ޓެރަރިސްޓުންގެ ހަމަލާގައި 20 މީހުން މަރާލައިފި

ޕާކިސްތާނުގެ ހުޅަނގު ދެކުނުގެ ބަލޫޗިސްތާން ޕްރޮވިންސްގައި އޮންނަ ކޯލާ ދެލި ނަގާ މައިނަކަށް ޓެރަރިސްޓުން ދިން ޙަމަލާއެއްގައި 20 މީހުން މަރާލާފައިވާ ކަމަށް އެގައުމުގެ ފުލުހުން މިއަދު ބުނެފިއެވެ. ކުއެޓާ ސިޓީގެ އިރުމަތީގައި އޮންނަ އެ އަވަށުގެ ޕޮލިސް ސްޓޭޝަންގެ އޮފިސަރު ހުމާޔޫން ޚާން ބުނީ، ހަތިޔާރު އެޅި ބަޔަކު ޑޯކީ ސަރަހައްދުގައި ހުންނަ ޖުނައިދު ކޯލް ކޮމްޕެނީގެ މައިން ނަގާ މަރުކަޒަށް ހަމަލާދީފައިވަނީ ފަތިސް ގަޑީގައެވެ. އަދި އެމީހުން ބަރުހަތިޔާރު ބޭނުންކޮށްފައިވާ ކަމަށް އޭނާ ބުނެއެވެ. އެމީހުން ރޮކެޓާއި ގްރެނޭޑް ވެސް ހަމަލަ ދޭން ބޭނުން ކުރިކަމަށް ބުނެއެވެ. "ޑޯކީ ހޮސްޕިޓަލަށް މަރުވެގެން މިހާތަނަށް 20 މީހަކު ގެނެސްފައިވޭ،" ޑޯކީގެ ހަސްފަތާލުގެ ޑޮކްޓަރެއް ކަމަށްވާ ގޯހަރު ޚާން ޝާދިޒާއީ ބުންޏެވެ.