”ފާތުން، މިހާރު ކިހިނެއްތަ؟ އަދިވެސް ބަނޑުގަ ރިއްސާތަ؟“ ފާތުންގެ ސަމާލުކަން އެހެން ދިމާއަކަށް ގެންދަން ޝަހާ ބޭނުންވިއެވެ. އަދި މަޑުމަޑުން ފާތުންގެ އަތުގައި އަތް އަޅާލިއެވެ. ރައްދުގައި ފާތުންއަށް އިތުރު ބަހެއް ނުބުނެވި އުޅެނިކޮށް، ކޮޓަރީގެ ދޮރުގައި ކޮންމެވެސް މީހަކު ޓަކި ޖާހަލައިފިއެވެ. ޝަހާ ދޮރާއި ދިމާއަށް ބަލައިލިއެވެ. އަދި ކާކުބާއޭ އަހާލާ ކަހަލަ ނަޒަރަކުން ފަތުންއާއި ދިމާއަށް އެނބުރި ބަލައިލިއެވެ. ”ފަރީ ކަންނޭންގެ. އެބަ އަންނަން ދޮރު ހުޅުވާލާފަ.“ މިހެން ބުނުމާއިއެކު ގޮނޑިން ތެދުވިއެވެ. ޝަހާ ހުއްޓުން އެރީ، ޝަހާގެ އަތުގައި ފާތުން ހިފެހެއްޓުމުންނެވެ. ”ކިހިނެއްވީ ފާތުން؟“ ކޮންމެވެސް ވަރަކަށް ހިތްހަމަ ނުޖެހިފާ އޮވެ، ފާތުން ސުވާލު ކުރިއެވެ. ”ޝަހާ ކީއްވެތަ އަހަރެން ކުރި ސުވާލުގެ ޖަވާބު ނުދޭން ތިއުޅެނީ؟“ ”ޓަކި ޖެހީ ކާކުތޯ ބަލައިލާފަ އެބަ އަންނަމޭ.“ އޯގާތެރި ހިނިތުންވުމަކާއިއެކު، ފާތުންއާއި ދިމާއަށްބަލައިލަމުން ޝަހާ ބުނެލިއެވެ. ޝަހާ މަސައްކަތް ކުރީ  ފާތުންގެ ސުވާލުތަކަށް ޖަވާބު ދިނުމަށް ރަނގަޅު ވަޤުތެއް ހޯދާށެވެ. އެހެނީ ޙަޤީޤަތް އެނގިއްޖެނަމަ ފާތުންއަށް ވާނެ ގޮތް ޝަހާއަށް ވަރަށް ރަނގަޅަށް އެނގެއެވެ. މަޑުމަޑުން ހިނގާލާފައި ގޮސް ކޮޓަރީގެ ދޮރު ހުޅުވާލިއިރު، ދޮރުމަތީގައި ހުރީ މެދު އުމުރު ފުރައިގެ ފިރިހެނެކެވެ. ބަލާބެލުމަށް ހުތުރެއްވެސް ނޫނެވެ. ލުއިލުއި ހިނިތުންވުމަކާއިއެކު، އަމިއްލަ ނަން ބުނެ ޝަހާއަށް އެނާގެ ކުރު ތަޢާރަފެއް ދިނެވެ. އެވަޤުތު ޝަހާއަށް ދެފިޔަވަޅު ފަހަތަށް ޖެހިލެވުނެވެ. މޭމައްޗަށް ގަނޑުފެން އެއްޗެއް އޮއްސާލި ކަހަލަ އިހުސާސެއްވެސް ކުރެވުނެވެ. ދެލޯ ބޮޑުވެގެން ދިޔުމާއިވެސް އެކުގައެވެ. ކުރިމަތީގައި އެހުރީ ދެވަނަ ދެމީހެއް ނޫނެވެ. ރަޝީދުއެވެ. ޝަހާ ހަދާނެގޮތް ހުސްވިއެވެ. އެހެންނަމަވެސް މޫނުމައްޗަށް ވެރިވަމުންދިޔަ ހާސްކަން ރަޝީދު ކުރިމަތީގައި ދައްކަން ބޭނުން ނުވި ކަހަލައެވެ. އެހެނީ ނޫންކަމަށް ހަދާފައި ޝަހާ ކޮށްލީ ސުވާލެކެވެ. ”ކޮން ރަޝީދުއެއްތޯ؟ އަޅުގަނޑު ނުދަންނަށް ތި ބޭފުޅާއެއް. އަދި އަޅުގަނޑަކަށް ހިއެއް ނުވޭ މި ކޮޓަރީގަ އޮތީ ތިޔަ ބޭފުޅާއާއި އެއްވެސް ގުޅުމެއް އޮތް މީހެއް ހެނެއް.