އީރާނުގައި ފަހަކަށް އައިސް ހިނގާދިޔަ ނުރައްކާތެރި ހަމަނުޖެހުންތަކާއި ޓެރަރިސްޓް ހަމަލާތަކުގެ ފަހަތުގައި އޮތީ ވޮޝިންގޓަން  ކަމަށް އެމެރިކާގެ ކުރީގެ ސެކްރެޓަރީ އޮފް ސްޓޭޓް އަދި ސީ.އައި.އޭގެ ކުރީގެ ޑިރެކްޓަރު މައިކް ޕޮމްޕޭއޯ، ފާޅުގައި އިއުތިރާފުވެއްޖެއެވެ.

އިޒްރޭލުގެ ’ޗެނަލް 13‘ އަށް ދިން އިންޓަވިއުއެއްގައި ޕޮމްޕޭއޯ ބުނެފައިވަނީ، އީރާނުގައި ފެނިގެންދިޔަ ހަމަނުޖެހުންތަކަކީ އެ ގައުމުގެ އެތެރޭގެ އަމިއްލަ އިހުސާސްތަކަކުން އުފެދުނު ކަމެއް ނޫން ކަމަށެވެ. އޭގެ ބަދަލުގައި، އެއީ އީރާނުގެ ”ވެރިކަން ބަދަލުކުރުމަށް“ ބޭރުގެ ބާރުތަކުން ފަރުމާކޮށްގެން ހިންގި ވަރުގަދަ މަސައްކަތް ކަމަށް އޭނާ ކަށަވަރުކޮށްދިނެވެ.

އީރާނުގެ ހަމަނުޖެހުންތަކުގެ ފައިދާ ހުޅަނގުގެ ގައުމުތަކަށް ނެގިފައި ނުވާ ކަމަށް ބުނެ ދެކެވޭ ވާހަކަތަކަށް ރައްދު ދެމުން ޕޮމްޕޭއޯ ބުނީ، އެ ގައުމަށް ބޭރުގެ ވަރަށް ގިނަ ވަސީލަތްތަކާއި އެހީތެރިކަން ފޯރުކޮށްދެވުނު ކަމަށެވެ.

”އެހީތެރިކަން ލިބުނު، ވަރަށް ގިނަ އެހީތެރިކަން ލިބުނު،“ ޕޮމްޕޭއޯ ބުންޏެވެ. އަދި އޭނާ އިތުރަށް ބުނި ގޮތުގައި އެ ހުރިހާ އެހީތަކެއް އާންމުންނަށް ނުފެނިދާނެއެވެ. ނަމަވެސް އެމެރިކާއިން އީރާނުގެ ސަރުކާރާ ދެކޮޅަށް ކުރެވެން ހުރި ހުރިހާ މަސައްކަތެއް ކުރަމުންދާ ކަމުގެ ފުރިހަމަ ޔަގީންކަން އޭނާ ދިނެވެ.

މީގެ އިތުރުން، މިދިޔަ ޖެނުއަރީ މަހުގެ ކުރީކޮޅު ސޯޝަލް މީޑިއާ ޕްލެޓްފޯމް ’އެކްސް‘ ގައި ކުރި ޕޯސްޓެއްގައި ޕޮމްޕޭއޯ ވަނީ އީރާނުގެ މަގުތަކުގައި އިޒްރޭލުގެ ’މޮސާޑް‘ އެޖެންޓުން ހަރަކާތްތެރިވަމުންދާ ކަމަށް ބުނެފައެވެ. އަދި އީރާނުގެ މަޝްހަދު، ތެހެރާން އަދި ޒާހިދާން ފަދަ ސިޓީތަކަކީ ހަމަނުޖެހުން އުފެއްދުމަށް އަމާޒުކުރެވުނު މައިގަނޑު ސަރަހައްދުތައް ކަމުގައި އޭނާ ފާހަގަކުރިއެވެ.

ޕޮމްޕޭއޯ އަކީ ޑޮނަލްޑް ޓްރަމްޕްގެ ސަރުކާރުގައި އީރާނާ ދެކޮޅަށް ގެންގުޅުނު  އެންމެ ވަރުގަދައަށް ފިއްތުންތައް ކުރިމަތިކުރުމުގެ ސިޔާސަތުގެ މައި މޭސްތިރިއެވެ. އޭނާއަކީ އީރާނުން ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައިވާ ’މުޖާހިދީނޭ ޚަލްގް‘ އާ ގާތް ގުޅުމެއް ބާއްވާ، އެ ޖަމާއަތުގެ އެކިއެކި ބައްދަލުވުންތަކުގައި ބައިވެރިވެ އެފަރާތްތަކަށް ތާއީދުކުރާ ފަރާތެކެވެ.