ކުޑަބެ ފެނިފައި، ފާތުން ދިޔައީ ސިއްސައިގެންނެވެ. އަދި ކުއްލިއަކަށް ޝަހާގެ އަތުގައި ހިފާ ބާރުކޮށްލިއެވެ. އެވަޤުތު ފާތުންގެ އަތް ފިނިވެފައިވާ މިންވަރު ޝަހާއަށް އިޙުސާސް ކުރެވުނެވެ. ޝަހާއަށް ބަލައިލެވުނީ ފާތުންގެ މޫނަށެވެ. ފާތުން ކަންބޮޑުވެ، ބިރުގެންފައި އިން މިންވަރު، އޭނާގެ އަތުގެ ފިނިކަމުން ވަޒަން ކޮށްލެވުނީތީއެވެ. ހަމަ އެވަޤުތުމެ، ޝަހާގެ އަނެއް އަތް، ފާތުންގެ އަތްމަތީގައި ބާއްވާ ބާރުކޮށްލިއެވެ. ފާތުންގެ ހާސްކަން ފިލުވާލުމަށް އެހީތެރި ވުމުގެ ގޮތުންނެވެ. އޭރުވެސް ފާތުންގެ ނަޒަރު ހުއްޓިފައި ހުރީ އޭނާގެ ކުޑަބެއާއި ދިމާއަށެވެ. ބިރުން ގޮސް ދެލޯ ބޮޑުވެފައިވާ ޙާލުގައެވެ. މާޒީގެ އަނދިރި ޞަފްޙާތަކެއް އަނެއްކާވެސް ފާތުން ވަށާލިކަހަލައެވެ. ”ރިލޭކްސް“ ފާތުންއާއި މުޚާތަބުކޮށް ވައި އަޑަކުން ޝަހާ ބުނެލިއެވެ. ފާތުން ހަމަ ޖައްސާލުމުގެ ނިޔަތުގައެވެ. ފާތުންގެ ކުޑަބެ އެހާ އަވަހަށް އަންނާނެ ކަމަކަށް ޝަހާ ހިތަށްވެސް ނާރައެވެ. އެހެނީ ކުޑަބެގެ ވާހަކަ ފާތުން ކައިރީގައި ބުނަން ޝަހާ ވިސްނައިގެން ހުރީ ތަންކޮޅެއް ހަމަޖެހިލައިގެންނެވެ. ކުޑަބެއާއި ކުރިމަތިލުމަށް، ނަފްސާނީ ގޮތުންވެސް ފާތުން ތައްޔާރުކުރަން ޖެހޭނެކަން ޝަހާއަށް އެނގޭތީވެސް މެއެވެ. ޝަހާ އެހެން ބުނުމާއިއެކު، ފާތުން ޝަހާއާއި ދިމާއަށް ބަލައިލިއެވެ. ހަތަރުކަޅި ހަމަވުމާއިއެކު، ކުޑަބެއާއި ބެހޭގޮތުން ކޮންމެވެސް ވާހަކައެއް ޝަހާއަށް އެނގިފައި އޮތްކަން ފާތުންއަށް އިޙުސާސް ކުރެވުނެވެ. އެހެނީ ޝަހާގެ މޫނުމަތިން ފެންނަން ހުރީ،  ފާތުން ކައިރީގައި ބުނަން ޖެހޭ ވާހަކައެއް ނުބުނެވި އޮތްކަހަލަ ޝުޢޫރެކެވެ. ފާތުން ފެންކަޅިވާގޮތް ވިއެވެ. އެވަޤުތު ކުޑަބެގެ ދެމަފިރިން ފާތުން ކައިރިޔަށް އައިސް ހުއްޓުނެވެ. އެންމެ ފުރަތަމަވެސް ފާތުންއަށް ގޮވާލީ، ކުޑަބެދައްތައެވެ. ”ފާތުމަތު، މިހާރު ކިހިނެއްތަ؟ ފާތުމަތު މިތާ ބާއްވާފަ އޮތްކަން ކުޑަބެދައްތައަށް އެނގުނީ އިއްޔެގަ. ޝަހާޔާ މިއަދު ދިމާވެގެން އަހާވެސްލިން. އެކަމަކު ޝަހާވެސް މާބޮޑު އެއްޗެއް ނުބުނި. އެހެންވެ ހިތަށްއެރީ ވީހާވެސް އަވަހަކަށް ފާތުމަތު ދެކިލަން އައުމޭ އެންމެ ރަނގަޅުވާނީ. ކުޑަބެދައްތައަށް ވުރެ ބޮޑަށް ފާތުމަތުގެ ކުޑަބެ ވީހާވެސް އަވަހަކަށް އަންނަން ބޭނުންވެގެން އުޅުނީވެސް. ފާތުމަތުގެ ޚަބަރު ލިބުނީއްސުރެ ވަރަށް ދެރަވެފަ އެހުންނަނީ.