ސަޢޫދީ ޢަރަބިއްޔާގެ ރިޔާޟްގައި ދުނިޔޭގެ އެންމެ އުސް އިމާރާތް އެޅުމަށް ނިންމައިފިއެވެ. މި އިމާރާތަކީ، 2 ކިލޯމީޓަރުގެ އުސް ހަރޮށިބިނާ އެކެވެ. މި ވަރުގެ އުސް އިމާރާތެއް އަދި ދުނިޔޭގައެއް ނެތެވެ.
މިވަރުގެ އުސް އިމާރާތެއް މާލޭގައި ބިނާކޮށްފިނަމަ، އެ އިމާރާތް މަތިން އުތުރުން ބ. އަތޮޅު އަދި ދެކުނުން ދ. އަތޮޅާ ހަމައަށް ފެންނާނެއެވެ.
މި މަޝްރޫޢު ކާމިޔާބު މަޝްރޫއަކަށް ވެއްޖެނަމަ، މިހާރު ދުނިޔޭގެ އެންމެ އުސް އިމާރާތް ކަމަށްވާ 828 މީޓަރުގެ ދުބާއީގެ ބުރުޖު ޚަލީފާ އަށްވުރެ ދެގުނަ އުސް އިމާރާތަކަށް ވާނެއެވެ. މިހާތަނަށް ސައޫދީގައި ބޮޑެތި މަޝްރޫއުތައް ބޮޑުކޮށް އިއުލާން ކުރުމަށްފަހު މަޑުމަޑުން އޭގެ ސައިޒު ކުޑަކޮށްފައި ވެއެވެ.
މި މަޝްރޫއު ވެސް ވެގެން ދާނީ ސަޢޫދީގެ ތަރައްޤީގެ ބިޔަ ޕްރޮޖެކްޓްތަކުގެ ތެރެއިން އެއް މަޝްރޫޢެވެ.
މި ބޮޑު މަޝްރޫޢުގެ ޑިޒައިން ވާދަވެރިކަމަށް ހުޅުވާލުމުން ކާމިޔާބުކޮށްފައިވަނީ ޔޫކޭގެ މަޝްހޫރު ފޯސްޓަރ + ޕާޓްނަރސް ކުންފުނިންނެވެ. މި އިމާރާތް ހުންނާނީ ރިޔާޟްގެ އުތުރުގައި، އަލަށް ހަދާ ކިންގް ސަލްމާން އިންޓަރނޭޝަނަލް އެއަރޕޯޓް ކައިރީގައެވެ. 2,000 މީޓަރު (6,562 ފޫޓު) އުސް މި އިމާރާތަކީ އޮފީސްތަކާއި، މީޙުން ދިރިއުޅޭ އެޕާޓްމަންތްތަކާއި، ހޮޓާ އަދި މުނިފޫހި ފިލިވުމުގެ ސަރަޙައްދުތައް ހިމެނޭ އޮލަނބަށް ބިނާކުރާ ސިޓީއެއްގެ ގޮތުގައި ތަޞައްވުރުކުރެވިފައިވާ ތަނެކެވެ.
މި ހަރޮށި ބިނާއަކީ ސަޢޫދީ ޢަރަބިއްޔާގެ ވިޝަން 2030 ގެ ދަށުން ހިންގާ ބޮޑެތި މަޝްރޫއުތަކުގެ ތެރެއިން އެއް މަޝްރޫޢެވެ. ނިއޯމް އަދި ދަ ލައިން ފަދަ މަޝްރޫޢުތަކާއެކު، މި ހަރޮށި ބިނާވެސް ސައުދީ އަރަބްގެ ތަރައްޤީގެ ރަމްޒެއްގެ ގޮތުގައި ބެލެވެއެވެ. މި އިމާރާތުގެ އުސްމިނުގެ ސަބަބުން، މިހާރު ސަޢޫދީގައި ހުރި އެންމެ އުސް އިމާރާތް ކަމަށްވާ މައްކާގެ އަބްރާޖުލް ބައިތު ކްލޮކް ޓަވަރު (600 މީޓަރު) ކުޑަ ވެގެންދާނެއެވެ.
މިއީ ދުނިޔޭގެ އެންމެ އުސް އިމާރާތް އެޅުމަށް ސަޢޫދީން ކުރާ ދެވަނަ މަސައްކަތެވެ. މީގެ ކުރިން ޖިއްދާގައި 1,000 މީޓަރުގެ ޖިއްދާ ޓަވަރު އެޅުމުގެ މަސައްކަތް އަހަރުތަކެއް ވަންދެން މަޑުޖެހިފައި އޮތުމަށްފަހު މިހާރު ވަނީ ފަށާފައެވެ.
