ފުން ޚިޔާލެއްގެ ތެރެއަށް ގެއްލިފައި އިނދެވުނީ ކިހާއިރެއް ވަންދެން ކަންވެސް ޝަހާއަކަށް ނޭންގުނެވެ. ކުއްލިޔަކަށް ސިއްސައިގެން ދިޔައީ، އޭނާގެ މޫނުމައްޗަށް އަމާޒުކޮށް ބާރު އަތްތިލަ ބަޑިއެއް މަންމަ ޖެހި އަޑަށެވެ. ”ކީކޭ މަންމާ؟“ ދެއަތަށް ބޯ ހޫރާލުމާއިއެކު، ދެލޯ ބޮޑުކޮށްލާފައި ޝަހާ ސުވާލު ކޮށްލިއެވެ. ދެލޮލަށް ކޮންމެވެސް ވަރަކަށް ކަރުނަވެސް ޖަމާވެފައި ހުއްޓެވެ. އެކަރުނަތައް ފޭބިޔަ ނުދޭން ޝަހާ މަސައްކަތް ކުރި މަންޒަރު ޝަހާގެ މަންމައަށް ވަރަށް ރަނގަޅަށް ފެނުނެވެ. އެހެނީ މަންމައާއި ދިމާއަށް އެނބުރުނު ވަޤުތު ވަރަށް އަވަސް އަވަހަށް ލޮލުގެ އެސްފިޔަ ޖަހަމުން ގެންދިޔައެވެ. ޙަޤީޤަތުގައިވެސް މަންމައަށް އެކުޅެލެވުނީ، ޝަހާގެ ހިތުގެ އެންމެ ހިމަ ނާރާއެވެ. ”ދަރިފުޅާ، ދެން އަޅާނުލާ. މަންމަ ދެން އެވާހަކައެއް ނުދައްކާނަން. އެއީ މަންމަ ކޮނެހެން ސިރިޔަސްކޮން ބުނި އެއްޗެއް ނޫން އިނގޭ. އެކަމަކު ޝަހާ ވަރަށް ދެރަވެއްޖެކަން މަންމައަށް އެނގިއްޖެ. މަންމައަށް މަޢާފުކުރޭ.“ ”މަންމާ، އެއީ ދެން މަންމަ މަޢާފަށް އެދެން ޖެހޭވަރުގެ ކަމެއްވެސް ނޫނެއްނު. އެއީ އަހަރެންގެ މާޒީ، މިހާރު އެކަމަކާ ނުވެސް ވިސްނަން. އެހެން ނޫނަސް މިހާރުދެން ވަޤުތު ފާއިތުވެއްޖެ. އަހަރުމެން ކިތަންމެ ބޭނުންވިޔަސް ނުވާނެ ކަންކަންވެސް ހުންނާނެތާ ދޯ. އަހަރެންގެ ލައިފްއާ މެދު އަހަރެން ހިތްހަމަ ޖެހޭ.“ މަންމަގެ އުނގުމަތީގައި މަޑުމަޑުން އަތް ބާއްވާލައިގެން އިނދެ، ޝަހާ ވާހަކަ ދައްކަމުން ގެންދިޔައެވެ. އަދި އެހެން ބުނުމާއިއެކު، ކުއްލިޔަކަށް ފާރުގައި ހުރި ގަޑިޔާއި ދިމާއަށް ބަލައިލިއެވެ. ދައްކަމުން ގެންދިޔަ ވާހަކައިގެ މަޢުލޫ ބަދަލުކޮށްލުމުގެ ނިޔަތުގައިވެސް މެއެވެ. ”އަސްތާ، މިހާރު އެއޮއް ޢަސުރުވަނީ، އަހަރެން އަދި މިއުޅެނީ ނަމާދުވެސް ނުކޮށް. އިރުކޮޅަކުން ހޮސްޕިޓަލަށްވެސް ދާން އެބަޖެހޭ. މަންމަ ދާނަންތަ؟“ ފުންމައިގެން ގޮނޑިން ތެދުވަމުން ޝަހާ ބުނެލިއެވެ. ”މަންމަ ދާނަން. އެކަމަކު އޭގެ ކުރިން ފާތުމަތަށް ވެފަ އޮތް ވަޢުދެއް ފުންދަން އެބަ ޖެހޭނު.“ ހީނލާފައި ޝަހާގެ މަންމަ ބުންޏެވެ. ބަލާބެލުމަށް ހީވަނީ މިހާރު ކޮންމެވެސް ވަރަކަށް ހަމައަކަށް އެޅިފައި އިންހެނެވެ. ޝަހާއާއި ވާހަކަ ދައްކާލުމުންވެސް ކޮންމެވެސް ވަރެއްގެ ލުޔެއް ހިތަށް ލިބުނު ކަހަލަ އިޙުސާސެއް ކުރެވިފައި ހުރިހެން ޝަހާ މަންމައަށް ހީވިއެވެ. ”އަނެއްކާ ކޮން ވަޢުދެއް؟“ ކުރީ ދުވަހު ހޮސްޕިޓަލުގައި ކުރެވުނު މަޝްވަރާ ޝަހާ ހަނދާން ނެތިފައި ހުރިކަހަލައެވެ. ”ސާބަސް ޝަހާ، ފާތުމަތު ބުންޏެއްނު މަންމަ އަޅާ ފޮނި ބޯކިބާ ކާން ބޭނުންވާ ވާހަކަ. އާން ޤަބޫލުކުރަން އިއްޔެއާ ބަލާފަ މިހާރު ޙާލަތު މުޅިން ބަދަލުވެއްޖެކަން. އެކަމަކުވެސް މަންމަ މިހިތަށް އަރަނީ ބޯކިބާ ހިފައިގެން ދާން. އޭރުންވެސް ފަހަރެއްގަ ކޮންމެސް ވަރެއްގެ ހިތްހަމަ ޖެހުމެއް ލިބިދާނެތާ ދޯ.“ މަންމަ އެހެން ބުނުމުން އޭރުގައި ދެކެވުނު ވާހަކަތައް ޝަހާގެ ހަނދާނަށް އައެވެ. އެއުފާވެރި ވަޤުތުކޮޅާއި، އޭގެ ފަހުން ކަން ވެގެންދިޔަގޮތް ޝަހާގެ ލޯމަތީގައި ދުވެލި ކަހަލައެވެ. އަދި ކުޑަކޮށް މާޔޫސްވާ ގޮތްވިއެވެ. އެހެން ނަމަވެސް އެކަން އޭނާގެ މަންމައަށް ދައްކާކަށް ބޭނުމެއް ނުވިއެވެ. ”އާނ ތެދެކޭ. ތީ ވަރަށް ރަނގަޅު ޚިޔާލެއް. ދެން އެހެންވިއްޔާ މަވެސް ދާނީ މަންމަޔާ އެއްކޮން. މާދަމާ ޑިޔުޓީއަށްވެސް ނިކުންނަން ޖެހޭނެ. މިއަދުގެ ޕޭޝަންޓުންވެސް ތިބޭނެ ވެއިޓިންގަ.“