“ ފާތުންގެ ކުޑަބެދައްތަ އެހުރިހާ ވާހަކައެއް ދައްކާނިންމާލީ، ސައީދުއާއި ދިމާއަށް ބަލައިލަމުންނެވެ. ކުޑާބެދައްތަގެ ވާހަކައިން ފާތުންއާއި ބެހޭގޮތުން މާބޮޑު އެއްޗެއް ނޭންގޭކަން ފާތުންއަށް ކަށަވަރުވިއެވެ. އަދި ޝުކުރިއްޔާއޭ ބުނާކަހަލަ ގޮތަކަށް ޝަހާއާއި ދިމާއަށް ބަލައިލިއެވެ. ޝަހާވެސް ރައްދުގައި މަޑުމަޑުން ބޯޖަހާލިއެވެ.  އެއަށްފަހު ޝަހާ ބޭނުންވީ، އެދެމަފިރިންނަށް ފާތުންގެ ކައިރިއަށް ޖެހިލުމަށް ތަންދިނުމަށެވެ. އެހެންނަމަވެސް، ފާތުން އިނީ ޝަހާގެ އަތުގައި ހިފަހައްޓައިގެން ކަމަށް ވާތީ، ޝަހާއަކަށް އެތަނަކުން ގުޑައެއް ނުލެވުނެވެ. ޝަހާ އެތަނުން ދުރަށް ދިއުމަށް ފާތުން ބޭނުންވެސް ނުވާ ކަހަލައެވެ. ”ފާތުމަތު ދަ…ދަރިފުޅާ ކިހިނެއްތަ؟“ ވަރަށް ހިތްވަރު ކޮށްލާފައި ސަޢީދު ފާތުންއާއި މުޚާތަބު ކުރިއެވެ. ފާތުންއާއިމެދު ކުރެވިފައިވާ ނާއިންސާފަށް ހިތާމަކުރާ ކަހަލަ ޝުޢޫރެއް ސައީދުގެ މޫނުމަތިން ފެންނަން ހުއްޓެވެ. ”ދަރިފުޅާ، ކުޑަބެއަށް މަޢާފުކުރޭ. ދަރިފުޅާމެދު ކުޑަބެއަށް ކަންތައް ކުރެވުނީ ރަނގަޅަށް ނޫންކަން މިހާރު އިޙުސާސް ކުރެވިއްޖެ. ދުވަސްތަކެއް ވެއްޖެ ކުޑަބެ އެކަމާ ވިސްނާތާ. ކުޑަބެދައްތައަށްވެސް ހުރިހާ އެއްޗެއް ކިޔައިދީފަ މިހާރު އޮންނާނީ. ދައްތަ ބުނީ ފާތުމަތުގެ ފަރާތުން މަޢާފު ލިބުނިއްޔާ ތިމަންނަވެސް މަޢާފު ކުރާނަމޭ. ހަމަ ޙަޤީޤަތުގަވެސް ކުޑަބެ މިހުންނަނީ ވަރަށް ދެރަވެފަ. ކުޑަބެއަށް މަޢާފު ކުރާނަންދޯ.“ ފާތުންއާއި މެދު ކަންތައް ކުރެވުނު ގޮތާއިމެދު ހިތާމަކުރާ ޙާލު، ސަޢީދު ވާހަކަ ދައްކަމުން ގެންދިޔައެވެ. ފާތުން އިނީ ބުނާނެ އެއްޗެއް ނޭންގިފައި ކަހަލަ ގޮތަކަށެވެ. ފާތުންގެ ބޮޑުދައިތަ އަދި އަޙްމަދު ތިބީ މިވަނީ ކިހނެއްކަން ނޭންގިފައެވެ. އެހެނަސް ސަޢީދު އެދައްކަނީ ކޮން ކަމެއްގެ ވާހަކައެއްކަން ޝަހާ އަދި އޭނާގެ މަންމައަށް ވަރަށް ރަނގަޅަށް އެނގެއެވެ. އެހެނީ އެވަޤުތު އެދެމައިން އެކަކު އަނެކަކަށް ބަލައިލުމާއިއެކު، އިސްދަށަށް ޖަހާލިއެވެ. ”ސަޢީދުބެ ކޮން ކަމަކާ ފާތުމަތުގެ ކިބައިން މަޢާފަށް ތި އެދެނީ؟“ ވާނުވާ ނޭންގޭ ޙާލުގައި އިނދެ، ހައްވަ ސުވާލުކުރިއެވެ. ހައްވަ އެތަނުގައި ހުރިކަންވެސް ސަޢީދުއަށް ނޭންގޭ ކަހަލައެވެ. އެހެނީ އެކަމަކަށް މާބޮޑު ސަމާލުކަމެއް ސަޢީދުއެއް ނުދިނެވެ. އެއާއި ޚިލާފަށް އަދިވެސް ސަޢީދުގެ ނަޒަރު ހުއްޓިފައި ހުރީ ފާތުންއަށެވެ. އެހެނަސް ހައްވަގެ އެސުވާލުގެ ރައްދުގައި ވާހަކަ ދައްކަން ފެށީ ފާތުންއެވެ. ”ކޮންމެ ގޮތަކަށް ކޮންމެ ކަމެއް ދިޔަޔަސް، ޙާލާތު ކޮންމެ ގޮތަކަށް އޮތަސް ތީ އަބަދުވެސް އަހަރެންގެ ކުޑަބެ. އަހަރެންގެ ބައްޕަގެ ކޮއްކޮ. އަދި ބައްޕައަށްފަހު، އަހަރެންގެ ބައްޕައެއްގެ މަޤާމުގަ ހުރި މީހެއް. އެހެންވީމަ ބައްޕައަކަށް މަޢާފު ނުކުރުމަކީ އަހަރެންގެ ހިތް ރުހޭނެ ކަމެއް ނޫން. ކުޑަބެގެ މައްޗަށް އަހަރެންގެ ހިތް ސާފު. ކުޑަބެދައްތަވެސް ދެން ކުޑަބެއަށް މަޢާފުކުރޭ.“

