ތައިވާނުގެ އިލެކްޓްރޯނިކްސް ކުންފުންޏެއް ކަމަށްވާ ހޮން ހައި ޕްރިސިޝަން އިންޑަސްޓްރީ ކޮމްޕެނީ (ފޮކްސްކޮން) އިން އިންޑިއާއާއި އެމެރިކާގައި 2.2 ބިލިއަން ޑޮލަރުގެ އިންވެސްޓްމަންޓް ހިންގުމަށް ހުއްދަ ދިނުމަށް ތައިވާނުގެ ސަރުކާރުން ނިންމައިފިއެވެ. މި އިންވެސްޓްމަންޓަކީ ދުނިޔޭގެ ބާޒާރުގައި ފޮކްސްކޮންގެ އުފެއްދުންތައް ތަފާތުކޮށް، ޚާއްސަކޮށް އެޕަލްގެ އައިފޯނު އުފެއްދުމުގެ މަރުކަޒެއްގެ ގޮތުގައި އިންޑިއާ އިތުރަށް ބާރުގަދަ ކުރުމަށް ކުރާ މަސައްކަތެކެވެ.
މި އިންވެސްޓްމަންޓުގެ ތެރެއިން 1.49 ބިލިއަން ޑޮލަރު ހޭދަކުރާނީ އިންޑިއާގައި އައިފޯނާއި އެހެނިހެން ކޮމްޕޯނެންޓްސް އުފެއްދުމަށް އާ ކާރުޚާނާއެއް ގާއިމުކުރުމަށެވެ. މި ފައިސާ ހަރަދުކުރެވޭނީ ފޮކްސްކޮންގެ ސިންގަޕޫރު ސަބްސިޑިއަރީއެއް ކަމަށްވާ ޔޫޒާން ޓެކްނޮލޮޖީ (އިންޑިއާ) ޕްރައިވެޓް ލިމިޓެޑް މެދުވެރިކޮށެވެ. މިއީ އެމެރިކާއާއި ޗައިނާއާ ދެމެދު އުފެދިފައިވާ ވިޔަފާރީގެ ދެބަސްވުމާ ގުޅިގެން ޗައިނާއިން ބޭރުން އުފެއްދުންތައް ބަދަލުކުރުމަށް އެޕަލްއިން ކުރަމުންދާ މަސައްކަތަށް އެއްބާރުލުން ދިނުމުގެ ގޮތުން ކުރެވޭ އިންވެސްޓްމަންޓެކެވެ.
މިފަދަ ބޮޑެތި އިންވެސްޓްމަންޓްތަކުގެ ސަބަބުން އިންޑިއާ ވަނީ އައިފޯނު އުފެއްދުމުގެ މުހިންމު މަރުކަޒަކަށް ބަދަލުވެފައެވެ. ނިމިދިޔަ 2025 މާޗު މަހުގެ ނިޔަލަށް އިންޑިއާގައި އައިފޯނު އެސެމްބްލް ކުރުމުގެ އާމަދަނީ 22 ބިލިއަން ޑޮލަރަށް އަރާފައިވާ ކަމަށް ރިޕޯޓުތައް ބުނެއެވެ. މިއީ ކުރީ އަހަރާ އަޅާ ބަލާއިރު 60 އިންސައްތަ އިތުރުވުމެކެވެ.
