ޗައިނާގެ މަސްވެރިފުޅަނދު

ޗައިނާގެ މަސްވެރި އުޅަނދުފަހަރަކީ ޖިއޮޕޮލިޓިކަލް ހަތިޔާރެއްގެ ގޮތުގައި ބޭނުންކުރާ ވަސީލަތެއް ކަމަށް އެމެރިކާގެ ކޮންގްރެސްގެ ކޮމިޓީއަކުން ތުހުމަތުކޮށްފި އެވެ. އެމެރިކާގެ ހައުސް އޮފް ރެޕްރެޒެންޓެޓިވްސް އިން އުފައްދާފައިވާ ޗައިނާއާ ބެހޭ ސެލެކްޓް ކޮމިޓީން ކުރިއަށް ގެންދިޔަ ތަހުގީގަކަށްފަހު، ދުނިޔޭގައި އެންމެ ފުޅާދާއިރާއެއްގައި ގަވާއިދާ ހިލާފަށް މަސްވެރިކަން ކުރާ ގައުމަކީ ޗައިނާ ކަމަށް ތުހުމަތުކޮށްފިއެވެ. އެ ކޮމިޓީގެ ރިޕޯޓުގައި ބުނެފައިވާ ގޮތުގައި ޗައިނާގެ ބޮޑު މަސްވެރި ފްލީޓަކީ ހަމައެކަނި ވިޔަފާރީގެ ބޭނުމަށް ބޭނުންކުރާ އެއްޗެއް ނޫން ކަމަށާއި، އެއީ ޖިއޮޕޮލިޓިކަލް ހަތިޔާރެއްގެ ގޮތުގައި ބޭނުންކުރާ ވަސީލަތެކެވެ. ޖުމްލަ 16،000 އުޅަނދު ހިމެނޭ ޗައިނާގެ މި ފްލީޓުން އައްސޭރިފަށުގެ ގައުމުތަކަށް ބިރުދައްކައި، ކަނޑުގެ ވަސީލަތްތައް ނަހަމަ ގޮތުގައި ބޭނުންކޮށް، މަޖުބޫރުން މަސައްކަތް ކުރުވުމުގެ އަމަލުތައް ހިންގާ ކަމަށް ވެސް ރިޕޯޓުގައިވެއެވެ. ކޮންގްރެސްގެ މެމްބަރު ކާލޯސް ގިމެނޭޒް ވިދާޅުވި ގޮތުގައި ޗައިނާގެ މި އުޅަނދުފަހަރު ހަރަކާތްތެރިވަނީ "އަސްކަރީ ފައުޖެއްގެ ސިފައިގައި" ކަމަށާއި، މިއީ އެމެރިކާގެ ގައުމީ އަދި އިގްތިސާދީ ސަލާމަތަށް އޮތް ނުރައްކަލެކެވެ. 2023 ވަނަ އަހަރު އުފެއްދި މި ކޮމިޓީން ވަނީ ޗައިނާގެ ކަނޑުމަހުގެ އުފެއްދުންތައް 'ސީފުޑް އިމްޕޯޓް މޮނިޓަރިންގ ޕްރޮގްރާމް' ގެ ދަށުން ވަރުގަދައަށް ބެލެހެއްޓުމަށް ގޮވާލާފައެވެ. މީގެ އިތުރުން، 'އައުޓްލޯ އޯޝަން ޕްރޮޖެކްޓް' އިން ހޯދާފައިވާ ހޯދުންތަކަށް ރިއާޔަތްކޮށް، ޗައިނާގެ އުޅަނދުފަހަރުގައި އުތުރު ކޮރެއާ އަދި އުއިގޫރު ދަރިކޮޅުގެ މީހުން ލައްވައި މަޖުބޫރުން މަސައްކަތް ކުރުވާ ކަމުގެ ތުހުމަތުތައް ވެސް ވަނީ ތަކުރާރުކޮށްފައެވެ. ކޮމިޓީގެ ރިޕޯޓުގައި ފާހަގަކޮށްފައިވާ މައިގަނޑު ފަސް ނުކުތާއެއްގެ ތެރޭގައި، ޗައިނާއިން ދުނިޔޭގެ ކަނޑުމަސް ޕްރޮސެސްކުރުމުގެ ދާއިރާ މުށުތެރެއަށްލައި، ދައުލަތުގެ އެހީތެރިކަމާއެކު އަގުތައް ކޮންޓްރޯލްކޮށް، އެމެރިކާގެ އުފެއްދުންތެރިކަން ބަލިކަށިކުރުމަށް ބާޒާރުގައި ނުފޫޒު ފޯރުވާކަން ހިމެނެއެވެ. މިއީ ބައިނަލްއަގުވާމީ ގަވާއިދުތަކަށް ގޮންޖެހުމެއް ކަމަށް ކޮމިޓީން ސިފަކުރެއެވެ. މި މައްސަލައަށް ހައްލެއް ހޯދުމުގެ ގޮތުން، އެމެރިކާގެ ކޯސްޓް ގާޑަށް ދޭ ބަޖެޓު އިތުރުކުރުމަށާއި، އުޅަނދުފަހަރު ދެނެގަނެވޭނެ ހާއްސަ ނިޒާމެއް ގާއިމުކުރުމަށް ކޮމިޓީން ލަފާދީފައިވެއެވެ. އަދި ޗައިނާގެ ނުފޫޒު ކުޑަކުރުމަށްޓަކައި "ފިޝް ފޯ ސެކިއުރިޓީ" ގެ ނަމުގައި ބައިނަލްއަގުވާމީ އިއްތިހާދެއް އުފެއްދުމަށް ވެސް ވަނީ ހުށަހަޅާފައެވެ. މޮނޮކްރޯމް މީޑިއާ ސިންޑިކޭޓެޑްް ނިއުސް ސާވިސް