ޕާކިސްތާނުގެ ސަރުކާރާއި އަމިއްލަ ތައުލީމީ އިދާރާތަކަށް ނިސްބަތްވާ ދަރިވަރުންގެ ޖަމިއްޔާތައް ގުޅިގެން، ފެބްރުއަރީ މަހުގެ 12 ވަނަ ދުވަހު މުޅި ގައުމުގައި ”ސްޓޫޑަންޓް ސޮލިޑަރިޓީ މާޗް“ ނުވަތަ ދަރިވަރުންގެ އެއްބައިވަންތަކަމުގެ ހިނގާލުމެއް ބޭއްވުމަށް ނިންމައިފިއެވެ.

މި ހިނގާލުން ބާއްވާނެކަން އިއުލާންކޮށްފައިވަނީ  ލާހޯރު ޕްރެސް ކްލަބުގައި ބޭއްވި ނޫސްވެރިންގެ ބައްދަލުވުމެއްގައެވެ. މި ބައްދަލުވުމުގައި ޕްރޮގްރެސިވް ސްޓޫޑަންޓްސް ކަލެކްޓިވް (ޕީ.އެސް.ސީ) ގެ ސެކްރެޓަރީ ޖެނެރަލް އިގްބާލް ޚާން، ދަ ސްޓޫޑަންޓްސް ހެރަލްޑްގެ އެޑިޓަރު ގާޒީ ޝެހްރިޔާރު، ޕީ.އެސް.ސީ ގެ ތަރުޖަމާނު ސާރާ އަލީ އަދި ޖޭ.ކޭ.އެން.އެސް.އެފް ގެ ލީޑަރު މުޖީބު އަކްބަރުގެ އިތުރުން ދަރިވަރުންގެ އެކި އިސް ފަރާތްތަކުން ބައިވެރިވިއެވެ.

މި ހަރަކާތުގެ ތެރެއިން ލާހޯރުގައި ބާއްވާ ހިނގާލުން ކުރިއަށްދާނީ ގަވަރްމަންޓް ކޮލެޖް ޔުނިވަރސިޓީ (ޖީ.ސީ.ޔޫ) އިން ފެށިގެން ޕަންޖާބް އެސެމްބްލީއާ ހަމައަށެވެ.

މި ހިނގާލުމުގެ މައިގަނޑު މަގްސަދަކީ މަތީ ތައުލީމު ހާސިލުކުރާ ދަރިވަރުންނަށް ކުރިމަތިވަމުންދާ އެކި ގޮންޖެހުންތަކާއި، ހާއްސަކޮށް ދަރިވަރުން އަމިއްލައަށް މަރުވާ މައްސަލައަށް ހައްލެއް ހޯދުމަށް ސަރުކާރަށް ބާރުއެޅުމެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އިގްބާލް ޚާން ވިދާޅުވީ، ޔުނިވަރސިޓީތަކުގެ ފީ ބޮޑުވުމާއި، ކިޔަވާކުދިންނަށް ކުރިމަތިވާ އެކި ކަހަލަ ފުރައްސާރަތަކާއި، އަދި ތައުލީމީ ނިޒާމުގެ ނިންމުންތައް ނިންމުމުގައި ދަރިވަރުންގެ ބައިވެރިވުން ނެތުމުގެ ސަބަބުން ކިޔަވާކުދިން ތިބީ ވަރަށް ބޮޑު ނުތަނަވަސްކަމެއްގެ ތެރޭގައެވެ.

އޭނާ އިތުރަށް ފާހަގަކުރެއްވި ގޮތުގައި، ސަރުކާރުގެ ޔުނިވަރސިޓީތަކުގައި އިދާރީ ގޮތުން ދަރިވަރުންނަށް އިހާނެތިކޮށް ހިތައި އިހުތިރާމް ކުޑަކުރަމުންދާއިރު، އަމިއްލަ ޔުނިވަރސިޓީތަކުން އަމަލުކުރަމުންދަނީ ހަމައެކަނި ފައިސާ ހޯދުމަށް މަސައްކަތްކުރާ ”މާފިއާ“ އެއްގެ އުސޫލުންނެވެ. މިފަދަ ސިޔާސަތުތަކުގެ ސަބަބުން ދަރިވަރުންގެ މުސްތަގުބަލަށް ބޮޑެތި ހުރަސްތަކެއް ކުރިމަތިވަމުންދާ ކަމަށްވެސް އޭނާ ވިދާޅުވިއެވެ.