މަންމަގެ ވާހަކައަށް ޖަވާބު ދިނުމަށްފަހު، ޝަހާ އޭނާގެ ކޮޓަރިއާއި ދިމާއަށް ދިއުމަށް ހިނގައިގަތެވެ. އެހެނަސް އަނެއްކާވެސް މަންމައާއި ދިމާއަށް އެނބުރިލިއެވެ. ހީވަނީ ބުނަން ބޭނުންވެފައި އޮތް ވާހަކައެއް އޮތީހެނެވެ. ”މަންމާ، ކުޑަ ޚިޔާލެއް އެބަ އޮތް.“ ވަރަށް ވިސްނައިގެން ބުނަން އުޅޭ ވާހަކައެއް ފަދައިން ޝަހާ ބުނެލިއެވެ. ”ކޮން ވާހަކައެއް؟“ މަންމަ އަހާލިއެވެ. ”ފާތުން ހޮސްޕިޓަލުން ދޫކޮށްލީމަ ކިހިނެއް ވާނެ މިގެއަށް ގެންނަން. ބޮޑުދައިތަމެންވެސް އެތިބެނީ ކޮޓަރިއެއް ކުއްޔަށް ހިފައިގެން. އަނެއްކާ މިގެއަށް ގެނައިމަ ފާތުންވެސް ހިތްހަމަ ޖެހޭނެ. މަންނައަށްވެސް ތަންކޮޅެއް ރަނގަޅަށް އަޅާލެވޭނެއެއްނު ދޯ“ ޝަހާގެ އެޚިޔާލަށް މަންމަ ތާޢީދު ކުރިއެވެ. އެހެންނަމަވެސް ޝަހާގެ މަންމަ ޤަބޫލުކުރާ ގޮތުގައި އެއީ މަސްލަހަތު އެހާ ރަނގަޅުވާނެ ގޮތެއް ނޫނެވެ. ”ތީ ވަރަށް ރަނގަޅު ޚިޔާލެއް. އެކަމަކު ޖެހިގެން އެހުރި ގޭ މީހުންނަށް ފާތުމަތު މާލޭގަ އެބަ ހުރިކަން އެނގޭނެ އެއްނު.“ އެވަޤުތު ކުޑަބެދައްތައާއި ބައްދަލު ވެގެން ދެކެވުނު ވާހަކަ ޝަހާގެ ހަނދާނަށް އައެވެ. ”މަންމަ އެކަމާ ހާސްނުވޭ. މިހާރު އެގޭ މީހުންނަށްވެސް އޮތީ ފާތުން ހޮސްޕިޓަލުގަ އޮތްކަން އެނގިފަ“ މިހެން ބުނުމާއިއެކު، ކުޑަބެދައްތައާއި ދެކެވުނު ވާހަކަ ޝަހާގެ މަންމައަށް ކިޔައިދިނެވެ. އެހުރިހާ ވާހަކައެއް އެނގުމާއިއެކު، ޝަހާގެ މަންމަވެސް އެޚިޔާލަށް ތާޢީދު ކުރިއެވެ. އަދި ހޮސްޕިޓަލުން ސީދާ އެގެއަށް ގެނައުމަށް އުފަލާއިއެކު އެއްބަސްވިއެވެ. އެހެންނަމަވެސް އެކަން އެހެން ކުރެވޭނީ ޚުދު ފާތުން އެކަމާއި އެއްބަސް ވެގެންތާއެވެ. ޝަހާގެ މަންމަގެ ހިތުގައި އެކަމާއިމެދު ކޮންމެވެސް ވަރަކަށް ޝައްކު އުފެދުނެވެ. އެހެނީ އެގެއާއި އެހިސާބުގެ މާޙައުލަކީ، ފާތުންއަށް އޭނާގެ މާޒީގެ އެތައް ހަނދާން ތަކެއް އާލާ ކުރުވާނެ މާޙައުލަކަށް ވާނެތީވެސް މެއެވެ. އެހެނަސް ޝަހާގެ ޚިޔާލު އެކަމުގައި ތަފާތެވެ. އެހެނީ ޝަހާ ޤަބޫލުކުރާ ގޮތުގައި، ފާތުންއަށް ލިބޭނީ ހިތްހަމަ ޖެހުމެކެވެ. ޝަހާގެ ގެއާއި، ފާތުން އުޅެބޮޑުވި ގެއަކީ، އެތަނެއްގައި ފާތުންގެ އުފާވެރި އެތައް ހަނދާންތަކެއް އެކުލެވިފައިވާ މާޙައުލެކެވެ. އޭގެ އިތުރުން އެގެއަށް ފާތުން ގެނައުމުގައި ޝަހާގެ އެހެން މަޤްޞަދެއްވެސް އެބައޮތެވެ. އެއީ ފާތުން އޭނާ ގެންގުޅެ ބޮޑުކުރި މައިންބަފައިން އޭނާއަށް ޓަކައި ދެކެމުން އައި ހުވަފެންތަކާއި ކުރަމުން އައި އުންމީދުތައް ހަނދާނަށް ގެނައުމެވެ. އަދި ފާތުންގެ ދިރިއުޅުން މުޅިން އައު ފެށުމަކުން ފެށުމަށް ހިތްވަރު ދިނުމެވެ. އާނއެކެވެ. ފާތުންގެ ކުރިމަގު އޮތީ ކިހިނެއް ކަމެއް ޚުދު ފާތުންއަކަށްވެސް މިހާރަކު ނުވިސްނޭނެއެވެ. އެހެނެއް ކަމަކު އަލުން ދިރިއުޅުން އާރާސްތު ކުރުމަކީ ނުވާނެ ކަމެއް ކަމަށް ބެލުމަކީވެސް ފާތުންގެ ކުރިމަގާއިމެދު ކުރެވޭނެ ނާއިންސާފެކެވެ.

