މިއަހަރުގެ ހައްޖުގެ އަޅުކަމަށް ސްރީލަންކާއިން ދިޔަ 3,500 ހައްޖާޖީންނަށް މިނާގެ ފޭލިގެތަކުގައި ހޭދަކުރަންޖެހުނު ހަތަރު ދުވަސް، އިންތިޒާމުތައް ދަށްވުމުގެ ސަބަބުން ބިރު ބޮޑު ހުވަފެނަކަށްވިއެވެ. އިންސާނީ ކަރާމާތް ގެއްލޭ ފަދަ ދަށު ދަރަޖައިގެ ޙާލަތެއްގައި ހައްޖާޖީން އުޅެންޖެހުމުން، ސްރީލަންކާގެ ހައްޖު ކޮމިޓީގެ ހިންގުންތެރިކަމެއް ނެތްކަން ހާމަވެ، އާންމުންގެ ބޮޑު ނުރުހުމެއް ވަނީ އަމާޒުވެފައެވެ.
މި މައްސަލައިގެ މުގުލުގައިވަނީ، ތަޖުރިބާކާރު ލޯކަލް ޓްރެވަލް އެޖެންޓުންގެ ލަފަޔާ ޚިލާފަށް، ހައްޖު ކޮމިޓީން އަމިއްލައަށް އިޚްތިޔާރުކުރި "ރިހްލަތު ވަ މަނާފިއު" ކުންފުންޏެވެ. އެ ކުންފުންޏާ ޙަވާލުކޮށްގެން ދިން ޚިދުމަތްތަކުގެ ސަބަބުން އުފެދުނު ބޮޑެތި މައްސަލަތަކުގައި:
-
ކޮންމެ ހައްޖާޖީއަކު އެންމެ މަތީ ފަންތީގެ "ކެޓަގަރީ އޭ" ގެ ޚިދުމަތްތައް ހޯދުމަށްޓަކައި 562,000 ސްރީލަންކަން ރުޕީސް (26ހާސް ދިވެހި ރުފިޔާ) ގެ އަގެއް ދައްކާފައިވެއެވެ. ނަމަވެސް، އެމީހުން ބޭތިއްބީ ދެއްކި އަގުގެ ދެބައިކުޅައެއްބަޔަށްވުރެ ކުޑަ އަގަކަށް ލިބޭ، އެންމެ ދަށު ފަންތީގެ "ކެޓަގަރީ ސީ" ގެ ފޭލިގެތަކުގައެވެ.
-
މުޅި ގްރޫޕަށް ދީފައިވަނީ އެންމެ 32 ފާޚާނާއެވެ. މި ތަންތަނަކީ ފެންވަރަންވެސް ބޭނުންކުރާ ތަންތަނަށް ވުމުން، ނިސްބަތުން ކޮންމެ 100 ހައްޖާޖީއަކަށް ޖެހެނީ އެންމެ ފާޚާނާއެކެވެ. ކޮންމެ މީހަކު އެންމެ 5 މިނެޓް ހޭދަކުރި ނަމަވެސް، ދުވާލަކު ފާޚާނާއަށް ވަދެވޭނީ އެންމެ ދެ ފަހަރެވެ. މީގެ ސަބަބުން އުމުރުން ދުވަސްވީ މީހުންނާއި ބަލިމީހުން ގަދަ ހޫނުގައި ކިއޫތަކުގައި ރޮއިރޮއި ތިބެންޖެހުނެވެ.
-
ކެއުމުގެ އިންތިޒާމު ހަމަޖައްސާފައިވަނީ ފިރިހެނުންނަށް އެއް ލައިން އަދި އަންހެނުންނަށް އެއް ލައިނެވެ. އަޅުކަމުގެ ބުރަ މަސައްކަތަށްފަހު، ސަހަރާގެ ގަދަ ހޫނުގައި އެތައް ގަޑިއިރަކު ކިއޫގައި ތިބެގެން ލިބުނު ކާނާއަކީ އެއްގޮތަކަށްވެސް ކާންކަމުދާ ފެންވަރުގެ އެއްޗެއް ނޫން ކަމަށް ބުނެއެވެ.
އާންމުންގެ މެދުގައި އެންމެ ބޮޑު ރުޅިވެރިކަމެއް އުފެދުނީ، އާންމު ހައްޖާޖީން ހޫނާއި ބަނޑުހައިހޫނުކަމުގެ ސަބަބުން ހާލުގައި ތިބިއިރު، ހައްޖު ކޮމިޓީގެ މެންބަރުން އާންމު ފޭލިގެތަކަށް ޒިޔާރަތްކުރުމަށްވެސް އިންކާރުކޮށްފައިވާތީއެވެ. އޭގެ ބަދަލުގައި، އެ ބޭފުޅުން ތިއްބެވީ އާންމުންގެ ދަތިތަކާ ދުރުގައި، އަރާމު ވީއައިޕީ އެކޮމޮޑޭޝަންތަކުގައި ފިލައެވެ.
މިއީ ހަމައެކަނި އިދާރީ ފެއިލްވުމެއް ނޫން ކަމަށާއި، މީގެ ތެރޭގައި މާލީ ޚިޔާނާތާއި ހައްޖާޖީންގެ ޙައްޤުތަކަށް އަރައިގަތުން ހިމެނޭ ކަމަށް ބުނެ ގިނަބަޔަކު ދަނީ އަޑުއުފުލަމުންނެވެ. ހައްޖާޖީންގެ ރައްކާތެރިކަމަށް ދިން ފައިސާއަށް ވީނުވީއެއްނޭނގި ޚިޔާނާތްތެރިވި ކަމަށްވެސް ބުނެއެވެ.
މި ކާރިސާގެ ފުރިހަމަ ޒިންމާ ހައްޖު ކޮމިޓީގެ ފަސް މެންބަރުންވެސް އުފުލަންޖެހޭނެ ކަމަށް ބުނެ، އެ ބޭފުޅުން ވަގުތުން އިސްތިއުފާ ދިނުމަށް މިހާރު ދަނީ ގޮވާލަމުންނެވެ.
