ބޭންކް އޮފް މޯލްޑިވްސް (ބީއެމްއެލް) އަށް ނުދައްކާ އޮތް 170 މިލިއަން ރުފިޔާގެ ލޯނާ ގުޅިގެން ރައްޔިތުންގެ މަޖިލީހުގެ ކުރީގެ ނާއިބު ރައީސް ރީކޯ މޫސާ މަނިކުގެ ހެވީލޯޑް މޯލްޑިވްސްގެ ތިންރަށް ވިއްކާލުން ހައިކޯޓުން ވަގުތީގޮތުން ހުއްޓުވައިފިއެވެ.
ހައިކޯޓުން މިއަދު ނެރުނު އަމުރުގައި ވިދާޅުވެފައިވަނީ، އެ މައްސަލައާ ގުޅިގެން އެ ކޯޓުން ގޮތެއް ނިންމަންދެން ސިވިލް ކޯޓުން ދީފައިވާ ހުއްދައަށް އަމަލުކުރުން ފަސްކުރަން އަންގަވާ ކަމަށެވެ.
މި އަމުރު ނެރުއްވީ ހެވީލޯޑުން އެ މައްސަލަ ހައިކޯޓުގައި އިސްތިއުނާފު ކުރުމާ ގުޅިގެންނެވެ.
ބީއެމްއެލްއިން ވިއްކާލަން އިއުލާން ކޮށްފައިވާ ރަށްތަކަކީ ލ. ފަރެސް އައިލެންޑާއި ކުޑަ ފަރެސް އައިލެންޑް އަދި ބޮޑުހުރާ އައިލެންޑެވެ. މީގެ ތެރެއިން ފަރެސް އާއި ކުޑަފަރެސްގައި މިހާރު ހިންގަމުން އަންނަނީ ރަހާ ރިސޯޓެވެ. އަދި ބޮޑުހުރާއަކީ ދަނޑުވެރިކަމަށް ދޫކޮށްފައިވާ ރަށެކެވެ.
ރަހާ ރިސޯޓުގައި 100 ކޮޓަރި އެބަހުއްޓެވެ. ހުރިހާ ކޮޓަރިއަކީ ވެސް ބީޗް ވިލާއެވެ. މި ރަށްތަކުގެ ހެޑް ލީޒް ހަމަވާނީ 2064 ވަނަ އަހަރު އެވެ.