ދެމައިން އެކުގައި ޚިޔާލު ބަދަލުކުރުމަށްފަހު، ޝަހާ ދިޔައީ ފެންވަރައިގެން ނަމާދު ކުރާށެވެ. ޝަހާގެ މަންމަ އަވަސްވެގަތީ ފާތުންގެ އެދުމުގެ މަތިން އޭނާއަށް މީރު ފޮނި ބޯކިބާ އެޅުމަށެވެ. މެންދުރު ނަމާދުކޮށް ނިމުނުއިރު ހުރީ ޢަސުރު ވަޤުތާއި ދާދި ގާތް ވެފައެވެ. އެހެންކަމުން ހޮސްޕިޓަލަށް ދިއުމަށް ތައްޔާރުވާނީ ޢަސުރު ނަމާދު ކޮށްގެން ކަމަށް ވިސްނާލުމާއިއެކު ކޮޓަރީގައި ޝަހާ މަޑުކޮށްލީއެވެ. އެވަޤުތުކޮޅު އަޙްމަދަށް ގުޅައިގެން ފާތުންގެ ޙާލުބަލާ ހެދުމަށް ޝަހާ ގަސްތުކުރިއެވެ. އަޙްމަދު ބުނި ގޮތުގައި ފާތުންއަށް އޮތީ ނިދިފައެވެ. ބޮޑުދައިވެސް އޭރުގައި އެތަނުގައި އިން ކަމަށް ބުންޏެވެ. އަޙްސަން ދިޔަތޯ އެހުމުން ނުދާ ކަމަށްވެސް އަޙްމަދު ބުންޏެވެ. ފޯނު ބޭއްވުމަށްފަހު، އަޙްސަންއާއި ވާހަކަ ދައްކަން ވެފައި އެބައޮތްކަން ޝަހާގެ ހަނދާނަށް އައެވެ. އެހެންނަމަވެސް ވާހަކަ ދައްކަން ބޭނުންވަނީ ސީދާ ދިމާވެގެން ކަމަށްވާތީ، ފޯނު ކުރާކަށް ޝަހާ ގަސްތެއް ނުކުރެއެވެ. ފާތުންގެ ކުރިމަތީގައި ހުރެ، އަޙްސަން ބުނި ވާހަކައިގެ އަސްލު މަޤްޞަދު ބަލަން ޝަހާވެސް ބޭނުންވެއެވެ. އަޙްސަން ވިސްނަމުން އެދަނީ ކޮން ގޮތަކަށް ކޮން ކަމަކާއިމެދު ކަމެއް މިފަހަރު ޝަހާއަށްވެސް ނޭންގުނު ކަހަލައެވެ. އެހެނީ ލުއި ގޮތަކަށް ނަމަވެސް އަޙްސަންގެ އެހުށައެޅުމަށް އިޖާބަ ދިނުމަކީ ފާތުންއަކަށްވެސް އެހާ ފަސޭހަ ކަމަކަށް ނުވާނެކަން ޝަހާވެސް ޤަބޫލުކުރެއެވެ. ނަމަވެސް މިފަހަރު ވިސްނައިދޭން ޖެހޭނީ، އަޙްސަންއަށް ކަމެއް ނޫނީ ފާތުންއަށް ކަމެއް ޝަހާއަކަށް ނުވިސްނުނެވެ. ވަކި ކޮޅަކަށް ގޮތެއް ނިންމަން ފަސޭހަވާނީ އަޙްސަންއާއި ވާހަކަ ދެކެވުމުން ކަމަށް ވިސްނާލުމާއިއެކު ފުން ނޭވާއެއް ލިއެވެ. އަދި އެޚިޔާލުތަކުން ދުރަށްގޮސް ނަމާދުކުރުމަށް އަވަސްވެގަތެވެ.  ނަމާދުކޮށް ނިންމައިގެން ޝަހާ ބޭރަށް ނިކުމެ ބަލައިލިއިރު މަންމަވެސް ނަމާދުކޮށް ނިންމާލައިގެން ކޮޓަރިން ނިކުންނަނީއެވެ. ”މަންމަ ނަމާދަށް އަރަން ދިޔައީ ބޯކިބާ ފިހެން އަވަނަށް ލާފަ. މިހާރު ފިހެން ވަރަށް ކައިރި ވެދާނެ. ކުޑައިރުކޮޅަކު މަޑުކޮށްލާ އިނގޭ ޝަހާ.“ ޝަހާ އެގޮތަށް އެއްބަސް ވުމާއިއެކު، ފޯނު ނަގާ އަޙްސަންއަށް މެސެޖެއް ކޮށްލިއެވެ. ހުސްވަޤުތަކުން ބައްދަލުކޮށްލުމަށް ބޭނުންވާ ވާހަކަ ބުނުމަށްޓަކައެވެ. މާގިނައިރުތަކެއް ނުވެ، އަނެއްކޮޅުންވެސް ޖަވާބު އައެވެ. ޝަހާއަށް ފަސޭހެ ވަޤުތަކުން ބައްދަލު ކޮށްލެވޭނެ ކަމަށް ބުނަމުންނެވެ. ކުޑައިރުކޮޅެއްގެ ތެރޭގައި ޝަހާ ހޮސްޕިޓަލަށް ދާނެކަމަށް ބުނެ، ހޮސްޕިޓަލްގެ ކެންޓީނުގައި މަޑުކޮށްލުމަށް އަޙްސަންގެ ކިބައިން ޝަހާ އެދުނެވެ. އަހްސަންވެސް އެގޮތަށް އެއްބަސްވިއެވެ. ޝަހާގެ މަންމަ އެޅި ބޯކިބާ ކޮށާ، މަތިޖެހި ތައްޓަކަށް އަޅާ، އިތުރު ހެދިކާވެސް ތައްޓަކަށް އަޅާ، ވަރަށް ރަނގަޅަށް ބަންދުކޮށްލައިގެން، ހޮސްޕިޓަލަށް ދިއުމަށް ދެމައިން ނިކުތެވެ. ގެއިން ނިކުތް ވަޤުތު، ފާތުންގެ ކުޑަބެއާއި ދިމާވެއްޖެއެވެ. ފާތުންގެ މަޢުލޫމާތު އޮޅުން ފިލުވުމުގެ ބޭނުމުގައި ކުޑަބެ ސުވާލުކުރަން ފެށިއެވެ. އަދި ފާތުން ދެކިލަން ހޮސްޕިޓަލަށް ދާން ބޭނުންވާ ވާހަކަވެސް ބުންޏެވެ. ބަލާބެލުމަށް ހީވަނީ ކުރެވުނު ކަމަކާއިމެދު ހިތާމަކުރާ ހެންނެވެ. އެކަން ޝަހާގެ ދެމައިންނަށްވެސް ވަރަށް ރަނގަޅަށް ފާހަގަވިއެވެ. އެހެން ބުނުމާއިއެކު ފާތުންގެ ކުޑަބެ ހިނގައިގަތީ އޭނާގެ ގެއާއި ދިމާއަށެވެ.