ތެދެކެވެ. ފާތުންއަކީ އޭނާގެ ޙަޔާތުގައި އެތަކެއް ތޫފާނަކާއި ކުރިމަތިލާފައި ހުރި މީހެކެވެ. ގެނބެމުން ދިޔަ އެތަށް ފަހަރަކު ހިތްވަރާއިއެކު ކޮޅަށް ތެދުވެ، ޙަޔާތުގެ ނައު ކުރިޔަށް ގެންދަން މަސައްކަތް ކޮށްފައިވާ ހިތްވަރުގަދަ ކަނބަލެކެވެ. ފާތުންގެ ކުޑަބެ، އޭނާ ބަދުނާމުކޮށް ފަޟީޙަތްކުރީ،  ބައްޕައެއް ފަދައިން، ސަޢީދުގެ ފަރާތުން އަޅާލުމާއި އެއްބާރުލުން ލިބޭނެ ކަމުގެ އުންމީދު ކޮށްގެން ހުރި ނާޒުކު ދަނޑިވަޅެއްގައެވެ. އެހެނަސް މިއަދު ފާތުންގެ ހިތް ހަމަ ޙަޤީޤަތުގައިވެސް އޭނާގެ ބައްޕައެއްފަދަ ކުޑަބެގެ މައްޗަށް ސާފެވެ. އެހެނީ ފާތުން މިހާރު ތަޙަންމަލު ކުރަމުން އެގެންދާ ތަކުލީފުގެ ކުރިމަތީގައި، މީގެ ސަތާރަ އަހަރުކުރިން ހިނގާދިޔަ އެޙާދިސާއަކީ ވަރަށް ކުޑަ މިންވަރެކެވެ. އެދުވަސް ދެނެއް އަނބުރައެއް ނާންނާނެއެވެ. އެހެންނަމަވެސް ކުޑަބެގެ މިޢަމަލުން އޭރުގައި ގެއްލުނު އަބުރު އަނބުރާ ލިބޭ ކަމަށް ވާނަމަ، ކުޑަބެއަށް މަޢާފު ކުރުމަކީ ނެތްކަމެއް ނޫންތާއެވެ. ފާތުން ޤަބޫލުކުރާ ގޮތުގައި، އެދުވަހު ކުރިމަތިވި އެއްވެސް ކަމެއް ހިތުގައި އަޅައިގެން އެހެން މީހުންނަށް ޓަކައި ހިތުގައި ގިލަންވެރިކަން ބާއްވައިގެން އުޅުމަކުން ކުރާނެ ފައިދާއެއްވެސް ނެތެވެ. ވޭތުވެދިޔަ ދުވަސްތަކަކީ، ދުނިޔޭގައި ދެން މާގިނަ ދުވަހަކު ނުހުންނާނެ ކަމުގެ އިޙުސާސްވެސް އެތައްފަހަރަކު، ފާތުންއަށް ކުރުވި ދުވަސްތަކެކެވެ. ވީއިރު ދުނިޔޭގައި ހުރެ ދިރިތިބީންގެ މައްޗަށް ހިތްސާފު ކުރުމަށްވުރެ ހިތަށް ހަމަޖެހުން ލިބޭނެ އެއްވެސް ކަމެއް ނެތެވެ. އެގޮތުގެ މަތިން ފާތުންގެ ކުޑަބެއަށްވެސް މަޢާފުކުރީއެވެ. ”ކުޑަބެ ވަރަށް އުފާވެއްޖެ. އަދި އެހާ ހިތްހަމަވެސް ޖެހިއްޖެ. ލައްކަ ދުވަސްވެއްޖެ މި ބުރަ ހިތުގަ އަޅައިގެން އުޅޭތާ. ފާތުމަތާ ދެން ދުވަހަކުވެސް ބައްދަލުވެދާނެ ކަމުގެ އުންމީދުވެސް ކަނޑާލައިގެން ހުރީ. އެކެމަކު އަހަރެން ކުރި ކަންތަކުން މިންޖުވޭތޯ އެތައް ދުޢާއެއްވެސް ކުރިން. އަލްޙަމްދުﷲ. މިއަދު އަހަރެންގެ ދުޢާ އިޖާބަކުރައްވައިފި ކަމުގެ އިޙުސާސް ކުރެވިއްޖެ. ޝުކުރިއްޔާ ދަރިފުޅާ.