ޔުނިވަރސިޓީ ތަޢުލީމަކީ ކާމިޔާބުގެ ތަޅުދަނޑިކަމަށް ދެކޭ މީހުން އެބައިތުރުވެއެވެ. އެހެންކަމުން ތިމާގެ ދަރީންނަށް ވެސް ޔުނިވަރސިޓީ ތަޢުލީމު ހާސިލް ކޮށްދިނުމަށް މަސައްކަތް ކުރެވެއެވެ. ވަރަށްރަނގަޅު ކަމެކެވެ. އިލްމު އުނގެނެންވާނެއެވެ. ތަޢުލީމް ހާސިލް ކުރަންވާނެއެވެ.
އެހެންނަމަވެސް ދުނިޔެ މިއަދުވެސް އޭރުވެސް ދައްކާ ޙަގީގަތެއް އެބައޮތެވެ. އެއީ ތަޢުލީމީ ދާއިރާގެ ފުޅާކަމެވެ. ހަމައެކަނި ޑިގްރީ ކީއްކުރަން ހެއްޔެވެ؟ މާސްޓަރ އިންވެސް ނިންމާލެވޭކަމަށް ނެތެވެ. ޕީއެޗުޑީއަކުން ވެސް ނިންމައި ނުލެވޭނެއެވެ.

ޔުނިވަރުސިޓީ ތަޢުލީމަކީ ކާމިޔާބީގެ ތަޅުދަނޑި ކަމަށް ދެކޭމީހުން ވެސް މަދެއްނޫނެވެ. އެހެންނަމަވެސް އެއަށްވުރެ ދުރަށް ފުންކޮށް މިކަމާމެދު ވިސްނާލަން ޖެހެއެވެ. ޙަޤީޤީ ތަޢުލީމަކީ ހަމައެކަނި ކްލާސްރޫމަކަށް
ނުވަތަ ކަރުދާސް ކޮޅަކަށް ބަރޯސާވާ އެއްޗެއް ނޫނެވެ. އަދުގެ ދުނިޔެ މިދަނީ މިކަމުގެ ޙަޤީޤަތް ހާމަކޮށް ދައްކަމުންނެވެ. ތަޢުލީމު އުނގެނުމުގެ ބޭނުމަކީ ބޮޑު ސެޓުފިކެޓެއް ހޯދުން ކަމަށްވާނަމަ އެކަން އެބަވެއެވެ. އެކަމަކު ތަޢުލީމު އުނގެނުމުގެ ހަގީގީ މާނައަކީ ކިޔެވިއެއްޗެއްގެ ބޭނުން ރަނގަޅަށް ހިފަން ދަސްކުރުމެވެ. އޭގެ ފައިދާ ތިމާއަށާއި މުޖުތަމަޢަށް ފޯރުކޮށްދިނުމެވެ. އެހެނަސް އެކަން ކުރެވޭނީ ތަޢުލީމާއެކު ރީތި އަޚްލާގާއި އަދަބާއި ސްލޫކު ދަސްކޮށްގެންނެވެ. ކިޔަވައިގެންތިބި އެތައްބައެއް ރާއްޖޭގައި އެބައުޅެއެވެ. އެމީހުންގެ އަތުގައި އެތައް ސެޓުފިކެޓެއް އެބައޮތެވެ. އެއިން ކުރެވޭ ބޭނުންމެއްނެތެވެ. ސެޓުފިކެޓުތައް ހުރީ މަތާރަންފިލާމަތީގައެވެ. މީހާގެ ޚިދުމަތެއް ޤައުމަށް ނުލިބެއެވެ. ދިމާވާގޮތަކުން މުޖުތަމަޢުން ވެސް އޭނާ ނުފެނެއެވެ. ތައުލީމާއެކު ރިވެތި އަޚްލާގު ދަސްނުކުރެވުނީ ކަމަށްވެދާނެއެވެ.
މަތީ ސެޓެފިކެޓެއް ހިފައިންގެން އައުމުން ބޮޑު މަގާމެއް ލިބިދާނެއެވެ. އެހެނަސް އަޚްލާގެއްނެތިއްޔާ އެމަޤާމުގައި އޭނާއަށް ދެމިހުންނަން ދަތިވެދާނެއެވެ. އެހެން ވަނީ ދިމާވާ ގޮންޖެހުންތަކާ ކުރިމަތި ލުމުގެ ޤާބިލްކަން ނެތިގެން ކަމަށްވެދާނެއެވެ. އެހެންނަމަވެސް ރިވެތި އަޚްލާގު ދަސްކޮށްފައި ހުރުމުން ލިބިފައިހުރި އިލްމުގެ މައްޗަށް އަޚްލާގު އިސްކޮށް ގޮންޖެހުންތަކާ ކުރިމަތިލައި ހައްލުން ހޯދަން ފަސޭހަވާނެއެވެ. އޭގެ ސަބަބުން މުޖުތަމަޢަށް ކުރާ ފައިދާ އިންތިހާއަށް ބޮޑުވެގެންދެއެވެ. އަޚްލާގާއި ރިވެތި މުޢާމަލާތާއި ސާފު ޢަމަލުގެ ސަބަބުންނެވެ.