ޝަހާގެ ދެމައިން ހޮސްޕިޓަލަށް ގޮސް ފާތުން އެނދުމަތި ކޮށްފައިވާ ކޮޓަރިއަށް ވަތްއިރު، އެތަނުގައި ޑރ. ފަރީޝާވެސް ހުންނެވިއެވެ. ފާތުންގެ ޗެކަޕް ހެދުމަށް ޓަކައެވެ. ”އަސްތާ މި އާދެވުނީ މާ ރަނގަޅު ވަޤުތެއްގައެއްނު. ކޮބާ މިހާރު ފާތުން ކިހިނެއްތަ ފަރީ؟ ކޮން އިރަކުން ޑިސްޗާޖު ކުރެވޭވަރު ވާނީ؟“ ކޮޓަރިއަށް ވަދެ ފާތުން ކައިރިއަށް ހުއްޓިލަމުން ޑރ. ފަރީޝާ ގާތުގައި ޝަހާ އަހާލިއެވެ. ”އަލްޙަމްދުﷲ، ހީކުރި ވަރަށްވުރެ އަވަހަށް ރިކަވަރ ވަމުން ދަނީ. އެކަމަކު އަދި އެއްދުވަހު މިތާ އޮވެލަން ޖެހޭނެހެން ހީވަނީ. އެންމެ ރަނގަޅު ދޯ ފާތުން“ ވަރަށް އޯގާތެރި ހިނިތުން ވުމަކާއިއެކު، ޑރ. ފަރީޝާ، ފާތުންއާއި މުޚާތަބު ކުރިއެވެ. ”ތަންކޮޅެއް އަވަސްވާނެ ގޮތެއް ނޯންނާނެތަ ޑޮކްޓަރ؟“ އާދޭހުގެ ރާގަކަށް ފާތުން އަހާލިއެވެ. ”ފަރީ. މިއީ ފާތުންގެ ބެސްޓް ފޮރެންޑްގެ ކްލޯސް ފްރެންޑެއް. އެހެންވީމަ، އޭނަވެސް އަހަރެންނާ މުޚާތަބުކުރާ ގޮތަކަށް ފާތުންއަށްވެސް ކުރެވޭނެ.“ އަނެއްކާވެސް އޯގާތެރިކަމާއިއެކު ހީލަމުން ޑރ. ފަރީޝާ ބުނެލިއެވެ. ”އޯކޭ، ފަރީ، ތަންކޮޅެއް އަވަހަށް މިތަނުން ނިކުމެވޭނެ ގޮތެއް ހަދާދީބަލަ ޕްލީސް.“ މިފަހަރުވެސް ފާތުންގެ އަޑުގައި ހުރީ އާދޭހުގެ ކުލަވަރު އެކުލެވިފައެވެ. ތުއްތު ކުއްޖެއް ފަދައިންނެވެ. ފާތުންގެ އެ އާދޭހަށް ރައްދު ދިނީ ޝަހާއެވެ. ”މައި ޑިޔަރ. ހަމަޖެހިބަލަ ހަމަޖެހިބަލަ. ދެވޭނޭ. އިންޝާﷲ ވަރަށް އަވަހަށް ދެވޭނޭ. އިހަށް އެއްކޮން ރަނގަޅު ވެލަންދެން ކެތްކޮށްލާ.“ އަތުގެ އިނގިލިތަކުގެ ކުރިދޮށުން ފާތުންގެ ކޮނޑުގައި ލުއި ގޮތަކަށް ޖަހާލުމާއިއެކު ޝަހާ ބުނެލިއެވެ. ”އިންޝާﷲ ދެން ވަރަށް އަވަހަށް ފޮނުވާލަ ދޭނަން. އެކަމަކު މިވަޤުތު އަހަރެން ގޮސްލާނަން އިނގޭ. ޓޭކް ކެޔާ.“ ވަރަށް އޯގާތެރި ކަމާއިއެކު ފާތުންއާއި މުޚާތަބުކޮށް ޑރ. ފަރީޝާ ބުނެލިއެވެ. އަދި ކޮޓަރިން ނިކުމެގެން ދިޔައީއެވެ. ޑރ. ފަރީޝާ ދިއުމުން، ޝަހާ އެނބުރި ފާތުންއާއި ދިމާއަށް ރަނގަޅަށް ބަލައިލިއެވެ.  ފާތުން އޮތީ ފުން ޚިޔާލެއްގެ ތެރެއަށް ގެއްލިފައެވެ. ”ހޭ. އަނެއްކާވެސް އެދިޔައީ ޚިޔާލީ ދުނިޔެއަށް. ދެން ތިވަރަށް ޚިޔާލީފޮލާ ކެއްކުން ހުއްޓާލަބަލަ. އެއީ އެހާ މީރު އެއްޗެއްވެސް ނޫނެއްނު.“ ސަމާސާ ކޮށްލުމުގެ ނިޔަތުގައި ޝަހާ ބުނެލިއެވެ. ”އެއަށްވުރެ މާ މީރު އެއްޗެއް ހިފައިގެންނޭ މަންމަ އެއައީ.“ ޝަހާ ބުނި އެއްޗަކަށް ރައްދު ދިނުމުގެ ގޮތުން ފުން ނޭވާއެއް ލުމާއިއެކު، ފާތުންގެ ވާހަކަ ކުރިޔަށް ގެންދިޔައެވެ. ތުންފަތުގެ އެއްފަރާތް ދަމާލުމާއިއެކު، ފާޑަކަށް ހީނލާފައެވެ. ”ހިތި ޒަހަރު ބޮއެ ބޮއެ ވަރުބަލި ވެފަހުރި މީހަކަށް މިހާރު މީރު ވާނީވެސް ހިތި އެއްޗެހިތާ ދޯ. އަސްލުގަ މި ވިސްނާލީ މިތަނުން ނިކުމެގެން ދެން ދާނެ ތަނަކާ ހަދާނެ ގޮތަކާ މެދު. ހަމަ ގައިމުވެސް ދެން އަނބުރާ ރަށަށް ދާނެ ހިތްވަރެއް އަހަރެންގެ ކިބަޔަކު ނެތް. ދިޔައިމަވެސް އުޅެން ޖެހޭނީ މާޒީގެ ހިތި ހަނދާންތަކުން ސަލާމަތް ނުވެވިގެން. އެމީހާ އަނެއްކާވެސް އަތުވެދާނެ ކަމުގެ ބިރުވެސް ހިތުތެރޭގަ އަބަދުވެސް އޮންނާނެ.