ގދ. ފަރެސްމާތޮޑާ، ފަރެސް އަވަށް، ކޮރަލް، އަބްދުﷲ ހިލްމީއަކީ ދޭފަތް ހެދުމުގައި އަރާ ހުރި ފިރިހެނެކެވެ. ރޮށިފިހަން، ރިހަކައްކަން، ބަތްކައްކަން އެމީހަކު ބުނާ ބައްޓަމަކަށް ދޭފައި ހަދައިދިނުމުގެ ގާބިލްކަން އޭނާ ވަނީ ހޯދައިފައެވެ. ނިމިގެން މިދިޔަ ރޯދައަށް ލިބުނު އޯޑަރުތަކަށް އޭނާ ވަނީ އެތައް ދޭފަތެއް ހަދައިދީފައެވެ. އޭގެ ކުރިންނާއި އެފަހުން އޭނާ ހެދިހުރިހާ ދޭފަތެއް ވަނީ ވިކި ހުސްވެފައެވެ.

އާންމުކޮށް އޭނާ ދޭފަތް ހަދަނީ ހިރުނދު ލަކުޑިންނެވެ. މަދުންނަމަވެސް އެލުމިނިއަމުން ދޭފަތް ހަދައެވެ. ދެ ބާވަތުގެ ދޭފަތަށްވެސް އިންތިހާއަށް ޑިމާންޑު އޮވެއެވެ. އެހެންނަމަވެސް މި ދެބާވަތަކީވެސް ފަރެސްމާތޮޑާއިން ހޯދަން މިވަގުތު އެހާ ފަސޭހަ އެއްޗެއް ނޫނެވެ. ހިރުނދު ލަކުޑި އާންމުކޮށް އޭނާ ހޯދަނީ ގަނެގެންނެވެ. އެލުމިނިއަމް ދޭފަތް ހަދަނީ ބާވެފައި ހުންނަ ތަވާ ފަދަ އެއްޗެހި ބޭނުންކޮށްގެންނެވެ.

އެކި ސައިޒުގެ ދޭފަތް އޭނާ ހަދައެވެ. އާންމުކޮށް ތޭރަ އިންޗީގެ ދޭފަތެވެ. އެހެންނަމަވެސް އެ މީހަކު އެދޭ ކޮންމެ ސައިޒަކުން އޭނާ ދޭފަތް ހަދައިދެއެވެ. އޭނާގެ ދޭފަތުގެ މަގުބޫލުކަން އިތުރުވެފައިވަނީ ފަރެސްމާތޮޑާގައި އެކަންޏެއް ނޫނެވެ. ގދ. އާއި ގއ. އާއޮ، ފުވައްމުލަކާއި އައްޑޫސިޓީން ވެސް އޭނާއަށް އޮޑަރު ލިބެއެވެ. ލިބޭ އެއްވެސް އޯޑަރެއް އޭނާ ދުލެއް ނުކުރެއެވެ. ބުނާ ދުވަހަކަށް ނިންމައިދެއެވެ. މިއީ އޭނާއަށް އޮންނަ ބޮޑު އިތުބާރެކެވެ.

މިމަސައްކަތަކީ އާމްދަނީ ހޯދަން ފެށި މަސައްކަތެއް ނޫނެވެ. އެހެންނަމަވެސް އެއީ ހޮބީއަކަށް ފެށި ކަމެކެވެ. މިހާރު އެކަން ފުޅާވެ އޭނާ އެމަސައްކަތްކުރަނީ އާމްދަނީ ހޯދުމަށެވެ. ކުރިން މަސްވެރިކަމުގައި ހީވާގި ކަމާއެކު ހަރަކާތްތެރިވެފައި މިހާރު މަސްވެރިކަން ދޫކޮށްލުމަށްފަހު ދޭފަތް ހެދުންމުގެ އިތުރުން އެހެން މަސައްކަތްތައްވެސް ކުރެއެވެ.

ހިލްމީ ހަދާ ދޭފަތުގެ އަގު ކަނޑައަޅަނީ ސައިޒުންނެވެ. އެންމެ ކުޑަ ސައިޒު ކަމަށްވާ ދިހަ އިންޗި ދޭފަތެއް ވިއްކަނީ 45 ރުފިޔާއަށެވެ. ބާރައިން ވިއްކަނީ 50 ރުފިޔާއަށެވެ. ތޭރަ އިންޗީގެ ދޭފަތެއް ވިއްކަނީ 70 ރުފިޔާއަށެވެ. ދޮޅުފޫޓުގެ ދޭފަތެއް 130 ރުފިޔާއަށެވެ. ދެ ފޫޓުގެ ދޭފަތެއް 300 ރުފިޔާއަށެވެ. މިހުރިހާ ދޭފަތަކީ އެއް ޑިޒައިނަކަށް ހުންނަ ދޭފަތެވެ. ދަބު ފަދަ އެއްޗެހި ހައިދެނީ 350 ރުފިޔާއާއި 450 ރުފިޔާއާ ދެމެދުގެ އަގެއްގައެވެ. މިނޫނަސް ކަސްޓަމަރު ބޭނުންވާ ޑިޒައިން ދިނުމުން އެ ޑިޒައިނަކަށް ހިލްމީ ދޭފަތް ހަދައިދެއެވެ. ދޭފަތުގެ އިތުރުން ހުނިގޮނޑިއާއި ރޮށި ދަމާ ގޮނޑިވެސް އިލްމީ ހަދައިދެއެވެ.

”މި މަސައްކަތުން ރަނގަޅު އާމްދަނީއެއް ލިބޭ. އާމްދަނީއަށްވުރެ ބޮޑަށް ލިބޭ ހިތްހަމަޖެހުމަކީ މީހުންގެ ފަރާތުން ލިބޭ ހެޔޮ ބަސްތައް. ދޭފަތުގެ އެއްވެސް މައްސަލައެއް ނުވަތަ އުނދަގުލެއް ހުރެގެން އެއްވެސް މީހަކު ޝަކުވާ ކޮށްފައެއް ނޫވޭ. މުޅިންވެސް ލިބެނީ ތައުރީފުގެ ބަސްތައް. އެހެން އެވަނީ އަބަދުވެސް ބަލަން އެމީހަކު ބުނިގޮތަކަށް ދޭފަތެއް ވިޔަސް ރޮށިދަމާ ގޮނޑިއެއް ވިޔަސް ހުނިގޮނޑިއެއް ވިޔަސް އެބުނި ކިއްސަރުގައި އެބައްޓަމުގައި ހެދޭތޯ. އެންމެ އުފާވާ އަނެއްކަމަކީ ދޭފަތް ބޭނުންކުރާ މީހުން އެ ފަސޭހަ ވާހަކަ ބުނާތީ. އެއީ ވަރަށްބޮޑު އުފަލެއް. ދޭފަތް ބޭނުންކުރާ މީހުން ނުވަތަ ކަސްޓަމަރުންނަށް އެކަމުދަންޏާ އަހަރެން ހުންނާނީ ހިތްހަމަ ޖެހިގެން،“ ހިލްމީ ބުންޏެވެ.

ހިލްމީއަށް އިތުރު ހުނަރާއި ކުރިއެރުމަށް އެދެމެވެ.