“  މޫނުމަތިން ހިނިތުންވުމުގެ ކުލަވަރު ދެއްކޭތޯ ޝަހާ މަސައްކަތް ކުރިއެވެ. ”މަޢާފް ކުރައްވާ. އަޅުގަނޑަށް އޮޅުނީ ކަންނޭންގެ.“ މިހެން ބުނުމާއިއެކު، އެނބުރި ދިއުމަށް ރަޝީދު ހިނގައިގަތެވެ. ”ޝަހާ، ކާކު؟ އަޙްސަންތަ؟“ ފާތުން މިހެން ގޮވާލި އަޑު ރަޝީދުއަށް އިވުމާއިއެކު، ކުއްލިއަކަށް ޝަހާއާއި ދިމާއަށް އެނބުރިލިއެވެ. ”މަޢާފް ކުރައްވާ. އެކަމަކު މި ކޮޓަރީގައި އަޅުގަނޑު ދަންނަ މީހަކު އެބަ އުޅޭހެން ހީވޭ.“ ކޮޓަރިތެރެއަށް ބޯ ދިއްކޮށްލަން މަސައްކަތް ކޮށްލުމާއިއެކު، ރަޝިދު ބުނެލިއެވެ. ޝަހާ ކަންބޮޑުވާ ގޮތްވިއެވެ. ފާތުންއަށް ރަޝީދު ފެންނާކަށް ޝަހާ ބޭނުމެއް ނުވެއެވެ. އެހެނީ މިފަދަ ނާޒުކު ދަނޑިވަޅެއްގައި ފާތުންއަށް އިތުރު ހާސްކަމަކާއި ތަކުލީފެއް ކުރިމަތި ކުރުވާފަދަ އެއްވެސް ކަމެއް މެދުވެރިވާން ނޭދޭތީވެސް މެއެވެ.

ޝަހާއަށް އިތުރު އެއްޗެއް ނުބުނެވި އުޅެނިކޮން ރަޝީދު ކޮޓަރިއަށް ވަދެއްޖެއެވެ. ޝަހާ ދުވެފައި ކަހަލަ ގޮތަކަށް ގޮސް ރަޝީދުގެ ކުރިމައްޗަށް އެރިއެވެ. އެހެނީ، ޝަހާ އަދިވެސް މަސައްކަތް ކުރަމުން އެގެންދަނީ ފާތުންއަށް ރަޝީދު ފެނުމުގެ ކުރިން އެތަނުން ފޮނުވާލާށެވެ.  ”ކާކުތަ ޝަހާ؟“ އަނެއްކާވެސް ފާތުން ގޮވާލިއެވެ. ”ތިޔައީ ކޮން ބޭފުޅެއް ކަމެއް އަޅުގަނޑަކަށް ނޭންގެ. އެކަމަކު މިތަނުން އަޅުގަނޑުގެ އަންހެނުންގެ އަޑު އިވުނީމަ މިވަނީ. އަޅުގަނޑުގެ އަނބިމީހާ ގެއްލިގެން ހޯދަން އުޅޭތާ ދުވަސްތަކެއް ވެއްޖެ. މި ހޮސްޕިޓަލުގަ އެނދުމަތި ކޮށްފަ އޮތް ޚަބަރު ލިބިގެން ހޯދަމުން މިހިނގަނީ. ގާތްގަނޑަކަށް ހުރިހާ ވޯޑުތަކެއްވެސް ބެލިއްޖެ. ޕްރައިވެޓް ކޮޓަރިތައްވެސް ބަލަމުން މި ހިނގަނީ. އެހެންވީމަ ތިބޭފުޅާ ރަނގަޅުވާނީ އަޅުގަނޑުގެ މަސައްކަތަށް ހުރަސް އަޅުއްވަން މަސައްކަތް ނުކުރެއްވިއްޔާ.“ ޝަހާއަށް މުޚާތަބުކޮށް ރަޝީދު ބުންޏެވެ. ކޮންމެވެސް ވަރަކަށް ނުރުހުން ފާޅުކުރަން މަސައްކަތް ކުރަމުންވެސް މެއެވެ. ޝަހާ ކަންބޮޑުވާ ގޮތް ވިއެވެ. އެހެނަސް ދެން ކުރާނެ ކަމެއް ނެތެވެ. ރަޝީދު އެހުރީ ކޮޓަރިތެރެއަށް ވަދެއެވެ. ޝަހާއަކަށް އެކަނިމާ އެކަނި ކުރެވޭނެ ކަމެއްވެސް ނެތެވެ. އެހެންނަމަވެސް ފާތުން ސަލާމަތްކުރަން ޝަހާއަށް ކުރެވުނު މަސައްކަތެއް ކުރަން އެހުރީ ތައްޔާރަށެވެ. ”ޝަހާ، އަހަރެން ސަލާމަތްކުރޭ“. ފާތުން ގޮވާލިއެވެ. އެހެނީ ރަޝީދު