މެދުއިރުމަތީގައި ހަމަނުޖެހުން ހިނގަމުންދާ މިވަގުތުގައި ދިވެހިރާއްޖެއިން މަސައްކަތްކުރާނީ ޢަރަބި އިސްލާމީ ޤައުމުތަކާއެކީ، އެކަތިގަނޑެއްގެ ގޮތުގައިކަމަށް
ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ނޫސްވެރިންނަށް މަޢުލޫމާތު ދެއްވުމަށް ރައީސް އޮފީހުގައި މިއަދު ބޭއްވި ބައްދަލުވުމުގައި ރައީސް ވިދާޅުވީ މެދުއިރުމަތީގައި މިހާރު ހިނގަމުންދާ މި ހަނގުރާމައަކީ އިސްލާމީ އުންމަތަށް ލިބިގެންދިޔަ ވަރަށްބޮޑު ހިތާމައެއް ކަމަށެވެ. އެމަނިކުފާނު ވިދާޅުވީ މެދުއިރުމަތީގައި މިހާރު ހިނގަމުންދާ ހަމަނުޖެހުމުގައި އެއްގައުމުން އަނެއް ގައުމަށް ހަމަލާދިނުން ކުށްވެރި ކުރައްވާ ކަމަށެވެ. މިކަމުގައި އީރާނާއި، އެމެރިކާއި، އިޒްރޭލު ވެސް ރަނގަޅު ނޫން ކަމަށް ރައީސް ވިދާޅުވިއެވެ. ހަނގުރާމައިގައި ގެއްލޭ ކޮންމެ މުސްލިމް ފުރާނައަކީ އިސްލާމީ އުންމަތަށް ލިބޭ ގެއްލުމެއް ކަމަށް ވެސް ރައީސް ވިދާޅުވިއެވެ.
ރައީސް ވިދާޅުވީ އިރާނުން ޢަރަބި މުސްލިމު ޤައުމުތަކަށް ދެމުންގެންދާ ޙަމަލާތަކާ ވިދިގެން އެޤައުމުތަކުގެ ވެރިންނަށް ފޯނުން ގުޅުވައިވާހަކަ ދައްކަވަމުން ގެންދަވާ ކަމަށެވެ. ރޭގެ ވަގުތެއްގައި ޔުނައިޓެޑް ޢަރަބް އެމިރޭޓްސްގެ ރައީސަށް ފޯނުން ގުޅުއްވައި، ދިވެހި ރައްޔިތުން އެބޭފުޅުންނާ އެކުގައި ތިބިކަން އަންގާފައިވާނޭ ކަމަށް ވެސް ރައީސް ވިދާޅުވިއެވެ. މިއަދު މެންދުރުފަހު އިތުރު ޤައުމުތަކުގެ އިސްވެރިންނަށް ގުޅުއްވައި، ދިވެހިރާއްޖޭގެ ތާއީދުފާޅުކުރައްވާނެކަން ރައީސް ވިދާޅުވިއެވެ. އެގޮތުން ސަޢޫދީ ޢަރަބިއްޔާ، ޤަތަރު، ބަހުރެއިން އަދި އޮމާންގެ އިސްވެރިންނަށް ގުޅުއްވައި ދިވެހި ރައްޔިތުން ތިބީ އެ ހުރިހާ ޤައުމުތަކެއްގެ ރައްޔިތުންނާ އެކުގައިކަން ހާމަކުރައްވާނެކަމުގައި ވެސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މި ހަނގުރާމައިގައި ރާއްޖެއަށް އޭގެ އަސަރު މި ކުރަނީ، ރާއްޖެއަކީ ފަތުރުވެރިކަމަށާއި އަދި ކާބޯތަކެއްޗާއި ތެލަށް، މެދުއިރުމައްޗަށް ވަރަށް ބޮޑަށް ބަރޯސާވެފައިވާތީ ކަމުގައި ވިދާޅުވިއެވެ. އެމަނިކުފާނުގެ ވާހަކަފުޅުގައި، ދިވެހިރާއްޖޭގެ މަސްލަޙަތު ހިމާޔަތްކުރުމުގެ ގޮތުންވެސް ވަރަށްގިނަ މަސައްކަތްތައް ކުރައްވަމުން ގެންދަވާކަން ހާމަކުރެއްވިއެވެ.