“ މިހާރު ފާތުންވެސް ކޮންމެވެސް ވަރަކަށް ހަމަޖެހިފައި އިންހެން ހީވެއެވެ. އެހެނީ މިހާރު އެއިނީ ޝަހާގެ އަތުންވެސް ދޫކޮށްލައިގެންނެވެ. ވާހަކަ ދެއްކުމުގައިވެސް އެއްވެސް ކަހަލަ ތުރުތުރު އެޅުމެއް ނެތެވެ. ”އަދި އެބައޮތް ކުޑަ ވާހަކައެއް ބުނަންވެފަ. އަސްލުގަ ވާހަކައަކަށްވުރެ ބޮޑަށް އިލްތިމާސްއެއް ކަމަށް ހީކޮށްލާ“ ދަނޑިވަޅު ބަލާފައި ކުޑަބެދައްތަ ބުންޏެވެ. އަނެއްކާ ކޮންކަހަލަ އިލްތިމާސެއްބާ؟“ ހައިރާންވެ އިނދެ ފާތުން އަހާލިއެވެ. ”ހޮސްޕިޓަލުން ގެއަށް ފޮނުވާލީމަ ހިނގާ އަހަރުމެންނާއެކީ ގެއަށް ދާން. ފާތުމަތުގެ އަސްލު ގެއަށް.“ ކުޑަބެދައްތަ ބުނި ވާހަކައަށް ބާރުލަމުން އެވާހަކަ ސަޢީދުވެސް ތަކުރާރު ކޮށްލިއެވެ. ”އެއީ ތެދެއް ދަރިފުޅާ. ޙަޤީޤަތަށް ބުނާނަމަ އަހަރުމެން މިއައީވެސް ފާތުމަތު ބަލާ.“ ފާތުންއަށް ބުނާނެ އެއްޗެއް ނޭންގުނު ކަހަލައެވެ. އެއީ ފާތުން އުޅެބޮޑުވި ގެއެވެ. މުޅި ދުނިޔޭންވެސް ފާތުންއަށް އެންމެ ބޮޑަށް އަމިއްލަ ވަންތަކަން އިޙުސާސް ކޮށްދޭ މާޙައުލެވެ. އާނއެކެވެ. އެގެއަކީ ފާތުންގެ ކުޑައިރާއި ޒުވާން ދުވަސްވަރުގެ އެންމެ އުފާވެރި އަދި ފޮނި ހަނދާންތައް އެކުލެވިފައިވާ ގެއެވެ. ފާތުންގެ މުސްތަޤުބަލު ބިނާކުރުމަށް ޓަކައި އެތައް ހުވަފެންތަކެއް އެ ފުރާޅެއްގެ ދަށުގައި އިނދެ، ދެކެމުން އައި ފުރާޅެވެ. އެމާޙައުލަކާއި ނުލާ ފާތުންގެ ކުރިމަގު ތަޞައްވުރުވެސް ކޮށްފައިނުވާ މާޙައުލެވެ. ފުރާނަފަދަ ލޯބިވާ މަންމައާއި ބައްޕަގެ ގެއެވެ. އެހެނަސް ދެން އަނބުރާ އެގެއަށް ދާކަށް ފާތުން ބޭނުމެއް ނޫނެވެ. ސަބަބަކީ ކޮބައިކަމެއް ޚުދު ފާތުންއަކަށްވެސް ބުނެދޭކަށް ނޭންގެއެވެ. ”ވަރަށް ބޮޑަށް ޝުކުރިއްޔާ ކުޑަބޭ. އެކަމަކު މިފަހަރު ޝަހާ މަންމަގެ އެދުމުގެ މަތިން އެގެއަށް ދިއުމަށް މިހާރު އޮތީ ނިމިފަ. ދޯ ޝަހާ މަންމާ.“ ކުޑަބެގެ ހުށައެޅުމަށް ތަންކޮޅެއް ޢަދަބުވެރިކަމާއިއެކު ނޫނެކޭ ބުނާނެ ގޮތެއް ވިސްނާލުމާއެކު ފާތުން ބުނެލިއެވެ. ”އާން ސަޢީދު ހަމަ ތަންކޮޅެއް ލަސްވީ. ހަމަ ދެންމެގަ ފާތުން އެއްބަސްވެފަ އޮތީ ހޮސްޕިޓަލުން ދޫކޮށްލީމަ އަހަރެންނާއެކު ގެއަށް ދާން.“ ޝަހާ މަންމަ ފާތުންއާއި އެއްބަސް ވެލިއެވެ. ”ފާތުން އަހަރުމެން ގޭގަ ހުއްޓަސް އެހުރެވެނީ ހަމަ ތިގޭގަ ކަމަށް ބަލަމާ ހިނގާދޯ. އަހަރުމެން ގެވެސް އެހުރީ ކުޑަބެމެން ގެއާ ޖެހިގެންނެއްނު. އެހެންވީމަ ފާތުންނާ ބައްދަލުކުރަންވީމަ ހަމަ ކޮންމެ ވަޤުތަކުވެސް ކުޑަބެމެންނަށް އާދެވޭނެއެއްނު.“ ޝަހާ އޭނާގެ ޚިޔާލު ހުށައެޅިއެވެ.