ވާހަކަދެއްކި އަޑު ފާތުންއަށް އިވިއްޖެއެވެ. ޝަހާ ފާތުން ކައިރިއަށް ދިއުމަށް ހިނގައިގަތެވެ. އެހެންނަމަވެސް އެއަށްވުރެ ބާރަށް ރަޝީދު ހިނގައިގަތެވެ. އަދި ފާތުން ކައިރީގައި ގޮސް އިށީންދެލިއެވެ. ޝަހާ ހަދާނެގޮތް ހުސްވި ކަހަލައެވެ. އެހެނަސް ހިތްވަރު ދެރަ ނުކޮށް ވޭތޯ ވަރަށް މަސައްކަތް ކުރިއެވެ. ހަދާނެ ގޮތަކާއިމެދު ވިސްނަމުން ގޮސް ކުއްލިޔަކަށް ދަބަހުގައި އޮތް ފޯނު ނަގާ، ނަންބަރަކަށް ގުޅާލިއެވެ. ޝަހާ ގުޅީ އަޙްސަންއަށެވެ. ވަރަށް ސިއްރުންނެވެ. އަދި ފޯނު ހިފައިގެން ފާތުންއާއި ވީހާވެސް ކައިރިއަކަށް ދެވޭތޯ ޝަހާ މަސައްކަތް ކުރިއެވެ. ޝަހާ ބޭނުންވީ އެ ކޮޓަރިތެރޭގައި މިވަޤުތު ހިނގަމުން އެދާ ކަންތައް އަޙްސަންއަށް އަންގާށެވެ. އެހެނީ ޝަހާއަށް ޤަބޫލު ކުރެވުނު ގޮތުގައި މިވަޤުތު ފާތުން މިކަމުން ސަލާމަތް ކުރެވޭނެ ފަރާތަކީ އަޙްސަންއެވެ. އަނެއްކޮޅުން ޝަހާގެ ކޯލަށް ޖަވާބު ދިނުމުގެ ގޮތުން އަޙްސަން ފޯނު ނެގިއެވެ. ފޯން ކަންފަތުގައި ޖަހައިގެން އިރުކޮޅަކު އަޙްސަން އިނެވެ. ހިނގަމުން އެދާ ކަންތައް ކޮންމެވެސް ވަރަކަށް އަޙްސަންއަށް ދެނެގަނެވިއްޖެއެވެ. އިރުކޮޅެއްފަހުން ފޯނު ކަނޑާލުމާއިއެކު އަޙްސަން ގުޅީ ފުލުސް އޮފީހަށެވެ. ދެން އެއަށްފަހު އަހްމަދަށެވެ. އަދި މި ވަޤުތު ކަންތައް ކުރަންވީ ގޮތް ވަރަށް ރަނގަޅަށް ކިޔައިދިނެވެ. ހަމަ އެއާއިއެކު، ކެތްތެރި ވުމަށްވެސް އަޙްމަދަށް ނަސޭހަތްތެރި ވިއެވެ.

އަނެއްކޮޅުން ރަޝީދު ގޮސް ފާތުން ކައިރީގައި އިށީނުމާއިއެކު، ފާތުން ބިރުން ރޯން ފެށިއެވެ. އަދި ބަނޑުގައި އަތްއަޅާ، ބޭބީ ރައްކާތެރި ކުރަން މަސައްކަތް ކުރަމުން ގެންދިޔައެވެ. ހަމަ އެއާއިއެކު، ރޮމުން ގިސްލަމުން ރަޝީދުއަށް އާދޭސް ކުރަމުން ގެންދިޔައެވެ. ގޮތް ހުސްވާހެން ހީވުމުން ދެން މުޚާތަބުކުރީ ޝަހާއަށެވެ. ”ޝަހާ، އަހަރެން ސަލާމަތްކޮށްދީ. މި މީހާ ކައިރީގަ ބުނެބަލަ މިތަނުން ދާށޭ. އަހަރެންގެ ބޭބީއަށް ގޮތެއް ނުހަދާށޭ ބުނޭ.