ދ. ވާނީގައި ހުންނަ ޕޮލިސް ޓްރެއިނިންގ ސެންޓަރުގައި ތަމްރީން ހަދަމުންދިޔަ ދަރިވަރެއްގެ ހާލުސިރިއަސްވެ އައިޖީއެމްއެޗުގައި ފަރުވާދޭން ފަށައިފިއެވެ. އޭނާއަށް ފަރުވާދެމުން ގެންދަނީ ވެންޓިލޭޓަރުގެ އެހީގައި ކަމަށް ފުލުހުން ވަނީ ބުނެފައެވެ. މިހާދިސާ ހިނގާފައިވަނީ މިހިނގާ މެއިމަހު 4 ވަނަ ދުވަހުގެރޭ ފަތިހު 04:21 އެހައިކަންހާއިރު އެވެ. ހާލު ސީރިއަސްވެ ފަރުވާދެމުން ގެންދަނީ މިހާރުކުރިއަށްދާ 40 ވަނަ ޕޮލިސް އިނީޝިއަލް ޓްރެއިނިންގ ކޯހުގެ ދަރިވަރަކަށެވެ.
އެރޭ ފަތިހު ”ވޭކް-އަޕް ކޯލް ދިނުމަށް މުދައްރިބުން ދަރިވަރުންގެ ބެރެކްސްތަކަށް ވަދެ ދަރިވަރުން ހޭލައްވަމުން ދިޔައިރު 34 އަހަރުގެ ފިރިހެން ރެކްރޫޓެއް، ގޮވުމުންވެސް ހަބަރެއް ނުވެ ހަރަކާތެއްވެސް ނެތުމުން، 04:27 ގައި އޭނާ މެޑިކަލް ރޫމަށް ގެންގޮސް އަވަސް ފަރުވާ ދޭން ފަށާފައިވެއެވެ. ޑޮކްޓަރުގެ ލަފާގެ މަތިން، 04:48 ގައި އިތުރު ފަރުވާއަށް ދ. އަތޮޅު ހޮސްޕިޓަލަށް ގެންގޮސް ފަރުވާ ދީފައި ވެއެވެ. އަދި އެ ހޮސްޕިޓަލުން ފަރުވާ ދިނުމަށްފަހު، 13:22 ގައި އެއަރ އެމްބިއުލާންސްގައި މާލެ ގެނެސް ދަނީ ފަރުވާ ދެމުންނެވެ.“ ފުލިހުން ވިދާޅުވިއެވެ.
ފުލުހުން ވިދާޅުވެފައިވަނީ އެ ޒުވާނާއާ ބެހޭގޮތުން އެންމެފަހުން އަޕްޑޭޓު ލިބިފައިވަނީ މިއަދު ހެނދުނު ކަމަށެވެ. އޭރުވެސް ޑޮކްޓަރުން ބުނެފައިވަނީ އެޒުވާނާގެ ”ހާލަތު ނާޒު ކަމަށް“ ފުލުހުން ވިދާޅުވެފައިވެއެވެ.