މި ހުރިހާ ވާހަކަތަކެއް ދައްކަމުން ދިޔައިރުވެސް ހައްވައާއި އަޙްމަދު ތިބީ، ވާނުވާ ނޭންގިފައެވެ. ކުއްލިޔަކަށް އެމީހުން ދައްކަމުންދިޔަ ވާހަކައިގެ ތެރެއަށް ވަންނަން ހައްވަ ބޭނުންވިއެވެ. އެހެނީ މާޒީގައި ހައްވައަށް އެނގިފައި ނުވާ ކަމެއް އެބަ އުޅޭ ކަމުގެ އިޙުސާސެއް ހައްވައަށް ވިއެވެ. އެކަން އޮޅުން ފިލުވަންހައްވަ ކެތްމަދުވިއެވެ. އަދިކުރިންވެސް ކުރި ސުވާލު ތަކުރާރު ކުރަން ބޭނުންވިއެވެ. އެހެނަސް ދެން އަނބުރާ އެގެއަށް ދާކަށް ފާތުން ބޭނުމެއް ނޫނެވެ.“އަހަރެންނަށް އެއްޗެއް ސާފުކޮށްލަ ދީބަލަ ސަޢީދުބޭ“ ”އަހާން، ހައްވަވެސް އެބަހުރިދޯ މިތާންގަ. ވަރަށް ބޮޑަށް މަޢާފުކުރޭ ހައްވާ. އެތައް ޒަމާނެއް ކޮށްލާފަ ފާތުމަތު ފެނުނީމަ ވީ އުފަލެއްގެ ބޮޑުކަމުން އެހެން ކަމަކަށް ސަމާލުކަންވެސް ނުދެވުނީ. އާން ދެން ބުނެބަލަ، ކޯޗެއް ސާފުކޮށްދޭންވީ؟“ ވަރަށް ހިތްހަމަ ޖެހިލާފައި ހުރެ ސަޢީދު ސުވާލުކުރިއެވެ. ”ސަޢީދުބެ އެންމެ ފުރަތަމަ މިތަނަށް އައިސް ފާތުމަތު ކައިރިން މަޢާފަށް ތިއެދުނީ ކޮންކަމާހޭ؟“ ސަޢީދު އޭގެ ޖަވާބުގައި ވާހަކަ ދައްކަން ތައްޔާރުވެލި ވަޤުތު ފާތުން ވާހަކަ ދައްކަން ފެށިއެވެ. ”އެއީ މާބޮޑުކަމެއް ނޫނޭ ބޮޑުދައިތާ. ބޮޑުދައިތަ މާއަވަހަށް ތި ކަންބޮޑުވަނީ.“ މާޒީގެ ހިތި ހަނދާންތައް އަލުން އާލާކޮށްގެން މިއުފާވެރިކަން ވަޤުތުކޮޅު ޚަރާބުކޮށްލަން ފާތުން ބޭނުން ނުވި ކަހަލައެވެ. ”އެއީ ތެދެއް ބޮޑުދައިތާ. އެއީ އެހާބޮޑުކަމެއް ނޫން. ދެން އަވަހަށް ހިނގާ ސައިބޯން. ކުޑަބެޔާ ކުޑަބެދައްތަވެސް އާދެބަލަ މިތަނުން އެއްޗެއް ކާލަން.“ ހައްވަގެ ހާސްކަން ފިލުވާލަން ޝަހާވެސް މަސައްކަތް ކުރިއެވެ. އެވަޤުތު ދެކެވުނު ހުރިހާ ވާހަކަތަކަށް ނިމުމެއް ގެނެސް، އެކޮޓަރި ތެރޭގެ މާޙައުލު އުފާވެރިކަމުން ގުގުމާލިއެވެ. އެވަޤުތު ޝަހާ ވިސްނަމުން ދިޔައީ އަޙްސަން ދެއްކި ވާހަކައާއި މެދުގައެވެ. ފާތުންއަށް ވިސްނައިދޭނެ ގޮތަކާއިމެދުވެސް ޝަހާ ވިސްނަމުން ދިޔައެވެ. އެއުފާވެރި މާޙައުލުގެ ތެރެއިން ޝަހާ ފުން ޚިޔާލަކަށް ގެއްލިފައި އިންކަން މިފަހަރު ފާހަގަކުރީ، އަޙްމަދެވެ. އެވަޤުތު، މަޑުމަޑުން ޝަހާގެ އުޅަނބޮށީގައި ކޮށްޓާލުމާއިއެކު، ކިހިނެއްވެފައިތޯ އަހާލުމުގެ ގޮތުން ބުމައިގެ އިޝާރާތަކުން ސުވާލުކޮށްލިއެވެ. އެހެނީ އެވަޤުތުކޮޅުގެ ހިތްހަމަ ޖެހުން ހަލާކުކޮށްލަން އަޙްމަދުވެސް ބޭނުމެއް ނުވިއެވެ. އެހެންނަމަވެސް ކަމެއް ނުވާކަމަށް ބުނުމުގެ ގޮތުން ޝަހާ މަޑުމަޑުން ބޯ ހޫރާލިއެވެ. ނަމަވެސް ކުޑައިރުކޮޅަކު ވިސްނަން އިނުމަށްފަހު، އަޙްމަދަށް ގޮވާލިއެވެ. އަދި ފަހުން މަޝްވަރާ ކޮށްލަންވެފައި އޮތް ވާހަކައެއް އެބައޮތްކަމަށް އަޙްމަދު ގާތުގައި