އީރާނުގެ ނިއުކްލިއަރ ފައިލްއާ ގުޅޭ މައްސަލަތައް ހައްލު ކުރުމަށް އެމެރިކާއާއެކު މަޝްވަރާ ކުރިއަށް މުއްސަނދި ކޮށްފައިވާ ޔޫރެނިއަމް އެމެރިކާއާ ހަވާލު ނުކުރާނޭ ކަމަށް އީރާނުން ބުނެފިއެވެ. އެ ތަކެތި އެމެރިކާއަށް ބަދަލުކުރުމާ މެދު އެއްވެސް މަރުހަލާއެއްގައި ވިސްނާފައި ނުވާ ކަމަށް އީރާނުގެ ފޮރިން މިނިސްޓްރީގެ ތަރުޖަމާން އިސްމާއީލް ބަޣާއީ ވިދާޅުވިއެވެ.
ބަޣާއީ މިހެން ވިދާޅުވީ އީރާނާއި ވޮޝިންޓަންއާ ދެމެދު މަޝްވަރާތައް ކުރިއަށްދާ ގޮތާ ބެހޭ ގޮތުން ވާހަކަ ދައްކަވަމުންނެވެ. އޭނާ ވިދާޅުވީ މި މަޝްވަރާތައް ވެސް ކުރިއަށްދާނީ އީރާނުގެ މަސްލަހަތު ފުރިހަމައަށް ކަށަވަރު ކޮށްދިނުމުން ކަމަށެވެ.
މަޝްވަރާތަކާ ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕާއި އެހެން އޮފިޝަލުން ދެއްކެވި ވާހަކަތަކާ ގުޅޭ ގޮތުން ސުވާލު ކުރުމުން ބަޣާއީ ވިދާޅުވީ އީރާނުން ހުށަހަޅާފައިވާ ކަންކަން އެގޮތުގައި އޮންނާނޭ ކަމަށެވެ. އެއްބަސްވުމަކަށް އައުމަށް ލިބިފައިވާ ކުރިއެރުން ބަލައިގަންނާނީ އީރާނުގެ ގައުމީ މަސްލަހަތުތަކާއި ހައްގުތަކާއި ރެޑް ލައިންތައް ހިމާޔަތް ކުރެވޭނޭކަން ޔާގީން ކުރެވުމުން ކަމަށް ވެސް އޭނާ ވިދާޅުވިއެވެ. އެ އެސެސްމަންޓް ހަދާނީ ކަމާ ބެހޭ އިދާރާތަކުން ކަމަށް ވެސް އޭނާ ވިދާޅުވިއެވެ.
ބަޣާއީ ވިދާޅުވީ މިހާރު ހިނގަމުންދާ ހަނގުރާމަ ހުއްޓާލުމުގެ އެއްބަސްވުމުގެ އޮނިގަނޑު ވަރަށް ސާފު ކަމަށާއި އެއީ ދެ ހަފްތާގެ މުއްދަތެއް ކަމަށެވެ. އޭނާ ވިދާޅުވި ގޮތުގައި ދާދި ފަހުން ކުރިއަށް ގެންދިޔަ މުއާމަލާތްތަކުގެ ބޭނުމަކީ ހަނގުރާމަ ނިމުމަކަށް ގެނައުމުގެ ފުރުސަތު ފަހިކޮށްދިނުން ކަމަށެވެ. ހަނގުރާމަ ހުއްޓާލުމުގެ މުއްދަތު އިތުރުކުރުމާ ބެހޭ ގޮތުން މިހާތަނަށް މަޝްވަރާ ކުރެވިފައިނުވާ ކަމަށް ވެސް އޭނާ ވިދާޅުވިއެވެ.
ޕާކިސްތާނުގެ އަސްކަރީ ވަފުދުން މި ހަފުތާގައި ތެހެރާންގައި ބޭއްވި ދެ ދުވަހުގެ މަޝްވަރާތަކުގެ ނަތީޖާއާ ބެހޭ ގޮތުން ވާހަކަ ދައްކަވަމުން ސްޕޯކްސްޕާސަން ވިދާޅުވީ، ދެ ފަރާތުން ވެސް ދެ ގައުމުގެ ދެމެދުގައި ހުރި ފަރަގުތައް ސާފުކޮށް، ދެ ގައުމުގެ ދެމެދުގައި އޮތް ދެ ގައުމުގެ ގުޅުން ހުރި ހައްލު ކުރެވިދާނެ ދާއިރާތައް ދެނެގަނެފައިވާ ކަމަށެވެ. އޭނާ ވިދާޅުވީ މި މަޝްވަރާތައް ކުރީ ނިއުކްލިއަރ މައްސަލަތަކާ ގުޅޭ ގޮތުން ކަމަށާއި ނަމަވެސް މިހާރު ކުރިއަށްދާ އެޖެންޑާގައި އޮތީ ހަނގުރާމަ ނިމުމަކަށް ގެނައުމުގެ އިތުރުން ހޮރްމޫޒް ކަނޑުއޮޅިއާ ބެހޭގޮތުން ފުޅާ ދާއިރާއެއްގައި މަޝްވަރާ ކުރުން ކަމަށް ވެސް އޭނާ ވިދާޅުވިއެވެ.
އޭނާ ވިދާޅުވީ އީރާނުން ނިންމުންތައް ނިންމާނީ ހަގީގަތްތަކުގެ މައްޗަށް ބިނާކޮށް ކަމަށެވެ. އެއާ ވިދިގެން އެމެރިކާގެ އޮފިޝަލުން ސޯޝަލް މީޑިއާގައި ފަތުރާ ވާހަކަތަކަށް ސަމާލުކަން ނުދިނުމަށް ވެސް އޭނާ ގޮވާލެއްވިއެވެ. އަދި ހޮރްމޫޒް ކަނޑުއޮޅި އަދިވެސް އޮތީ އީރާނުގެ ބެލުމުގެ ދަށުގައި ކަމަށާއި ކަނޑުއޮޅި ދަތުރުކުރުމުގެ ކަންކަން އީރާނުގެ ބެލުމުގެ ދަށުން ކުރިއަށް ގެންދާނަމަ އެކަމަށް އިޖާބަ ދޭނޭ ކަމަށް ވެސް ވިދާޅުވިއެވެ.
