ގިނަ ދުވަސްތަކަކަށްފަހު ބަންގްލަދޭޝްގައި ބާއްވާ އާންމު އިންތިޚާބާ ގާތްވަމުން އަންނައިރު، އިންތިޚާބަށްފަހު އުފެދޭނެ ސަރުކާރެއްގެ ބާވަތާ ބެހޭގޮތުން އާންމުންގެ މެދުގައި ބޮޑެތި ބަހުސްތަކެއް ވަނީ އުފެދިފައެވެ. މިގޮތުން އެންމެ ބޮޑަށް ދެކެވޭ އެއް ވާހަކައަކީ ހުރިހާ ސިޔާސީ ޕާޓީތަކެއް ބައިވެރިވާ ’ގައުމީ ސަރުކާރެއް‘ އުފެއްދުމުގެ ވާހަކައެވެ.
މި މައުޟޫއުގައި ޖަމާއަތޭ އިސްލާމީން ގައުމީ ސަރުކާރެއް އުފެއްދުމަށް ތާއީދުކުރަމުންދާއިރު، ބީއެންޕީން ވިސްނުން ގެންގުޅެނީ އެ ޕާޓީއާ ގުޅިފައިވާ އިއްތިހާދުތަކާއެކު ސަރުކާރެއް އެކުލަވާލުމަށެވެ. ނަމަވެސް، ބަންގްލަދޭޝްގެ މިހާރުގެ ސިޔާސީ މާހައުލުގައި ގައުމީ ސަރުކާރެއްގެ މަފްހޫމަކީ ޑިމޮކްރަސީގެ އުސޫލުތަކާ ފުށުއަރާ، ނުރައްކާތެރި ކަމެއްގެ ގޮތުގައި މުހައްލިލުން ދަނީ ސިފަކުރަމުންނެވެ.
ގައުމީ ސަރުކާރަކީ އިދިކޮޅު ޕާޓީތައް ވެސް ހިމެނޭހެން އެންމެން އެއްބަސްވާ އުސޫލަކުން ހިންގާ ސަރުކާރެކެވެ. މީގެ ސަބަބުން މަޖިލީހުގައި އިދިކޮޅު ފަރާތެއް ނޯންނާނެއެވެ. ސިޔާސީ އިލްމުވެރިޔާ ރޮބަޓް ޑާލް އޭނާގެ ފޮތުގައި ބަޔާންކުރައްވާ ގޮތުގައި، ފުރިހަމަ ޑިމޮކްރަސީއެއްގެ އަސާސަކީ ގިނަ ޕާޓީތަކެއްގެ ބައިވެރިވުމާއި މިނިވަން ސިޔާސީ ހަރަކާތްތަކެވެ. ހުރިހާ ޕާޓީތަކެއް އެއް ސަރުކާރަކަށް ވުމަކީ ޑިމޮކްރަސީގެ އަސްލު ގެއްލިގެންދާނެ ކަމެކެވެ.
ދުނިޔޭގެ ތާރީޚަށް ބަލާއިރު، ގައުމީ ސަރުކާރުތައް އާންމުކޮށް އުފައްދަނީ ދާޚިލީ ހަނގުރާމަތަކުގެ ވަގުތުގައާއި ގައުމުގެ އަސާސީ އޮނިގަނޑަށް ނުރައްކާވާ ފަދަ ކާރިސާގެ ވަގުތުތަކުގައެވެ. ނަމަވެސް، އާންމު ހާލަތެއްގައި މިފަދަ ސަރުކާރެއް އޮތުމަކީ ރައްޔިތުންގެ ހަގީގީ ޚިޔާލުތަކާއި އިދިކޮޅު ސިޔާސީ ހަރަކާތްތައް ފޮރުވި، ދީނީ އަދި އިޖުތިމާއީ ބައިބައިވުން އިތުރުވުމަށް މަގުފަހިވާ ކަމެކެވެ.
މީގެ އިތުރުން، ގައުމީ ސަރުކާރެއްގައި ހިމެނޭ އެކި ޕާޓީތަކުން އެ ބައެއްގެ އަމިއްލަ ސިޔާސީ މަގްސަދުތަކާއި މަންފާތައް އިސްކުރުމުގެ ސަބަބުން، ގައުމީ މަސްލަހަތު ހިމެނޭ މުހިންމު ކަންކަން ނިންމުމުގައި ލަސްތަކެއް ކުރިމަތިވެ، ސަރުކާރުގެ ހިންގުމަށް ބުރޫއެރުމުގެ ފުރުސަތު ބޮޑެވެ. އެހެންކަމުން، ބަންގްލަދޭޝްގެ ޑިމޮކްރަސީ ހަރުދަނާކުރުމަށްޓަކައި މިފަދަ ނިޒާމަކަށް ވިސްނުމަކީ ނުރައްކާތެރި ކަމެއްގެ ގޮތުގައި ބެލެވެއެވެ.