“ އެވަޤުތު ރަޝީދު ވަރަށް ރަނގަޅަށް ޝަހާއާއި ދިމާއަށް ބަލައިލިއެވެ. ޝަހާގެ ނަމަކީ، ރަޝީދު އެތައް ފަހަރަކު، ފާތުންގެ ދުލުން އަޑު އަހާފަ އޮތް ނަމެކެވެ. އަދި އެއީ ފާތުންއަށް ކިހާ މުހިންމު މީހެއްކަންވެސް ރަޝީދުއަށް ވަރަށް ރަނގަޅަށް އެނގެއެވެ. އެހެންކަމުން ރަޝީދު ދެން މަސައްކަތްކުރީ ޝަހާއާއި މުޚާތަބު ކުރާށެވެ. އެހެނީ ޝަހާ ބުނެފިއްޔާ ފާތުން ޤަބޫލު ނުކުރާނެ އެއްވެސް ކަމެއް ނޯންނާނެތީކަން އެނގޭތީވެސް މެއެވެ. ޝާހާއާއި ދިމާއަށް ރަޝީދު ހިނގައިގަތުމުން ޝަހާ ކޮންމެވެސް ވަރަކަށް ފަހަތަށް ޖެހެން ފެށިއެވެ. އެހެންނަމަވެސް ރަޝީދުއަކީ ކޮންކަހަލަ މީހެއްކަން ޝަހާ ވަނީ ކުރިން އަންދާޒާ ކޮށްފައެވެ. ވީމާ، އޭނާއާއި ކުރިމަތިލާނެ ގޮތް ޝަހާއަށް ވަރަށް ރަނގަޅަށް އެނގެއެވެ. ”ތީ ދޯ ޝަހާއަކީ؟ ފާތުމަތުގެ ބެސްޓް ފްރެންޑް.“ ގޮނޑިން ތެދުވެގެން ގޮސް، ޝަހާ ކައިރިއަށް ރަޝީދު ހުއްޓުނެވެ. ”އާން މީ ޝަހާއަކީ. ރަޝީދުއަށް އަހަރެން އެނގޭތަ؟“ ”އާން އެނގޭ. ފާތުމަތު އޮތީ ޝަހާގެ ކުރު ތަޢާރަފެއް މާކުރިން ދީފަ. އަހަރުމެން ދެމީހުން ކައިވެނި ކުރަން އުޅުނުއިރު. ދޯ ފާތުމަތު.“ ރަޝީދުގެ ވާހަކައިގާ ފާތުން ޝާމިލުކުރަން މަސައްކަތް ކުރިއެވެ. ”އަހަރެން ނޫޅެން ކަލެޔާ ވާހަކަ ދައްކާކަށް. ތީ އަހަރެންގެ ފިރިމީހާއެއް ނޫން. ކަލޭ އަމިއްލައަށް އަހަރެން ވަރިކުރީ.“ ތުރުތުރުއަޅާ އަޑަކުން ފާތުން ބުންޏެވެ. އެއަޑުގައި އެކުލެވިފައިވަނީ، ބިރާއި ކަންބޮޑުވުމެވެ. ރުޅިއާއި ވޭނެވެ.

މިފަދަ ޙާލެއްގައި ފާތުންއާއި ޝަހާ ތިއްބާ، ކޮޓަރިއަށް އައިސް އެވަނީ އަޙްސަންއެވެ. ފުލުހުންނާއިވެސް އެކުގައެވެ. މާގިނައިރުތަކެއް ނުވެ އަޙްމަދުވެސް އައިސް ވަދެއްޖެއެވެ. އަޙްމަދަށް ރަޝީދު ފެނުމާއިއެކު، ބާރަށް ހަޅޭއްލަވައިގަތެވެ. އެވަޤުތު އަޙްސަން މަސައްކަތްކުރީ އަޙްމަދު ކޮންޓްރޯލު ކުރުމަށެވެ. ފުލުހުންވެސް އެތަނުގައި ތިބުމާއިއެކު، އަޙްމަދުގެ ފަރާތުން ނޭދެވޭ ކަމެއް ފެނުމަކީ، ޙާލަތު މުޅިން ބަދަލު ވެގެން ހިނގައިދާނެ ކަމަކަށް ވެދާނެތީއެވެ. ހަމަ އެހެންމެ އަޙްމަދު ނުރައްކަލަކަށް ހުށައެޅިދާނެތީވެސް މެއެވެ. އަޙްމަދު ކޮންޓްރޯލު ކުރުމަށްފަހު އަޙްސަން މަސައްކަތް ކުރީ ރަޝީދު ފުލުހުންނާއި ޙަވާލު ކުރުމަށެވެ. އެހެންނަމަވެސް ރަޝީދު މަސައްކަތް ކުރީ އޭނާގެ ބުއްދި ބޭނުން ކުރުމަށެވެ. ”އަހަރެން މި އައީ ފާތުމަތަށް އެއްވެސް ކަހަލަ ގެއްލުމެއް ދޭކަށް ނޫން. އެކަމަކު ފާތުމަތުގެ ކިބައިން މަޢާފަށް އެދެން. އަހަރެންގެ ފަރާތުން ފާތުމަތަށް އެއްވެސް ގެއްލުމެއް ދެވިފައިވާނަމަ އެކަމަށް ޓަކާ އަހަރެން ފާތުމަތުގެ ކިބައިން ނިހާޔަތަށް މަޢާފަށް އެދެން. އަދި އަހަރެންނާއިއެކު، އަނބުރާ ރަށަށް ދިއުމަށް އިލްތިމާސް ކުރަން. ފާތުމަތު ހިނގާ އަހަރެންނާއެކު ދާން.