ބުންޏެވެ. އަޙްމަދުވެސް އެންމެ ރަނގަޅުކަމަށް ބުނެ ޝަހާގެ ވާހަކައަށް އެއްބަސް ވެލިއެވެ. އެއަށްފަހު، ދެންތިބި އެންމެންނާއިއެކު އެދެމީހުންވެސް ބައިވެރި ވިއެވެ. ފާތުންގެ ޙަޔާތަށް އަންނަމުން ދިޔަ ހެޔޮ ބަދަލާއިމެދު ހިތްހަމަ ޖެހޭ ކަހަލަ ކުލަވަރެއް ފާތުންގެ މޫނުމަތިންވެސް ފެންނަމުން ދިޔައެވެ. އަދި ފުންނޭވާއެއް ލުމާއިއެކު ހިތާއިހިތުން ﷲ އަށް ޙަމްދު ކުރިއެވެ.

ޖެހިގެން އައި ދުވަހަކީ، ފާތުން ހޮސްޕިޓަލުން ގެއަށް ފޮނުވާލި ދުވަހެވެ. ފުރިހަމަ ކުރަން ޖެހޭ ހުރިހާ ލިޔެކިޔުންތައް ފުރިހަމަކޮށް ނިންމާލުމަށް ފަހު، ޝަހާގެ ކާރުގައި ފާތުން ގޮވައިގެން ގެއަށް ދިޔައީ އަޙްމަދު އަދި ޝަހާއެވެ. ދެން ތިބި އެންމެން ތިބީ ފާތުންގެ އިސްތިޤުބާލުގައި ކުރަންޖެހޭ ހުރިހާ ތައްޔާރީތަކެއް ކުރުމަށްޓަކައި ގޭގައެވެ. ފާތުންގެ ކުޑަބެގެ ދެމަފިރިންނާއި އެޢާއިލާގެ އިތުރު މެންބަރުންވެސް ޝާމިލުވާ ގޮތަށެވެ. އެހުރިހާ އެންމެންވެސް މިހާރު ފާތުންއާއިމެދު ހިތްސާފުވެފައިވާ ކަހަލައެވެ. އެހެނީ ހުރިހާ އެންމެންވެސް އެއުފާވެރި ވަޤުތުކޮޅަށް ތައްޔާރީތައް ކުރަމުން ގެންދިޔައީ ވަރަށް އުފާވެރި ޝުޢޫރުތަކަކާއި އެކުގައެވެ. ޝަހާގެ ކާރު މަޑު ދުވެއްޔެއްގައި ދުއްވާފައި އައިސް ގެއާއި ކައިރިކޮށްލިއެވެ. އަޙްމަދު ކާރުން ފައިބައިގެން އައިސް ފާތުން ފޭބުމަށްޓަކައި ކާރުގެ ދޮރު ހުޅުވާލަދިނެވެ. ކާރުން ފޭބުމަށްފަހު ފާތުންގެ ނަޒަރު އެންމެ ފުރަތަމަވެސް ގޮސް ހުއްޓުނީ، ޖެހިގެން ހުރި ގޭގެ ދޮރާއި ދިމާއަށެވެ. ވޭތުވެ ދިޔަ ސަތާރަ އަހަރުގެ ތެރޭގައިވެސް އެގެއަކަށް މާބޮޑު ބަދަލުތަކެއް އައިސްފައި ހުރިކަމަކަށް ފާތުންއަކަށް ފާހަގައެއް ނުކުރެވެއެވެ. ހަމައެކަނި ގޭގެ ދޮރާށި ފިޔަވައެވެ. އެގެއާއި ދިމާއަށް ބަލަހައްޓައިގެން ޚިޔާލަކަށް ގެއްލިފައި އިރުކޮޅަކު ފާތުންއަށް ހުރެވުނެވެ. އެވަޤުތު ކޮންމެވެސް ވަރަކަށް ސިއްސައިގެން ދިޔައީ، ވަރަށް މަޑުމައިތިރި ގޮތަކަށް ޝަހާ ގޮވާލުމުންނެވެ. ފާތުންއަށް ކުރާނެ އަސަރާއި އިޙުސާސް ޝަހާއަށް ވަރަށް ރަނގަޅަށް އެނގެއެވެ. ”އިޓްސް އޯކޭ ފާތުން. ދެން ހިނގާ އަވަހަށް ގޭތެރެއަށް ވަންނަން. އަދިވެސް ކޮންމެވެސް ވަރަކަށް ވަރުބަލިކަން އެބަ ހުއްޓެއްނު ދޯ. ގެއަށް ފޮނުވާލިޔަކަސް ކޮމްޕްލީޓް ރެސްޓް ކުރާށޭ ފަރީ ބުންޏެއްނު.“ ފާތުން ކުރަމުން އެގެންދާ ޚިޔާލުތަކުން ދުރުކޮށްލުމުގެ ނިޔަތުގައި ޝަހާ ބުންޏެވެ. އަދި ވަރަށް އޯގާތެރިކަމާއިއެކީ، ފާތުންގެ އަތުގެ މުލައްދަނޑީގައި ފިރުމާލިއެވެ. ”އާން ހިނގާ ދޯ“ ފުން ނޭވާއެއް ލުމާއިއެކު ދެލޯ ބޮޑުކޮށްލާފައި ފާތުންވެސް ޝަހާގެ ވާހަކައަށް ޖަވާބު ދިނެވެ. އަދި ޝަހާގެ އެހީތެރިކަމާއިއެކީ ގެއާއި ދިމާއަށް ހިނގައިގަތެވެ.

