މި ތަހުގީގުތަކުން ހާމަވެފައިވާ ގޮތުގައި، ސިފައިންގެ އެތެރޭގައި ވައްކަމާއި، މަކަރާއި ހީލަތުން މުދާ ހޯދުމާއި، ހަތިޔާރު އުފެއްދުމުގައި ކޮރަޕްޝަން ހިމެނޭކަން ވަނީ ފާހަގަކުރެވިފައެވެ. މީގެ އިތުރުން، އަސްކަރީ ސާމާނުގެ ފެންވަރާ ގުޅޭގޮތުން ދޮގު ރިޕޯޓުތައް ހުށަހަޅާފައިވާކަން ވެސް ވަނީ ހާމަވެފައެވެ.މި ކެމްޕޭނަކީ ހަމައެކަނި އަސްކަރީ ގޮތުން އަދަބު ދިނުމުގެ އިތުރުން، ސިފައިންގެ މައްޗަށް ރައީސް ޝީގެ އަމިއްލަ ބާރުވެރިކަން ވަރުގަދަކުރުމަށް ކުރާ މަސައްކަތެއްގެ ގޮތުގައި މުހައްލިލުން ދެކެއެވެ. ހާއްސަކޮށް ދުނިޔޭގެ ސިޔާސީ މަސްރަހު ހޫނުވެފައިވާ މި ދަނޑިވަޅުގައި، ސިފައިންގެ ވަފާތެރިކަން ކަށަވަރުކުރުމަކީ ޝީގެ މައިގަނޑު އެއް އަމާޒެވެ. މި ފިޔަވަޅުތަކުގެ ސަބަބުން ޗައިނާގެ ސިފައިން ޒަމާނީ ކުރުމަށް ކުރާ މަސައްކަތްތަކަށް، ހާއްސަކޮށް ނިއުކްލިއާ އަދި މިސައިލް ފޯސްގެ ތަރައްގީއަށް މަޑުޖެހުމެއް އަތުވެދާނެ ކަމަށް ބެލެވެއެވެ. ނަމަވެސް، މީގެ ސަބަބުން ސިފައިންގެ ހައިރާކީގެ މައްޗަށް ޝީގެ ކޮންޓްރޯލް އިތުރަށް ވަރުގަދަވެގެންދާނެއެވެ. ޓައިވާން ކަނޑުއޮޅިއާއި ދެކުނު ޗައިނާ ކަނޑުގެ މައްސަލައިގައި ބޭރުގެ ފިއްތުންތައް އިތުރުވަމުންދާ ދަނޑިވަޅެއްގައި، މިފަދަ ބޮޑު އިސްލާހީ ފިޔަވަޅެއް އެޅުމަކީ ޗައިނާގެ ދިފާއީ ސިޔާސަތަށް އަންނާނެ ބޮޑު ބަދަލެއްގެ ގޮތުގައި ފާހަގަކުރެވެއެވެ. ޖެނެރަލް ޖަންގް ޔޫޝިއާ ފަދަ އިތުބާރު ހުރި ބޭފުޅުންނަށް އަމާޒުވުމަކީ ކޮރަޕްޝަން ނައްތާލުމުގައި ޝީ އެއްވެސް ދޫދިނުމެއް ނުދެއްވާނެ ކަމުގެ ހެއްކެކެވެ.
ދުނިޔެ
ޗައިނާގެ ދިފާއީ ސިޔާސަތަށް އަންނާނެ ބޮޑު ބަދަލެއް
ޗައިނާގެ ރައީސް ޝީ ޖިންޕިންގެ ސަރުކާރުން އެގައުމުގެ ސިފައިންގެ އެންމެ މަތީ ފަންތީގައި ހިމެނޭ އިސްވެރިންނަށް އަމާޒުކޮށް ކޮރަޕްޝަނާ ދެކޮޅު ވަރުގަދަ ކެމްޕޭނެއް ފަށައިފިއެވެ. ފޮރިން ޕޮލިސީ މެގަޒިންއިން ރިޕޯޓްކޮށްފައިވާ ގޮތުގައި، މި ފިޔަވަޅުތަކުގެ މައިގަނޑު އަމާޒަކަށް ވެފައިވަނީ ޝީގެ އަރިސް ބޭފުޅެއް ކަމަށްވާ ޖެނެރަލް ޖަންގް ޔޫޝިއާއެވެ.
ޕީޕަލްސް ލިބަރޭޝަން އާމީ (ޕީއެލްއޭ) ގެ އެތެރޭގައި ހިންގާ މި ކެމްޕޭނުގެ ދަށުން މިހާތަނަށް ގިނަ އަދަދެއްގެ އިސް އޮފިސަރުން ވަނީ މަގާމުން ވަކިކޮށް ނުވަތަ ތަހުގީގަށް ހާޒިރުކޮށްފައެވެ. މީގެ ތެރޭގައި ހާއްސަކޮށް ޗައިނާގެ ސްޓްރެޓީޖިކް މިސައިލް ފޯސް ނުވަތަ ރޮކެޓް ފޯސްގެ އިސްވެރިން ހިމެނޭކަން ފާހަގަކުރެވެއެވެ.