“ މިފަހަރު އަޙްސަންގެ ރުޅިވެސް ކޮންޓްރޯލު ނުވި ކަހަލައެވެ. ”އޭ. މާ މަޢުސޫމު ކަމަށް ހެދިގެން އުޅޭނެ ކަމެއްނެތް އިނގޭ. ފާތުންގެ މުޅި ދިރިއުޅުން ހަލާކު ކޮށްލާފަ ތިހުރީ. މިހާރުވެސް ތިއުޅެނީ ފާތުން އެއޮތް ޙާލައިގެންވެސް މިތާ އޮތަ ނުދޭން.“ އެވަޤުތު ޝަހާ އެދޭތެރެ މެދަށް ވަނެވެ. އައިސް ހުރީ ކޮންކަހަލަ ހިތްވަރެއް ކަމެއްވެސް ނޭންގެއެވެ. ޝަހާ މުޚާތަބުކުރީ އަޙްސަންއާއިއެވެ. ”އަޙްސަން ހަމަޖެހިބަލަ. ވާހަކަ ދައްކައިގެން ހައްލު ކުރެވޭތޯ ބަލަމާ ހިނގާ.“ އެވަޤުތު ފުލުހުންގެ ތެރެއިން ދުރުވެ ހުންނެވި އިސް ބޭފުޅަކު ވާހަކަ ދެއްކެވިއެވެ. އަދި އަސްލު މައްސަލައާއި ބެހޭގޮތުން ސުވާލު ކުރެއްވިއެވެ. ފުލުހުންގެ ސުވާލު އަމާޒުވީ ފާތުންއަށެވެ. އެހެނީ ރަޝީދުގެ ޝިކާރައަކީވެސް ފާތުން ތާއެވެ. ފާތުން ކުރު ގޮތަކަށް ހުރިހާ ވާހަކަތަކެއް ފުލުހުންނަށް ކިޔައިދިނެވެ.

ފާތުންގެ ބަޔާން ނެގުމަށްފަހު، ރަޝީދު ގޮވައިގެން ފުލުހުން ދިޔައީއެވެ. ޝަހާ ހަމަޖެހުމުގެ ފުން ނޭވާއެއް ލުމާއިއެކު އުފަލުން ގޮސް ފާތުންގެ ގައިގާ ބައްދާލިއެވެ. ފާތުންއަށް ބާރަށް ރޮއެގަނެވުނެވެ. އެއީ ހިތްހަމަ ޖެހުމުގެ ރުއިމެއް ކަމެއް ނުވަތަ ހިނގާދިޔަ ކަންތަކަށް ގަތް ބިރު ކަމެއް ނޭންގުނެވެ. ހަމަ އެހެންމެ އަޙްމަދަށްވެސް ރޮވިއްޖެއެވެ. ޝަހާ މަސައްކަތް ކުރަމުން ގެންދިޔައީ ފާތުން ހަމަ ޖެއްސޭތޯއެވެ. ފާތުންގެ ބުރަކަށީގައި މަޑުމަޑުން ފިރުމާލިއެވެ. ”އިންޝާﷲ ދެން ހުރިހާ ކަމެއްވެސް ދާނީ ރަނގަޅަށް.“ ޝަހާ މިހެން ބުނުމާއިއެކު، ފާތުން އަނެއްކާވެސް ކުރިން ޝަހާއާއި ކުރި ސުވާލު ކުރިއެވެ. އެހެންނަމަވެސް މިފަހަރު އެސުވާލަށް ޖަވާބު ދޭން ޝަހާ ތައްޔާރެވެ. އެހެނީ މިވަޤުތު އެކޮޓަރި ތެރޭގައި ހުރީ އޭނަ އެކަންޏެއް ނޫނެވެ. ފާތުންއަށް ހިތުގެ ފުންމިނުން ހިތްވަރުދީ ހެޔޮ އެދޭ އިތުރު ދެމީހަކު އެބަ ތިއްބެވެ. ފުން ނޭވާއެއް ލުމާއިއެކު ހަމަޖެހިލައިގެން ފާތުން ކައިރީގައި އިށީންދެލިއެވެ. އަދި ކަން ހިނގާ ދިޔަގޮތް ވަރަށް ރަނގަޅަށް ފާތުންއަށް ކިޔައިދިނެވެ. އެވަޤުތު އަޙްމަދުވެސް އައިސް ކައިރީގައި އިށީނެވެ. ”ދޮންތާ، އަހަރެންނަށް އެނގޭ މި ޚަބަރު ލިބުމުން ދޮންތައަށް ކުރާނެ އަސަރު. އެކަމަކު ހިނގާދޯ ތަންކޮޅެއް ޕޮޒިޓިވްކޮށް މިކަމާއިމެދު ވިސްނާލަމާ.