“ ހިތުގެ އުދާސްތައް ބޭރުކުރަމުން ގެންދެވުނީ، އެތަނުން ކާކުގެ ކައިރީގައި ކަމެއްވެސް ފާތުންއަކަށް އިޙުސާސެއް ނުކުރެވުނެވެ. އެހެނީ ހަމަ ހޭވެރިކަން ވެގެން ބަލައިލިއިރު، އެވަޤުތު ކޮޓަރިތެރޭގައި ތިބި އެންމެން ކަހަލަ ގޮތަކަށް ތިބީ ފާތުންއާއި ދިމާއަށް ބަލަހައްޓައިގެންނެވެ. ބަސް ހުއްޓިފައެވެ. އެވާހަކަތަކަށް ދޭނެ ޖަވާބެއް އެތަނުން އެއްވެސް މީހަކަށް ނޭންގުނު ކަހަލައެވެ. ހަދާނެ ގޮތެއް ނޭންގިގެން އިންކަހަލަ ގޮތަކަށް ފަހަރަކު މީހަކަށް ފާތުންވެސް ބަލަމުން ގެންދިޔައެވެ. ”ސޮރީ، މިކަހަލަ ވަޤުތެއްގަ އަހަރެންވެސް ދައްކާ ވާހަކަ ދޯ“. އެވާހަކަތައް ދެއްކުނީތީ އޭގެ މޮޔަ ހީވާކަހަލަ ގޮތަކަށް ފާތުން ބުނެލިއެވެ. ”ނޫނޭ ފާތުމަތު ދަރިފުޅާ، ފާތުމަތު ތިބުނީ އެއްގޮތަކަށްވެސް ދޮގު ވާހަކައެއް ނޫން. އަސްލުގަ ފާތުމަތު ދެން ރަށަށް ދާނެ ކަމެއްވެސް ނެތް. އެންމެ ތުއްތު އިރުންސުރެވެސް މިއީ ފާތުމަތުގެ ”ޝަހާމަންމަ“. މާނައަކީ މަންމަ. އެހެންވީމަ މި މަންމަގެ ގޭގެ ދޮރޯށި އަބަދުވެސް ތިޔަ ދަރިފުޅަށް ޓަކައި ހުޅުވިފަ ހުންނާނެ. މިތަނުން ދޫކޮށްލީމަ ފާތުމަތު ދާނީ ފާތުމަތުގެ ”ޝަހާމަންމަ“ޔާ އެކީ ގެއަށް. ފާތުމަތު ބޭނުންވާހާ ދުވަހަކު އެގޭގަ އުޅެވޭނެ.“ ދަނޑިވަޅު ބަލާފައި، ޝަހާއާއި ދެމީހުން ހޮސްޕިޓަލަށް އައުމުގެ ކުރިން ކުރި މަޝްވަރާގެ މަތިން، ފާތުންއަށް އެޚިޔާލު ޝަހާގެ މަންމަ ހުށައެޅިއެވެ. އެހުރިހާ ވާހަކައެއް އަޑުއަހަން އިނދެފައި، ފާތުންގެ ނަޒަރު ޝަހާއާއި ދިމާއަށް އަނބުރާލިއެވެ. އެއީ ޝަހާގެވެސް ޚިޔާލުތޯ ބަލައިލުމުގެ ނިޔަތުގައި ކަހަލަ ގޮތަކަށެވެ. ރައްދުގައި ޝަހާ ވަރަށް ލޯބިން ބޯ ޖަހާލިއެވެ. އާނއެކޭ ބުނމުގެ ގޮތުންނެވެ. ޝަހާ މަންމަގެ އެހުށައެޅުމަށް ބާރު ދިނުމުގެ ގޮތުން ޝަހާ ވާހަކަ ދައްކަން ފެށިއެވެ. ”ބޮޑުދައިތަމެންވެސް ދެން ރަށަށް ދާން ވަންދެން ތިބޭނީ އަހަރުމެން ކައިރީގަ.“ ޝަހާގެ އެހުށައެޅުމަށް ޖަވާބެއް ދޭނީ ކިހިނެއްތޯ ބުނެލާ ކަހަލަ ގޮތަކަށް ހައްވަ އަދި އަޙްމަދު އެކަކު އަނެކަކާއި ދިމާއަށް ބަލައިލިއެވެ. ”ޝަހާދައްތަ ދެން އެހާބޮޑު ތަކުލީފެއް އުފުލާނެ ކަމެއް ނެތް. މިހާރުވެސް ތި ކޮށްދޭވަރު ކުޑައެއް ނޫނެއްނު.“ ވަރަށް ލަދުވެތިވެފައި ހުރިކަހަލަ ގޮތަކަށް އަޙްމަދު ބުނެލިއެވެ. ”ސާބަސް އަޙްމަދުކޮއްކޯ. މި ދައްތައަކީ އަމިއްލަ އެއްބަނޑު އެއްބަފާ އިތުރު މީހަކު ހުރި މީހެއް ނޫން. މަންމަ ފިޔަވާ ދެން ދައްތަގެ އެންމެ ގާތް މީހަކީ ފާތުން. އެހެންވިމަ ފާތުންގެ ޢާއިލާއަކީ ދައްތަގެވެސް ޢާއިލާކަމަށް އަބަދުވެސް ދެކެން. އެހެންވީމަ މި އުފުލަނީ ތަކުލީފެކޭ ނުބުނޭ.“ އަޙްމަދު ބުނި އެއްޗަކަށް ކޮންމެވެސް ވަރަކަށް ހިތްހަމަ ނުޖެހިފައި ހުރި ކަހަލަ ގޮތަކަށް ޝަހާ ބުނެލިއެވެ. އޭރުގައި ހައްވަ އިނީ ބުނާނެ އެއްޗެއް ނޭންގިފައެވެ. ފާތުން ހޮސްޕިޓަލުން ދޫކޮށްލުމަށްފަހު ދާނެ ތަނަކާއިމެދު މަޝްވަރާ ކުރުމަށްފަހު، އެންމެފަހުން ޝަހާގެ ގެއަށް ދިއުމަށް ފާތުން އެއްބަސް ވިއެވެ. އެވަޤުތު ޝަހާގެ މަންމަވެސް ހަމަޖެހުމުގެ ނޭވާއެއް ލިއެވެ.