ކީރިތި ރަސޫލާ މުޙައްމަދު ޞައްލަﷲ
ޢަލައިހި ވަސައްލަމަ އަޅުގަނޑުމެންނަށް ދަސްކޮށްދެއްވީ އޯގާތެރިވުމަށެވެ. އިޙްތިރާމް ކުރުމަށެވެ. ތެދުވެރިވުމަށެވެ. މިއީ ޙަޤީޤީ ތަޢުލީމު
ލިބިފައިވާ މީހެއްގެ ކިބައިގައި ހުންނަންޖެހޭނޭ އަސާސީ ސިފަތަކެވެ.
ޑިގްރީއަކުން ނުވަތަ ޢިލްމެއް ވާންޖެހޭނީ މިކަންކަމުގެ ތެރެއަށް ވަންނަން ބޭނުންކުރާ ތަޅުދަނޑިއެއްގެ ގޮތުގައެވެ. އެ ދޮރުތައް ހުޅުވުމަށްފަހު ދާއިމަށް ހުޅުވިފައި ހުންނަންޖެހޭނެއެވެ. އެކަން އެގޮތަށް ކުރެވޭނީ އިސްލާމީ ރިވެތި އުސޫލުން ބައްޓަންވެފައިވާ އަމަލުތަކުންނެވެ.
‎ސްޓީވަން ކޮވީގެ ”ދަ 7 ހެބިޓްސް އޮފް ހައިލީ އިފެކްޓިވް ޕީޕަލް“ ފޮތުގައި މި އުސޫލުތަކާ ގުޅޭ މުހިންމު ނުކުތާތަކެއް ހިމަނާފައިވެއެވެ.
ކޮވީގެ ފުރަތަމަ އާދަ ކަމުގައިވާ ”ޕްރޯއެކްޓިވްވުން“ އަކީ އަމިއްލަ ޢަމަލުތަކާއި ނިންމުންތަކަށް ޒިންމާވުމަށް ބާރުއަޅާ އުސޫލެކެވެ. މިއީ
އިސްލާމްދީނުގައި ބާރުއަޅާ ޖަވާބުދާރީވުމުގެ މަފްހޫމާ އެއްގޮތްވާ އުސޫލެކެވެ. މީގެ އިތުރުން، ލީޑަރުންނާއި މުވައްޒަފުންގެ ހައިސިއްޔަތުން
ޓީމް ލީޑަރެއްގެ ދައުރު އަދާކުރުމުގެ މުހިންމުކަން މި މަޤާލާގައި ފާހަގަކޮށްފައިވެއެވެ. ‎ކޮވީގެ ފަސްވަނަ އާދަ ކަމުގައިވާ ”ފުރަތަމަ
އަޑުއެހުމަށްފަހު ދެން ވާހަކަދެއްކުން“ އަކީ އެހެން މީހުންގެ ވާހަކަ އަޑުއެހުމަށް އިސްކަންދޭ އުސޫލެވެ. މި އުސޫލުގެ ސަބަބުން މަސައްކަތު
މާޙައުލުގައި އުޅޭއިރު މުވައްޒަފުންގެ އަޑު އިވޭނެއެވެ. އަހާނެއެވެ. އިޙްސްސާސް ކުރެވޭނެއެވެ. އިޙްތިރާމާއި އަގު ވަޒަންކުރެވޭކަން ކަށަވަރުކޮށްދެވޭނެއެވެ. އަދި މިފަދަ މާޙައުލެއްގައި އުފެއްދުންތެރިކަމާއި އައު ޚިޔާލުތައް އުފެދުމަށް
މަގުފަހިވެގެންދެއެވެ. ‎ ތަޢުލީމީ ދާއިރާއަށް އަންނަމުންދާ ބަދަލުތަކާއެކު، ގްރެޖުއޭޓްވުމަކީ ތަޢުލީމުގެ ނިމުމެއް ނޫންކަން ހަނދާންކުރުން
މުހިންމެވެ. ހުނަރު ދަސްކުރުމާއި، އަމިއްލަ ޒާތަށް ކުރިއެރުން ހޯދުމާއި، އަދި ލިބޭ ރަނގަޅު މަޢުލޫމާތު ހެޔޮ ޢަމަލުތަކަށް ބަދަލުކުރުމުގެ ޤާބިލުކަމަކީ ކާމިޔާބު މާނަކުރާ ޙަޤީޤީ ރޮނގުތަކެވެ.

އިސްލާމްދީނަކީ ތަޢުލީމަށް ލޯބިކުރާ ދީނެކެވެ. ޢިލްމު އުނގެނުމަށް ބާރުއަޅާ ދީނެކެވެ. އޯގާތެރިކަމަށް ބާރުއަޅާދީނެކެވެ. އެކަކު އަނެކަމަށް ހަމްދަރުދީއާއި އަޅާލުމަށް ގޮވާލާ ދީނެކެވެ. މިހުރިހާކަމެއްގެ އަޑީގައި އޮތީ ރިވެތި އަޚުލާގެވެ. ޚުލްގެވެ. މިއީ ޑިގްރީއަކަށްވުރެ މާ
މަތިވެރި ކަމެއްނޫން ހެއްޔެވެ؟ ޢިލްމާއެކު ރިވެތި އަޚްލާގެއްގައި ހިފަހައްޓަށް އެއަށް އަމަލު ކުރާ ކަމަށްވާނަމަ ދެދުނިޔޭގައި ތިބާ ކާމިޔާބު ވެއްޖެއެވެ.