“ އޭރު، ފާތުން އިނީ ހަދާނެ ގޮތެއް ނޭންގިފައި ކަހަލަ ގޮތަކަށެވެ. ވާނީވެސް އެހެންތާއެވެ. އެންމެ ފަހަރަކު ނޫނެވެ. ފާތުންގެ ބަނޑުގައި ގަރުބަގަނެ، ނެތިގެން އެދިޔައީ ތިންވަނަ ފުރާނައެވެ. ފާތުން ކުރި އެތައް އުންމީދެއް ފަނާ ކޮށްލާފައެވެ. ދިރިއުޅުން އާރާސްތު ކުރަން ކުރި ހުރިހާ އުންމީދެއް މުޅިން ނެތިގެން ދިޔައީއެވެ. އިރުކޮޅަކު  ހަނު އިނުމަށްފަހު، މަޑުމަޑުން ބަނޑުގައި އަތް އަޅާލިއެވެ. އަދި އޯގާތެރި ކަމާއިއެކު އަތް ކާތާލިއެވެ. އޭނާގެ ދަރިފުޅު އަދިވެސް ބަނޑުގައި އެބަ އޮތްކަމަށް ޤަބޫލުކުރާ ކަހަލަ ގޮތަކަށެވެ. އެހެނަސް ދުލަކުން އެއްވެސް ކަހަލަ ބަހެއް ނުބުނެވެއެވެ. ބުނަން ބޭނުންވެސް ނުވާ ކަހަލައެވެ. ޝަކުވާއެއްވެސް ކުރަން ބޭނުން ނުވާ ކަހަލައެވެ. ”ޝަހާ، އަހަރެންގެ ބަނޑުގައި ބޭބީ އޮތްނަމަ ރަޝީދު އަންނާނެ ދޯ އަހަރެން ގެންދަން. އަނެއްކާވެސް ހިތުހުހި ގޮތެއް ހަދާލިސް ދޯ އަހަރެންނަށް؟ ނޫނީ ބޭބީވެސް އަހަރެންގެ އަތުން އަތުލައިގެން ގެންދިޔައިސް ދޯ“ ފާތުންގެ ދުލުން އެ ނިކުތް ދެތިން ސުވާލުތަކަކީ، ކޮންކަހަލަ ވިސްނުމެއްގައި އިނދެ ހާމަކުރި އެއްޗެއް ކަމެއް އެތަނުން އެކަކަށެވެސް ނޭންގުނެވެ. އެހެނީ އެ ސުވާލުތަކަށް ދޭނެ ޖަވާބެއް އެކަކަށްވެސް ނުވިސްނުނެވެ. ޚުދު ޝަހާއަށްވެސް މެއެވެ. އެއާއި ޚިލާފަށް އެންމެންގެ ހިތުގައިވެސް އުފެދުނީ ސުވާލެވެ. ހުރިހާ އެންމެންވެސް ހީކުރީ އެއީ ފާތުންއަށް ކެތްކުރަން އުނދަގޫ ކަމަކަށް ވާނެ ކަމެވެ. އެފަދަ ޙާލެއްގައި ތިއްބާ ފާތުން އޭނާގެ ވާހަކަ ކުރިއަށް ގެންދިޔައެވެ. ”ބައްޕަ ބުނަމުން އައީ ރަނގަޅަށް. ކޮންމެ ކަމެއްވެސް ވާނީ ރަނގަޅަކަށް. ވެދާނެ ދޯ އަހަރެންގެ ހަޔާތުގަ މިއަށްވުރެ ރަނގަޅު ގޮތެއް ކުރިމަތިވާން އޮތީ ކަމަށްވެސް.“ ޝަހާއަށް ލިބުނީ ހައިރާން ކަމެކެވެ. އެހެންނަމަވެސް އެންމެ ކުރީގެ ފާތުންގެ ސިފަތައް ފެނަން ފެށުމުން ކޮނެވެސް ވަރެއްގެ ހިތްހަމަ ޖެހުމެއްވެސް ހިތުތެރޭގައި އުފެދުނެވެ. އާނއެކެވެ. ދެންމެގައި ހިނގާދިޔަ ޙާދިސާ ވެގެން އެދިޔައީ ފާތުންއަށް އޭނާގެ ޙަޔާތާއިމެދު ފައްސި ނަޒަރަކުން ވިސްނާލުމާއިއެކު ގޮތެއް ނިންމުމަށް ލިބުނު ރަނގަޅު ފުރުޞަތަކަށެވެ.  