ފާތުން ގޮސް ގެއަށް ވަތްއިރު، ފާތުން ބަލާބޮޑުކުރި ބައްޕަ ފަރާތުގެ ޢާއިލާގެ ވަރަށް ގިނަ މެންބަރުން އެގެއަށް ޙާޟިރުވެ ތިއްބެވެ. ފާތުންއަށް ދިނުމަށް ގޭތެރެއިން ތައްޔާރުކޮށްފައިވާ ސަޕްރައިސްއަށް ވުރެ ބޮޑު ސަޕްރައިސްއެއް އެގޭތެރެއިން ފާތުންއަށް ލިބުނެވެ. އެހެނީ އެއީ ފާތުންއަށް އެތައް ގޮތަކުން ހައިރާކަން ގެނުވައިދިން ވަޤުތުކޮޅެކެވެ. އެދުވަހު ފާތުން ބަދުނާމުކޮށް ޢާއިލާގެ ތެރެއިން ބާކީކޮށް ފާތުން ބޭރުކޮށްލި އެންމެން ކަހަލަ ގޮތަކަށް މިއަދު މިތާ ފެންނަން ހުރުމަށްވުރެ ހައިރާން ވާނެ އެއްކަމެއްވެސް ފާތުންއަކަށް ނެތެވެ. އެހެންނަމަވެސް ފާތުންގެ އިސްތިޤުބާލުގައި ގޭތެރެ އޮތީ ވަރަށް ފުރިހަމައަށް ޒީނަތްތެރި ކޮށްލާފައެވެ. އެހުރިހާ ކަމެއް ފެނުމާއިއެކު ފާތުންއަށް އަޑުގެ ކޮޅަށް ރޮއެގަނެވުނެވެ. އެރުއިމަކީ، މިއަދާއި ޖެހެންދެން ފާތުންގެ އެތެރެހަށީގައި ހިފަހައްޓާފައި އޮތް ވޭނާއި ކެކުޅުން ކަމަށްވެސް ވެދާނެއެވެ. ނޫނީ އެއީ އުފާވެރިކަމުގެ ކަރުނަ ކަމަށްވެސް ވެދާނެއެވެ. ނޫނީ ހުރިހާ ކަމެއް އެއްވުމުން ފާތުންއަށް އޭނާގެ އިޙުސާސްތައް ހިފަހައްޓާ ނުލެވުނީ ކަމަށްވެސް ވެދާނެއެވެ. އެހެނަސް ޔަޤީންވާ އެއްކަމެއް އެބައޮތެވެ. އެވަޤުތު އެތަނުގައި ހުރި ކޮންމެ ފަރުދެއްގެވެސް އެންމެ ބޮޑު މަޤްޞަދަކީ ފާއިތުވި ދުވަސްތަކުގައި ފާތުން ތަޙަންމަލު ކުރަމުން ގެންދިޔަ ވޭނުން ފާތުން ނެރުމެވެ. އަދި ހަމަޖެހޭ އުފާވެރި ދިރިއުޅުމަކަށް އަލުން އިޔާދަ ކުރުވުމެވެ. އެހެނަސް ފާތުންގެ ރުއިން މިވަޤުތު ހުއްޓުވަން މަސައްކަތް ނުކުރުމަށް ޝަހާ ޢިޝާރާތް ކުރިއެވެ. އެހެނީ އެވަޤުތު ހައްވައަށް ކެތް ނުވެގެން ފާތުން ކައިރިއަށް އައުމަށް މަސައްކަތް ކުރިއެވެ.