ހުރިހާ ކަމެއް ހަމަޖެހުމާއިއެކު، ތަންކޮޅެއް އުފާވެރި މާޙައުލަކަށް އެކޮޓަރިތެރެ ބަދަލުވެގެން ދިޔައެވެ. ”ކޮބައިތަ ޝަހާ މަންމަ ގެނައި މީރު އެއްޗަކީ؟“ ކުއްލިޔަކަށް ފާތުން ސުވާލު ކޮށްލިއެވެ. ޝަހާ މަންމަ ގެނައި ފޮނި ބޯކިބާ މަތިން ޝަހާވެސް ހަނދާންވީ ފާތުން އެސުވާލު ކުރުމުންނެވެ. އެހެނަސް އެސުވާލަށް ޖަވާބު ދިނީ ޝަހާގެ މަންމައެވެ. ”އާން. އިއްޔެގަ ފާތުމަތު ބުނީމެއްނު އަހަރެން އަޅާ ފޮނިބޯކިބާ ކާން ބޭނުން ވާހަކަ؟ އެހެންވީމަ ފާތުމަތުގެ އެދުމުގެ މަތިން ބޯކިބާ ހިފައިގެން މިއައީ.“ އެހެން ބުނުމާއިއެކު، މޭޒުމަތީގައި ބަހައްޓާފައި ހުރި ބޯކިބާ ތަށި ގެނެސް ފާތުންގެ އަތަށް ދިއްކޮށްލިއެވެ. އަދި އެއާއެކު ގެނެސްހުރި އިތުރު ހެދިކާވެސް ސުފުރާ މައްޗަށް ނެގިއެވެ. އަޙްމަދުވެސް ވަރަށް ހިތްހަމަ ޖެހިފައި ހުރިކަހަލަ ގޮތަކަށް ގޮސް އެތަނުން ބޯކިބާ ފޮއްޗެއް ނަގާ ރަހަ ބަލައިލިއެވެ. ”ދޮންތަ ބުނީ ވަރަށް ބޮޑު ތެދެއް. ހަމަ އަސްލުވެސް ޝަހާދައްތަ މަންމަ އަޅާ ފޮނި ބޯކިބާ ވަރަށް މީރު.“ ފާތުންވެސް ހިތްހަމަ ޖެހުނު ކަހަލައެވެ. އެހެނީ ދެން އިތުރު އެއްވެސް ވާހަކައެއް ނުދައްކާ، އަވަސްވެގަތީ ބޯކިބާ ކެއުމަށެވެ. ޝަހާގެ މަންމަ ވަރަށް ހިތްހަމަ ޖެހުނެވެ. އެވަޤުތު ހައްވަ، ޝަހާގެ މަންމަގެ ކައިރިޔަށް ޖެހިލާފައި ވަރަށް އޯގާތެރިކަމާއެކީ، އަތުގައި ހިފާލިއެވެ. ”ވަރަށް ބޮޑަށް ޝުކުރިއްޔާ ޝަރީފައްތާ. ޝަރީފައްތަގެ ތިހެޔޮކަން އަހަރެން ދުވަހަކުވެސް ހަނދާން ނައްތައެއް ނުލާނަން. އަހަރެން ދެން ރަށަށް ދާނީ ހިތްހަމަ ޖެހިގެން. އިންޝާﷲ ދެން ފާތުމަތަށް މެދުވެރި ކުރައްވާނީ ރަނގަޅުގޮތް. ދެން އަހަރެންގެ އެންމެ ބޮޑު އުންމީދަކި ފާތުމަތަށް ރަނގަޅު ބައިވެރިޔަކު ލިބުން.“ ޝަހާގެ މަންމަވެސް ހައްވަގެ އަތުގައި ވަރަށް އޯގާތެރި ކަމާއިއެކީ ހިފާލިއެވެ. އަދި އެއީ އޭނާގެވެސް އުންމީދެއް ކަމުގައި ބުންޏެވެ. ”ހައްވަ ދެރަނުވޭ. ﷲ އިރާދަ ކުރެއްވިއްޔާ ތިދުވަސްވެސް ފާތުމަތަށް ދައްކަވާނެ.“ އެވަޤުތު ފާތުން، ޝަހާ އަދި އަޙްމަދު ތިބީ ކޮންމެވެސް ވަރަކަށް ސަކަރާތުގެ ތެރޭގައެވެ. ހައްވަ އަދި ޝަހާގެ މަންމަގެ ވާހަކަ އެ ތިންމީހުންނަކަށް އަޑެއް ނީވެއެވެ. އެހެންނަމަވެސް ޝަހާ ބަލައިލިއިރު އެދެމީހުން ވާހަކަ ދައްކަން ތިބި ގޮތުން އެދައްކަނީ ވަރަށް ސީރިޔަސް ވާހަކައެއްކަން އެނގުނެވެ. އެހެނެއް ކަމަކު، އެމީހުންގެ ކައިރިއަށް ދިއުމަކަށް ޝަހާ ގަސްތެއް ނުކުރެއެވެ. އެހެނީ ފާތުންގެ ރަނގަޅު މޫޑަށް ހުރަސް އަޅަން މިވަޤުތު ޝަހާ ބޭނުމެއް ނުވެއެވެ. އަދި ހަމަ އެހެންމެ ފާތުންގެ ސަމާލުކަން އެމީހުންނާއި ދިމާއަށް އަނބުރާލާކަށްވެސް ޝަހާ ބޭނުމެއް ނުވެއެވެ.

