އަފްޣާނިސްތާނުގެ ވެރިރަށް ކާބުލްގެ ސަލާމަތީ ގޮތުން ވަރުގަދަ ސަރަހައްދެއްގައި ހުންނަ ޗައިނާ މީހުން ހިންގާ ރެސްޓޯރެންޓަކަށް ހޯމަ ދުވަހު ދިން ބޮމުގެ ހަމަލާއެއްގައި ޗައިނާގެ ރައްޔިތަކާއި އަފްޣާނިސްތާނުގެ ހަ މީހުން މަރުވެއްޖެއެވެ. މި ހަމަލާގެ ޒިންމާ އިސްލާމިކް ސްޓޭޓް (އައިސިސް) ގެ އަފްޣާން ގޮފިން މިހާރު ވަނީ އުފުލާފައެވެ.

ކާބުލްގެ ފުލުހުންގެ ތަރުޖަމާނު ޚާލިދު ޒަދްރާން ވިދާޅުވި ގޮތުގައި، މި ގޮވުން ގޮވާފައިވަނީ އޮފީސްތަކާއި ވިޔަފާރި މަރުކަޒުތަކާއި އެމްބަސީތައް ހުންނަ ޝަހްރޭ ނައު އަވަށުގައެވެ. މިއީ އެ ސިޓީގެ އެންމެ އަމާން އެއް ސަރަހައްދު ކަމަށް ބެލެވޭ ތަނެކެވެ. އައިސިސްއިން ނެރުނު ބަޔާނެއްގައި ބުނެފައިވަނީ މިއީ ޖާނުން ފިދާވެގެން ދިން ހަމަލާއެއް ކަމަށެވެ.

އައިސިސްއާ ގުޅުން އޮންނަ އަމާގް ނިއުސް އެޖެންސީން ރިޕޯޓްކޮށްފައިވާ ގޮތުގައި، ޗައިނާ ސަރުކާރުން އުއިގޫރު މުސްލިމުންނާ މެދު ހިންގަމުންދާ ލާއިންސާނީ އަމަލުތަކުގެ ސަބަބުން، ޗައިނާގެ ރައްޔިތުންނަކީ އެ ޖަމާއަތުގެ އަމާޒުފަތްގަނޑެއް ކަމަށް ވަނީ ކަނޑައަޅާފައެވެ. ޗައިނާގެ ޝިންޖިއާން ސަރަހައްދުގައި ދިރިއުޅޭ 10 މިލިއަނެއްހާ ވީގޫރު މުސްލިމުންނަށް ޗައިނާއިން އަނިޔާކުރާ ކަމަށް އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ތުހުމަތު ކުރި ނަމަވެސް، ޗައިނާއިން އެކަން ދޮގުކުރެއެވެ.

މި ހަމަލާގައި މަރުވި ޗައިނާ މީހާއަކީ އަޔޫބް ނަމަކަށް ކިޔާ މީހެކެވެ. މި ރެސްޓޯރެންޓަކީ ޗައިނާގެ މުސްލިމެއް ކަމަށްވާ އަބްދުލް މަޖީދާއި އޭނާގެ އަންހެނުންގެ އިތުރުން އަފްޣާން ބައިވެރިއެއް ކަމަށްވާ އަބްދުލް ޖައްބާރު މަހްމޫދު ގުޅިގެން ހިންގާ ތަނެކެވެ. މި ތަނުން މައިގަނޑު ގޮތެއްގައި ހިދުމަތް ދެނީ ކާބުލްގައި އުޅޭ ޗައިނާގެ މުސްލިމުންނަށެވެ.

އެމަޖެންސީ ނަމަކަށް ކިޔާ އިންސާނީ އެހީދޭ ޖަމާއަތުގެ ޑައިރެކްޓަރު ޑޭޖަން ޕެނިކް ވިދާޅުވި ގޮތުގައި، ހަމަލާގައި އަނިޔާވި 20 މީހަކު ހޮސްޕިޓަލަށް ގެންދެވުނެވެ. އޭގެ ތެރޭގައި ހަތަރު އަންހެނުންނާއި ކުޑަކުއްޖަކު ހިމެނެއެވެ. ސޯޝަލް މީޑިއާގައި ދައުރުވާ ވީޑިއޯތަކުން ފެންނަ ގޮތުގައި، ގޮވުމުގެ ސަބަބުން ރެސްޓޯރެންޓުގެ ކުރިމަތިން ބޮޑު ބައެއް ހަލާކުވެ، މަގުމައްޗަށް ކުނިތައް ބުރައިގެން ގޮސްފައިވެއެވެ.

2021 ވަނަ އަހަރު ތާލިބާނުން އަފްޣާނިސްތާނުގެ ވެރިކަމާ ހަވާލުވެ، ގައުމުގެ ސަލާމަތީ ކަންކަން ރަނގަޅު ކުރާނެ ކަމަށް ބުނި ނަމަވެސް، އައިސިސް އިން ދޭ މިފަދަ ނުރައްކާތެރި ބޮމުގެ ހަމަލާތައް އަދިވެސް ދަނީ ކުރިއަށް ކަމަށް މުހައްލިލުން ފާހަގަކުރެއެވެ.