ސައުދީ އަރަބިއްޔާގެ ވަޒީރުންގެ މަޖިލީހަށް ފުރަތަމަ ފަހަރަށް ޝީޢީ މަޛުހަބުގެ ބޭފުޅަކު އައްޔަންކުރައްވައިފި އެވެ. ސައޫދީ ކެބިނެޓަށް 5 ވަނަ މަޛުހަބު ކަމަށްވާ ޝީޢާ މަޛުހަބުގެ ފަހުދު ބިން އަބްދުލްޖަލީލް ބިން އަލީ އައްސައިފް އައްޔަންކުރައްވާފައިވަނީ އިންވެސްޓްމެންޓާ ބެހޭ މިނިސްޓަރ ގެ މަގާމަށެވެ.

ކުރިން އެ މަގާމުގައި ހުންނެވި ޚާލިދު އަލްފާލިޙް މިހާރު ވަނީ މިނިސްޓަރ އޮފް ސްޓޭޓްގެ މަގާމަށް ބަދަލުކުރައްވާފައެވެ. މި ބަދަލު ގެނެސްފައިވަނީ ސައުދީގެ ބިޔަ މަޝްރޫއެއް ކަމަށްވާ ’ދަ ލައިން‘ މަޝްރޫއާ ގުޅޭގޮތުން އަލްފާލިޙް ފާޑުވިދާޅުވެ ވާހަކަދެއްކެވި ކަން އެނގުމުންނެވެ.

1976 ވަނަ އަހަރު ސައުދީގެ އިރުމަތީ ޕްރޮވިންސް އަށް އުފަންވި އައްސައިފް އަކީ ކިންގް ފަހުދު ޔުނިވަރސިޓީ އޮފް ޕެޓްރޯލިއަމް އެންޑް މިނަރަލްސް އިން އިންފޮމޭޝަން މެނޭޖްމަންޓްގެ ދާއިރާއިން ދަސްވެނިވެވަޑައިގެންފައިވާ ބޭފުޅެކެވެ. އޭނާ އަކީ ދަރަނި މެނޭޖްކުރުމާއި، އިންވެސްޓްމަންޓް އަދި ބައިނަލްއަގުވާމީ ފައިނޭންސިންގ ދާއިރާގައި 20 އަހަރަށްވުރެ ގިނަ ދުވަހުގެ ތަޖުރިބާ ހުރި ބޭފުޅެކެވެ.

2021 ވަނަ އަހަރުން ފެށިގެން ސައުދީ ޕަބްލިކް އިންވެސްޓްމަންޓް ފަންޑުގެ ގްލޯބަލް ފައިނޭންސިންގ އަދި އިންވެސްޓްމަންޓް ސްޓްރެޓެޖީގެ މުހިންމު ދާއިރާތަކާ ހަވާލުވެވަޑައިގެން ހުންނެވި އައްސައިފް އަކީ، ސައުދީ ފިނޭންސް މިނިސްޓްރީގެ ޕަބްލިކް ޑެބްޓް މެނޭޖްމަންޓް އޮފީހުގެ ބާނީއެވެ. އަދި އޭނާ އަކީ ނޭޝަނަލް ޑެބްޓް މެނޭޖްމަންޓް ސެންޓަރުގެ ފުރަތަމަ ސީ.އީ.އޯ ވެސް މެއެވެ. މީގެ އިތުރުން ސާބް ބޭންކާއި އެޗް.އެސް.ބީ.ސީ ސައުދީ އަރަބިއްޔާގެ އިސް މަގާމުތައްވެސް އޭނާ ވަނީ ފުރުއްވާފައެވެ.

އައްސައިފް ވަނީ ނިއޯމް އަދި އެކުއާ ޕަވަރ އަދި ގަލްފް އިންޓަރނޭޝަނަލް ބޭންކް، ކިންގް އަބްދުالله އިކޮނޮމިކް ސިޓީ އަދި ކިންގް ސަލްމާން އެއާޕޯޓް ޑިވެލޮޕްމަންޓް ކޮމްޕެނީ ފަދަ ގިނަ މުއައްސަސާތަކެއްގެ ބޯޑު މެންބަރުކަމާއި ޗެއާމަންކަން ކުރައްވާފައެވެ.

އޭނާގެ ފާހަގަކޮށްލެވޭ ކާމިޔާބީތަކުގެ ތެރޭގައި ’ގްރީން ފައިނޭންސިންގ‘ އޮނިގަނޑެއް އެކުލަވާލުމާއި، ސައުދީގެ ސޮވެރިން ވެލްތު ފަންޑުން ފުރަތަމަ ފަހަރަށް 100 އަހަރުގެ ގްރީން ބޮންޑް ނެރުމާއި، ބޮޑެތި ބިޔަ މަޝްރޫއުތަކަށް ފައިސާ ހޯދާނެ މަގުތައް އިތުރުކުރުމުގެ ޕްރޮގްރާމްތައް ކުރިއަށް ގެންދިއުން ހިމެނެއެވެ.