އެމަޖަލުގައި ތިއްބާ، ކުއްލިޔަކަށް ޝަހާގެ ފޯނަށް މެސެޖެއް އައެވެ. ތަންކޮޅެއް ދުރަށް ޖެހިލާފައި، މެސެޖު ބަލައިލިއެވެ. އެއީ އަޙްސަންގެ މެސެޖެކެވެ. މިވަޤުތު ހޮސްޕިޓަލުގެ ކެފޭގައި އަޙްސަން އިންކަމަށް ބުނުމަށްޓަކައި ޝަހާއަށް މެސެޖު ކުރީއެވެ. ޝަހާ އެނބުރި ފާތުން ކައިރިޔަށް އައިސް ވަރަށް އަވަހަށް އެބަ އަންނަންކަމަށް ބުނެ ކެންޓީނަށް ދިއުމަށް ހިގައިގަތެވެ. އެވަޤުތު ޝަހާ މަންމަ ގޮވާލުމުންވެސް ދިނީ ހަމަ އެއް ޖަވާބެކެވެ. ކެންޓީނަށް ވަދެ، ދެކޮޅަށް ލޯ ހިންގާ ހޯދާލިއިރު، އަޙްސަން އިނީ ތަންކޮޅެއް ދުރުގައި ހުރި މޭޒެއްގެ ދޮށުގައި ކޮފީ ތައްޓެއް ހިފައިގެން މޯބައިލް ފޯނާއި ދިމާއަށް ބަލަހައްޓައިގެންނެވެ. ޝަހާ ގޮސް އަޙްސަންއަށް ގޮވާލުމުން މޭޒުދޮށުގައި އިށީނުމަށް ދަޢުވަތު ދިނެވެ. ”ކޮބާ ފާތުން މިހާރު ކިހިނެއްތަ؟ އަދިވެސް އަހަރެން ދެކެ ރުޅިއައިއްސަތަ؟“ ފާޑަކަށް ހީނލާފައި އަޙްސަން ސުވާލުކުރިއެވެ. ބަލާބެލުމަށް މިހާރު އަޙްސަންވެސް އިނީ ހަމަޖެހިފައެވެ. އަދި ހަމަ އެހެންމެ އެވަޤުތު އަޙްސަންވެސް ކަންތައްކުރީ ތަންކޮޅެއް ހިތްއަވަސްކޮންކަން އިޙުސާސް ކުރެވިފައިވާ ކަހަލަ ގޮތަކަށެވެ. އެހެނީ އަޙްސަން ބުނި ވާހަކައަކީ އެފަދަ ދަނޑިވަޅެއްގައި ބުނަން ނުވާނެ ކަހަލަ ވާހަކައެއްކަން މިހާރު އަޙްސަންއަށްވެސް އިޙުސާސް ވެއްޖެ ކަހަލައެވެ. ”މިހާރު ވަރަށް ބޮޑުތަން ރަނގަޅު. މިވަޤުތު އިނީވެސް ތަންކޮޅެއް ހަމަޖެހިފަ.“ ފާތުންގެ ޙާލު އަޙްސަންއަށް ޝަހާ ބުނެދިނެވެ. ”އަހަރެން އެތަނުން ދިޔައިމަ ފާތުން އެއްވެސް އެއްޗެކޭ ބުނިތަ؟“ ފާތުންގެ ޚިޔާލުހުރި ގޮތެއް ބަލަން އަޙްސަން ވަރަށް ބޮޑަށް ބޭނުންވެފައި ހުރިކަހަލަ ގޮތަކަށް ސުވާލުކުރިއެވެ. އޭރުގައި ފާތުން ދެއްކި ހުރިހާ ވާހަކަތަކެއް ޝަހާ، އަޙްސަންއަށް ކިޔައިދިނެވެ. އަދި އެވަޤުތު އަޙްސަން އެބުނި އެއްޗެއްގެ އަސްލު މަޤްޞަދާއި ބެހޭގޮތުން ސުވާލުކުރިއެވެ. ”އަހަރެންވެސް ޤަބޫލުކުރަން އަހަރެން ފާތުންއަށް ހުށައެޅި އެއްޗެއް ހުށައެޅީކީ އެންމެ ރަނގަޅު ވަޤުތަކު ނޫންކަން. ފަހުން ވިސްނާލީމަ އަހަރެންނަށް އެކަން އިޙުސާސް ކުރެވުނު. އަދި ވަރަށް ދެރަވެސްވި. އެކަމަކު ޝަހާއަށްވެސް އެނގޭނެ އަހަރެންގެ މުޅި އުމުރު މިހޭދަކުރަނީ ފާތުންގެ އިންތިޒާރުގަ ކަން.“ އަޙްސަންގެ އެޖުމުލަވެގެން ދިޔައީ، ޝަހާގެ ހިތަށް ހަރާލި ތޫނު ހަންޖަރެއް ފަދަ އެއްޗަކަށެވެ. އެހެނީ އެވަޤުތު ކޮންމެވެސް ވަރަކަށް އަތުގެ އިނގިލިތަކަށް ބާރުވާގޮތަށް މުށްކަވާ ލެވުނެވެ. ވަރަށް ސިއްރުންނެވެ. ޝަހާގެ އިޙުސާސްތައް އަޙްސަންއަށް އަންގަން ބޭނުން ނުވާތީވެސް މެއެވެ. ”އާން ތިކަން އަހަރެންނަށްވުރެ ރަނގަޅަށް އެނގޭނީ ކާކަށް؟“ ކިތަންމެ އަސަރު ކުރިއެއް ކަމަކު، އަޙްސަންގެ ވާހަކައަށް އެއްބާރުލުން ދިނުމުގެ ގޮތުން ޝަހާ ބުނެލިއެވެ. ”ސަތާރަ އަހަރު ފަހުން އަހަރެން ކުރަމުން އައި އިންތިޒާރު ނިމުމަކަށް އަތުވެދާނެ ކަމުގެ އުންމީދު އަދި ކިރިޔާމި އާވީ. ޙާލާތު ކޮންމެ ގޮތަކަށް އޮތަސް އަހަރެން އުންމީދު ކަނޑައެއް ނުލަން. މިހާ ދުވަސްފަހުން ފާތުންއާ ބައްދަލުވެ، ފާތުންގެ ޙާލަތު ފެނުމުން ކޮންމެސް ވަރަކަށް މާޔޫސްވާން ޖެހުނު ވަޤުތުކޮޅެއް ދިޔަ. އެހެންނަމަވެސް ފާތުންގެ މާޒީގެ ހިތި ތަޖުރިބާތައް އަހަރެންނަށް އެނގުނު ދުވަހުން ފެށިގެންވެސް އަނެއްކާވެސް އަހަރެންގެ އެންމެ ބޮޑު މަޤްޞަދަކަށް ވެގެން ދިޔައީ ފާތުންގެ ދިރިއުޅުން އަލުން އާރާސްތު ކޮށްދިނުން. އަހަރެންގެ ޙަޔާތަށް ފާތުން އަލުން ގެނެސްގެން. ފާތުންގެ އަނިޔާވެރިޔާއަށް އޭނައަށް ލިބެންވާ ހައްޤު ޢަދަބު ދިނުމަށް މަސައްކަތްވެސް ކޮށްގެން. އަލްޙަމްދިﷲ އެކަން މިހާރު އެއޮތީ ކޮޅެއްގަ ޖައްސާފަ. އަހަރެންނަށް ލިބިފައިވާ ހުރިހާ ބާރެއްގެ ބޭނުން ކޮށްގެންވެސް އެމީހާ ސަލާމަތްވިޔަކަ ނުދޭނަން. އަހަރެން ޕީ.