އަދި މިއީ ފާތުންއަށް ފައްސިކޮށް ކަންތައްތައް ވިސްނައިދިނުމަށް އެންމެ ރަނގަޅު ދަނޑިވަޅު ކަމަށް ޝަހާ ބެލިއެވެ. އެގޮތުގެ މަތިން ޝަހާގެ ވާހަކަ ކުރިއަށް ގެންދިޔައެވެ. ”ފާތުން. ތީ އަހަރުމެން ދެކެން ބޭނުންވާ ހިތްވަރުގަދަ ފާތުންއަކީ. ޤަބޫލުކުރަން ފާތުންގެ ޙަޔާތުގައި ހިނގާދިޔަ އެއްވެސް ކަމަކީ ކުރިމަތިލާން ފަސޭހަ ކަންތައްތަކެއް ނޫންކަން. އެކަމަކުވެސް ފަޚުރުވެރި ކަމާއިއެކީ ބުނެލަން ކެރޭނެ ތިޔައީ ފިސާރި ކަނބަލެކޭ. އަހަރެން ފާތުންނާމެދު ފަޚުރުވެރިވަން. ތިޔަ ރަޙުމަތްތެރިޔާއަކީ މާތް ﷲ އަހަރެންނަށް ދެއްވި ނިޢުމަތެއް ކަމުގަ އަހަރެން ޤަބޫލުކުރަން.“ އެހެން ބުނުމާއިއެކު ފާތުންގެ ގައިގާ އޯގާތެރިކަމާއިއެކު، ޝަހާ ބައްދާލިއެވެ. އެވަޤުތު އަޙްމަދުވެސް އޭނާގެ ޝުޢޫރު ފާޅުކޮށްލިއެވެ. ”ތީ މަގޭ ދޮންތައަކީ. މަގޭ ހިތްވަރުގަދަ ދޮންތަ. އިންޝާﷲ ދެން ހުރިހާ ކަމެއްވެސް ދާނީ ރަނގަޅަށް.“ އެ މުޢާމަލާތް ކުރިއަށް ދިޔައިރު އަޙްސަން ހުރީ ބުނާނެ އެއްޗެއް ނޭންގިފައި ކަހަލަ ގޮތަކަށެވެ. ނުވަތަ ދައްކަން ހުރި ވާހަކަ މާ ގިނައީ ކަމަށްވެސް ވެދާނެއެވެ. އެވަޤުތު ޝަހާގެ ނަޒަރު ގޮސް އަޙްސަންއަށް ހުއްޓުނެވެ. ”އަޙްސަން ކީއްވެ މާ މަޑުން ތި ހުންނަނީ؟ އަޙްސަންވެސް ފާތުންއަށް ހިތްވަރުގެ ބަސްކޮޅެއް ބުނެލަބަލަ.“ އެވަޤުތު އަޙްސަން ވަރަށް އުފާވެރި ޚަބަރެއް ދޭންވެފައި އެބައޮތް ކަމަށް ބުންޏެވެ. ”މީގެ ދުވަސްކޮޅެއް ކުރިން އަހަރެން އޮންނާނެ ޕީ.އެޗް.ޑީ އަށް ކިޔަވަން ދިއުމަށް ހުށައަޅާފަ. މިއަދު އެބައިން މެއިލް އައިސް. އަހަރެންނަށް ކޯސް ލިބިއްޖެ ކަމަށް. ދުބާއީ ޔުނިވަސިޓީއިން.“ ޝަހާ،ފާތުން އަދި އަޙްމަދުވެސް އެއްފަހަރާ މަރުޙަބާ ކިއެވެ. އެހެންނަމަވެސް އަޙްސަންގެ ވިސްނުން ހުރީ މުޅިން އެހެންގޮތަކަށް ކަމެއް ޝަހާއަކަށްވެސް ނޭންގެއެވެ. އެހެނީ ޝުކުރު އަދާކުރުމުގެ ބަދަލުގައި، އަޙްސަން ދިނީ މުޅިން އެހެން ކަހަލަ ޖަވާބެކެވެ. ”އެކަމަކު އަހަރެން ދާކަށް ގަސްތެއް ނުކުރަން.“ އަޙްސަންގެ އެ ނިންމުމާއިމެދު އެންމެ ފުރަތަމަވެސް ސުވާލުކުރީ ފާތުންއެވެ. ”ކީއްވެ؟ ތީ އަޙްސަންގެ ޑްރީމެއްނު؟