އިންޑިއާއަށް ދަތުރުކުރާ ފަތުރުވެރިން އާންމުކޮށް ގައުމަށް އެތެރެވުމަށް އިޚްތިޔާރުކުރާ ދިއްލީގެ ބަދަލުގައި، މުމްބާއީ އިޚްތިޔާރުކުރުމަށް ބާރުއަޅައި މަޝްހޫރު ނޫހެއް ކަމަށްވާ ޔޫކޭގެ’ޓެލެގްރާފް‘ އިން ރިޕޯޓެއް ޝާއިއުކޮށްފިއެވެ. މި ރިޕޯޓުގައި ބުނެފައިވަނީ މުމްބާއީއަކީ ފަތުރުވެރިންނަށް މާ ބޮޑަށް މަރުހަބާ ކިޔާ، ސަގާފީ ގޮތުން މުއްސަނދި އަދި ބިނާވެށީގެ ގޮތުން ހިތްގައިމު ސިޓީއެއް ކަމަށެވެ.
މުމްބާއީއަކީ ”އިރުމަތީގެ އޮކްސްފޯޑް“ ގެ ގޮތުގައި ސިފަކުރަމުން، އެ ސިޓީގައި ހުރި ޔުނިވާސިޓީތަކާއި، އަދަބީ ތާރީޚާއި، ފިކުރީ ދިރިއުޅުމަށް މި ރިޕޯޓުގައި އަލިއަޅުވާލާފައިވެއެވެ. މީގެ އިތުރުން، އިނގިރޭސި އިސްތިއުމާރީ ދުވަސްވަރުގެ މަގުތަކާއި، މޫދު ފެންނަ ގޮތަށް ހުންނަ ހިތްގައިމު ހިނގާ މަގުތަކުގެ ސަބަބުން މުމްބާއީއަކީ އިންޑިއާއަށް ވަދެވޭ އެންމެ ރީތި ދޮރާށި ކަމަށް ބުނެފައިވެއެވެ.
ދިއްލީގެ ތޮއްޖެހުމާއި ސިޔާސީ ހަލަބޮލިކަމާ ބަލާއިރު، މުމްބާއީގެ އައްސޭރިފަށުގެ ހުޅުވާލެވިފައިވާ މާހައުލާއި ބައިނަލްއަގުވާމީ ފެންވަރުގެ ހަކަތައަކީ ފަތުރުވެރިންނަށް މާ ފަސޭހަވާނެ ކަންތައްތަކެއް ކަމަށް ލިޔުންތެރިޔާ ފާހަގަކުރެއެވެ. ޚާއްސަކޮށް އަލަށް އިންޑިއާއަށް ޒިޔާރަތްކުރާ މީހުންނަށް މުމްބާއީއަކީ ޒަމާނީ އިންޑިއާގެ އަސްލު ސޫރަ ވަރަށް ބޮޑަށް ދައްކުވައިދޭ ސިޓީއެކެވެ.
މި ރިޕޯޓުގައި މުމްބާއީގެ އަވަށްތަކާއި، ދާރުލްއާސާރުތަކުގެ އިތުރުން ކާބޯތަކެތީގެ މަޝްހޫރު ސަރަހައްދުތަކަށް ޒިޔާރަތްކުރުމަށް ލަފާދީފައިވެއެވެ. މި ތަންތަނުން ސިޓީގެ ތާރީޚާއި، ތައުލީމީ ކުރިއެރުމާއި، އަދި މިހާރުގެ ޒަމާނީ ސަގާފަތް އެކުވެފައިވާ މިންވަރު ފެނިގެންދާނެ ކަމަށް ބުނެފައިވެއެވެ.
ނިންމާލަމުން މި ރިޕޯޓުގައި ފާހަގަކޮށްފައިވަނީ، އިންޑިއާގެ ތަފާތު ތަޖުރިބާއެއް ހޯދަން ބޭނުންވާ ފަރާތްތަކަށް މުމްބާއީއަކީ އެންމެ އެކަށީގެންވާ މަންޒިލް ކަމަށެވެ. މިއީ ހަމައެކަނި ވިޔަފާރީގެ މަރުކަޒެއް ނޫން ކަމަށާއި، މިއީ ފަތުރުވެރިންނަށް ބޭނުންވާ ހުރިހާ ފުރުސަތުތަކެއް ފަހިވެފައިވާ ސިޓީއެއް ކަމަށްވެސް ބުނެފައިވެއެވެ.
