުމެން ހަމަޖެހިގެން ތިބެން ޖެހޭކަން އަޙްމަދުކޮއްކޮ ހަނދާން ނައްތާނުލާތި އިނގޭ. ރަޝީދުއާ މެދު ވިސްނާނީ އޭގެ ފަހުން.“ ޝަހާ ދިން ނަޞޭހަތް އަޙްމަދު ޤަބޫލުކުރިއެވެ. އަދި ފާތުންގެ ކުރިމަތީގައި ހިތްވަރު ކުރާނެ ކަމުގެ ޔަޤީންކަން ޝަހާއަށް އަޙްމަދު ދިނެވެ.

ފާތުންނާއި ގުޅުންހުރި ބައެއް ކަންކަމާއިމެދު މަޝްވަރާ ކުރުމަށް އިރުކޮޅަކު ތިބުމަށްފަހު ހައްވައަށް ޕާރުސަލް ހިފައިގެން ޝަހާއާއި އަޙްމަދު ދިޔައީ ކޮޓަރިއަށެވެ. އޭރު ހުރީ މެންދުރުވާން ކައިރިވެފައެވެ. ކޮޓަރިއަށް ވަނުމާއިއެކު ޝަހާ، ހައްވައަތަށް ޕާރުސަލް ދިއްކޮށްލިއެވެ. ހައްވަ ކައި ނިމުމުން، ހައްވަ ގޮވައިގެން ގެއަށް ދިއުމަށް އަޙްމަދު ކައިރީގައި ޝަހާ ބުންޏެވެ. ކޮންމެވެސް ވަރަކަށް އަރާމު ކޮށްލުމަށް ފުރުޞަތު ދިނުމުގެ ގޮތުންނެވެ. އެތަނުން ދުރަށް ދިއުމަކަށް ހައްވަގެ ހިތެއް ނުރުހުނެވެ. އެހެންނަމަވެސް ޝަހާއާއި އަޙްމަދު ކޮންމެވެސް ވަރަކަށް އާދޭސްކޮށް، ވިސްނައި ދިނުމުން އެންމެފަހުން ދާން އެއްބަސްވިއެވެ. މިހާރު ފާތުން ކައިރީގައި އިނީ ޝަހާ އެކަންޏެވެ. ފާތުންގެ ޙާލަތަށް ފުންކޮން ވިސްނާލުމުގެ ފުރުޞަތު ޝަހާއަށް އެލިބުނީ އަދި ކިރިޔާއެވެ. އެހިނދު ޝަހާއަށް އަނެއްކާވެސް ހުޅުވާލެވުނީ މަޒީގެ ޞަފްޙާތަކެވެ. ކުޑައިރު އެކުގައި ހޭދަކުރި އުފާވެރި އަދި މަޖާ ދުވަސްތަކާއިމެދު، ފުންކޮށް ވިސްނާލެވުނެވެ. އެއީ ކޮންމެ އިންސާނެއްގެ ޙަޔާތުގައިވެސް އަންނާނެ އެންމެ މަޢުސޫމު ދުވަސްތަކެވެ. ދުނިޔަވީ ޚިޔާލެއް އަދި ފިކުރެއް އެއިރަކު ނުހުންނާނެއެވެ. ދުނިޔެއަކީ ރަހުމުކުޑަ އިންސާނުން ގިނަ ތަނެއްކަންވެސް އެއިރަކު ނޭންގޭނެތާއެވެ.  ވީއިރު އެދުވަސްތައް ފާއިތުވެ، ޒިންމާދާރު މީހުންނަށް ވާދުވަހަކުން، ޙަޔާތުގެ ދަތުރުގައި މިފަދަ ތޫފާނުތަކާއި ކުރިމަތިލާން ޖެހޭނެކަން އޭރުގައި އެނގޭނީ ކިހިނަކުން ހެއްޔެވެ؟ އެކަން އެހެން ވާނެކަން އެނގޭނަމަ، ހަމަ ގައިމުވެސް އެކަމަށް ދުރާލާ ތައްޔާރުވާން އެނގުނީސްތާއެވެ. އެހެނަސް އެދުވަސްތަކެއް އަލަކުން ނުގެނެވޭއެވެ. އެއީ މާޒީއެވެ. މިހާރު ކުރިމަތީގައި މިއޮތީ މިއަދުގެ ޙަޤީޤަތެވެ. ހިއްޗެވެ. އެހެނަސް ހިތްވަރާއިއެކު ކުރިމަތިލާން ޖެހޭނެތާއެވެ. އެހިނދު ޝަހާގެ ދުލުން ބުނެލެވުނީ ”އުންމީދެއް އޮތިއްޔާ ދިރުމެއްވާނެ. އިންޝާﷲ ހުރިހާ ކަމެއްވެސް ދާނީ ރަނގަޅަށް“ ޝަހާގެ ދުލުން މިހާ ހިސާބަށް ބުނެލެވުމުން ”ﷲ ވޮޑިގެން…. ވަނީ… ކެތްތެރިންނާ…އެކު“ ކުކުރަމުން ކަހަލަ ގޮތަކަށް ފާތުންގެ ދުލުން ބުނެލި އަޑު ޝަހާއަށް އިވުނެވެ. އެހިނދު ފާތުންއާއި ދިމާއަށް ބަލައިލެވުނެވެ. އެއިރު ފާތުންގެ ލޯ މަޑުމަޑުން ހުޅުވެނިއްޔެވެ. މަޑުމަޑުން ފާތުންގެ އަތް ޝަހާގެ އަތުތެރެއަށް ލިއެވެ. ޝަހާ ފެންކަޅި ވިއެވެ. އުފަލުންނެވެ. ”ޝަހާ.“ ފާތުން، ޝަހާއަށް ގޮވާލުމާއިއެކު، މަޑުމަޑުން އަމިއްލަ ބަނޑުގައި އަތް ޖައްސާލިއެވެ. ”މަގޭ ބޭބީ… ރަނގަޅު.. ދޯ؟“

• ނުނިމޭ –