ފުލުހުންނަށް ލިބިފައިވާ ބާރު ބަދަލުހިފުމުގެ ވަސީލަތެއްގެ ގޮތުގައި ބޭނުން ނުކުރުމަށް ފުލުހުންނަށް ހަނދާން ކޮށްދެއްވާ ކަމަށް މާލޭ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
”މިއަދު ލިބިފައިވާ ބާރު ބަދަލު ހިފުމުގެ ވަސީލަތެއްގެ ގޮތުގައި ބޭނުންކުރެއްވުމުން، ދުރުހެލިވެތިބުމަށް، އަޅުގަނޑު ފުލުންހުންގެ މުއައްސާސާއަށް ހަނދާންކޮށްދެމެވެ. ރާއްޖޭގެ ވެރިކަން ކުރާ ރަށް ކަމުގައިވާ މާލޭގެ މޭޔަރުގަ ހައިސިއްޔަތުން، މިއަދު މާލޭގެ ރައްޔިތުނަށް އަމާންކަމާއި ރައްކާތެރިކަން ނެތްކަމުގެ އިހްސާސު އަޅުގަޑު އިންތިހާއަށް ކުރެވޭ ވާހަކަ ހިތާމައާއި އެކު ދަންނަވަމެވެ.“
އާދަމް އާޒިމް މިގޮތަށް ވިދާޅުވީ އާރުޑީސީގެ ކުރީގެ އެމްޑީ މޫސާއަލީމަނިކު ދިރިއުޅުއްވާ ގެއަށް ރޭ ދަންވަރު ފުލުހުން ވަދެ ރޭޑުކޮށްފައިވާތީ ކުރެއްވި ޕޯސްޓެއްގައެވެ. މޭޔަރު ވިދާޅިވެފައިވަނީ ދަންވަރުގެ ވަގުތަކީ މައިންނާއި ޅަދަރީން ރޭގަނޑު އަރާމުކުރާ ވަޤުތު ކަމަށެވެ. އެވަގުތު ގޭގެއަށް ވަދެ އާއިލާގެ ނިދި ގެއްލުވާލައި ފުލުހުން ރޭޑްތައް ހިންގުމުން، އާއިލާތައް މިވައްޓާލެވެނީ ވަރަށް ބޮޑު ބިރުވެރިކަމެއްގެ ތެރެއަށް ކަމަށް ވެސް މޭޔަރު ވަނީ ވިދާޅުވެފައެވެ.
”މިއަދު މިފަދަ ކަންކަން ހިނގާތަން، ފެނުމަކީ އަޅުގަނޑަށް ވަރަށް ބޮޑު މާޔޫސް ކަމެއް ލިބޭ ކަމެކެވެ. އަޅުގަނޑުމެންނަށް މީގެ ކުރިންވެސް މިފަދަ ހާދިސާތައް ވަނީ ތަޖުރިބާކުރެވިފައެވެ. އަމިއްލައަށް އުފަންކުރުވާ އިންޓެލިގެންސް ރިޕޯޓާއި އަދި ފްރޭމްކުރުމަށް ހެކި ބަހައްޓައިގެން ހިންގި ރޭޑުތަކުން އެތައް އާއިލާތަކަކަށް ވަނީ އަނިޔާއި ހިތާމަ ބޭއިންސާފުން ލިބިފައެވެ.“ މޭޔަރު ވިދާޅުވެފައިވެއެވެ.
އާޒިމް ވިދާޅުވެފައިވަނީ މިފަދަ ބޮޑެތި ޖަރީމާތައް ހިންގި ފަރާތްތައް މިއަދާ ހަމައަށް ވެސް އިންސާފު ކުރިމައްޗަށް ގެނެވިފައިނުވާ ކަމަށެވެ. މިފަދަ ހިތާމަވެރިކަންކަން، އަމިއްލައަށް ތަހައްމަލުކޮށްފައިވާ މީހެއްގެ ހައިސިއްޔަތުން އާޒިމް ވަނީ ޤާނޫނު ތަންފީޒު ކުރައްވާ ފަރާތްތަކުގެ އަމަލުތަކުގައި ޕްރޮފެޝަނަލިޒަމް ދަމަހައްޓަވައި ދެއްވުމަށް އެދި ވަޑައިގެންފައެވެ.