“ އަޙްސަން ދެތިން ފިޔަވަޅު ކުރިއަށް ޖެހިލިއެވެ. ”އާން، މިއީ އަހަރެން އެންމެ ކުޑައިރުއްސުރެ ދެކެމުން އައި ހުވަފެނެއް. އަހަރެންގެ ވަރަށް ކުޑައިރު ބައްޕަ ނިޔާވެއްޖެ. މަންމަ އަހަރެން ބަލާ ބޮޑުކުރީ އެކި ގޭގޭގައި މީސްމީހުންނަށް ތަފާތު މަސައްކަތްތައް ކޮށްދީގެން. އެހެންވެ އަހަރެން ކިޔެވުމަށް ދިން ސަމާލުކަން އިތުރުކުރީ. މާލީ ޙާލަތު ދަށްކަމުން މަތީ ތަޢުލީމު ޙާޞިލު ކުރުމުގެ ފެންވަރު ނެތީމަ ސަރުކާރުންދޭ ސްކޯލާޝިޕް ހޯދުމުގެ ބޭނުމުގަ. އަހަރެން މިއަދު އައިސް މިހުރި މަޤާމާ ހަމައަށް އައި އިރު މިދުވަސް ދެކޭކަށް މިހާރަކު އަހަރެންގެ މަންމައެއްވެސް ދުނިޔެއަކު ނެތް. އެކަނިވެރި ދިރިއުލުމެއް ވޭތި ކުރާތާ އެތައް ދުވަސްތަކެއް ވެއްޖެ. މިއަދު އަހަރެން އަތުގައި ހުރިހާ އެއްޗެއްވެސް އެބަހުރި. ގެދޮރާއި މުދަލާ، ކާރާ، މަޤާމު އަދި ޤަދަރާ އިހުތިރާމާ. އެހެންނަމަވެސް އެއިން އެއްވެސް ކަމެއްގެ ލައްޒަތެއް ނުލިބޭ. އަދި އެއިން އެއްވެސް ކަމެއް ޙިއްޞާ ކުރާނެ ބައިވެރިއެއް ނެތް. އެހެންވީމަ ދެން އިތުރަށް ކުރިއަށް ދާން ބޭނުން  ނުވަނީ.“ ތެދެކެވެ. އާދައިގެ ނިކަމެތި ޢާއިލާއަކަށް އުފަންވިއެއް ކަމަކު، މިއަދު އަޙްސަންއަކީ މުޖުތަމަޢު ބަލައިގަންނަ ވަރުގެ ޤަދަރާއި އިޙުތިރާމް ލިބިފައިވާ މީހެކެވެ. އެހިސާބަށް އޭނާ ފޯރީ އަމިއްލަ މަސައްކަތާއި ހިތްވަރުންނެވެ. އެއީ ދާއިރާއަށް ވަފާތެރި، އެހާމެ އިހުލާސްތެރި ޚާދިމެކެވެ. އެހެނަސް މައިބަފައިން ދުނިޔޭގައި ނެތް، ޙަޔާތުގެ ބައިވެރިޔަކުވެސް ނެތް އެކަނިވެރިއެކެވެ. އަޙްސަންގެ ހިތުގެ ޝުޢޫރު ފައުޅުކުރުމާއިއެކު، މުޅި ކޮޓަރިތެރެއަށް ހަމަހިމޭންކަން ވެރިވެގެން ދިޔައެވެ. އިރުކޮޅަކު އެހެން ތިބުމަށްފަހު، އަޙްސަން އެދެއްކި ވާހަކައަށް އަނެއްކާވެސް ރައްދެއް ދިނީ ފާތުންއެވެ. ”އަޙްސަން ތި ބުނީ ރަނގަޅު ވާހަކައެއް. އެކަމަކު ތިހާ ހިސާބަށް ވާޞިލިވެފަ ދެން ފަހަތަށް ޖެހުން އެހާ ބުއްދިވެރި ގޮތެއް ކަމަކަށް ހަމަގައިމުވެސް އަހަރެންނެއް ނުދެކެން.“ ޝަހާވެސް ފާތުން އެބުނި އެއްޗަކާއިމެދު އިއްތިފާޤު ވެއެވެ. ’އަހަރެން މި މޭރުމުން ވާހަކަ ދެއްކިޔަސް އަހަރެން ކޯހަށް ދާނެ ގޮތެއް އެބައޮތް.“ އެވަޤުތު އެތާ ތިބި ތިން މީހުން އެއްފަހަރާ ކަހަލަ ގޮތަކަށް އެއީ ކޮން ގޮތެއްތޯ ސުވާލު ކުރިއެވެ. ”އެއީ ފާތުން އަހަރެންނާއެކު ދިއުމަށް އެއްބަސްވުން.“

• ނުނިމޭ –