އެޗް.ޑީއަށް ކިޔަވަންދާން ކުރިމަތިލީ، ދުވަސްކޮޅަކަށް ނަމަވެސް ރާއްޖެއިން ދިއުމަށް ބޭނުން ވެގެން. ވަކި ހިސާބަކުން ނާއުންމީދުވާން ފެށީމަ. އެކަމަކު ކޮންމެ އިންސާނަކުވެސް ޚާލިސް ހިތަކައިއެކު ކުރާ ދުޢާ ކޮންމެވެސް ގޮތަކަށް އިޖާބަ ކުރައްވާނެތާ ދޯ. އެގޮތުން އަހަރެންނަށް ކޯސް ލިބިގެން ފުރައިގެން ދިއުމުގެ ކުރިން ފާތުންއާ ބައްދަލުވާގޮތް މިވީ، އަހަރެންނަށް އަލުން ފާތުން ލިބެން އޮތީމަ ކަމަށް އަހަރެންގެ ހިތް ޤަބޫލުކުރޭ. އެހުރިހާ އެއްޗެއް އެއްފަހަރާ އަހަރެންގެ ހިތާ ސިކުނޑި ވަށާލި ވަޤުތުކޮޅަކަށް އެވަޤުކޮޅު ވެގެން ދިޔައީ. ފާތުންގެ އަނިޔާވެރިޔާ ދެކެ އައިސް ހުރި ރުޅިވެސް ކޮންޓްރޯލު ނުވެގެން ވީގޮތެއް ކަމަށް އަހަރެންނަށް ފަހުން ވިސްނުނު. އެކަމަށް ޓަކާ ފާތުންގެ ކިބައިން މަޢާފަށް އެދެންވެސް އަހަރެން ބެނުން.“ އަޙްސަންގެ ހިތުގެ އުދާސްތައް އިއްވާ ނިންމާލުމުން ޝަހާއަށްވެސް ފުން ނޭވާއެއް ލެވުނެވެ. ”އެންމެ ރަނގަޅު. އަހަރެން ބަލާނަން ފާތުންއަށް ވިސްނައި ދެވޭތޯ. އެކަމަކު މިހާރުގެ ޙާލަތަށް ބަލާފަ އެއީ އެހާ ފަސޭހަ ކަމަކަށް ނުވާނެކަން އަޙްސަންވެސް ޤަބޫލުކުރަން ޖެހޭނެ. ވަޤުތު ނަގާނެ. އެކަމަކު އިންޝާﷲ ހުރިހާ ކަމެއްވެސް ރަނގަޅުވާނެ ކަމަށް ބަލާ. އަދި އެއްދުވަސް ފަހުން ފާތުން ހޮސްޕިޓަލުން ޑިސްޗާޖު ކުރާނެ. އޭރުން ދާނީ އަހަރުން ގެއަށް. ގެއަށް ފޮނުވާލީމަ އަޙްސަން އާދޭ. އޭރުން ތަންކޮޅެއް ހަމަޖެހިލައިގެން ވާހަކަވެސް ދައްކާލެވޭނެ. އޭގެ ކުރިން އަހަރެން ބަލާނަން ތިކަމާމެދު ފާތުންވެސް ތަންކޮޅެއް ޕޮޒިޓިވްކޮށް ވިސްނާނެ ގޮތަކަށް ވާހަކަ ދެއްކޭތޯ. އެކަމަކު މިހާރު އަދި ބަލަން ޖެހޭނީ ފާތުން އެހުރި ޙާލަތުން ނެރެވޭތޯ.“ ކުރިއަށް ކަންތައް ކުރާނެ ގޮތުގެ ވާހަކަ ޝަހާ ކިޔައިދިނެވެ. ”އެންމެ ރަނގަޅު މިވަޤުތު އަހަރެން ގޮސްލާނަން އިނގޭ. ވަރަށް އަވަހަށް އެބަ އަންނަމޭ ކިޔާފަ މި އައީވެސް.“ ލަސްވެގެން ހޯދުމުގެ ކުރިން ފާތުން ކައިރިއަށް ދިއުމަށް ޝަހާ ގަސްތުކުރިއެވެ.

”އަނެއްކާ ކޮންތާކަށް ގޮސްލާފަ ތި އައީ. މާ ޚާއްޞަ މީހަކީތަ އެހާ އަވަސް އަރުވާލާފަ ތި ދުއްވައިގަތީ؟“ ޝަހާ ގޮސް ކޮޓަރިއަށް ވަނުމުން، ސަމާސާ ރާގަކަށް ފާތުން ސުވާލުކޮށްލިއެވެ. ބަލާބެލުމަށް މިވަޤުތު ފާތުންގެ މޫޑުވެސް ތަންކޮޅެއް ރަނގަޅެވެ. އެހެންކަމުން އަޙްސަންއާއި ގުޅޭ އެއްވެސް ވާހަކައެއް ދައްކާކަށް ޝަހާ ގަސްތެއް ނުކުރެއެވެ. ”އެއީ ސިއްރެއް. ފަހުން ބުނާނަން.“ ހީނލާފައި ޝަހާ ޖަވާބު ދިނެވެ. އެވަޤުތު ކޮޓަރީގެ ދޮރުގައި މީހަކު ޓަކި ޖަހާލި އަޑަށް ހުރިހާ އެންމެން ކަހަލަ ގޮތަކަށް ދޮރާއި ދިމާއަށް ބަލައިލިއެވެ. ދޮރުހުޅުވަން ދިއުމަށް އަޙްމަދު ތެދުވިއެވެ. އެހެންނަމަވެސް ދޮރާއި ހަމައަށް ނުދެވި އުޅެނިކޮށް، ދޮރު ހުޅުވާލާފައި ކޮޓަރިތއރެއަށް ވަނީ ފާތުންގެ ކުޑަބެގެ ދެމަފިރިންނެވެ.

• ނުނިމޭ –