ހިތްފުރޭ ވަރަށް ރުއިމުން މިހާރު ރަނގަޅުތޯ ޝަހާ، ފާތުންއާއި ސުވާލު ކުރިއެވެ. ޖަވާބުގައި ފާތުން ބޯޖަހާލިއެވެ. ”އެހެންވިއްޔާ ދެން އެތެރެއަށް ވަންނަމާ ހިނގާދޯ“ މިހެން ބުނުމާއިއެކު، ފާތުންގެ ބުރަކަށީގައި މަޑުމައިތިރި ކަމާއިއެކު ޝަހާގެ އަތް ޖައްސާލިއެވެ. ދެލޯ ރަނގަޅަށް ފޮހެލުމާއިއެކު، ފާތުންވެސް ކުރިޔަށް ހިނގައިގަތެވެ. އެވަޤުތުކޮޅު ޝަހާއަށް، ފާތުންގެ ފަރާތުން ކަމެއް ފާހަގަވިއެވެ. އަދި މަޑުމަޑުން ކައިރިއަށް ޖެހިލާފައި މާވަރަކަށް ލޯ ތިހިންގަނީ ކޯޗެއް ހޯދަންތޯ ސުވާލު ކޮށްލިއެވެ. ”އަޙްސަން ނާދޭތަ؟“ ވަރަށް ސިއްރުސިއްރުން ފާތުން ސުވާލުކޮށްލިއެވެ. ”ކީއްކުރަން އަޙްސަން އަންނަންވީ؟ ފާތުންނެއްނު އަޙްސަން ފޮނުވާލީވެސް.“ ސަމާސާ ރާގަކަށް ޝަހާ ބުނެލިއެވެ. ”ދެން ޝަހާ“ ހީނލާފައި ފާތުން ބުނެލިއެވެ. ”އޭރު ޙާލަތު ދިމާކުރިގޮތުން މަށަށްވެސް އެހެން ބުނެވުނިއްޔޭ. ދެން އަޙްސަންވެސް ވޭތަ އެކަން ހިތުގަ އަޅައިގެން އުޅެން. ހަމަ ނާންނަން ވެގެން ދައްކާހާ ބަހަނާ.“ ފާޑަކަށް ތުން ދަމާލާފައި ފާތުން ބުނެލިއެވެ. ”ހަމަ އަސްލުވެސް ފާތުން ބޭނުންތަ އަޙްސަން އަންނަން؟“ ފާތުންގެ ހިތުގެ އިޙްސާސް ދެނެގަންނަން ޝަހާ މަސައްކަތް ކުރިއެވެ. ”އާނ ބޭނުން.“ ވަރަށް ދިގުކޮށް ދަމާލަމުން ތުއްތު ކުއްޖެއް ފަދައިން ފާތުން ބުނެލިއެވެ. އެވަޤުތު ފާތުންގެ ބައްޕަ ފަރާތުގެ ޢާއިލާގެ ހުރިހާ މެންބަރުން ކަހަލަ ގޮތަކަށް ކައިރިއަށް އައިސް ފާތުން ވަށާލިއެވެ. އަދި ވަރަށް ލޯބިން ގައިގާ ބައްދާލުމާއިއެކު ފާތުންގެ ކިބައިން މަޢާފަށް އެދެމުން މަރުޙަބާ ކިޔަމުން ގެންދިޔައެވެ. ޝަހާ، ފާތުން ކައިރިއަށް ގޮނޑިއެއް ގެނެސް އެތަނުގައި މަޑުމަޑުން ބޭންދިއެވެ. މުޅި ގޭތެރެ ވަނީ ހުނުމާއި ސަކަރާތުގެ އަޑުން ގުގުމާލާފައެވެ. ނަމަވެސް ފާތުންގެ ހިތުގެ އުދާސްތައް ފިލުވާލުމަކީ އެހާ ފަސޭހަކަމެއް ނޫންތާއެވެ. އެކަމަށް ވަޤުތު ނަގާނެކަމީ، ޔަޤީން ކަމަކެވެ. އެހެނީ ފާތުންގެ އަތުން ބީވެގެންދިޔަ އެއްވެސް އެއްޗަކީ އިތުރު އެއްވެސް މީހަކަށް އަނބުރާ ގެނެސްދެވޭ އެއްޗެއް ނޫނެވެ. އެވަޤުތުކޮޅުގެ ތެރޭގައިވެސް ފާތުންގެ ހިތާއި ސިކުނޑި ވަށާލާފައިވަނީ، ދެން އަލުން ދިރިއުޅުން ފަށާނެ ގޮތެއްގެ ފުން ޚިޔާލުތަކުންނެވެ. މިތަނުން ދެން ދާނީ ކޮންތާކަށްބާއެވެ؟ ކުރިޔަށް ދާނީ ކިހިނެއްބާއެވެ؟ ފަށާނީ ކިހާ ހިސާބަކުންބާއެވެ؟ އެހީތެރިކަމުގެ އަތެއް ދިއްކޮށްލާނެ މަދަދުގާރެއް ހުންނާނެބާއެވެ؟ މިކަހަލަ ޚިޔާލުތަކެއްގެ ތެރެއަށް ގެއްލިފައި އިންދާ، ވަރަށް ރައްޓެހި އަޑަކުން ފަހަތުން ގޮވާލިހެން ހީވެގެން ސިއްސައިގެން ގޮސް އެނބުރި ފަހަތަށް ބަލައިލެވުނެވެ.

• ނުނިމޭ –