އެމެރިކާގެ ބޮޑެތި ކުންފުނިތައް ބަނގުރޫޓުވާ މިންވަރު 2010 ވަނަ އަހަރަށްފަހު އެންމެ މަތީ މިންވަރަކަށް ހިނގައްޖެއެވެ. ތަފާސްހިސާބުތަކުން ދައްކާގޮތުގައި 2025 ވަނަ އަހަރުގެ ޖެނުއަރީ މަހުން ފެށިގެން ނޮވެމްބަރު މަހުގެ ނިޔަލަށް 717 ކުންފުންޏަކުން ވަނީ އިފްލާސް ކޮށްދިނުމަށް އެދި ކޯޓަށް ހުށަހަޅާފައެވެ. މިއީ އޭގެ ކުރީ އަހަރާ އަޅާބަލާއިރު 14 އިންސައްތައިގެ އިތުރުވުމެކެވެ.

އެމެރިކާ ކުންފުނިތައް ބަނގުރޫޓުވާން މެދުވެރިވި މައިގަނޑު ސަބަބެއްގެ ގޮތުގައި ފާހަގަކުރެވެނީ ޓްރަމްޕްގެ ސަރުކާރުން އެހެން ގައުމުތަކުން ގެންނަ މުދަލަށް ތައާރަފުކުރި ޓެރިފްތަކެވެ. މި ޓެރިފްތަކުގެ ސަބަބުން ވިޔަފާރިތަކުގެ ޚަރަދުތައް އިންތިހާއަށް ބޮޑުވެ، މުދާ ސަޕްލައިކުރުމުގެ ނިޒާމަށް ބުރޫ އަރާފައިވާކަމަށް އިގްތިސާދީ މާހިރުން ބުނެއެވެ.

ޓެރިފްތަކުގެ އިތުރުން، މުދަލުގެ އަގު އުފުލުމާއި، އިންޓްރެސްޓް ރޭޓް މަތިވުމަކީ ވެސް ކުންފުނިތަކަށް ދަރަނި އަދާކުރުމުގައި އަދި ހިންގުމުގެ ޚަރަދުތައް ބެލެހެއްޓުމުގައި ކުރިމަތިވި ބޮޑެތި ގޮންޖެހުންތަކެކެވެ. މީގެ ސަބަބުން ގިނަ ކުންފުނިތަކެއްގެ މާލީ ތަނަވަސްކަން ވަނީ ދަށްވެފައެވެ.

މިކަމުގެ ނޭދެވޭ އަސަރު އެންމެ ބޮޑަށް ކޮށްފައިވަނީ އިންޑަސްޓްރިއަލް ދާއިރާގެ ކުންފުނިތަކަށެވެ. މީގެ ތެރޭގައި އިމާރާތްކުރުމުގެ ދާއިރާ، އުފެއްދުންތެރިކަން، އަދި ދަތުރުފަތުރުގެ ދާއިރާ ހިމެނެއެވެ. މީގެ އިތުރުން އާންމު ކޮންސިއުމަރުންނަށް ބޭނުންވާ މުދަލާއި ޚިދުމަތް ފޯރުކޮށްދޭ ދާއިރާތަކަށް ވެސް ވަނީ ބޮޑެތި ގެއްލުންތަކެއް ލިބިފައެވެ.

އެމެރިކާގެ ޖީޑީޕީ 4.3 އިންސައްތައިގެ ކުރިއެރުމެއް ހޯދާފައިވީ ނަމަވެސް، އިގްތިސާދީ މާހިރުން ފާހަގަކުރާ ގޮތުގައި މި ކުރިއެރުމުގެ ފައިދާ ހުރިހާ ދާއިރާތަކަށް ހަމަހަމައަކަށް ނުލިބެއެވެ. ގިނަ ވިޔަފާރިތަކެއް އަދިވެސް ތިބީ ޓެރިފްތަކުގެ ބޮޑުކަމުންނާއި، ލޯނު ނެގުމުގެ ޚަރަދު ބޮޑުވުމާއި، ސަޕްލައި ޗެއިންގެ މައްސަލަތަކުގެ ސަބަބުން ވަރަށް ބޮޑު ނުތަނަވަސްކަމެއްގެ ތެރޭގައެވެ.